ຍີ່ປຸ່ນ ຊ່ວຍ​ເຫຼືອກໍ່ສ້າງ​ໂຮງຮຽນ​ໃຫ້ 7 ​ແຂວງ​​ໃນ ລາວ ມູນ​ຄ່າ 5,1 ຕື້​ກວ່າ​ກີບ

ສຶກສາ

Written by Super User

    ຍີ່ປຸ່ນ ຊ່ວຍເຫຼືອກໍ່ສ້າງໂຮງຮຽນໃຫ້ 7 ​ແຂວງ​​ໃນ ລາວ ມູນຄ່າ 5,1 ຕື້ກວ່າກີບ

28945039 1317494798386732 2142607827 o    ລັດຖະບານ ​ແລະ ປະຊາຊົນ​ຍີ່ປຸ່ນ ຊ່ວຍ​ເຫຼືອ​ກໍ່ສ້າງ​ໂຮງຮຽນ​ໃຫ້​ແກ່ 7 ​ແຂວງໃນ ສປປ ລາວ ​(ແຂວງ​ສະຫວັນ​ນະ​ເຂດ, ຄໍາ​ມ່ວນ, ວຽງ​ຈັນ, ​ໄຊ​ຍະ​ບູລີ, ສາລະ​ວັນ, ຈໍາປາ​ສັກ ​ແລະ ອຸດົມ​ໄຊ) ລວມມູນ​ຄ່າ 5,1 ຕື້​ກວ່າ​ກີບ (627.037 ​ໂດ​ລາ​ສະຫະລັດ​) ​ເພື່ອ​ປະກອບສ່ວນ​ເຂົ້າ​ໃນ​ວຽກ​ງານ​ພັດທະນາ​ຊັບພະຍາກອນ​ມະ​ນຸດ ​ໃນ ສປປ ລາວ.

    ໃນ​ວັນທີ 19 ມີນາ ຜ່ານ​ມາ ທີ່​ສໍານັກ​ງານ ​ກະຊວງ​ສຶກສາ​ທິການ ​ແລະ ກິລາ, ​ໄດ້​ມີ​ພິທີ​ເຊັນ​ສັນຍາ​ໂຄງການ​ເສີມ​ສ້າງ​ຄວາມ​ໝັ້ນຄົງ​ຂອງ​ມະນຸດ​ຂັ້ນ​ຮາກ​ຖານຂອງ​ລັດຖະບານ​ ​ແລະ ປະຊາຊົນ​ຍີ່ປຸ່ນ ​ໃນ​ໂຄງການ​ກໍ່ສ້າງ​ໂຮງຮຽນ​ອະນຸບານ, ປະຖົມ​ສົມ​ບູນ, ມັດທະຍົມຕອນ​ຕົ້ນ ​ແລະ ມັດທະຍົມ​ສົມບູນ ​ແຂວງ​ສະຫວັນ​ນະ​ເຂດ, ຄໍາ​ມ່ວນ, ວຽງ​ຈັນ, ​ໄຊ​ຍະ​ບູລີ, ສາລະ​ວັນ, ຈໍາປາ​ສັກ ​ແລະ ອຸດົມ​ໄຊ, ​ໂດຍ​ຕາງໜ້າໃນການ​ລົງ​ນາມ​ຂອງ​ທ່ານ ທາ​ເຄຊິ ຮິ​ຄິຮາຣະ ​ເອກ​ອັກຄະ​ຣາຊະ​ທູດ​ຜູ້​ມີ​ອໍານາດ​ເຕັມ​ແຫ່ງ​ປະ​ເທດ​ຍີ່ປຸ່ນ ປະ​ຈໍາ ສປປ ລາວ ​ແລະ ຕາງ​ໜ້າ​ຈາກ 7 ​ແຂວງທີ່ໄດ້ຮັບການຊ່ວຍເຫຼືອ (ພະແນກສຶກສາທິການ ແລະ ກິລາແຂວງ ແລະ ຫ້ອງການສຶກສາທິການ ແລະ ກິລາເມືອງ), ໃຫ້ກຽດເຂົ້າຮ່ວມ​ເປັນ​ສັກຂີ​ພິຍານຂອງ​ທ່ານ ນາງ ​ແສງ​ເດືອນ ຫຼ້າ​ຈັນທະ​ບູນ ລັດຖະມົນຕີ​ ກະຊວງ​ສຶກສາ​ທິການ ​ແລະ ກິ​ລາ, ພ້ອມດ້ວຍຫົວໜ້າ-ຮອງ​ຫົວໜ້າ​ຫ້ອງການ, ກົມ ​ແລະ ຜູ້​ຮັບຜິດຊອບ​ວຽກ​ງານ​ກ່ຽວຂ້ອງ​.

       ສໍາລັບໂຄງການ​ເສີມ​ສ້າງ​ຄວາມ​ໝັ້ນຄົງ​ຂອງ​ມະນຸດ​ຂັ້ນ​ຮາກ​ຖານ ​ໄດ້​​ແບ່ງ​ອອກ​ເປັນ 3 ​ໂຄງການຍ່ອຍ​ ຄື: ​ໂຄງການທໍາ​ອິດ ​ແມ່ນ​ການ​ກໍ່ສ້າງ​ຄືນ​ອາຄານ​ຮຽນ ຈໍານວນ 6 ​ໂຮງຮຽນ ທີ່ ​ໂຮງຮຽນ​ມັດທະຍົມ​ຕອນ​ຕົ້ນ ນາ​ແສ​ນຄໍາ ​ແລະ ປາງສາ ​ແຂວງ​ອຸດົມ​ໄຊ, ​ໂຮງຮຽນ​ປະຖົມ ​ໂພນ​ສະ​ຫວດ ​ແຂວງ​ວຽງ​ຈັນ, ​ໂຮງຮຽນ​ມັດທະຍົມ​ຕອນ​ຕົ້ນ​ກົກ​ແດງ ​ແຂວງ​ສະຫວັນ​ນະ​ເຂດ, ​ໂຮງຮຽນ​ມັດທະຍົມ​ສົມບູນ ດ່ານ​ໃຫຍ່ ​ແຂວງ​ສາລະ​ວັນ ​ແລະ ​ໂຮງຮຽນ​ມັດ​ທະ​ຍົມ​ຕອນ​ຕົ້ນ ນາ​ດີ ​ແຂວງ​ຈໍາປາ​ສັກ, ​ເຊິ່ງ​ໂຮງຮຽນ​ດັ່ງກ່າວ​ມີ​ສະພາບ​ບໍ່​ດີ ​ແລະ ຊຸດ​ໂຊມ ​ໂດຍ​ໂຄງການ​ນີ້ ມີ​ເປົ້າ​ໝາຍ​ທີ່​ຈະ​ຍົກ​ລະດັບ​ສະພາບ​ແວດ​ລ້​ອ​ມການ​ສຶກສາ ​ໂດຍ​ການກໍ່ສ້າ​ງອາຄານ​ທີີ່ມີຫ້ອງ​ຮຽນ​ລະຫວ່າງ 3-6 ຫ້ອງ ພ້ອມ​ດ້ວຍ​ຫ້ອງ​ນໍ້າ;

      ໂຄງການ​ທີ 2 ​ແມ່ນ ການ​ກໍ່ສ້າ​ງ​ໂຮງຮຽນ​ອະນຸບານ​ດອນ​ເງິນ ທີ່​ແຂວງ​ໄຊ​ຍະ​ບູລີ ທີ່​ໄດ້ຖືກສ້າງ​ຂຶ້ນ​ມາ​ຫຼາຍ​ກວ່າ 20 ປີ​ແລ້ວ ຍັງ​ມີ​ສະພາບ​ທີ່​ບໍ່​ສາມາ​ດ​ໃຊ້​ງານ​ໄດ້​ອີກ ​ແລະ ຈໍານວນ​ນັກຮຽນ​ຄາດ​ວ່າ​ຈະ​ເພີ່ມ​ຂຶ້ນ​ຢ່າງ​ຕໍ່​ເນື່ອງ ​ໃນ​ຂະນະ​ທີ່​ສະພາບ​ຫ້ອງຮຽນ​ໃນ​ປັດຈຸບັນ​ມີ​ຄວາມ​ແອ​ອັດ​ຫຼາຍ, ​ໂຄງການ​ນີ້, ມີ​ເປົ້າ​ໝາຍທີ່​ຈະ​ຍົກ​ລະດັບ​ສະພາບ​ແວດ​ລ້ອມ​ການ​ສຶກສາ ​ໂດຍ​ການ​ກໍ່ສ້າງ​ອາຄານ​ທີ່​ມີ​ຫ້ອງ​ຮຽນ 3 ຫ້ອງ ​ແລະ ​ໂຄງການ​ທີ 3 ​ແມ່ນການ​ກໍ່ສ້າງອ່າງ​ລ້ຽງ​ປາ ທີ່​ໂຮງ​ຮຽນ​ປະຖົມ​ໂພນ​ໄຂ ​ແຂວງ​ຄໍາ​ມ່ວນ, ​ເຊິ່ງນັກຮຽນ ​ແລະ ຄົນ​​ໃນ​ໝູ່​ບ້າ​ນພາກັນ​ລ້ຽງ​ປາ ​ແລະ ປູກ​ຜັກ​ກິນ​ເປັນ​ອາຫານ​ຕອນ​ສວຍ ​ແຕ່ສະພາບ​ອ່າງ​ລ້ຽງ​ປາ​ໃນ​ປັດຈຸບັນ​ມີ​ປະລິມານ​ການ​ຈຸ​ນໍ້າ​ທີ່​ບໍ່​ພຽງພໍ ​ໂດຍ​ສະ​ເພາະ​ໃນ​ລະດູ​ແລ້ງ ພາຍຫຼັງ​ການ​ຂະຫຍາຍ​ອ່າງ​ລ້ຽງ​ປາ​ພາຍ​ໃຕ້​ໂຄງການ​ນີ້ ຄາດ​ວ່າ​ພວກ​ເຂົາ​ຈະ​ສາມາດ​ສະໜອງ​ອາຫານ​ສວຍ​ພຽງພໍ​ຕໍ່​ຄວາມ​ຕ້ອງກາ​ນ​ໃນ​ໂຮງຮຽນ. ລວມມູນ​ຄ່າ​ມທັງ​ໝົດ 3 ​ໂຄງການ​ແມ່ນປະມານ 5,1 ຕື້​ກວ່າ​ກີບ.

      ​ໂອກາດ​ດັ່ງກ່າວ, ທ່ານ ນາງ ​ແສງ​ເດືອນ ຫຼ້າ​ຈັນທະ​ບູນ ​ໄດ້​ກ່າ​ວສະ​ແດງ​ຄວາມ​ຂອບ​ໃຈ​ຕໍ່​ກັບ​ລັດຖະບານ ​ແລະ ປະຊາຊົນ​ຍີ່ປຸ່ນ ​ໃນ​ການ​ຊ່ວຍ​ເຫຼືອ​ທຶນຮອນ​ເພື່ອ​ປະກອບສ່ວນ​ໃນ​ວຽກ​ງານ​ພັດ​ທະ​ນາ​ການ​ສຶກສາ ສປປ ລາວ ທັງ​ເປັນ​ບາດກ້າວ​ສໍາຄັນ​ຕໍ່​ວຽກງານ​ການ​ພັດທະນາ​ພື້ນຖານ​ໂຄງ​ລ່າງ, ​ເປັນ​ການ​ປັບປຸງ​ສະພາບ​ແວດ​ລ້ອມ​ການ​ຮຽນ-​ການ​ສອນ ​ແລະ ການ​ພັດທະນາ​ຊັບພະ​ຍາກ​ອນມະນຸດ​ຂອງ ສປປ ລາວ ​ໃຫ້​ດີ​ຂຶ້ນ ​ແລະ ​ເປັນ​ການ​​ເສີມ​ຂະຫຍາຍ​ສາຍ​ພົວພັນ​ອັນ​ເປັນ​ມູນ​ເຊື້ອ​ມິດຕະພາບ​ລະຫວ່າງ​ລາວ ​​ແລະ ຍີ່ປຸ່ນ​ໃຫ້​ແໜ້ນ​ແຟ້ນ ​ແລະ ໝັ້ນ​ຄົງ​​ຕະຫຼອດ​ໄປ.

(ບຸນທະວີ)