ອົງ​ການ​ອາ​ຫານ​ໂລກ ຊ່ວຍ​ເຫຼືອໂຮງ​ຮຽນ​ສຶກ​ສາ​ພິ​ເສດ ​ມູນ​ຄ່າ 86 ລ້ານກີບ

ສຶກສາ

Written by Super User

        ອົງການອາຫານໂລກ ຊ່ວຍເຫຼືອໂຮງຮຽນສຶກສາພິເສດ ມູນຄ່າ 86 ລ້ານກີບ

29527375 1876605869040585 173509238 o   ອົງ​ການ​ອາ​ຫານ​ໂລກ ປະ​ຈຳ ສ​ປ​ປ ລາວ (WFP) ໄດ້​ໃຫ້​ການ​ຊ່ວຍ​ເຫຼືອ​ລ້າ ທາງ​ດ້ານ​ອາ​ຫານ ແລະ ອຸ​ປະ​ກອນ​ສວນ​ຄົວ ແກ່ໂຮງ​ຮຽນ​ສຶກ​ສາ​ພິ​ເສດ ແຂວງຫຼວງ​ພະ​ບາງ ລວມ​ມູນ​ຄ່າ​ທັງ​ໝົດ 86 ລ້ານກີບ (10.444 ໂດລາສະຫະລັດ) ໃນ​ສົກ​ຮຽນ 2017-2018.ເມື່ອ​ວັນ​ທີ 23 ມີ​ນາ ຜ່ານ​ມາ​ ທີ່​ໂຮງ​ຮຽນ​ສຶກ​ສາ​ພິ​ເສດ ແຂວງຫຼວງ​ພະ​ບາງ ໄດ້​ມີ​ພິ​ທີ​ຖະ​ແຫຼ່ງ​ຂ່າວ​ການ​ຊ່ວຍ​ເຫຼືອ​ລ້າ ທາງດ້ານອາ​ຫານ ແລະ ອຸ​ປະ​ກອນ​ສວນ​ຄົວ​ຈາກ​ອົງ​ການ​ອາ​ຫານ​ໂລກ ປະ​ຈຳ ສ​ປ​ປ ລາວ ໃຫ້​ແກ່​ໂຮງ​ຮຽນ​ສຶກ​ສາ​ພິ​ເສດ ແຂວງຫຼວງ​ພະ​ບາງ, ໂດຍໃຫ້​ກຽດເຂົ້າຮ່ວມຂອງທ່ານ ສົມລິດ ຈັນທະມາລີ ຮອງຫົວໜ້າພະແນກສຶກສາທິການ ແລະ ກິລາ ແຂວງຫຼວງພະບາງ, ທ່ານ ນາງ ຊາຣາ ກອກດອນ-ກິນຊັນ ຜູ້​ອຳ​ນວຍ​ການ ແລະ ຜູ້​ຕາງ​ໜ້າ​ອົງ​ການ​ອາ​ຫານ​ໂລກ ປະ​ຈຳ ສ​ປ​ປ ລາວ ພ້ອມດ້ວຍຄະນະ, ຄະ​ນະ​ອຳ​ນວຍ​ການ​ໂຮງ​ຮຽນ, ຄູ-ອ​າ​ຈານ  ແລະ ນ້ອງໆ​ນັກ​ຮຽນ.

      ໂອ​ກາດ​ດັ່ງ​ກ່າວ, ທ່ານ ແສງເພັດ ພັດທະນາ ຜູ້​ອຳ​ນວຍ​ການ​ໂຮງ​ຮຽນ​ສຶກ​ສາ​ພິ​ເສດ ໄດ້​ກ່າວ​ສະ​ເໜີ​ຄວາມ​ເປັນ​ມາ ແລະ ສະ​ພາບ​ລວມ​ຂອງ​ໂຮງ​ຮຽນ​ສຶກ​ສາ​ພິ​ເສດ ແຂວງຫຼວ​ງ​ພະ​ບາງ, ພ້ອມກັບສະຫຼຸບການໄດ້ຮັບການສະໜັບສະໜູນຈາກອົງການອາຫານໂລກໃນສົກຮຽນ 2017-2018 ທີ່ປະກອບມີ ເຂົ້າສານ, ແກ່ນໝາກຖົ່ວແຫ້ງ, ນ້ຳມັນພືດ, ປ໋ອງປາ, ບົວຫົດຜັກ, ຈົກ,​ ຊວ້ານ, ແກ່ນຜັກ 6 ຊະນິດ, ໝໍ້, ຜ້າຖາມ, ມີດ ແລະ ອື່ນໆ ລວມມູນຄ່າທັງໝົດ ປະມານ 86 ລ້ານກີບ (10.444 ໂດລາສະຫະລັດ). ນອກຈາກນັ້ນ, ທ່ານຍັງໄດ້ກ່າວວ່າ: ການໄດ້ຮັບອາຫານຈາກອົງການອາຫານໂລກ ແມ່ນເຮັດໃຫ້ນັກຮຽນໄດ້ມີອາຫານບໍລິໂພກປະຈຳວັນ, ກິນອີ່ມ, ມີສຸຂະພາບແຂງແຮງ, ຫຼຸກຜ່ອນການເຈັບເປັນຂອງນັກຮຽນຫຼາຍຂຶ້ນ, ການຮຽນກໍ່ດີ, ບໍ່ຂາດຮຽນ, ຕັ້ງໃຈຮຽນ, ບໍ່ມີປັນຫາປາກົດການຫຍໍ້ທໍ້ເກີດຂຶ້ນ, ມີອຸປະກອບຕ່າງໆຮັບໃຊ້ເຮັດສວນຄົວປຸກພືດຜັກພຽງພໍ ສາມາດປຸກໄດ້ 385 ກິໂລກຣາມ, ໝາກຖົ່ວ 156 ກິໂລກຣາມ ແລະ ພໍ່-ແມ່ຜູ້ປົກຄອງນັກຮຽນໄດ້ມາຮູ້ມາເຫັນລູກຕົນເອງໄດ້ຮັບການເບິ່ງແຍງຊ່ວຍເຫຼືອທຸກດ້ານ ກໍ່ມີຄວາມດີໃຈ ແລະ ໄດ້ຝາກຄວາມຂອບໃຈມາຍັງ ພັກ-ລັດ ແລະ ອົງການຕ່າງໆ.

       ຂະ​ນະ​ທີ່, ທ່ານ ນາງ ຊາ​ຣາ ກອກດອກ-ກິບ​ຊັນ ​ໄດ້​ກ່າວເຖິງຈຸດ​ປະ​ສົງ​ຂອງ​ການ​ຊ່ວຍ​ເຫຼືອ​ໃນ​ຄັ້ງ​ນີ້, ແມ່ນ​ເພື່ອ​ເປັນ​ການ​ສົ່ງ​ເສີມ​ການ​ສຶກ​ສາ​ສຳ​ລັບ​ຄົນ​ພິ​ການ, ເປັນ​ການ​ລິ​ເລີ່ມ​ການ​ຊ່ວຍ​ເຫຼືອ​ຂອງ​ອົງ​ການ​ອາ​ຫານ​ໂລກຕໍ່​ວຽກ​ງານ​ສຶກ​ສາ​ພິ​ເສດ ຕາມ​ນະ​ໂຍ​ບາຍ ແລະ ພາ​ລະ​ບົດ​ບາດ ແລະ ໜ້າ​ທີ່​ຂອງ​ອົງ​ການ​ສະ​ຫະ​ປະ​ຊາ​ຊາດ ທີ່​ເປັນ​ຜູ້​ວາງ​ນະ​ໂຍ​ບາຍ​ສາ​ກົນ​ກ່ຽວ​ກັບ​ວຽກ​ງານ​ດັ່ງ​ກ່າວ. ສະນັ້ນ, ພວກເຮົາເຂົ້າໃຈດີວ່າ ເດັກພິການປະເຊີນກັບຫຼາກຫຼາຍສິ່ງທ້າທາຍ ຍ້ອນຄວາມເປັນພິການຂອງເຂົາເຈົ້າ. ເຖິງຢ່າງໃດກໍ່ຕາມ, ເດັກເຫຼົ່ານີ້ ບໍ່ຄວນຖືກມອງວ່າ ຕ້ອງການພຽງແຕ່ການເບິ່ງແຍງ ແລະ ການປົກປ້ອງເທົ່ານັ້ນ ແຕ່ຕ້ອງຍອມຮັບວ່າ ເຂົາເຈົ້າແມ່ນສ່ວນໜຶ່ງຂອງຄອບຄົວ, ຂອງຊຸມຊົນ ແລະ ຂອງສັງຄົມ. ການໃຫ້ການສຶກສາແກ່ເດັກພິການ ແມ່ນການລົງທຶນໃນການລົບລ້າງອຸປະສັກກີດຂວາງການບັນລຸສິດທິຂອງເດັກ ເຖິງວ່າຈະເປັນຍິງ ຫຼື ຊາຍ. ສະນັ້ນ, ໃນໂຮງຮຽນຫຼັງນີ້ ເດັກພິການທຸກຄົນ ແມ່ນສາມາດສະແດງຄວາມສາມາດຢ່າງເຕັມສ່ວນ ບໍ່ຕ່າງຫຍັງກັບເດັກບໍ່ພິການ ແລະ ສາມາດປະກອບສ່ວນໃນການພັດທະນາເສດຖະກິດ ແລະ ສັງຄົມຂອງ ສປປ ລາວ ອີກດ້ວຍ. ສຳລັບອົງການອາຫານໂລກ ຈະສືບຕໍ່ສະໜັບສະໜູນໂຮງຮຽນສຶກສາພິເສດ ແລະ ວຽກງານນີ້ ໄດ້ເຮັດໃຫ້ເດັກມີອາຫານກິນໃນແຕ່ລະວັນ ເພື່ອການສຶກສາ ແລະ ໂພຊະນາການທີ່ເຂົາຕ້ອງການ.ນອກຈາກນັ້ນ, ທ່ານ ນາງ ຊາ​ຣາ ກອກດອກ-ກິບ​ຊັນ ຍັງໄດ້ມີການມອບປື້ມການປຸງແຕ່ງອາຫານທ່ຽງສຳລັບໂຮງຮຽນປະຖົມສຶກສາ ແລະ ຄົວເຮືອນ ແລະ ປື້ມອ່ານ ທີ່ເປັນເລື່ອງເລົ່າກ່ຽວກັບ ຊຸມຊົນຂອງທ້າວ ວັນນາ ໃຫ້ແກ່ທາງໂຮງຮຽນສຶກສາພິເສດອີກຈຳນວນໜຶ່ງ, ເຊິ່ງກ່າວຮັບໂດຍ ທ່ານ ແສງເພັດ ພັດທະນາ ຜູ້ອຳນວຍການໂຮງຮຽນສຶກສາພິເສດ.

ອຳໄພວັນ