ມວຍ​ສາກົນ​​ຊຽງ​ຂວາງ ຕັ້ງ​ເປົ້າ​ 2 ຫຼຽນ​ຄຳງານ​ກິລາ​ແຫ່ງ​ຊາດ ຄັ້ງ​ທີ 11 ທ້າຍ​ປີ​ນີ້

ສຶກສາ

Written by Super User

ມວຍ​ສາກົນ​​ຊຽງ​ຂວາງ ຕັ້ງ​ເປົ້າ​ 2 ຫຼຽນ​ຄຳງານ​ກິລາ​ແຫ່ງ​ຊາດ ຄັ້ງ​ທີ 11 ທ້າຍ​ປີ​ນີ້

 28943628 1351311958304286 739633090 o   ສະຫະພັນ​ມວຍ​ສາກົນ​ແຂ​ວງຊຽງ​ຂວາງ ກຽມ​ຄວາມ​ພ້ອມ​​ທັບ​ນັກຊົກ​ທີ່​ມີສີມືດີ​ທີ່​ສຸດ​ທີ່​ເປັນ ລູກຫຼານຂອງ​ພໍ່​-​ແມ່​ປະຊາຊົນ​ເມືອງ​ວິລະ​ຊົນຊາວທົ່ງໄຫຫີນ ແຂວງຊຽງຂວາງ ຈຳນວນ 8 ຄົນ ກຽມ​ຂຶ້ນ​ເວທີ​ລ່າ​ 2 ຫຼຽນ​ຄຳ ເປົ້າ​ໝາຍ ​ໃນ​ງານ​ມະຫາ​ກຳ​ກິລາ​ແຫ່ງ​ຊາດ ຄັ້ງ​ທີ 11 ຫຼື ຊຽງ​ຂວາງ ​  ເກ​ມ ທີ່​ແຂວງ​ຊຽງ​ຂວາງ ຮັບ​ກຽດ​ເປັນ​ເຈົ້າພາບ ລະຫວ່າງ​ວັນ​ທີ 11-21 ພະຈິກ 2018 ນີ້.

   ຕາມ​ການ​ໃຫ້​ສຳພາດ​ຂອງທ່ານ ສີ​ໄວ ອຸດົມ​ສຸກ ຮອງ​ປະທານ​ສະຫະພັນ​ມວຍ​ສາກົນ​ແຂວງ​ຊຽງ​ຂວາງ ​ເນື່ອງ​ໃນ​ໂອກາດ​ນຳພາ​ທັບ​ນັກ​ກິລາ​ມວຍ​ສາກົນ​ແຂວງ​ຊຽງ​ຂວາງ ​ເຂົ້າ​ຮ່ວມ​ແຂ່ງຂັນ​ມວຍ​ສາກົນ ທົ່ວ​ປະ​ເທດ ຄັ້ງ​ທີ 12 ປະຈຳ​ປີ 2018 ​ໄດ້​ແຈ້ງ​ກ່ຽວ​ກັບ​ການ​ຫ້າງ​ຫາ​ກະກຽມ​ຄວາມ​ພ້ອມ​ຂອງ​ທັບ​ນັກກິລາມວຍ​ສາກົນ​ລູກ​ຫຼານ​ແຂວງ​ດັ່ງກ່າວໃຫ້​ຊາບ​ວ່າ: ພາຍຫຼັງ​ທີ່​ທາງ​ລັດຖະບານ ກໍ່​ຄື​ການ​ນຳ​ແຂວງ​ຊຽງ​ຂວາງ ​ໄດ້​ແຈ້ງ​ການ​ຢ່າງ​ກວ້າງຂວາງ​ໃຫ້​ພໍ່-​ແມ່​ປະຊາຊົນ​ຊາວ​ແຂວງຊຽງ​ຂວາງ​ຊາບ ກ່ຽວ​ກັບການ​ໄດ້​ຮັບ​ກຽດ​ເປັນ​ເຈົ້າພາບ ຈັດ​ງານ​ມະຫາ​ກຳກິລາ​ແຫ່ງ​ຊາດ ຄັ້ງ​ທີ 11 ຫຼື ຊຽງ​ຂວາງ ​ເກ​ມ ທີ່​ແຂວງ​ຊຽງ​ຂວາງ ຮັບ​ກຽດ​ເປັນ​ເຈົ້າພາບ ລະຫວ່າງ​ວັນ​ທີ 11-21 ພະຈິກ 2018 ອຳນາດ​ການ​ປົກຄອງ​ແຂວງ, ​ເມືອງ ​ແລະ ບ້ານ ​ຕະຫຼອດ​ຮອດ​ຄະນະຮັບຜິດຊອບອະນຸກຳມະການ​ທຸກ​ຝ່າຍໂດຍ​ສະ​ເພາະ​ແມ່ນ​ພໍ່-​ແມ່​ປະຊາຊົນ​ຊາວແຂວງ ກໍ່​ພ້ອມ​​ໃຈກັນ​ຫ້າວຫັນ​ອອກ​ແຮງ​​ແຂ່ງຂັນຈັດ​ຕັ້ງ​ປະຕິບັດໜ້າ​ທີ່​ວຽກ​ງານ​​ໃຜລາວ​ສ້າງສາ​ພັດທະນາ​ຢ່າງ​ມີ​ຂະ​ບວນການ​ຟົດ​ຟື້ນ ນັບ​ມາ​ຮອດ​ປັດຈຸບັນ ​ແຂວງ​​ໄດ້ມີ​ທ່າ​ແຮງໃນ​ການ​ພັດທະນາ​ຫຼາຍ​ດ້ານ.

​        ທ່ານ ສີ​ໄວ ອຸດົມ​ສຸກ ກ່າວ​ຕື່ມ​ອີກ​ວ່າ: ສ່ວນ​ວຽກ​ງານ​ກິລາ​ມວຍ​ສາກົນ​ແຂວງ ກໍ່​ໄດ້​ມີ​ການ​ຂຶ້ນ​​ແຜນຢ່າງຮອບດ້ານ ​ເພື່ອ​ສຸມ​ໃສ່​ສົງ​ເສີມພັດທະນາ​ນັກ​ກິລາ​ລູກ​ຫຼານ​ແຂວງ ​ໂດຍ​ສະ​ເພາະ​​ໃນ​ລະຫວ່າ​ງວັນທີ 8-10 ມີນາ ຜ່ານ​ມາ ​ໄດ້​ສົ່ງ​ນັກ​ກິລາ 5 ​ນັກຊົກ, ຍິງ 1 ຄົນ ​ເຂົ້າ​ຮ່ວມ​ແຂ່ງຂັນມວຍ​ສາກົນ ທົ່ວ​ປະ​ເທດ ຄັ້ງ​ທີ 12 ປະຈຳ​ປີ 2018 ທີ່​ນະຄອນຫຼວງ​ວຽງ​ຈັນ ມີນັກ​ກິລາ​​ຈາກ 6 ​ແຂວງ ຄື: ຊຽງ​ຂວາງ​, ຄຳ​ມ່​ວນ, ຈຳປາ​ສັກ, ສາລະ​ວັນ, ​ເຊ​ກອງ, ອັດ​ຕະປື ​ແລະ ບັນດາ​ຄ້າຍ​ມວຍ​ອ້ອມ​ຂ້າງນະຄອນຫຼວງ​ວຽງ​ຈັນ, ມະຫາວິທະຍາ​ໄລ​ແຫ່ງ​ຊາດ, ວິທະຍາ​ໄລ​ພະລະສຶກສາ, ​ໂຮງຮຽນ​ພອນ​ສະຫວັນ​ກິລາ-ກາ​ຍະ​ກຳ ​ແລະ ກະຊວງ​ປ້ອງ​ກັນ​ປະ​ເທດ (ກອງທັບ) ​ເຂົ້າ​ຮ່ວມ 70 ຄົນ, ​ໃນ​ນັ້ນ ນັກ​ກິລາ​ລູກ​ຫຼານ​ແຂວງ​ພວກ​ເຮົາ​ສາມາດ​ຍາດ​ໄດ້​ 1 ຫຼຽນ​ຄຳ, 2 ຫຼຽນ​ເງິນ ​ແລະ 1 ຫຼຽນ​ທອງ ຢູ່ອັນ​ດັບ​ທີ 4 ສ່ວນ​ເຈົ້າ​ຫຼຽນ​ຄຳ ຕົກ​ເປັນ​ຂອງ​ກະຊວງ​ປ້ອງ​ກັນ​ປະ​ເທດ ກອງທັບ ທີ່​ສາມາດ​ຍາດ​ໄດ້ 4 ຫຼຽນ​ຄຳ ​ແລະ 1 ຫຼຽນ​​ເງິນ ຕໍ່​ຜົນງານ​ດັ່ງກ່າວ ຖື​ວ່າ​ຍັງ​ບໍ່​ໄດ້​ຕາມ​ເປົ້າ​ໝາຍ​ທີ່​ຕັ້ງ​ໄວ້ 2 ຫຼຽນ​ຄຳ. ​ແຕ່​ເຖິງ​ຢ່າງ​ໃດ​ກໍ່​ດີ, ຜົນງານ​ຄັ້ງ​ນີ້​ເປັນ​ບົດຮຽນ​ອັນ​ລໍ້າຄ່າ​ທີ່​ຈະ​​ໄດ້​ນຳ​ໄປ​ປັບປຸງ​ແກ້​ໄຂ້ພັດທະນາ​ນັກ​ກິລາຕໍ່​ໄປ​ເພື່ອ​ໃຫ້​ມີ​ຄວາມ​ສາມາດ​ຂຶ້ນ​ຕື່ມ​ອີກ.ສ່ວນ​ການ​ກະກຽມ​ຄວາມ​ພ້ອມ​ເຂົ້າ​ຮ່ວມ ຊຽງ​ຂວາງ ​ເກ​ມ 2018 ມວຍ​ສາກົນ​ແຂວງ​ຊຽງ​ຂວາງ ​ໄດ້​ຂຶ້ນ​ແຜນ​ຈະ​ສົ່ງ​ນັກ​ກິລາ​ທັງໝົດ 8 ຄົນ ຈາກ 8 ຮຸ່ນ ​ແລະ ຈະ​ເຊີນ​ເອົາ​ຄູ​​ເຝິກ​ທີ່​ມີ​ຄວາມ​ສາມາດ​ສູງ ມາ​ຊ່ວຍ​ຖ່າຍ​ທອດ​ຄວາມ​ຮູ້​ຄວາມ​ສາມາດ​ໃຫ້​ນັກ​ກິລາມີ​ການ​ພັດທະນາດີ​ຂຶ້ນ​ກວ່າ​ເກົ່າ ທັງ​ນີ້, ກໍ່​ເພື່ອ​​ເປັນ​ການຮັບປະກັນ​ຕາມ​ຄວາມ​ຫວັງທີ່​ຕັ້ງ​ເປົ້າ​ໝາຍ​ໄວ້ 2 ຫຼຽນ​ຄຳ ​ໃນ​ຊຽງ​ຂວາງ ​ເກ​ມ.

​ໂດຍ ສົງການ