ຣາຊ-ລາວ ແລະ ຊປປລ ຕິດຕາມ​ໂຄງການ ກ້າໄມ້ແຕກໃບ ສົດໃສ ຢືນຕົ້ນ ໃຫຍ່ງາມ ຢູ່ 3 ​ແຂວງ

ສຶກສາ

Written by Super User

ຣາຊ-ລາວ ແລະ ຊປປລ ຕິດຕາມໂຄງການ ກ້າໄມ້ແຕກໃບ ສົດໃສ ຢືນຕົ້ນ ໃຫຍ່ງາມ ຢູ່ 3 ​ແຂວງ

29634096 1322197301249815 1847222180 o    ບໍລິສັດ ຣາຊ-ລາວ ບໍລິການ ຈໍາກັດ ຮ່ວມກັບສູນກາງຊາວໜຸ່ມປະຊາຊົນ ປະຕິວັດລາວ (ຊປປລ) ລົງ​ຕິດຕາມ​ໂຄງການ “ກ້າໄມ້ແຕກໃບ ສົດໃສ ຢືນຕົ້ນ ໃຫຍ່ງາມ” ຢູ່ 3 ​ແຂວງ (ນະຄອນຫຼວງ​ວຽງ​ຈັນ, ​ແຂວງ​ວຽງ​ຈັນ ​ແລະ ​ແຂວງ​ໄຊ​ສົມບູນ). ທັງ​ນີ້, ກໍ່​ເພື່ອ​ເປັນ​ການ​ຕິດຕາມຊາວໜຸ່ມຜູ້​ທີ່ດ້ອຍໂອກາດບໍ່ມີວຽກເຮັດງານທໍາ ຜູ້​ທີ່​ໄດ້​ຮັບທຶນສະໜັບສະໜູນໝູນວຽນ ເພື່ອປະກອບອາຊີບ ທີ່ໝັ້ນຄົງ​, ເຄື່ອນໄຫວສໍາຫຼວດຄວາມຕ້ອງການທຶນຂອງຊາວໜຸ່ມ ແລະ ຕິດຕາມຜູ້ທີ່ກູຍືມທຶນໄປແລ້ວຢູ່ນະຄອນຫຼວງວຽງຈັນ ຈໍານວນ 2 ທຶນ,ແຂວງໄຊສົມບູນ 5 ທຶນ ແລະ ແຂວງວຽງຈັນ ຈໍານວນ 2 ທຶນ ປະກອບມີ ທຶນຕັດຫຍິບ, ສ້ອມແປງລົດ ແລະ ທຶນລ້ຽງສັດ.

       ການ​ລົງ​ຕິດຕາມ​​ໃນ​ຄັ້ງ​ນີ້, ​ໄດ້​ມີ​ຂຶ້ນ​ເມື່ອ​ບໍ່​ດົນ​ຜ່ານ​ມາ ທີ່ນະຄອນຫຼວງ​ວຽງ​ຈັນ, ​ແຂວງ​ວຽງ​ຈັນ ​ແລະ ​ແຂວງ​ໄຊ​ສົມບູນ, ​ໂດຍ​ໃຫ້​ກຽດ​ນຳພາ​ຂອງ​ທ່ານ ນະຣົງວິດ ຄອງສິນ ຜູ້ຈັດການອົງກອນປະຊາສໍາພັນ ບໍລິສັດ ຣາຊ-ລາວ ບໍລິການ ຈໍາກັດ ແລະ ທ່ານ ຄໍາປຸ່ນ ແກ້ວວິພາກອນ ຮອງຫົວໜ້າກົມພັດທະນາວິຊາຊີບສູນກາງ ຊປປລ ພ້ອມທີມງານ ​ແລະ ພາກສ່ວນ​ທີ່​ກ່ຽວຂ້ອງ​ເຂົ້າ​ຮ່ວມຕິດຕາມ.ບໍລິສັດ ຣາຊ-ລາວ ບໍລິການ ຈໍາກັດ ຮ່ວມມືກັບສູນກາງຊາວໜຸ່ມປະຊາຊົນ ປະຕິວັດລາວ (ຊປປລ) ໃນການຊ່ວຍເຫຼືອສັງຄົມລາວ ເວົ້າສະເພາະແມ່ນໄດ້ໃຫ້ການຊ່ວຍເຫຼືອ ກົມພັດທະນາວິຊາຊີບ ສູນກາງ ຊປປລ ພາຍໃຕ້ໂຄງການ “ກ້າໄມ້ແຕກໃບ ສົດໃສ ຢືນຕົ້ນ ໃຫຍ່ງາມ” ເຊິ່ງເລີ່ມຮ່ວມມືກັນມາແຕ່ວັນທີ 5 ເມສາ 2012 ໂດຍສະໜັບສະໜູນທຶນໝູນວຽນ ເພື່ອປະກອບອາຊີບໃຫ້ແກ່ຊາວໜຸ່ມທີ່ຮຽນຈົບຈາກສູນເຝິກອົບຮົມວິຊາຊີບຊາວໜຸ່ມ, ຊາວໜຸ່ມຜູ້ທີ່ດ້ອຍໂອກາດບໍ່ມີວຽກເຮັດງານທໍາໃຫ້ມີອາຊີບທີ່ໝັ້ນຄົງ. ໃນນັ້ນ, ກົມພັດທະນາວິຊາຊີບ ສູນກາງ ຊປປລ ນໍາເອົາທຶນໄປມອບຕໍ່ໃຫ້ແກ່ຊາວໜຸ່ມກູ້ຢືມພາຍ​ໃນ 3 ປີ ​ໃຫ້​ໃຊ້​ທຶນ​ຄືນໂດຍບໍ່ມີດອກເບ້ຍ ອັນໄດ້ເປັນສ່ວນໜຶ່ງທີ່ປະກອບສ່ວນເຂົ້າໃນການສ້າງສາພັດທະນາປະເທດຊາດໃນການແກ້ໄຂຄວາມທຸກຍາກຂອງປະຊາຊົນ, ເສີມສ້າງພັດທະນາວິຊາຊີບ, ພັດທະນາດ້ານສີມືແຮງງານລາວໃຫ້ມີຄຸນະພາບ ຫຼັງ​ຈາກຄົບ 3 ປີ​ແລ້ວ ທຶນ​ດັ່ງກ່າວແມ່ນຈະ​ນຳ​ໄປມອບໝູນວຽນຕໍ່ໃຫ້ແກ່ຊາວໜຸ່ມຜູ້ອື່ນໆທີ່ມີເງື່ອນໄຂກູ້ຍືມຕໍ່ໄປ.

        ສຳລັບໂຄງການຮ່ວມມືດັ່ງກ່າວ, ມາຮອດປັດຈຸບັນ​ແມ່ນຈັດຕັ້ງປະຕິບັດມາໄດ້ 2 ໄລຍະ ແລະ ສືບຕໍ່ໄລຍະທີ 3, ​ເຊິ່ງຜ່ານມາສາມາດມອບທຶນຊ່ວຍເຫຼືອຊາວໜຸ່ມກູ້ຍືມຈໍານວນ 14 ທຶນ ໃນຈໍານວນເງິນ 135.478.000 ກີບ ສົ່ງຕົ້ນທຶນຄືນແລ້ວ 78.750.000 ກີບ ເທົ່າກັບ 58,12 ​ເປີ​ເຊັນ ແລະ ນໍາໄປໝູນວຽນມອບຕໍ່ໃຫ້ແກ່ຊາວໜຸ່ມຜູ້ມີເງື່ອນໄຂກູ້ຍືມຈໍານວນ 9 ທຶນ ເປັນເງິນ 59 ລ້ານກີບ ຍັງຢູ່ໃນໄລຍະຕິດຕາມ ປັດຈຸບັນສາມາດມອບທຶນໄດ້ທັງໝົດ 25 ທຶນ ແລະ 2 ທຶນມອບພິເສດໃຫ້ສູນຕັດຫຍິບສູນກາງ ຊປປລ ຈໍານວນ 18.960.000 ກີບ. ສໍາລັບປີ 2018 ບໍລິສັດ ຣາຊ-ລາວ ບໍລິການ ຈໍາກັດ ໄດ້ໃຫ້ທຶນຊ່ວຍເຫຼືອຈໍານວນ 3 ແສນບາດ ເປັນເງິນກີບປະມານ 78​ ລ້ານກີບ, ເຊິ່ງຈະສືບຕໍ່ມອບໃຫ້ຊາວໜຸ່ມທີ່ມີເງື່ອນໄຂຢູ່ແຂວງຫຼວງນໍ້າທາ, ອຸດົມໄຊ, ສະຫວັນນະເຂດ, ຈໍາປາສັກ ແລະ ແຂວງເຊກອງ.

(ບົວລະພາ)