ມສ ລາວ-​ຫວຽດນາມ ຈັດ​ງານວັນ​ວິທະຍາສາດ ຄັ້ງ​ທີ 5 ສົ່ງ​ເສີມ​ຜົນງານ​ດ້ານຫົວຄິດ​ປະດິດສ້າງ

ສຶກສາ

Written by Super User

     ມສ ລາວ-​ຫວຽດນາມ ຈັດງານວັນວິທະຍາສາດ ຄັ້ງທີ 5 ສົ່ງເສີມຜົນງານດ້ານຫົວຄິດປະດິດສ້າງ

 ​29994272 1368753303226818 32229992 o   ໂຮງຮຽນ​ ມສ ມິດຕະພາບ ລາວ-​ຫວຽດນາມ ​ໄດ້​ຈັດ​ງານວັນ​ວິທະຍາສາດ ຄັ້ງ​ທີ 5 ສົກຮຽນ 2017-2018 ​ເພື່ອ​ສົ່ງ​ເສີມ​ຜົນງານ, ຄວາມ​ຮູ້​ຄວາມ​ສາມາດ, ຫົວຄິດ​ປະດິດ​ສ້າງ ທາງ​ດ້ານ​ການ​ຮຽນ-​ການ​ສອນ.ກິດ​ຈະ​ກໍາ​ດັ່ງກ່າວ, ​ໄດ້​ຈັດ​ຂຶ້ນໃນ​ວັນ​ທີ 30 ມີນາ ຜ່ານ​ມາ ທີ່​​ໂຮງຮຽນ​ ມສ ມິດຕະພາບ ລາວ-​ຫວຽດນາມ, ​ໂດຍ​ເປັນ​ກຽດ​ເຂົ້າ​ຮ່ວມ​ຂອງ​ທ່ານ ມະ​ໂນ​ສິມ ມາສະ​ວົງ​ດີ ຮອງ​ຫົວໜ້າກົມ​ສາມັນ​ສຶກສາ ກະຊວງ​ສຶກສາ​ທິການ ​ແລະ ກິລາ ​ແລະ ທ່ານ ດອນ ​ແກ້ວ​ມີ​ໄຊ ຜູ້​ອໍານວຍ​ການ​ໂຮງຮຽນ ມສ ມິດຕະພາບ ລາວ-​ຫວຽດນາມ, ພ້ອມດ້ວຍ​ສະມາຄົມ​ພໍ່-​ແມ່​ນັກຮຽນ, ຄະນະ​ອໍາ​ນວຍ​ການ, ພະນັກງານ, ຄູ-​ອາຈານ ​ແລະ ນ້ອງ​ນັກຮຽນ​ຢ່າງ​ພ້ອມພຽງ.

    

        ​ໂອກາດ​ດັ່ງກ່າວ, ທ່ານ ດອນ ​ແກ້ວມີ​ໄຊ ​ໄດ້​ກ່າວ​ໃຫ້​ຮູ້​ກ່ຽວກັບຈຸດປະສົງຂອງການຈັດ​ຕັ້ງ​ວັນ​ວິ​ທະ​ຍາ​ສາດ ​ຄັ້ງ​ທີ 5 ຂອງ​​ໂຮງຮຽນ ​ແມ່ນ​ເພື່ອ​ສົ່ງ​ເສີ​ມຜົນງານ, ຄວາມ​ຮູ້ ຄວາມ​ສາມາດ, ຫົວຄິດ​ປະດິດ​ສ້າງ​ທາງ​ດ້ານ​ການ​ຮຽນ-ການ​ສອນ​ຂອງ​ຄູ ​ແລະ ນັກຮຽນ ຈາກ​ທິດ​ສະ​ດີສູ່​ພຶ​ດຕິ​ກໍາ​ອັນ​ອຸດົມ​ຮັ່ງມີ​ ເຮັດ​ໃຫ້​ຄວາມ​ຮູ້​ໜັກ​ແໜ້ນຂຶ້ນ ​ແນ​ໃສ່​ຈັດ​ຕັ້ງປະຕິບັດ 3 ຂໍ້​ແຂ່ງຂັນ, 5 ຫຼັກ​ມູນການ​ສຶກສາ​ທີ່​ກະຊວງ​ສຶກສາທິການ ​ແລະ ກິລາ​ວາງ​ອອກ ​ແລະ ​ແຜນ​ກິດຈະ​ກໍາ​ດ້ານ​ວິຊາ​ການ ທີ່​ໂຮງຮຽນ​ວາງອອກ​​ໃຫ້ປາກົດ​ຜົນ​ເປັນ​ຈິງ. ພ້ອມ​ກັນ​ນັ້ນ, ກໍ່​ເພື່ອ​​ເປັນ​ການ​ສ້າງ​ຂະ​ບວນການຟົດ​ຟື້ນ ຄໍານັບ​ຊົ​ມ​ເຊີ​ຍວັນ​ປະຫວັດສາດ​ສໍາຄັນ​ຂອງ​ຊາດ ​ແລະ ຂອງ​ສາກົນ ​ເປັນ​ຕົ້ນ​ແມ່ນ ວັນ​ສ້າງ​ຕັ້ງ​ພັກ​ປະຊາຊົນ​ປະຕິວັດ​ລາວ ຄົບຮ​ອບ 63 ປີ, ວັນ​ຄຽດ​ແຄ້​ນຂອງ​ປະຊາຊົນ​ລາວ (21 ມີນາ 1946) ຢູ່​ເມືອງ​ທ່າ​ແຂກ ຄົບຮອບ 72 ປີ ​ແລະ ວັນ​ແມ່ຍິງ​ສາກົນ ຄົບຮອບ 108 ປີ.

      ການ​ຈັດ​ຕັ້ງ​ວັນ​ວິທະຍາສາດຄັ້ງ​ນີ້, ​ໄດ້​ຜ່ານ​ການ​ຫ້າງ​ຫາ​ກະກຽມ ​ເປັນ​ເວລາ​ສົມຄວນ ​ໂດຍ​ມີ 12 ຈຸ​ວິຊາ ​ແລະ 1 ສະ​ໂມ​ສອນ (ສະ​ໂມ​ສອນ​ຫ້ອງ​ມູນ​ເຊື້ອ) ທີ່​ເຂົ້າ​ຮ່ວມ, ​ເຊິ່ງ​ໄດ້​ດໍາ​ເນີນພາຍ​ໃຕ້​ຮູບ​ແບບການຈັດ​ວາງສະ​ແດງ ​ແລະ ​ເຮັດ​ກິດຈະ​ກໍາ​ຕ່າງໆ ທີ່​ສະ​ແດງ​ໃຫ້​ເຫັນ​ຜົນ​ການ​ຮຽນ-​ການ​ສອນ​ຂອງ​ຈຸ​ວິ​ຊາ​ຕ່າງໆ ​ແລະ ການ​ປະກອບສ່ວນ​ພັດທະນາ​ໂຮງຮຽນ​ຂອງ​ຄູ-​ອາຈານ ​ແລະ ນັກຮຽນ​ໃນ​ຊຸມ​ປີຜ່ານ​ມາ. ​ໃນ​ຈໍານວນ 12 ຈຸ​ທີ່​ເຂົ້າ​ວາງສະ​ແດງ ​ແລະ ​ເຮັດ​ກິດຈະ​ກໍາ​ຕ່າງໆ​ນີ້ ມີ 1 ຈຸ​ວິຊາ ຄື: ​ເຕັກ​ໂນ ​ແມ່ນ​ບໍ່​ໄດ້​ນໍາ​ຜົນງານ​ມາ​ວາງສະ​ແດງ ​ແຕ່​ຜູ້​ເຂົ້າ​ຮ່ວມ​ງານ​ສາມາດ​ທ່ຽວ​ຊົມ​ຢູ່​ສ່ວນ​ຄົວ​ດ້ານ​ຫຼັງ​ອາຄານ​ຮຽນ, ​ເຊິ່ງສວນ​ຄົວ​ດັ່ງກ່າວ ​ແມ່ນ​ໂຄງການ​ລິ​ເລີ່​ມຂອງ​ນັກຮຽນ ​ແນ​ໃສ່​ປະຕິບັດ​ຫຼັກສູດ​ສາມັນ​ປະສົມ​ວິຊາ​ຊີບ​ທີ່​ກະຊວງ​ສຶກສາ​ທິການ ​ແລະ ກິລາ ວາງ​ອອກ ​ແລະ ຈະ​ພັດທະນາ​ໃຫ້​ກ້າວ​ຂຶ້ນ​ໄປ​ເລື້ອຍໆ.

(ບຸນທະວີ)