ວລ ເສດ​ຖາ ບໍລິຫານ​ທຸລະ​ກິດ ເລືອກ​​ໄດ້​ຄະນະ​ບໍລິຫານ​ງານຊາວ​ໜຸ່ມ​ຊຸດ​ໃໝ່

ສຶກສາ

Written by Super User

​     ວລ ເສດຖາ ບໍລິຫານທຸລະກິດ ເລືອກ​​ໄດ້ຄະນະບໍລິຫານງານຊາວໜຸ່ມຊຸດໃໝ່

29526860 181060952515633 1067834712 o​   ວິ​ທະຍາ​ໄລ (ວລ)​ ​ເສດ​ຖາ ບໍລິຫານ​ທຸລະ​ກິດ ​ໄດ້​ຈັດ​ກອງ​ປະຊຸມ​ຊາວ​ໜຸ່ມ ​ເພື່ອ​ຜ່ານ​ບົດ​ລາຍ​ງານ​ການ​ເມືອງ ​ແຕ່​ປີ 2015-2017, ຜ່ານ​ແຜນ​ທິດ​ທາງ ​ແຕ່​ປີ 2018-2022, ພ້ອມ​ທັງ​ເລືອກຕັ້ງ​​ຄະນະ​ບໍລິຫານ​ງານຊາວ​ໜຸ່ມ​ຊຸດ​ໃໝ່ ​​ແນໃສ່ສືບ​ຕໍ່​ປະຕິບັດ​ວຽກ​ງານ​ໃຫ້​​ໄດ້​ຮັບ​ຜົນ​ສໍາ​ເລັດ ​ແລະ ມີຄຸນະພາບ​ສູງ​ຂຶ້ນ.ກອງ​ປະຊຸມ​ດັ່ງກ່າວ, ​ໄດ້​ຈັດ​ຂຶ້ນເມື່ອ​ວັນ​ທີ 23 ມີນາ ຜ່ານ​ມາ ທີ່ຫ້ອງ​ປະຊຸມ​ວິ​ທະຍາ​ໄລ​ ​ເສດ​ຖາ ບໍລິຫານ​ທຸລະ​ກິດ, ​ໂດຍ​ເປັນ​ກຽດ​ເຂົ້າ​ຮ່ວມ​ຂອງສະຫາຍ ຄໍາ​ສອນ ສຸລິຍະ​ແສງ ຜູ້​ອໍານວຍ​ການ​ວິທະຍາ​ໄລ​ ​ເສດ​ຖາ​ ບໍລິຫານ​ທຸລະ​ກິດ, ມີ ສະຫາຍ ລາດ​ສະ​ວົງ ຫຼວງ​ໂຄດ ​ເລຂາຊາວ​ໜຸ່ມ ວິ​ທະຍາ​ໄລ ​ເສດ​ຖາ ບໍລິຫານ​ທຸລະ​ກິດ, ຕາງໜ້າ 2 ອົງການ​ຈັດ​ຕັ້ງມະຫາຊົນ (ກຳມະບານ ແລະ ແມ່ຍິງ), ສະມາ​ຊິກ​ຊາວ​ໜຸ່ມ, ນັກ​ສຶກສາ ​ແລະ ຄູ​-ອາຈານ ​ເຂົ້າຮ່ວມ​ຢ່າງພ້ອມພຽງ.

      ​ໂອກາດ​ດັ່ງ​ກ່າວ, ສະຫາຍ ນາງ ວຽງ​ສະຫວັນ ​ເຮືອງ​ທະ​ວົງ ຮອງ​ເລຂາ​ໜ່ວຍ​ຊາວ​ໜຸ່ມ​ ວິທະຍາ​​ໄລ ​ເສດ​ຖາ ບໍລິຫານ​ທຸລະ​ກິດ ​ໄດ້ຜ່ານ​ບົດ​ລາຍ​ງານ​ໃນ​ການ​ຈັດຕັ້ງປະຕິບັດ​ວຽກງານ ​ໃນ ​ສົກ​ສຶກສາ 2015-2017 ​ໂດຍ​ໄດ້​ສຶກສາ​ອົບຮົມ​ການ​ເມືອງ-​ແນວ​ຄິດ ​ເປັນ​ບັນ​ຫາທີ່​ສໍາຄັນ ​ແລະ ມີ​ຄວາມ​ຈໍາ​ເປັນສໍາລັບ​ສະມາຊິກ​ຊາວ​ໜຸ່ມ, ​ເຊິ່ງວິທະຍາ​ໄລ​ໄດ້​ເອົາ​ໃຈ​ໃສ່ ​ແລະ ຈັດ​ຕັ້ງ​ເຄື່ອນ​ໄຫວ​ດ້ວຍ​ຫຼາຍ​ຮູບ​ການ ​​ເປັນ​ຕົ້ນ​ແມ່ນ ​ເຂົ້າ​ຮ່ວມ​ຮັບ​ຟັງ ​ແລະ ຈັດ​ຕັ້ງ​ເຜີຍ​ແຜ່​ທຸກ​ມະຕິ​ຄໍາ​ສັ່ງ​ຂອງ​ພັກ ​ແລະ ລັ​ດ, ສ້າງ​ຂະ​ບວນການ​​ເຄື່ອນ​ໄຫວ ​ແລະ ຈັດ​ຕັ້ງປາຖະ​ກະ​ຖາ​ຂຶ້ນ ​ເພື່ອ​ສ້າງ​ຜົນງານ​ຄໍານັບ​ຮັບ​ຕ້ອນ​ວັນ​ສໍາຄັນ​ຕ່າງໆ​ຂອງ​ຊາດ ​ແລະ ສາກົນ​ອື່ນໆ, ​​ເຊິ່ງ​ໃນ​ໄລ​ຍຜ່ານ​ມາ​ກໍ່​ມີ​ຈຸດ​ດີ​ຫຼາຍ​ດ້ານ ​ເປັນ​ຕົ້ນ​ແມ່ນມີ​ຄວາມ​ສາມັກ​ຄີ ​ແລະ ​ໄດ້​ຮັບ​ການ​ຊີ້​ນໍາ​ຈາກ​ຮາກ​ຖານ​ຊາວ​ໜຸ່ມ ວິທະຍາ​​ໄລ​ພາກ​ເອກະ​ຊົນ, ມີ​ຄວາມ​ສະ​ດວກ​ໃນ​ການ​ປະຕິບັດວຽກ​ງານ​ ​ໂດຍ​ແມ່ນ​ຜູ້​ປະ​ກອບ​ການ​ເປັນ​ຜູ້​ສະ​ໜອງ​ວັດຖຸ​ອຸປະກອນ​ໃນ​ການ​ໃຊ້​ງານ, ​ເຮັດ​ວຽກ​ຕາມ​ແຜນການ ​ແລະ ​ໃຫ້​ສະມາ​ຊິກ​ຊ່າວ​ໜຸ່ມ​ມີ​ສ່ວນ​ຮ່ວມ ມີ​ການ​ປຶກສາ​ຫາລື​ກັນ​ໃນໝູ່​ຄະນະ. ສະມາ​ຊິກສ່ວນ​ໃຫຍ່​ໄດ້​ຕັ້ງໜ້າ​ເອົາ​ໃຈ​ໃສ່​ວຽກ​ງານ​ສຶກສາ​ອົບຮົມ​ວຽກ​ງານ​ແນວ​ຄິ​ດ, ຫຼີກເວັ້ນປາ​ກົດ​ການ​ຫຍໍ້​ທໍ້​ຕ່າງໆ​ທີ່ຈະ​ປາ​ກົດ​ຂຶ້ນ, ສະມາຊິກ​ຊາວ​ໜຸ່ມ​ໃນ​ຈໍາ​ນວນ​ຫຼວງ​ຫຼາຍ​ໄດ້ຕັ້ງໜ້າ​ເຝິກຝົນຫຼໍ່​ຫຼອມ​ຕົນ​ເອງ​ໃຫ້​ເປັນ​ຄົນ​ກ້າວໜ້າ​​ ເອົາ​ໃຈ​ໃສ່ການ​ມາ​ຮຽນ​ເປັນ​ປົກກະຕິ ​ແລະ ສະມາຊິກ​ທຸກ​ສະຫາຍ​ເອົາ​ໃຈ​ໃສ່​​ໃນ​ການ​ເສ​ຍ​ເງິນ​ສະຕິ​ທຸກ​ເດືອນ.

      ສໍາ​ລັບ​ທິດ​ທາງ​ແຜນການ​ດໍາ​ເນີນ​ງານ​ຂອງ​ຊາວ​ໜຸ່ມ ວິທະຍາ​​ໄລ​ ​ເສດ​ຖາ ບໍລິຫານ​ທຸລະ​ກິດ ​ໃນ 5 ປີ​ຕໍ່ໜ້າ ​(2018-2022) ​ແມ່ນ​ຈະ​ສ້າງ​ຄວາມ​ເຂັ້ມ​ແຂງ​ໃຫ້​ແກ່​ສະມາຊິກ​ຊາ​ວໜຸ່ມ​ກ້າວ​ຂຶ້ນຈາກ​ລະດັບ​ໜຶ່ງ​ໄປ​ສູ່​ອີກ​ລະດັບ​ໜຶ່ງ ​ແລະ ສູງ​ຂຶ້ນ​ເລື້ອ​ຍໆ, ສ້າງ​ແຜນ​ດໍາ​ເນີນ​ງານ​ໃຫ້​ຄະນະ ​ແລະ ສະມາຊິກ​ຊາວ​ໜຸ່ມ​ ປະ​ຈໍາ​ 5 ປີ, ປະ​ເມີນ​ການ​ດໍາ​ເນີນ​ງານ​ຂອງ​ສະມາຊິກ​ຊາວ​ໜຸ່ມ​ໃຫ້​ສໍາ​ເລັດ​ຜົນ​ຢ່າງ​ມີ​ປະສິດທິພາບ​, ສືບ​ຕໍ່​ຜັນ​ຂະຫຍາຍ​ມະຕິ​ຄໍາ​ສັ່ງ​ຕ່າງໆ​ຂອງ​ພັກ-​ລັດ​ວາງ​ອອກ​ ກໍ່​ຄື ກະຊວງ​ສຶກສາ​ທິການ ​ແລະ ກິລາ​ໃຫ້​ແກ່​ສະ​ມາ​ຊິກ​ຊາວ​ໜຸ່ມ ​ແລະ ມີ​ການ​ກວດກາ​ຕິດຕາມ ​ແລະ ສະຫຼຸບ​ລາຍ​ງານ​ໃຫ້​ຄະນະ​ຮາກ​ຖານ​ວິທະຍາ​ໄລ​ພາກ​ເອກະ​ຊົນ​ເປັນ​ປະ​ຈໍາ.ນ​ອກຈາກ​ນີ້, ​ໃນ​ກອງ​ປະຊຸມ​ຍັງ​ໄດ້​ເລືອກ​ຕັ້ງ​ເອົາ​ຄະນະ​ຊາວ​ໜຸ່ມ​ຊຸດ​ໃໝ່ ​ໂດ​ຍ​ເລືອກ​ໄດ້ ສະຫາຍ ນາງ ວຽງ​ສະຫວັນ ​ເຮືອງ​ທະ​ວົງ ​ເປັນ​ເລຂາ​ຊາວ​ໜຸ່ມ​ວິ​ທະຍາ​​ໄລ ​​ເສດ​ຖາ ບໍລິຫານ​ທຸລະ​ກິດ, ສະຫາຍ ຫຸມ​ປິງ ມະນີ​ວັນ ເປັນຮອງເລຂາ​ຊາວ​ໜຸ່ມ​ວິ​ທະຍາ​​ໄລ, ທ້າວ ມອດ ພົມມະ​ເສນ, ທ້າວ ບຸນ​ໂຮມ ​ເຮືອງ​ທະ​ວົງ ​ແລະ ທ້າວ ກຽງ​ໄກ ສຸກຄະ​ວົງ​ແສງ ​ເປັນ​ຄະນະ​ຊາວ​ໜຸ່ມ​ ວິທະຍາ​ໄລ ​ເສດ​ຖາ​ ບໍລິຫານ​ທຸລະ​ກິດ.

(ບຸນທະວີ)