ສສກ ຈັດ​ກິດຈະ​ກໍາ​ກິລາ​ມວນ​ຊົນ ສະຫຼອງປີ​ທ່ອງ​ທ່ຽວ​ລາວ 2018 ຂອງຂະແໜງການສຶກສາ-ກິລາ

ສຶກສາ

Written by Super User

ສສກ ຈັດ​ກິດຈະ​ກໍາ​ກິລາ​ມວນ​ຊົນ ສະຫຼອງປີ​ທ່ອງ​ທ່ຽວ​ລາວ 2018 ຂອງຂະແໜງການສຶກສາ-ກິລາ

29633704 367700183711666 224401000 o 1   ກະຊວງ​ສຶກສາ​ທິການ ​ແລະ ກິລາ (ສສກ) ​ໄດ້ສ້າງ​ຂະ​ບວນການຈັດ​ກິດຈະ​ກໍາ​ກິລາ​ມວນ​ຊົນ ແລະ ສິລະ​ປະ​-ວັນນະ​ຄະດີ ​ເພື່ອ​ສະ​ເຫຼີ​ມສະຫຼອງປີ​ທ່ອງ​ທ່ຽວ​ລາວ 2018 ຂອງຂະແໜງການສຶກສາ ແລະ ກິລາ ​ໃນ​ວັນ​ທີ 23 ມີນາ ຜ່ານ​ມາ ທີ່​ສະໜາມກິລາ​ເຈົ້າ​ອານຸວົງ ນະຄອນຫຼວງວຽງຈັນ, ໂດຍມີ ​​ທ່ານ ບົວ​ລານ​ ສິລິ​ປັນຍາ ຮອງ​ລັດຖະມົນຕີ ກະຊວງ​ສຶກສາ​ທິການ ​ແລະ ກິລາ ແລະ ທ່ານ ຮສ.ປອ ຄຳຜາຍ ສີສະຫວັນ ຮອງລັດຖະມົນຕີ ກະຊວງສຶກສາທິການ ແລະ ກິລາ ພ້ອມ​ດ້ວຍ​ຜູ້​ຊ່ວຍ​ລັດຖະມົນຕີ, ບັນດາຫົວໜ້າ-ຮອງຫ້ອງການ, ກົມ, ສະ​ຖາ​ບັນ, ສູນ, ບໍລິສັດ​ລັດ​ວິ​ສະຫະ​ກິດ​ໂຮງງານ​ຜະລິດ​ອຸປະກອນ​ການ​ສຶກສາ ​ແລະ ​ໂຮງພິມ​ສຶກສາ, ມະ​ຫາ​ວິທະຍາ​ໄລ​ແຫ່ງ​ຊາດ, ວິທະຍາ​ໄລ​ອ້ອມ​ຂ້າງ ຕະຫຼອດ​ຮອດ​ພະນັກງານ-​ລັດຖະກອນ, ສະມາຊິກ 3 ອົງການ​ຈັດ​ຕັ້ງ​ມະຫາຊົນ ແລະ ນັກສຶກສາເຂົ້າຮ່ວມຢ່າງເປັນຂະບວນການຟົດຟື້ນ.

       ​ໂອກາດ​ນີ້, ທ່ານ ນາງ ຂັນທະລີ ສີຣິພົງພັນ ຫົວໜ້າຫ້ອງການ ກະຊວງ ສສກ ໄດ້ລາຍງານໃຫ້ຮູ້ວ່າ: ສຳລັບການຈັດກິດຈະກຳຄັ້ງນີ້ ແມ່ນຈັດຂຶ້ນພາຍໃນວັນດຽວສຳເລັດ ເພື່ອສ້າງຂະບວນການ ສະເຫຼີມສະຫຼອງວັນສຳຄັນຕ່າງໆຂອງພັກ, ຂອງຊາດ ຄື: ວັນສ້າງຕັ້ງສະຫະພັນກຳມະບານລາວ ຄົບຮອບ 62 ປີ, ວັນສ້າງຕັ້ງສະຫະພັນແມ່ຍິງສາກົນ ຄົບຮອບ 108 ປີ, ວັນສ້າງຕັ້ງພັກປະຊາຊົນປະຕິວັດລາວ ຄົບຮອບ 63 ປີ ແລະ ວັນສ້າງຕັ້ງຄະນະຊາວໜຸ່ມປະຊາຊົນປະຕິວັດລາວ ຄົບຮອບ 63 ປີ ໄປຄຽງຄູ່ກັບການສະເຫຼີມສະຫຼອງປີທ່ອງທ່ຽວລາວ 2018, ເຊິ່ງການຈັດກິດຈະກຳກິລາມວນຊົນຄັ້ງນີ້ ແມ່ນກຳນົດເອົາ 4 ປະເພດກິລາຄື: ດຶງເຊືອກທີມຍິງ-ຊາຍ, ແລ່ນ-ສົ່ງໄມ້ທີມຍິງ-ຊາຍ, ຈານບິນທີມຍິງ-ຊາຍ ແລະ ເຕັ້ນແອໂຣບິກ. ສ່ວນປະເພດສິລະປະ-ວັນນະຄະດີ ປະກອບມີ: ເຕັ້ນລີລາລີລາດ, ຟ້ອນລຳວົງມາດຕະຖານ, ເຕັ້ນບັດສະຫຼົບ, ສາວຊຽງຂວາງ ແລະ ຊົມການສະແດງອື່ນໆ ເຊິ່ງມີທັງໝົດ 10 ພາກສ່ວນເຂົ້າຮ່ວມແຂ່ງຂັນ.

      ຜ່ານການແຂ່ງຂັນຜົນປາກົດວ່າ: ກິລາ​ດຶງ​ເຊືອກທີ​ມຊາຍ ອັນ​ດັບ​ 1 ທີ​ມລວມຫ້ອງການ​ກະຊວງ​ ສສກ ແລະ ທີ​ມຍິງ ອັນ​ດັບ​ 1 ທີ​ມວິທະຍາ​ໄລ​ເຕັກນິກປາກ​ປ່າ​ສັກ, ວິທະຍາ​ໄລອົງ​ຕື້ ​ແລະ ​ໂຮງຮຽນ​ອະນຸບານ ສສກ; ກິລາຈານ​ບິນ ​ທີ​ມຊາຍ ອັນ​ດັບ​ 1 ທີ​ມກົມ​ກິດຈະການ​ນັກ​ສຶກສາ, ຫ້ອງການ​ສະພາ​ທີ່​ປຶກສາ​ການສຶກສາພາກ​ເອກະ​ຊົນ ​ແລະ ສະ​ຖາ​ບັນ​ບໍລິຫານ​ການ​ສຶກສາ ແລະທີ​ມຍິງ ອັນ​ດັບ​ 1 ທີ​ມລວມຫ້ອງການ ​ກະຊວງ​ ສສກ; ກິລາ​ແລ່ນ​ປ່ຽນ​ໄມ້ ທີມຊາຍ ອັນ​ກັບ​ 1 ທີ​ມມະຫາວິທະຍາ​ໄລ​ແຫ່ງ​ຊາດ ​ແລະ ທີ​ມຍິງ ອັນ​ດັບ​ 1 ທີ​ມ​ວິທະຍາ​ໄລສິລະປະ​ສຶກສາ ​ແລະ ວິທະຍາ​ໄລ​ພະລະສຶກສາ.

 ​      ໂອກາດດຽວກັນ, ທ່ານ ບົວ​ລານ​ ສິລິ​ປັນຍາ ກ່າວວ່າ: ຂະ​ບວນການສະ​ເຫຼີ​ມສະ​ເຫຼີ​ມປີ​ທ່ອງ​ທ່ຽວ​ລາວ 2018 ​ ​ແມ່ນ​ວຽກ​ງານ​ໜຶ່ງ​ທີ່​ສໍາຄັນ ທີ່​ໄດ້​ກໍານົດ​ຢູ່​ໃນ​ແຜນການ​ຂອງ​ລັດຖະບານ ​ເວົ້າ​ລວມ, ​ເວົ້າ​ສະ​ເພາະທຸກຂະ​ແໜງ​ກາ​ນນັບ​ແຕ່​ສູນ​ກາງ​ລົງ​ຮອດ​ທ້ອງ​ຖິ່ນ ​ໄດ້​ພ້ອມ​ກັນ​ເປັນ​ເຈົ້າ​ການ​ໃນ​ການ​ປະກອບສ່ວນ​ຢ່າງ​ຕັ້ງໜ້າ​ເຂົ້າ​​ໃນ​ຂະ​ບວນການສະ​ເຫຼີ​ມສະ​ຫຼອງ​ປີ​ທ່ອງທ່ຽວ​ລາວ ​ໃຫ້​ມີ​ບັນຍາກາ​ດຟົດ​ຟື້ນ, ກວ້າງຂວາງ, ຮັກສາ​ໄດ້​ທາງ​ດ້ານ​ວັດທະນະ​ທໍາ, ຮີດຄອງ​ປະ​ເພ​ນີອັນ​ດີງາມ​ຂອງ​ຊາດ ​ແລະ ຮັກສາ​ໄດ້​ຄວາມ​ສາມັກຄີ, ຄວາມ​ສະ​ຫງົບ​ປອດ​ໄພ​ຮອບດ້ານ. ສໍາລັບ​ກະຊວງ​ ສສກ ກໍ່​ໄດ້​ເປັນ​ເຈົ້າ​ການ​ປະກອບສ່ວນ​ຢ່າງ​ຕັ້ງໜ້າ​ເຂົ້າ​ໃນ​ຂະ​ບວນການ​ດັ່ງກ່າວ ​ໂດຍ​ໄດ້​ມີ​ການ​ແຕ່ງ​ຕັ້ງ​ຄະນະ​ຊີ້​ນໍາ, ກອງ​ເລຂາ ​ແລະ ມອບໝາຍ​ໃຫ້​ບັນດາ​ກົມ, ມະຫາວິທະຍາ​ໄລ, ສະຖາ​ບັນ, ສູນ, ວິທະຍາ​ໄລ​ອ້ອມ​ຂ້າງ ​ແລະ ບໍລິສັດ​ລັດ​ວິ​ສາ​ຫະກິດອ້ອມຂ້າງກະຊວງ​ສຶກສາ​ທິການ ​ແລະ ກິລາ ​ເປັນ​ເຈົ້າ​ການ​ຮ່ວມ​ກັນ ​ໃນ​ການ​ປະກອບສ່ວນ​ເຂົ້າ​ໃນ​ຂະ​ບວນການສະ​ເຫຼີ​ມສະຫຼອງ​ປີ​ທ່ອງ​ທ່ຽວ​ລາວ ​ໂດຍ​ຕິດ​ພັນ​ກັບ​ແຜນການ​ພັດທະນາ​ການ​ສຶກສາ ​ແລະ ກິລາ, ຕິດ​ພັນ​ກັບ​ບັນດາ​ກິດຈະ​ກໍາ​ປະ​ຈໍາປີ​ຂອງ​ແຕ່​ລະ​ພາກສ່ວນ ​ເພື່ອ​ເປັນ​ການ​ສ້າງ​ຂະ​ບວນການສະ​ເຫຼີ​ມສະຫຼອງ​ປີ​ທ່ອງ​ທ່ຽວ​ລາວ, ທັງ​ເປັນ​ການ​ສ້າງ​ຂະ​ບວນການສະ​ເຫຼີ​ມ ສະຫຼອງ​ວັນ​ສໍາຄັນ​ຕ່າງໆ​ຂອງ​ພັກ, ຂອງ​ຊາດ ​ໃຫ້​ມີ​ຄວາມ​ໝາຍ​ຄວາມໝາຍ​ເລິກ​ເຊິ່ງ ​ແລະ ​ເປັນ​ການ​ປຸກລະດົມ​ພະນັກງານ​-ລັດຖະກອນ ​​ໄດ້​ມີ​ການ​ອອກ​ກໍາລັງ​ກາຍ, ການ​ຫຼິ້ນ​ກິລາ​ເພື່ອ​ສົ່ງ​ເສີມ​ສຸຂະພາບ​ຮ່າງກາຍ ​ແລະ ຈິດ​ໃຈ ​ໃຫ້​ມີ​ຄວາມ​ເຂັ້ມ​ແຂງ​ສົມບູນ ​ແລະ ​ເປັນ​ການ​ຜ່ອນຄາຍ​ຄວາມ​ອິດ​ເມື່ອຍ, ຄວາມ​ເຄັງ​ຕຶງ​ຈາ​ກການ​ປະຕິບັດ​ໝ້າ​ທີ່​ວຽກ​ງານ.

​ໂດຍ: ນາງ ຕຸ່ນ​ຄໍາ