ສກຂ ຫຼວງນ້ຳທາ ໄດ້ຮັບບ່ອນນັ່ງຊົມກິລາຫຼັງໃໝ່

ສຶກສາ

Written by Super User

ສກຂ ຫຼວງນ້ຳທາ ໄດ້ຮັບບ່ອນນັ່ງຊົມກິລາຫຼັງໃໝ່

29250922 1351312248304257 351158703 o   ພະແນກສຶກສາທິການ ແລະ ກິລາແຂວງຫຼວງນໍ້າທາ ໄດ້ຮັບບ່ອນນັ່ງຊົມກິລາຫຼັງໃໝ່ ໂດຍແມ່ນທຶນຂອງລັດຖະບານ ມູນຄ່າ 2,3 ຕື້ກວ່າກີບ, ເຊິ່ງພິທີມອບ-ຮັບໄດ້ຈັດຂຶ້ນໃນວັນທີ 13 ມີນາ ຜ່ານມາ ທີ່ສະໜາມກິລາແຂວງຫຼວງນ້ຳທາ ໂດຍໃຫ້ກຽດກ່າວມອບຂອງ ທ່ານ ຕຸ້ຍ ແສງອາລຸນ ຜູ້ອໍານວຍການ ບໍລິສັດ ແສງອາລຸນ ກໍ່ສ້າງ ແລະ ກ່າວຮັບແມ່ນ ທ່ານ ບຸນຈັນ ຫຼວງລືໄຊ ຫົວໜ້າພະແນກສຶກສາທິການ ແລະ ກິລາແຂວງຫຼວງນ້ຳທາ ພ້ອມດ້ວຍບັນດາຄະນະພະແນກ, ຫົວໜ້າ-ຮອງຫົວໜ້າຂະແໜງ ແລະ ພາກສ່ວນທີ່ກ່ຽວຂ້ອງທັງ 2 ຝ່າຍເຂົ້າຮ່ວມເປັນສັກຂີພິຍານ.

  

      ໃນພິທີ, ທ່ານ ຕຸ້ຍ ແສງອາລຸນ ຜູ້ອໍານວຍການ ບໍລິສັດ ແສງອາລຸນ ກໍ່ສ້າງ ໄດ້ຜ່ານບົດລາຍງານການກໍ່ສ້າງບ່ອນນັ່ງຊົມກິລາ ເຊິ່ງເລີ່ມລົງມືກໍ່ສ້າງມາແຕ່ວັນທີ 30 ພຶດສະພາ 2017 ຫາວັນທີ 13 ມີນາ 2018 ຈຶ່ງສໍາເລັດ (ກໍານົດ 12 ເດືອນ), ມີອາຄານ 2 ຊັ້ນ 1 ຫຼັງ, ຂະໜາດ 14x35 ແມັດ ປະກອບມີ ບ່ອນນັ່ງຊົມກິລາ, ມີ 4 ຫ້ອງເຮັດວຽກ, ໂຄງສ້າງເຮັດດ້ວຍເບຕົງເສີມເຫຼັກ, ຝາກໍ່ດິນຈີ່, ຫຼັງຄາມຸງດ້ວຍ ສັງກະສີ ພ້ອມດ້ວຍເຄື່ອງເຟີນີເຈີ, ໄຟຟ້າ, ນໍ້າປະປາ,  ຫ້ອງນໍ້າ 10 ຫ້ອງ ລວມມູນຄ່າໃນການກໍ່ສ້າງ 2,3 ຕື້ກວ່າກີບ. ໂອກາດດຽວກັນ, ທ່ານ ບຸນຈັນ ຫຼວງລືໄຊ ໄດ້ກ່າວຮັບເອົາໂຄງການດັ່ງກ່າວ ພ້ອມທັງສະແດງຄວາມຍ້ອງຍໍຊົມເຊີຍຕໍ່ບໍລິສັດຜູ້ຮັບເໝົາທີ່ໄດ້ທຸ້ມເທທັງເຫື່ອແຮງ ແລະ ສະຕິປັນຍາ ເຂົ້າໃນການກໍ່ສ້າງຈົນເຮັດໃຫ້ໂຄງການດັ່ງກ່າວສຳເລັດຕາມສັນຍາ. ຄຽງຄູ່ກັນນັ້ນ, ກໍ່ໄດ້ຮຽກຮ້ອງໃຫ້ທາງບໍລິສັດ ປັບປຸງຄືນ ສິ່ງທີ່ຍັງຄ້າງຄາ ແລະ ປົວແປງຕາມກໍານົດສັນຍາ 1 ປີ.

ຂ່າວໂດຍ: ສົມຕຸ້ຍ ຂ.ຫຼວງນ້ຳທາ