ອາຄານຮຽນ ປະຖົມບ້ານຫ້ວຍລືສີ ໄດ້ເປີດນຳໃຊ້ຢ່າງເປັນທາງການ

ສຶກສາ

Written by Super User

ອາຄານຮຽນ ປະຖົມບ້ານຫ້ວຍລືສີ ໄດ້ເປີດນຳໃຊ້ຢ່າງເປັນທາງການ

29942291 1367857169983098 597531666 o    ອາຄານຮຽນ ປະຖົມສົມບູນບ້ານຫ້ວຍລືສີ ເມືອງບາຈຽງຈະເລີນສຸກ ແຂວງຈຳປາສັກ ໄດ້ມີພິທີມອບ-ຮັບ ແລະ ເປີດນຳໃຊ້ຢ່າງເປັນທາງການແລ້ວ ໃນວັນທີ 27 ມີນາ ຜ່ານມາ ທີ່ບ້ານຫ້ວຍລືສີ, ໂດຍເປັນກຽດກ່າວມອບຂອງທ່ານ ຟູຈິຮາຣະ ກະຊູຮິໂຣ ຕາງໜ້າມູນນິທິຫວັງ ທັງເປັນຜູ້ໃຫ້ທຶນສ່ວນຕົວປະກອບສ່ວນສ້າງໂຮງຮຽນດັ່ງກ່າວ ແລະ ກ່າວຮັບຂອງທ່ານ ບຸນສີ ຈິດໂພໝັ້ນ ຫົວໜ້າຫ້ອງການສຶກສາທິການ ແລະ ກິລາ ເມືອງບາຈຽງຈະເລີນສຸກ, ມີທ່ານ ໄພວອນ ຜາບຸນມີ ຮອງຫົວໜ້າພະແນກສຶກສາທິການ ແລະ ກິລາ ແຂວງຈຳປາສັກ, ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.

   ອາຄານຮຽນດັ່ງກ່າວ, ໄດ້ລົງມືກໍ່ສ້າງໃນໄລຍະ 6 ເດືອນ ເລີ່ມແຕ່ວັນທີ 1 ກັນຍາ 2017 ແລະ ມາຮອດວັນທີ 21 ມີນາ 2018 ແມ່ນໄດ້ກໍ່ສ້າງສຳເລັດ 100 ເປີເຊັນ ໂດຍແມ່ນພໍ່-ແມ່ປະຊາຊົນພາຍໃນບ້ານເປັນຜູ້ປະກອບສ່ວນໃນການກໍ່ສ້າງ, ຫ້ອງ 1 ມີຂະໜາດ 7x8 ແມັດ, ມີຄວາມຍາວທັງໝົດ 28 ແມັດ, ໂຄງຫຼັງຄາເຮັດດ້ວຍໄມ້ເນື້ອແຂງ, ຝາກໍ່ດ້ວຍດິນຈີ່, ພື້ນເທເບຕົງເສີມເຫຼັກ, ປະກອບເຄື່ອງໄຟຟ້າ,ໂຕະ-ຕັ່ງ-ກະດານດຳ, ຫຼັງຄາມຸງດ້ວຍສັງກະສີອາລຸຊິງ, ຕົວອາຄານທາສີຂຽວ, ສ້າງໃຫ້ມີບ່ອນລ້າງມືຖູແຂ້ວ ເພື່ອທຳຄວາມສະອາດ, ແບ່ງເປັນ 4 ຫ້ອງ ແຕ່ລະຫ້ອງສາມາດຮອງຮັບນັກຮຽນໄດ້ 33 ຄົນ.ນອກຈາກນີ້, ຍັງໄດ້ສ້າງຫ້ອງນໍ້າ (ຍິງ-ຊາຍ) ຈຳນວນ 3 ຫ້ອງ, ຮົ້ວອ້ອມໂຮງຮຽນ 80 ແມັດ, ເຄື່ອງໂປມນໍ້າບາດານ ແລະ ອ່າງເກັບນໍ້າ. ການສ້າງອາຄານຮຽນຫຼັງໃໝ່ນີ້, ໄດ້ຮັບທຶນຈາກ 3 ພາກສາວນ ຄື: ມູນນິທິຫວັງ, ທ່ານ ຟູຈິຮາຣະ ກະຊູຮິໂຣ ແລະ ທຶນສະມາຄົມພັດທະນາຊຸມຊົນບ້ານເຮົາ ລວມມູນຄ່າທັງໝົດ 368.000.000 ກີບ. ໃນນີ້, ສະມາຄົມພັດທະນາຊຸມຊົນບ້ານເຮົາປະກອບສ່ວນເປັນມູນຄ່າ 35.286.000ກີບ. ພ້ອມນັ້ນ, ໂຮງຮຽນຍັງໄດ້ຮັບອຸປະກອນກິລາ ແລະ ການສຶກສາ ເປັນປື້ມຂຽນ, ບິກ, ສໍ, ໄມບັນທັດ ແລະອື່ນໆ.

 

ໂດຍ: ຂາວພອນ ມ້າວຄຳຜິວ