ສຶກສາ-ກິລາ ນວ ​ສອບ​ເສັງ​ນັກຮຽນ​ເກັ່ງ ປ5, ມ4 ​ແລະ ມ7 ສົກ 2017-2018

ສຶກສາ

Written by Super User

ສຶກສາ-ກິລາ ນວ ສອບເສັງນັກຮຽນເກັ່ງ ປ5, 4 ​ແລະ ມ7 ສົກ 2017-2018

 28944585 1351311738304308 773237548 o   ພະແນກສຶກສາທິການ ແລະ ກິລາ ນະຄອນຫຼວງວຽງຈັນ (ນວ) ໄດ້ຈັດພິທີ​ເປີດ​ບັ້ນສອບ​ເສັງ​ນັກຮຽນ​ເກັ່ງ ​ປ5, ມ4 ​ແລະ ມ7 ທົ່ວ​ນະຄອນຫຼວງວຽງຈັນ ປະຈຳສົກ​ຮຽນ 2017-2018 ​ໃນວັນ​ທີ 14 ມີນາ ຜ່ານມາ ​ທີ່ສະໂມສອນໃນຮົ່ມ​ໂຮງຮຽນມັດທະຍົມ​ສົມບູນວຽງຈັນ, ​ໂດຍ​ພາຍ​ໃຕ້ການ​ເປັນ​ປະທານຂອງ​ທ່ານ ພູທອນ ແສງດາວົງ ຮອງຫົວໜ້າພະ​ແນ​ກສຶກສາ​ທິການ ​ແລະ ກິລາ ນະຄອນຫຼວງວຽງຈັນ, ມີຫົວໜ້າຫ້ອງການສຶກສາທິການ ແລະ ກິລາ 9 ເມືອງ, ​ຫົວໜ້າ-ຮອງ​ຫົວໜ້າຂະ​ແໜງ, ຄະນະ​ຮັບຜິດຊອບ​ການ​ສອບ​ເສັງ, ຄູ​ຍາມ​ຫ້ອງ​ສອບ​ເສັງ ຕະຫຼອດຮອດນ້ອງ​ນັກຮຽນ​ສອບ​ເສັງເຂົ້າຮ່ວມ​​.

  ​    ໃນ​ໂອກາດ​ນີ້, ທ່ານ ບຸນ​ທັນ ​ແສງ​ມະນີ ຫົວໜ້າຂະ​ແໜງມັດທະຍົມ ພະ​ແນ​ກສຶກສາ​ທິການ ​ແລະກິລາ ​ນະຄອນຫຼວງວຽງຈັນ ໄດ້​ກ່າວໃຫ້ຮູ້ກ່ຽວກັບຈຸດປະສົງຂອງການເປີດບັ້ນສອບ​ເສັງ​ນັກຮຽນ​ເກັ່ງ​ທົ່ວນະຄອນຫຼວງວຽງຈັນ ປະ​ຈຳສົກຮຽນນີ້, ແມ່ນ​ເພື່ອ​ກະຕຸກ​ຊຸ​ກຍູ້ຂະ​ບວນການ​ຮຽນ-ການ​ສອນຂອງ​ຄູ​-ອາຈານ ​ແລະ ນັກຮຽນ​ໃຫ້​ມີ​ຄວາມ​ຫ້າວຫັນ​ເບີກບານ​ມ່ວນ​ຊື່ນ ​ຕັ້ງໜ້າ​ເອົາ​ໃຈ​ໃສ່​ຕໍ່ການ​ສິດສອນ ​ແລະ ຮໍ່າຮຽນ, ມີການແຂ່ງຂັນຢ່າງຕັ້ງໜ້າໃນການສ້າງຜົນງານພັດທະນາການສຶກສາໃຫ້ມີຄຸນະພາບຍັບເຂົ້າຫາສາກົນເລື້ອຍໆ, ຮັບປະກັນ​​ໄດ້ໃນ​ການ​ປະຕິບັດ​ໂຄງການຫຼັກສູດ ທັງ​ເປັນ​ການຈັດຕັ້ງປະຕິບັດ 3 ຂໍ້​ແຂ່ງຂັນ​ທີ່​ກະຊວງ​ສຶກສາ​ທິການ ​ແລະ ກິລາ ວາງ​ອອກ​ໃຫ້​ປາກົດ​ຜົນ​ເປັນ​ຈິງ ​ແລະ ​ໄດ້​ຮັບ​ຜົນສຳ​ເລັດ​ຕາມ​ລະດັບ​ຄາດໝາຍ. ອີກ​ຢ່າງໜຶ່ງ ​ກໍ່​ເພື່ອ​ເປັນ​ການກວດກາ​ຕີ​ລາຄາຜົນ​ການຈັດຕັ້ງປະຕິບັດ​ໃນ​ການ​ພັດທະນາການ​ສຶກສາ​ຂອງ​ຜູ້ອຳນວຍການ ​ແລະ ຄູ-​ອາຈານ​ແຕ່ລະ​ໂຮງຮຽນ ພ້ອມ​ທັງ​ຄັດ​ເລືອກ​ເອົາ​ນັກຮຽນທີ່​ມີ​ພອນ​ສະຫວັນ​ດີເດັ່ນ, ມີ​ລະບຽບວິ​ໄນ ​ແລະ ຄຸນສົມບັດ​ດີ ​ເພື່ອ​ເປັນ​ຕົວ​ແທນ​ນັກຮຽນ​ເກັ່ງນະຄອນຫຼວງວຽງຈັນ ກຽມ​ເຂົ້າຮ່ວມ​ການ​ສອບ​ເສັງ​ນັກຮຽນ​ເກັ່ງ​ລະດັບ​ຊາດ.

      ການ​ສອບ​ເສັງ​ນັກຮຽນ​ເກັ່ງ​ຄັ້ງນີ້, ມີ​ນັກ​ສອບ​ເສັງ​ທັງໝົດ 461 ນ້ອງ, ຍິງ 312 ນ້ອງ, ຈັດ​ເປັນ 23 ຫ້ອງ​ສອບ​ເສັງ​, ຂັ້ນ ປ5 ມີ​ຈຳນວນ​ນັກຮຽນ​ 112 ນ້ອງ, ຍິງ 84 ນ້ອງ ຈັດ​ເປັນ 6 ຫ້ອງ​ສອບ​ເສັງປະກອບ​ດ້ວຍ 3 ວິຊາ ​ຄື: ຄະນິດ​ສາດມີ 38 ນ້ອງ, ຍິງ 21 ນ້ອງ, ພາສາ​ລາວມີ 36 ນ້ອງ, ຍິງ 21 ນ້ອງ ​ແລະ ​ໂລກ​ອ້ອມ​ຕົວມີ 40 ນ້ອງ, ຍິງ 32 ນ້ອງ; ຂັ້ນ ມ4 ມີ​ຈຳນວນນັກຮຽນ 205 ນ້ອງ, ຍິງ 143 ນ້ອງ, ຈັດ​ເປັນ 10 ຫ້ອງ​ສອບ​ເສັງ ປະກອບ​ດ້ວຍ 4 ວິຊາ​ ຄື: ຄະນິດສາດມີ 51 ນ້ອງ, ຍິງ 32 ນ້ອງ, ພາສາ​ລາວ-​ວັນນະຄະດີ ມີ 53 ນ້ອງ, ຍິງ 44 ນ້ອງ, ຟິຊິກ​ສາດ ມີ 50 ນ້ອງ, ຍິງ 32 ນ້ອງ ​ແລະ ​ເຄມີ​ສາດ ມີ 51 ນ້ອງ, ຍິງ 35 ນ້ອງ; ຂັ້ນ ມ7 ມີ​ຈຳນວນນັກຮຽນ 144 ນ້ອງ, ຍິງ 85 ນ້ອງຈັດ​ເປັນ 7 ຫ້ອງ​ສອບ​ເສັງ ປະກອບ​ດ້ວຍ 4 ວິຊາ ​ຄື: ຄະນິດສາດມີ 23 ນ້ອງ, ຍິງ 4 ນ້ອງ, ພາສາ​ລາວ-​ວັນນະຄະດີມີ 66 ນ້ອງ, ຍິງ 53 ນ້ອງ, ຟິຊິກ​ສາດ ​ມີ 31 ນ້ອງ, ຍິງ 19 ນ້ອງ ແລະ ​ເຄມີ​ສາດ​ມີ 24 ນ້ອງ, ຍິງ 9 ນ້ອງ.ສະເພາະຂັ້ນ ປ5 ແມ່ນບໍ່ໄດ້ເສັງລະດັບປະເທດ. ສ່ວນຂັ້ນ ມ4 ແລະ ມ7 ແມ່ນຈະໄດ້ເສັງລະດັບປະເທດ ​ແລະ​ ​ຈະ​ເລືອກ​ເອົາ​ນ້ອງ​ນັກຮຽນທີ່ມີຜົນການສອບເສັງດີເດັ່ນຂອງ​ແຕ່​ລະວິ​ຊາ​ ຄື:  ຂັ້ນ ມ4 ​ວິຊາ​ລະ 1 ຄົນ, ລວມ 4 ຄົນ ແລະ ຂັ້ນ ມ7 ວິຊາ​ລະ 1 ຄົນ, ລວມ 4 ຄົນ ເພື່ອ​​ເປັນ​ຕົວ​ແທນນັກ​ ​ນັກຮຽນ​ເກັ່ງ​ໃຫ້​ແກ່ນ​ະຄອນຫຼວງວຽງຈັນ​ ໄປ​ສອບ​ເສັງ​ລະດັບ​ທົ່ວ​ປະ​ເທດ​​ ທີ່ຈະ​ຈັດ​ຂຶ້ນໃນ​ທ້າຍເດືອນ​ເມສາ​ນີ້.

  ​    ໃນ​ໂອກາດ​ດັ່ງກ່າວ, ທ່ານ ພູທອນ ແສງດາວົງ ​ໄດ້​ກ່າວສະ​ແດງ​ຍ້ອງຍໍ​ຊົມ​ເຊີຍ​ຕໍ່ຄະນະ​ຮັບຜິດຊອບ​ການ​ສອບ​ເສັງ ຕັ້ງ​ແຕ່​ການເລີ່​ມຕົ້ນຄັດ​ເລືອກ​ຢູ່​ໃນ​ແຕ່ລະ​ໂຮງຮຽນ, ​ແຕ່ລະ​ເຂດເມືອງ​ຕ່າງໆ ທີ່​ໄດ້​ເອົາ​ໃຈ​ໃສ່ກະກຽມຄວາມ​ພ້ອມ​ຈົນ​ສາມາດ​ຄັດ​ເລືອກນັກຮຽນ​ເກັ່ງ ​ຂັ້ນ ປ5, ມ4 ​ແລະ ມ7 ຕາມ​ຄາດໝາຍ ​ແລະ ແນະນຳນ້ອງນັກຮຽນທຸກຄົນຕ້ອງໄດ້ເອົາໃຈໃສ່ຢ່າງຈິງຈັງແທ້ໆ, ຕ້ອງເກັ່ງຈຶ່ງສາມາດເປັນທີ 1 ຂອງນະຄອນຫຼວງໄດ້ ເພື່ອຕາງໜ້າໃຫ້ນ້ອງນັກຮຽນຜູ້ອື່ນໆເຂົ້າສອບເສັງລະດັບຊາດທີ່ຈະສອບເສັງໃນທ້າຍເດືອນເມສານີ້, ພ້ອມ​ດຽວກັນ​ກໍ່ຮຽກຮ້ອງ​ໃຫ້​ຄະນະ​ກຳມະການ​ກວດ​ບົດ ​ແລະ ຍາມ​ຫ້ອງ ​ຕ້ອງ​ພ້ອມ​ກັນ​ເອົາ​ໃຈ​ໃສ່ຊື່​ສັດ​ບໍລິສຸດ​ຍຸດຕິ​ທຳຕໍ່ໜ້າທີ່, ມີ​ຄວາມ​ໂປ່​ງ​ໃສ ​ແລະ ​ເປັນ​ທຳ, ພ້ອມ​ປະຕິບັດກົດ​ລະບຽບສອບ​ເສັງ​ຢ່າງ​ເຂັ້ມງວດ ​ແລະ ​​ໃຫ້ໄດ້​ຕາມ​ຈຸດປະສົງ​ເປົ້າໝາຍທີ່​ວາງ​ໄວ້.

                                                    ​ໂດຍ: ສີວອນ (ສຶກສາ-​ກິລາ ນວ)