ສຶກສາ

ສຶກສາ

Written by Super User

ວູຊູ​ລາວ ພ້ອມ​ສົ່ງ 6 ນັກ​ກິລາ​ດີ​ເດັ່ນ ຮ່ວມ​ ​ເອຊຽນ ​ເກ​ມ 2018 ທີ່​ອິນ​ໂດ​ເນ​ເຊຍ

35282719 1433915296710618 6324776489426354176 nສະຫະພັນ​ກິລມວຍ​ວູຊູ​​ແຫ່ງ​ຊາດ​ລາວ ພ້ອມ​ຈະ​ສົ່ງ 6 ນັກ​ກິລາ​ວູຊູດີ​ເດັ່ນ​ແຫ່ງ​ປີ 2018 ປະ​ເພດ​ຕໍ່ສູ້​ປ້ອງ​ກັນ​ຕົວ 6 ຮຸ່ນ, ຍິງ 2 ຮຸ່ນ ເຂົ້າຮ່ວມ​ລ່າ​ຫຼຽນ​ຄຳ ​ໃນ​ງານ​ມະຫາ​ກຳ​ກິລາ​ເອຊຽນ ​ເກ​ມ ຄັ້ງ​ທີ 18 ທີ່​ປະ​ເທດ​ອິນ​ໂດ​ເນ​ເຊຍ ຮັບ​ກຽດ​ເປັນ​ເຈົ້າພາບ ລະຫວ່າງ​ວັນ​ທີ 18 ສິງຫາ ຫາ ວັນ​ທີ 2 ກັນຍາ 2018. ຕາມ​ການ​ລາຍ​ງານ​ຂອງ ທ່ານ ສີທາ ຢູຢ່າ​ປະ​ເສີດ ​ເລຂາທິການ​ສະຫະພັນ​ມວຍ​ວູຊູ​ແຫ່ງ​ຊາດ​ລາວ ​ແຈ້ງ​ໃຫ້​ທີ​ມງານ​ນັກ​ຂ່າວ ໜັງສືພິມ​ສຶກສາ-ກິລາ ລາຍ​ວັນ ຊາບ​ວ່າ: ​ໃນ​ການ​ຫ້າງ​ຫາ​ກະກຽມ​ເຂົ້າ​ຮ່ວມ​ງານ​ມະຫາ​ກຳກິລາ​ເອຊຽນ ​ເກ​ມ ຄັ້ງ​ທີ 18 ທີ່​ປະ​ເທດ​ອິນ​ໂດ​ເນ​ເຊຍ ຮັບ​ກຽດ​ເປັນ​ເຈົ້າພາບ ຈະ​ເປີດ​ສາກ​ຂຶ້ນ ​ໃນ​ກາງ​ເດືອນ​ສິງຫາ​ນີ້ ສະຫະພັນກິລາວູຊູແຫ່ງຊາດລາວເຮົາ ໄດ້​ສົ່ງ​ເຂົ້າ​ຮ່ວມ​ແຂ່ງຂັນ​ທັງ​ໝົດ 6 ຄົນ, ຍິງ 2 ຄົນ ຈາກປະ​ເພດ​ຕໍ່ສູ້​ປ້ອງກັນ​ຕົວ​ໃນ​ຈຳນວນ 6 ຮຸ່ນ ​ແລະ ​ໄດ້​ມີ​ການ​ເກັບ​ຕົວ​ເຝິກຊ້ອມ​ມາ​ແຕ່​ກາງ​ເດືອນ​ພຶດສະພາ​ ຜ່ານ​ມາ ທີ່​ສູນ​ເຝິກ​ກິລາ​ແຫ່ງ​ຊາດ ບ້ານ​ສີ​ເກີດ ​ເມືອງ​ນາ​ຊາຍ​ທອງ ນະຄອນຫຼວງ​ວຽງ​ຈັນ ພ້ອມ​ທັງ​ໄດ້​ເຊີນ​ເອົາ​ຄູ​ເຝິກ​ຊາວ​ຈີນ ທ່ານ ຊົ້ງ ຢ່າ​ໜານ ຈາກ​ແຂວງຈຽນ​ຊີ ສປ ຈີນ ອະດີດ​ນັກ​ກິລາ​ມວຍ​ວູຊູ​ທີ​ມຊາດ​ຈີນ ມາ​ເປັນ​ຄູ​ເຝິກ​ສອນ​ໃຫ້ ​ແລະ ຫາ​ກໍ່​ເດີນທາງ​ມາ​ຮອດ​​ເມື່ອ​ວັນ​ທີ 30 ພຶດສະພາ ຜ່ານ​ມາ​ນີ້ ປັດຈຸບັນ​ນັກ​ກິລາ​ໄດ້​ຊ້ອມ​ເຂົ້າ​ສູ່​ລະບົບ​ແຜນການ​ເປັນ​ທີ່​ຮຽບຮ້ອຍ​​ແລ້ວ ​ໂດຍຊ້ອມ​ທັງ​ພາກ​ເຊົ້າ ​ແລະ ພາກ​ແລງ ​ໃຊ້​ເວລາ​ທັງ​ສອງ​ພາກ 5-6 ຊົ່ວໂມງ ນັບ​ມາ​ຮອດ​ປັດຈຸບັນ​ນັກ​ກິລາ​ທັງ 6 ຄົນ ​ແມ່ນ​ມີ​ສຸຂະ​ພາບ​ແຂງ​ແຮງ ​ແລະ ມີ​ຄວາມ​ຟິດ, ມີ​ເທັກ​ນິກ, ທັກ​ສະ ​ແລະ ຄວາມ​ພ້ອມ​ເກືອບ​ເຕັມ​ຮ້ອຍ​ເປີ​ເຊັນ ຄາດ​ວ່າກ່ອນ​ຈະ​ເຂົ້າສູ່​ການ​ແຂ່ງຂັນ​ຕົວ​ຈິງ​ທຸກ​ຄົນ​ຈະ​ສາມາດ​ຟິດ​ເຕັມ​ຮ້ອຍ​ເປີ​ເຊັນ.

      ​ໃນ​ການ​ແຂ່ງຂັນກິລາ​ມວຍ​ວູຊູ ​ງານ​ມະຫາ​ກຳ​ກິລາ​ເອຊຽນ ​ເກ​ມ ຄັ້ງ​ທີ 18 ທີ່​ປະ​ເທດ​ອິນ​ໂດ​ເນ​ເຊຍ ຈະ​ມີ​ການ​ຊີງ​ໄຊ​ກັນ​ຫຼາຍ​ລາຍການ ມີ 2 ປະ​ເພດ ຄື: ປະ​ເພດ​ຕໍ່ສູ້​ປ້ອງ​ກັນ​ຕົວ ແລະ ປະເພດຟ້ອນ. ໃນນີ້ສະ​ເພາະ​ນັກ​ກິລາ​ລາວ ສົ່ງເຂົ້າຮ່ວມ 6 ຮຸ່ນ​, ຍິງ 2 ຮຸ່ນ ປະກອບ​ມີ ທ້າວ ຄຳ​ຫຼ້າ ສຸຂະ​ພອນ (ອານັນ​ຕະ​ໄຊ) ຮຸ່ນ​ນໍ້າໜັກ 56 ກິ​ໂລກຣາມ ຈາກ​ກະຊວງ​ປ້ອງ​ກັນ​ປະ​ເທດ (ກອງທັບ), ທ້າວ ໜູ​ຄິດ ລາດ​ຊະ​ເພົາ ຫຼື ສິງ​ນ້ອຍ ຮຸ່ນ​ນໍ້າໜັກ 60 ກິ​ໂລກຣາມ ຈາກ​ກອງທັບ, ທ້າວ ດຳ​ຊຸມພອນ ຂຽວ​ສະຫວາດ (ສະຫຼາມ​ດຳ) ຮຸ່ນ​ນໍ້າໜັກ 65 ກິ​ໂລກຣາມ ຈາກ​ກອງທັບ, ທ້າວ ກາລັນ ​ໂຄດ​ສົມບັດ ຈາກ​ຄ້າຍ​ມວຍ​ສຸຂະ​ພອນ ບ້ານ​ນາ​ໄຮ່ ​ເມືອງ​ຫາດ​ຊາຍ​ຟອງ ນະຄອນຫຼວງ​ວຽງ​ຈັນ ຮຸ່ນ​ນໍ້າໜັກ 70 ກິ​ໂລກຣາມ, ນາງ ມີ່​ມີ່ ຍອຍ​ສາຍ​ຄຳ ຈາກ​ຄ້າຍ​ມວຍ​ຂວັນ​ໃຈ​ສີ​ໂຄດ ​ເມືອງ​ສີ​ໂຄດ​ຕະບອງ ນະຄອນຫຼວງ​ວຽງ​ຈັນ ​ຮຸ່ນ​ນໍ້າໜັກ 52 ກິ​ໂລກຣາມ ແລະ ນາງ ​ເປື່ອຍ ມະນີ​ວັນ ອະດີດ​ນັກຮຽນ ​ໂຮງຮຽນ​ພອນ​ສະຫວັນ​ກິລາ-ກາ​ຍະ​ກຳ ຮຸ່ນ​ນໍ້າໜັກ 56 ກິ​ໂລກຣາມ.  ສຳລັບ​ຜົນງານ​ຂອງ​ທັບ​ນັກ​ກິລາ​ມວຍ​ວູຊູ​ທີ​ມຊາດ​ລາວ ​ໃນ​ການ​ເຂົ້າຮ່ວມ​ງານ​ກິລາ ​ເອຊຽນ ​ ເກ​ມ ຜ່ານ​ມາ ສາມາດ​ຄວ້າຫຼຽນ​ເງິນ​ປະຫວັດສາດ ປີ 2006 ທີ່​ປະ​ເທດ​ກາ​ຕາ ​ຈາກ​ທ້າວ ​ໂພ​ໄຊ ອະ​ໄພ​ລາດ ຮຸ່ນ​ນໍ້າໜັກ 60 ກິ​ໂລກຣາມ, ​ໄດ້​ຫຼຽນ​ທອງ ປີ 2010 ທີ່​ແຂວງ​ກວາງ​ໂຈວ ສປ ຈີນ ຈາກ ທ້າວ ຄຳ​ຫຼ້າ ສຸຂະ​ພອນ ຮຸ່ນ​ນໍ້າໜັກ 56 ກິ​ໂລກຣາມ ​ແລະ ຫຼ້າ​ສຸດ​ ປີ 2014 ໄດ້​ຫຼຽນ​ທອງ ທີ່​​​ເມືອງອິນ​ຊອນ ສ ​ເກົາຫຼີ ຈາກ ທ້າວ ຄຳ​ຫຼ້າ ສຸຂະ​ພອນ ຮຸ່ນ​ນໍ້າໜັກ 56 ກິ​ໂລກຣາມ.

​ໂດຍ ສົງການ 

Written by Super User

ສທໜ ສະຫຼຸບ​ການ​ເຄື່ອນ​ໄຫວວຽກ​ງານ​ທີ່​ພົ້ນ​ເດັ່ນ 6 ​ເດືອນ​ຕົ້ນ​ປີ ​ພ້ອມວາງ​ແຜນ​ຕໍ່​ໜ້າ

35227588 1433915426710605 6917123526893764608 n   ຄະນະ​ບໍລິຫານ​ງານ ສະມາຄົມ​ນັກທຸລະກິດ​ໜຸ່ມ (ສທໜ) ສູນ​ກາງ​ຊາວໜຸ່ມ​ປະຊາຊົນ ປະຕິວັດ​ລາວ ຈັດ​ກອງ​ປະຊຸມສະຫຼຸບ​ການ​ເຄື່ອນ​ໄຫວ​ວຽກ​ງານ​ທີ່​ພົ້ນ​ເດັ່ນ 6 ​ເດືອນ​ຕົ້ນ​ປີ ​2018 ແລະ ວາງ​ທິດ​ທາງ​ແຜນການ​ໃນຕໍ່ໜ້າ​ ເມື່ອ​ບໍ່​ດົນ​ມາ​ຜ່ານມາ ທີ່ສູນກາງຊາວໜຸ່ມປະຊາຊົນປະຕິວັດລາວ ໂດຍ​ພາຍ​ໃຕ້ການ​ເປັນ​ປະທານ​ຮ່ວມ​ຂອງ​ທ່ານ ບຸນ​ຕາ ​ເທບ​ພະ​ວົງ ຮອງ​ເລຂາ​ຄະນະ​ບໍລິຫານງານສູນກາງ​ຊາວ​ໜຸ່ມ​ປະຊາຊົນ​ປະຕິວັດ​ລາວ ​ແລະ ທ່ານ ປອ. ຫົງ​ຄຳ ສຸວັນ​ນ​ະ​ວົງ ປະທານຄະນະ​ບໍລິຫານ​ງານ ສະມາຄົມ​ນັກທຸລະກິດ​ໜຸ່ມ, ມີ​ບັນດາຄະນະ​ພັກ, ​ຫົວໜ້າ​-ຮອງ​ຫົວໜ້າ​ກົມ ພ້ອມ​ດ້ວຍ​ຄະນະບໍລິຫານ​ງານ ສທໜ, ພະນັກງານ​ທີ່​ກ່ຽວຂ້ອງ​ເຂົ້າ​ຮ່ວມ.

     

 

      ​ໂອກາດ​ນີ້, ທ່ານ ປອ. ຄຳ​ແສນ ສີສະ​ວົງ ຮອງ​ປະທານ ​ແລະ ​ຜູ້​ປະຈຳການ ສທໜ ໄດ້ລາຍ​ງານ​​ວ່າ: ການຈັດກອງ​ປະຊຸມໃນ​ຄັ້ງ​ນີ້ ​ແມ່ນ​​ເພື່ອ​ເປັນ​ການສະຫຼຸບ ​ແລະ ​ຕີ​ລາຄາ​ຄືນ​ກ່ຽວ​ກັບ​ການຈັດ​ຕັ້ງ​ປະຕິບັດ​ວຽກ​ງານ​ການ​ເຄື່ອນ​ໄຫວ 6 ​ເດືອນ​ຕົ້ນ​ປີ ​ແລະ ປັບປຸງ​ແຜນ​ວຽກ​ງານ 6 ​ເດືອນ​ທ້າຍ​ປີ 2018 ຂອງ ສທໜ ​ໃຫ້​ເປັນ​ໄປຕາມ​ກົນ​ໄກ​ທີ່​ວາງ​ໄວ້. ນອກຈາກ​ນັ້ນ, ກໍ່ຍັງ​ເປັນ​ການ​ປັບປຸງ​ວຽກ​ງານ​ການ​ຈັດ​ຕັ້ງ​​ນຳພາ ​ເພື່ອ​ກະກຽມ​ໃສ່​ກອງ​ປະຊຸມ​ໃຫຍ່​ຂອງ ສທໜ ທີ່​ຈະ​ໄຂ​ຂຶ້ນ​ໃນ​ມໍ່ໆ​ນີ້ ​ແລະ ອີກ​ດ້ານ​ໜຶ່ງ​ກໍ່​ຍັງ​ເປັນການລະດົມ​ຄວາມ​ຄິດ​ເຫັນ​ຂອງ​ບັນດາ​ຄະນະ​ບໍລິຫານ​ງານ​ໃນ​ການ​ພັດທະນາ ສທໜ ​ໃນ​ຊຸມ​ປີ​ຕໍ່ໆ​ໄປ ແນ​ໃສ່ສົ່ງ​ເສີມ​​ການ​ພັດທະນາທຸລະ​ກິດ​ຊາວ​ໜຸ່ມລາວ ​ໃນ​ຂອບ​ເຂດ​ທົ່ວ​ປະ​ເທດໃຫ້​​ເປັນ​ໄປ​ຕາມ​​​ແນວທາງ​ນະ​ໂຍບາຍແຜນ​ຍຸດ​ທະ​ສາດຂອງຄະນະ​ບໍລິຫານ​ງານ​ສູນ​ກາງ​ຊາວ​ໜຸ່ມ ປະຊາຊົນ​ ປະຕິວັດ​ລາວ ​ແລະ ວິ​ໄສ​ທັດຂອງ​ຄະນະ​ບໍລິຫານ​ງານ ສທໜ ​ໃຫ້ປະສົບ​ຜົນສຳ​ເລັດຕາມ​ເປົ້າ​ໝາຍ​ທີ່​ວາງ​ໄວ້.

ໂດຍ ສົງການ    

Written by Super User

 ສສກ - ມູນນິທິ ນິບປົງ ຫາລືກຽມຮ່ວມມືດ້ານການສຶກສາຮຽນຮ່ວມ ແລະ ເດັກພິການຫູ

 35143321 1433915466710601 8531427980558204928 nກະຊວງສຶກສາທິການ ແລະ ກິລາ (ສສກ) ແລະ ມູນນິທິ ນິບປົງ ໄ​ດ້ປຶກສາຫາລືກ່ຽວກັບຄວາ​ມ​ເປັນ​ໄປ​ໄດ້​ໃນ​ການ​ຮ່ວມ​ມື​ກັນ ​ເປັນ​ຕົ້ນ​ແມ່ນວຽກງານການສຶກສາຮຽນຮ່ວມ ແລະ ການສຶກສາຂອງເດັກພິການທາງຫູ ເພື່ອເຮັດໃຫ້ຄົນພິການທາງຫູໄດ້ເຂົ້າຮັບການສຶກສາ ແລະ ເຂົ້າເຖິງການສຶກສາທີ່ດີຂຶ້ນກວ່າເກົ່າ.ເມື່ອວັນທີ 12 ມິຖຸນາ ຜ່ານມາ ທີ່ສໍານັກງານ ກະຊວງສຶກສາທິການ ແລະ ກິລາ, ທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີ ກະຊວງສຶກສາທິການ ແລະ ກິລາ ໄດ້ໃຫ້ກຽດຕ້ອນຮັບການຢ້ຽມຄໍານັບຂອງທ່ານ ​ໄອ​ກູ​ມິ ກະ​ວາ​ມາຕະ (Ikumi Kawamata) ຕາງ​ໜ້າ​ມູນ​ນິທິ ນິບປົງ ທັງ​ເປັນ​ຜູ້​ປະສານ​ງານ​ອົງການ​ຄົນ​ພິການ​ເອ​ເຊຍ ​ເພື່ອ​ການ​ພັດທະນາ (ADDP) ພ້ອມດ້ວຍຄະນະ, ມີຄະນະນໍາຈາກພາກສ່ວນທີ່ກ່ຽວຂ້ອງເຂົ້າຮ່ວມ.

 

      ໂອກາດດັ່ງກ່າວ, ທ່ານ ​ໄອ​ກູ​ມິ ກະ​ວາ​ມາຕະ ກ່າວໃຫ້ຮູ້ວ່າ: ການເຂົ້າຢ້ຽມຄໍານັບຄັ້ງນີ້ ກໍ່ເພື່ອລາຍ​ງານ ​ແລະ ປຶກສາ​ຫາ​ລືຄວາມ​ເປັນ​ໄປ​ໄດ້​ໃນການ​ຮ່ວມ​ມື​ກັນ ​ເປັນ​ຕົ້ນ​ແມ່ນ ກ່ຽວ​ກັບວຽກງານການ​ສຶກສາ​ຮຽນ​ຮ່ວມ ​ແລະ ການ​ສຶກສາ​ຂອງ​ເດັກ​ພິການ​ທາງ​ຫູ ​ເພື່ອ​ເຮັດ​ໃຫ້​​ເດັກ​ໃນ​ກຸ່ມ​ດັ່ງກ່າວ ​ໄດ້​ຮັບ​ການ​ສຶກສາ​ທີ່​ດີ​ຂຶ້ນ, ​ເຊິ່ງ​ໃນ​ໄລຍະ​ຜ່ານ​ມາ ທາງ​ມູນ​ນິທິ​ ​ໄດ້​ມີ​ປະສົບ​ການ​​ໃນ​ການ​ຊ່ວຍ​ເຫຼືອ​ວຽກງານດ້ານການ​ສຶກສາ​ຂອງ​ຄົນ​ພິການ​ທາງ​ຫູຢູ່​ຫຼາຍ​ປະ​ເທດ​ໃນ​ເອ​ເຊຍ ​ເປັນຕົ້ນແມ່ນ ສສ ຫວຽດນາມ ​ແລະ ປະ​ເທດ​ຟີ​ລິບ​ປິນ ​ໂດຍ​ໄດ້​ປະສົບຜົນ​ສໍາ​ເລັດ​ໃນ​ການ​ສ້າງ​ລະບົບ​ການ​ສິດສອນ​ໃຫ້​ແກ່​ຄົນ​ພິການ​ທາງຫູ. ​ໃນ​ນັ້ນ, ຢູ່​ ສສ ຫວຽດນາມ ​ແມ່ນ​ນັບ​ແຕ່ຊັ້ນ​ອະນຸບານ ຫາ ມະຫາວິທະຍາ​ໄລແມ່ນສໍາ​ເລັດ​ໃນ​ການ​ສ້າງ​ລະບົບ​ການ​ສິດສອນ​ໃຫ້​ແກ່​ຄົນ​ພິການ​ທາງຫູ. ນອກຈາກນີ້, ທາງ​ມູນ​ນິທີ ​ຍັງ​ເຊື້ອ​ໝັ້ນ​ຕໍ່​ກັບ​ຄວາມ​ສາມາດ​ຂອງ​ຄົນ​ພິການ​ທາງ​ຫູ​.

      ສໍາລັບ ສປປ ລາວ ​​ແມ່ນ​ວັນ​ທີ 15 ມິຖຸນານີ້, ທາງ​ມູນ​ນິທິ ຈະ​ໄດ້​ໄປ​ຢ້ຽມຢາມ​​ສູນ ​ແລະ ​ໂຮງຮຽນ​ການ​ສຶກສາພິ​ເສດ ໃນ​ນະຄອນຫຼວງ​ວຽງ​ຈັນ ​ແລະ ​ຈະຄົ້ນຄວ້າສ້າງ​ຄູ​ສອນພາສາ​ມື​, ລະບົບ​ຫຼັກສູ​ດການ​ສິດສອນ ​ແລະ ສື່​ການ​ສິດ​ສອນ​ພາສາ​ມື.ຂະນະດຽວກັນ, ທ່ານ ນາງ ແສງເດືອນ ຫຼ້າຈັນທະບູນ ​ໄດ້​ກ່າວ​ສະ​ແດງ​ຄວາມ​ຂອບ​ໃຈ​ຕໍ່​ທາງ​ມູນ​ນິທິ ນິບປົງ ທີ່​ຢາກ​ຊ່ວຍ​ເຫຼືອ​ທາງ​ດ້ານ​ການສຶກສາຮຽນຮ່ວມ ແລະ ການສຶກສາຂອງເດັກພິການທາງຫູ. ພ້ອມກັນນີ້, ທາງ​ກະຊວງ​ສຶກສາ​ທິການ ​ແລະ ກິ​ລາ ຍັງ​ສະ​ເໜີ​ໃຫ້​ທາງ​ມູນ​ນິທິ​ ຊ່ວຍ​ເຫຼືອ​ກ່ຽວກັບ​ການສ້າງ​ຄູ​ສອນພາສາ​ມື​, ລະບົບ​ຫຼັກສູ​ດການ​ສິດສອນ, ສື່​ການ​ສິດ​ສອນ​ພາສາ​ມື ​ແລະ ອື່ນໆ ເພື່ອ​ເຮັດ​ໃຫ້​ເດັກ​ພິການທາງຫູ ​ໄດ້​ຮັບ​ການ​ສຶກສາທີ່​ດີເທົ່າ​ທຽບ​ກັບ​ເດັກນ້ອຍ​ປົກກະຕິ​ທົ່ວ​ໄປ.

ໂດຍ: ນາງ ຕຸ່ນ​ຄໍາ