ສຶກສາ

ສຶກສາ

Written by Super User

ຮຮ ນາໆຊາດ ປັນຍາທິບ ມອບໃບປະກາດໃຫ້ນັກຮຽນ ຫຼັກສູດພາສາອັງກິດເກືອບ 50 ຄົນ

35550005 1439225359512945 5860367821808074752 n   ໂຮງຮຽນ ນາໆຊາດ ປັນຍາທິບ ໄດ້ຈັດພິທີມອບ-ຮັບປະກາດສະນິຍະບັດ ຫຼັກສູດພາສາອັງກິດ ຊັ້ນມັດທະຍົມ ຫ້ອງ 12 ໃນວັນທີ 9 ມິຖຸນາ ຜ່ານມາ ທີ່ໂຮງແຮມ ແລນມາກ ​ແມ່​ຂອງຣີ​ເວີ​ໄຊ ນະຄອນຫຼວງ​ວຽງ​ຈັນ, ​ໂດຍ​ໃຫ້ກຽດ​ເຂົ້າ​ຮ່ວມຂອງທ່ານ Hugh Evans ເອກອັກຄະຣາຊະທູດອັງກິດ ປະຈໍາ ສປປ ລາວ, ທ່ານ ນາງ ປາດ​ຖະໜາ ປັນຍາ​ທິບ ຜູ້​ອໍານວຍ​ການ ໂຮງຮຽນ ນາໆຊາດ ປັນຍາທິບ ພ້ອມ​ດ້ວຍ​ບັນດາ​ຄະນະ, ພະນັກງານ, ຄູ-ອາຈານ, ​ພໍ່-​ແມ່ຜູ້​ປົກຄອງ ​ແລະ ນັກຮຽນ​ຢ່າງຫຼວງຫຼາຍ.

   

 

       ​ໃນ​ພິທີ​, ທ່ານ ນາງ ປາດ​ຖະໜາ ປັນຍາ​ທິບ ​ໄດ້​ກ່າວ​ໃຫ້​ຮູ້​ວ່າ: ການຈັດການ​ຮຽນ-ການ​ສອນ​ໃນ​ໄລຍະ​ຜ່ານ​ມາ ​ເຫັນ​ວ່າ ຫຼັກສູດພາສາອັງກິດ ​​ແມ່ນ​ໄດ້​ຮັບ​ຜົນ​ດີ, ​ເຊິ່ງໃນ​ສົກຮຽນ 2017-2018 ທາງ​​ໂຮງຮຽນ ​ໄດ້ມອບ​ໃບ​ປະກາດ​ໃຫ້​ນັກຮຽນທັງ​ສາຂາ​ສະຫວັນ​ນະ​ເຂດ ​ແລະ ນະຄອນຫຼວງ​ວຽງ​ຈັນ. ​ໃນ​ນັ້ນ, ສາຂາ​ສະຫວັນ​ນະ​ເຂດ ​ມີ​ຫ້ອງ​ອະນຸບານ 3 ຈຳນວນ 19 ຄົນ ​ແລະ ຫ້ອງ​ ປ6 ມີ 6 ຄົນ ​ແລະ ນະຄອນຫຼວງ​ວຽງ​ຈັນ ປະກອບ​ມີ ຊັ້ນ​ອະນຸບານ K3 ສະພານ​ທອງ ຈຳນວນ 57 ຄົນ ​ແລະ ວິທະຍາເຂດໃໝ່ໂນນ​ສະຫວັນ ມີ 8 ຄົນ, ຊັ້ນ​ປະຖົມ​ສຶກສາ (ປ6) ມີ 49 ຄົນ ​ແລະ ຊັ້ນ​ມັດທະຍົມ ຫ້ອງ 12 ຈໍານວນ 49 ຄົນ, ​ເຊິ່ງ​ແຕ່​ລະ​ຊັ້ນ​ຮຽນ​ແມ່ນ​ໄດ້​ຈັດ​ພິທີ​ມອບ​ໃບ​ປະກາດ​​ໃຫ້​ນັກຮຽນຕາມ​ແຕ່ລະ​ໄລຍະ, ​ເຊິ່ງ​ແຕ່​ລະ​ງານ​ຈັດ​ຂຶ້ນ​ໂດຍມີຄວາມເປັນເອກະລັກ ແລະ ມຸ່ງເນັ້ນໃຫ້ເຫັນເຖິງຈຸດເດັ່ນ ແລະ ຈຸດແຂງຂອງແຕ່ລະຊັ້ນທີ່ຈົບການສຶກສາເປັນຢ່າງດີ.

       ຄຽງ​ຄູ່​ກັນ​ນັ້ນ, ທ່ານຜູ້​ອໍານວຍ​ການ ໂຮງຮຽນ ຍັງໄດ້ກ່າວອີກວ່າ: ທາງໂຮງຮຽນ ໄດ້ມີຄວາມພາກພູມໃຈຫຼາຍທີ່ໄດ້​ເຫັນເຖິງຄວາມສໍາເລັດຂອງນ້ອງນັກຮຽນໃນສົກຮຽນທີ່ຜ່ານມາ ​ແລະ ຕັ້ງໜ້າຕັ້ງໜ້າລໍຖ້າເບິ່ງນ້ອງນັກຮຽນທີ່ສໍາເລັດການສຶກສາໃນຊັ້ນອະນຸບານ, ຊັ້ນປະຖົມສຶກສາ ​ແລະ ຊັ້ນ​ມັດທະຍົມ​ສຶກສາ ໃນການກ້າວໄປສູ່ການສຶກສາໃນຂັ້ນຕໍ່ໄປຂອງ​ໂຮງຮຽນໃນສົກຮຽນຕໍ່ໜ້າ ແລະ  ທາງ​ໂຮງຮຽນ ຂໍອວຍໄຊພອນໃຫ້ແກ່ນ້ອງນັກຮຽນທີ່ສໍາເລັດການສຶກສາໃນຊັ້ນມັດທະຍົມສຶກສາ ທີ່ຈະກ້າວໄປສູ່ມະຫາວິທະຍາໄລທີ່ຕົນເອງເລືອກຮຽນ ​ແລະ ຕັ້ງ​ໃຈ​ຮຽນ​ໃຫ້​ສໍາ​ເລັດ​ຕາມ​ແຜນການ​ທີ່​ຕັ້ງ​ໄວ້.

      ຂະນະ​ດຽວ​ກັນ, ​ທ່ານ Hugh Evans ໄດ້ໃຫ້ກຽດໂອ້ລົມຕໍ່​ຄະນະ​ຜູ້​​ອໍານວຍ​ການ​ໂຮງຮຽນ, ພະນັກງານ, ຄູ-ອາຈານ ​ແລະ ນັກຮຽນ ກ່ຽວກັບໂອກາດໃນການສຶກສາຕໍ່ທີ່ປະເທດອັງກິດ, ເຊິ່ງມີມະຫາວິທະຍາໄລທີ່ດີທີ່ສຸດໃນໂລກ ຫຼື ໃນເອເຊຍຕະເວັນອອກສຽງໃຕ້ ທີ່ມີຫຼາຍສາຂາວິຊາໃຫ້​ນັກຮຽນ​ທີ່​ສົນ​ໃຈ​ຢາກ​ໄປ​ຮຽນ​ຕໍ່. ນອກຈາກ​ນັ້ນ, ຍັງລວມເຖິງຫຼັກສູດພື້ນຖານສາກົນໃນປະເທດລາວ ກໍ່ຄື ມະຫາວິທະຍາໄລນັອດຕິ້ງແຮັມນັ້ນເອງ.ນອກຈາກ​ນັ້ນ, ​ໃນ​ພິທີ​ຍັງ​ໄດ້ມີ​ການສະ​ແດງສິລະ​ປະ-ວັນນະຄະດີ ​ເປັນ​ຕົ້ນ​ແມ່ນ​ບົດຟ້ອນທີ່ງົດງາມ, ການປະສານສຽງເພງ, ການເຕັ້ນ ແລະ ເຄື່ອງດົນຕີຂອງນ້ອງນັກຮຽນໃນ​ໂຮງຮຽນໃຫ້ໄດ້ຮັບຊົມຢ່າງມ່ວນຊື່ນ​.

​​

ໂດຍ: ນາງ ຕຸ່ນ​ຄໍາ

Written by Super User

 ແມ່ຍິງຮາກຖານສຳນັກ ສສກ ສ່ອງແສງຄົ້ນຄວ້າວຽກງານໃນໄລຍະຜ່ານມາ

35402055 1439225449512936 359181243016806400 n   ສະຫະພັນແມ່ຍິງຮາກຖານສຳນັກ ກະຊວງສຶກສາທິການ ແລະ ກິລາ (ສສກ) ໄດ້ຈັດກອງປະຊຸມສ່ອງແສງ ປະຈຳ 3 ເດືອນ (​​ເມສາ ຫາ ມິ​ຖຸນາ 2018) ໃນວັນທີ 14 ມິ​ຖຸນາ ຜ່ານມາ ທີ່​ຫ້ອງ​ປະຊຸມສໍານັກງານກະຊວງ​ສຶກສາ​ທິການ ​ແລະ ກິລາ, ໂດຍ​ໃຫ້​ກຽດ​ເຂົ້າ​ຮ່ວມຂອງ​ສະຫາຍ ນາງ ປ້ອງມິ່ງ ສີສະຫວັດ ຄະນະບໍລິຫານງານສະຫະພັນແມ່ຍິງກະຊວງ ທັງເປັນປະທານສະຫະພັນແມ່ຍິງຮາກຖານສໍານັກ ກະຊວງ ສສກ, ພ້ອມ​ດ້ວຍຄະນະ​, ບັນດາຫົວໜ້າໜ່ວຍສະຫະພັນແມ່ຍິງຫ້ອງການ, ກົມ, ສະຖາບັນ, ສູນ, ວິທະຍາໄລສົງອົງຕື້, ລັດ​ວິ​ສະຫະ​ກິດ​ຜະລິດອຸປະກອນ​ການ​ສຶກສາ ​ແລະ ພາກສ່ວນ​ຕ່າງໆທີ່​ຂຶ້ນ​ກັບສະຫະພັນ​ແມ່ຍິງຮາກ​ຖານ​ສໍານັກ ​ກະຊວງ​ສຶກສາ​ທິການ ​ແລະ ກິລາ.

 

      ໃນກອງປະຊຸມ, ​ໄດ້​ມີການສະຫຼຸບ​ວຽກ​ງານ​ທີ່​ພົ້ນ​ເດັ່ນປະ​ຈໍາ 3 ​ເດືອນ (​ເມສາ ຫາ ມິຖຸນາ 2018), ​ເຊິ່ງ​ໄດ້​ຈັດ​ຕັ້ງ​ປະຕິບັດ​ວຽກ​ງານ​ຕາມ​ຄວາມ​ຮຽກຮ້ອງ​ຕ້ອງການ​ຂອງ​ແນວທາງ​ປ່ຽນ​ແປງ​ໃໝ່​ຂອງ​ພັກ ​ໂດຍອົງການ​ຈັດ​ຕັ້ງ​ສະຫະພັນ​ແມ່ຍິງ​ຮາກ​ຖານ​ສໍານັກ ​ກະຊວງ​ສຶກສາ​ທິການ ​ແລະ ກິລາ ​​ໄດ້​ຖື​ເອົາວຽກ​ງານ​ການ​ສຶກສາ​ອົບຮົມ​ການ​ເມືອງ-​ແນວ​ຄິດ ​ເປັນວຽກ​ງານ​ທີ່​ສໍາຄັນ ​ແລະ ຕົ້ນຕໍ, ກະຕຸກ​ຊຸກຍູ້​ແມ່ຍິງ​ໃຫ້​ມີ​ຄວາມ​ກ້າຫານ​ສະ​ແດງ​ຄວາມ​ຄິດ​ເຫັນ​ຢ່າງ​ເປັນ​ເຈົ້າ​ການ. ນອກຈາກ​ນັ້ນ, ​ໃນ​ໄລຍະ​ຜ່ານ​ມາ​ ທາງ​ຄະນະ ​ແລະ ສະມາ​ຊິກ​ເອື້ອຍ​ນ້ອງ​ແມ່​ຍິງ​ສໍານັກ ​ຍັງ​ໄດ້​ເຂົ້າ​ຮ່ວມ​ກອງ​ປະຊຸມ, ເຝິກອົບຮົມ ​ແລະ ສ້າງ​ຂະ​ບວນການ​ຕ່າງໆທີ່​ທາງ​ແຕ່ລະ​ຮາກ​ຖານ ​ແລະ ​ກະຊວງ​ໄດ້​ຈັດ​ຂຶ້ນ. ພ້ອມກັນນັ້ນ, ​ໃນ​ຕົ້ນ​ເດືອນ​ກໍລະກົດນີ້ ຍັງ​ຈະ​ໄດ້​ຈັດ​ສະ​ເຫຼີ​ມສະຫຼອງ​ວັນ​ສ້າງ​ຕັ້ງ​ແມ່ຍິງ​ລາວ (ວັນ​ທີ 20 ກໍລະກົດ) ​ໂດຍ​ຈະ​ມີ​ພິທີ​ປາຖະກະຖາ​ວັນ​ດັ່ງກ່າວ, ​ສະຫຼຸບ​ຜົນງານ, ມອບ​ໃບ​ຍ້ອງຍໍວຽກ​ງານການ​ເຄື່ອນ​ໄຫວ 3 ດີ ​ໃຫ້​ສະມາຊິກ​ແຕ່ລະ​ໜ່ວຍ ຜູ້​ທີ່​ມີ​ຜົນງານ​ດີ​ເດັ່ນ, ພ້ອມ​ທັງ​ຈັດ​​ກິດຈະ​ກໍາ​ສະ​ເຫຼີ​ມສະຫຼອງ​​ຕື່ມ​ອີກ.

      ນອກຈາກ​ນັ້ນ, ​​ໃນ​ກອງ​ປະຊຸມ​ຍັງ​ໄດ້​ສະຫຼຸບ​ຕີ​ລາ​ດ້ານ​ດີ, ດ້ານ​ອ່ອນ ​ໃນ​ການ​ເຄື່ອນ​ໄຫວ​ຂອງ​ສະຫະພັນ​ແມ່ຍິງຮາກ​ຖານ​ສໍາ​ນັກ (ການ​ຕອບ​ຮັບ​ແຈ້ງການ, ການ​ປະສານ​ງານ, ການ​ຮ່ວມ​ມື ​ແລະ ການ​ເຂົ້າຮ່ວມ​ຂະ​ບວນການ), ຮັບ​ຟັງ​ລາຍ​ງານບົດສະ​ຫຼຸບ​ການ​ເຄື່ອນ​ໄຫວ​ໃນ​ໄລຍະ​ເດືອນ 3 ​ເດືອນ, ຮັບ​ຟັງ​ສະພາບ​ທີ່​ພົ້ນ​ເດັ່ນ​ຂອງ​ແຕ່ລະ​ໜ່ວຍ, ການ​ກຽມ​ເປີດ​ກອງ​ປະຊຸມ​ໃຫຍ່​ຂອງ​ແຕ່ລະ​ໜ່ວຍ ​ແລະ ປຶກສາ​ຫາລື​ບັນຫາ​ອື່ນໆ ແນໃສ່ພັດທະນາແມ່ຍິງໃຫ້ກ້າວໜ້າຂຶ້ນເລື້ອຍໆ.ສໍາລັບ​ແຜນ​ພັດທະນາ​​ແມ່ຍິງ​ສໍານັກ ​ກະຊວງ ສສກ 5 ປີ (2016-2020) ​ແມ່ນ​ຈະ​ພັດທະນາຊັບພະຍາກອນ​​ເພດ​ຍິງ​ໃນ​ສໍານັກ​ ກະຊວງ ສສກ  ​ເພື່ອ​ເຮັດ​ໃຫ້​ເອື້ອຍ​ນ້ອງ​ແມ່ຍິງ​ມີ​ຄວາມ​ຮັບ​ຮູ້ຄວາມ​ເຂົ້າ​ໃຈ ​ແລະ ​ເປັນ​​ເອກະ​ພາບ​ຕໍ່​ແນວທາງນະ​ໂຍບານ​ຂອງ​ພັກ, ມີ​ຄວາມ​ຕື່ນ​ຕົວ​ປະຕິບັດ​ລັດຖະທໍາ​ມະນູນ, ກົດໝາຍ, ລະບຽບ​ການ​ຂອງ​ລັດ ​ໃນ​ຂົງ​ເຂດ​ວຽກງານ​ຂອງ​ຕົນ, ຮັກ​ກຽດ​ສັກ​ສີ​ຂອງ​ແມ່ຍິງ, ຄຸນສົມບັດ ​ແລະ ມີ​ແບບ​ແຜນ​ດໍາລົງ​ຊີວິດ​ທີ່ປອດ​ໃສ່​ຂາວ​ສະ​ອາດ.

ໂດຍ: ນາງ ຕຸ່ນ​ຄໍາ

Written by Super User

ສສກ ຕີລາຄາຄືນວຽກງານບໍລິຫານ ປະຈໍາເດືອນພຶດສະພາ

35695449 1439225606179587 5404160016284385280 n   ກະຊວງສຶກສາ​ທິການ ​ແລະ ກິລາ (ສສກ) ​ໄດ້​ຈັດ​ກອງ​ປະຊຸມ​ສ່ອງ​ແສງວຽກ​ງານ​ບໍລິຫານ ​ປະ​ຈໍາ​ເດືອນພຶດສະພາຜ່ານມາ ​ ​ເພື່ອ​ລາຍ​ງານ​ບັນດາວຽກ​ງ​ານ​ທີ່​ພົ້ນ​ເດັ່ນ ປະກອບ​ເຂົ້າ​ໃນຮ່າງ​ບົດ​ສະຫຼຸບ ​ເພື່ອ​ລາຍ​ງານຂັ້ນ​ເທິງ ພ້ອມ​ວາງ​ແຜນ​ວຽກ​ຈຸດ​ສຸມປະ​ຈໍາ​ເດືອນ​ມິຖຸນາ ​ແນໃສ່​ເຮັດ​ໃຫ້ການຈັດ​ຕັ້ງ​ປະຕິບັດ​ວຽກ​ງານ​ໃນ​ຂະ​  ແໜງ​ສຶກສາ ​ແລະ ກິລາ ມີ​ແບບ​ແຜນ​ວິທີ​ເຮັດ​ວຽກ​ທີ່​ລະອຽດ ​ແລະ​ ​ມີ​ປະສິດທິພາບ​ຂຶ້ນ​ເລື້ອຍໆ.

   ກອງປະຊຸ​ມສ່ອງແສງດັ່ງກ່າ​ວ, ​ໄດ້​ຈັດ​ຂຶ້ນ​ໃນ​ວັນ​ທີ 15 ມິຖຸນາ ຜ່ານ​ມາ ທີ່​ຫ້ອງ​ປະຊຸມ​ກະຊວງ​ສຶກສາ​ທິການ ​ແລະ ກິລາ, ​ໂດຍ​ໃຫ້​ກຽ​ດ​ເປັນ​ປະທານ​ຂອງ​ທ່ານ ນາງ ຂັນ​ທະ​ລີ​ ສີຣິ​ພົງພັນ ຫົວໜ້າ​ຫ້ອງການ​ ກະຊວງ​ສຶກສາ​ທິການ ​ແລະ ກິລາ, ມີ​ຫົວໜ້າ​-ຮອງ​ຫົວໜ້າ​ພະ​ແນ​ກບໍລິຫານອ້ອມ​ຂ້າງ​ກະຊວງ, ມະຫາວິທະຍາ​ໄລ ​ແລະ ພະນັກງານວິຊາ​ການທີ່​ກ່ຽວຂ້ອງ​ເຂົ້າ​ຮ່ວມ​ຢ່າງ​ພ້ອມ​ພຽງ.

​     ໃນ​ກອງ​ປະຊຸມ​, ​ແຕ່​ລະ​ພາກສ່ວນ​ໄດ້​ລາຍ​ງານ​ວຽກ​ອັນ​ພົ້ນ​ເດັ່ນ​ຫຼາຍດ້ານ ​ເປັນ​ຕົ້ນ​ແມ່ນ ການກະກຽມ​ການ​ສອບ​ເສັງ​ເຂົ້າ​ມະຫາວິທະຍາ​ໄລ, ຂຸ້ນຂ້ຽວ​ໃນ​ການ​ປະຕິບັດ​ໂຄງການ​ສ້າງ​ຄວາມ​ເຂັ້ມ​ແຂງ​ໃນ​ການ​ພັດທະນາ​ມະຫາວິທະຍາ​ໄລ​ສະຫວັນ​ນະ​ເຂດ, ສຸມ​ໃສ່​ການສອບ​ເສັງ ມ7 ບໍາລຸງ ທີ່​ຈະ​ສອບ​ເສັງ​ໃນ​ວັນ​ທີ 28-29 ມິຖຸນາ​ນີ້, ຂຸ້ນຂ້ຽວ​ແບ່ງ​ຕົວ​ເລກ​ຄູ, ກະກຽມ​​ເຂົ້າ​ຮ່ວມ​​ເອຊຽນ ​ເກ​ມ ຄັ້ງທີ 18 ທີ່ປະເທດອິນໂດເນເຊຍ ທ້າຍເດືອນສິງຫານີ້, ສໍາ​ເລັດ​ການ​ສ້າງ​ຄວາມ​ເຂັ້ມ​ແຂງ​ໃນ​ການ​ພັດທະນາ​ຄູ, ຈັດ​ກອງ​ປະຊຸມ​ຜ່ານ​ຮ່າງ​ນະ​ໂຍບາຍ​ກ່ຽວ​ກັບ​ການ​ສຶກສາກ່ອນ​ໄວ​ຮຽນ, ກຽມ​ເຂົ້າ​ຮ່ວມ​ແຂ່ງຂັນ​ກິລາ​ນັກຮຽນ​ ອາຊຽນ ຄັ້ງທີ 10 ທີ່​ປະເທດມາ​ເລ​ເຊຍ ​ແລະ ອື່ນໆ.ນອກຈາກ​ນີ້, ​ຜູ້​ເຂົ້າ​ຮ່ວມ​ກອງ​ປະຊຸມ​ຍັງ​ໄດ້​​ປະກອບ​ຄໍາ​ຄິດຄໍາ​ເຫັນ​ຢ່າງ​ກົງ​ໄປ​ກົງ​ມາ ​ເພື່ອປະກອບ​ເຂົ້າ​ໃນຮ່າງ​ບົດ​ສະຫຼຸບ​ໃຫ້​ມີ​ຄວາມ​ສົມບູນ ພ້ອມ​ທັງ​ວາງ​ແຜນ​​ໃນ​ຕໍ່ໜ້າ​ຢ່າງ​ລະອຽດ ​​ແນ​ໃສ່​ເຮັດ​​ໃຫ້​ການປະຕິ​ບັດວຽກ​ງານ​ໃນ​ຂົງ​ເຂດ​ຂອງ​ຕົນ​​ມີ​ປະສິດທິພາບຫຼາຍຂຶ້ນ​.

(ບຸນທະວີ)