ສຶກສາ

ສຶກສາ

Written by Super User

ວລ ປາກປ່າສັກ ສໍາ​ເລັດ​ບັ້ນ​ແຂ່ງຂັນ​ກິລາ-ສິລະ​ປະ​ວັນນະຄະດີ ສົກ 2017-2018

29251124 365178440630507 820601975 o   ​ວິທະຍາ​ໄລ​ເຕັກນິກ​ປາກ​ປ່າ​ສັກ ​ສໍາ​ເລັດ​ການ​​​ແຂ່ງຂັນ​ກິລາ-ສິລະ​ປະ​ວັນນະຄະດີ ​ແລະ ແຂ່ງຂັນ​ທັກ​ສະສີ​ມື​ແຮງ​ງານ​ພາຍ​ໃນ​ວິທະຍາ​ໄລ ​ ປະ​ຈໍາ​ສົກຮຽນ 2017-2018 ໃນ​ວັນ​ທີ 16 ມີນາ ຜ່ານ​ມາ ທີ່​ສະ​ໂມ​ສອນ​ວິທະຍາ​ໄລ​ດັ່ງກ່າວ, ໂດຍມີ ​ທ່ານ ສາຍ​ຄໍາ ພັນທະ​ວົງ ຜູ້​ອໍານວຍ​ການວິທະຍາ​ໄລ​ເຕັກນິກ​ປາກ​ປ່າ​ສັກ ພ້ອມ​ດ້ວຍ​ຄະນະ​ອໍານວຍ​ການ, ຄະນະ​ກໍາມະການ, ຄູ​-ອາຈານ ​ແລະ ນັກສຶກສາ​ເຂົ້າ​ຮ່ວມຢ່າງ​ພ້ອມພຽງ.

    ​ການແຂ່ງຂັນ​ຄັ້ງ​ນີ້, ກໍ່​ເພື່ອ​ອີງ​ຕາມ​ແຜນການ​ດໍາ​ເນີນ​ງານ​ ປະ​ຈໍາ​ສົກຮຽນ  2017-2018 ​​ໃຫ້​ເປັນ​ຂະ​ບວນທີ່​ຟົດ​ຟື້ນ ​ແລະ ​ເປັນ​ທີ່​ໜ້າ​​ເພິ່ງ​ພໍ​ໃຈ ໃນ​ການຈັດ​ຕັ້ງ​ການ​ເຄື່ອນ​ໄຫວ​ແຂ່ງຂັນ​ກິລາ-ສິລະ​ປະ​ວັນນະຄະ​ດີ​ຕົວ​ຈິງ, ​ເຊິ່ງການ​ແຂ່ງຂັນ​ໄດ້​ເລີ່​ມຈັດ​ມາ​ແຕ່​ວັນ​ທີ 1-16 ມີນາ 2018. ໃນນີ້ສະເພາະປະເພດກິລາປະກອບມີ: ​​ບານ​ສົ່ງຍິງ-ຊາຍ, ດຶງ​ເຊືອກຍິງ-ຊາຍ, ​ເປ​ຕັງຍິງ-ຊາຍ ​ແລະ ກະຕໍ້ຊາຍ ລວມມີ​ທັງ​ໝົດ 48 ທີ​ມ ​ໃນ 9 ພາກ​ວິຊາ, ມີ 424 ຄົນ, ຍິງ 192 ຄົນ. ສ່ວນ​ປະ​ເພດ​ສິລະ​ປະ​ວັນນະຄະ​ດີ ປະກອບ​ມີ 2 ລາຍ​ການ ຄື: ຟ້ອມລວມໝູ່ ​ແລະ ຮ້ອງ​ເພງ. ​ໃນ​ນັ້ນ, ຟ້ອມລວມໝູ່ ປະກອບ​ມີ 6 ທີ​ມ ​ແລະ ຮ້ອງ​ເພງ ມີ 10 ຄົນ ນັກ​ຮ້ອງ​ທີ່​ເປັນ​ຕົວ​ແທນ​ໃຫ້​ແຕ່​ລະ​ພາກ​ວິຊາ.

       ຜ່ານ​ການ​ແຂ່ງຂັນ​ປະ​ເພດ​ກິລາ ຜົນປາກົດ​ວ່າ ກິລາ​ບານ​ສົ່ງທີ​ມຊາຍ ອັນ​ດັບ 1 ​ໄດ້​ແກ່ທີ​ມ​ໂຮງ​ແຮມ-ທ່ອງ​ທ່ຽວ ແລະ ບານສົ່ງຍິງ ອັນດັບ 1 ທີ​ມ​ໄຟຟ້າ-​ເອ​ເລັກ​ໂຕຼນິກ. ສ່ວນ​ກິລາ​ດຶງ​ເຊືອກ  ທີ​ມຊາຍ-ທີ​ມຍິງ ອັນ​ດັບ​ 1 ​ທີ​ມ​ໄຟຟ້າ. ສໍາລັບ​ກິລາ​ເປ​ຕັງທີ​ມຊາຍ ອັນ​ດັບ​ 1 ​ທີ​ມໄຟຟ້າ ແລະ    ທີ​ມຍິງ​ ອັນ​ດັບ​ 1 ທີ​ມບໍລິຫານ​ທຸລະ​ກິດ ​ແລະ ກິລາ. ຂະນະທີ່ ​ກະຕໍ້​ຊາຍ ອັນ​ດັບ​ 1 ​ທີ​ມບໍລິຫານ​ທຸລະ​ກິດ.ສໍາລັບ​ປະ​ເພດ​ສິລະ​ປະ​ວັນນະຄະ​ດີ ຜົນປະກົດ​ວ່າ ຟ້ອມລວມໝູ່ ອັນ​ດັບ​ 1 ທີ​ມພາກ​ວິຊາ​ບໍລິຫານ​ທຸລະ​ກິດ (ມູນ​ເຊື້ອ​ຊາດ​ລາວ) ​ແລະ ຮ້ອງ​ເພງ ອັນ​ດັບ​ 1 ​ທ້າວ ຊອນ ອຸ່ນ​ໃຈ ຕົວ​ແທນ​ຈາກ​ພາກ​ວິຊາ​ອຸດສາຫະກໍາ ສາຂາ​ກໍ່ສ້າງ​ເຄຫະ​ສະຖານ.

​ໂດຍ: ນາງ ຕຸ່ນ​ຄໍາ

Written by Super User

ສະຫວັນນະເຂດ ເລັ່ງສ້າງນັກກິລາບານສົ່ງຮຸ່ນສືບທອດ ຮອງຮັບກິລານັກຮຽນ ທົ່ວປະເທດ 2020

29138096 365182890630062 1972325743 n   ​ພະ​ແນ​ກສຶກສາ​ທິການ ​ແລະ ກິລາ​ແຂວງ​ສະຫວັນ​ນະ​ເຂດ ​ເລັ່ງພັດທະນາ​ກິລາ​ບານ​ສົ່ງ​ພາຍ​ໃນແຂວງ ​ເພື່ອ​ສ້າງ​ເປັນນັກ​ກິລາ​ຮຸ່ນ​ສືບ​ທອດ ກະກຽມຮັບ​ໃຊ້​ໃນ​ການ​ເຂົ້າ​ຮ່ວມ​ງານ​ມະຫາກຳ​ກິລາ​ນັກຮຽນ​ມັດທະຍົມ​ສຶກສາ ທົ່ວ​ປະ​ເທດ ຄັ້ງທີ 7 ທີ່​ແຂວງ​ສາລະ​ວັນ ​ເປັນ​ເຈົ້າພາບ​ໃນ​ປີ 2020.ເມື່ອ​ວັນ​ທີ 19 ມີນາ ຜ່ານ​ມາ ທີ່ໂຮງຮຽນ​ມັດທະຍົມ​ສຶກສາອຸທຸມພອນ ເມືອງອຸທຸມພອນ ​ແຂວງ​ສະຫວັນ​ນະ​ເຂດ, ​ຂະ​ແໜງ​ກິລາ​ລະດັບ​ສູງ ພະ​ແນ​ກສຶກສາ​ທິການ ​ແລະ ກິລາ​ແຂວງ​ ​ໄດ້ລົງ​ເຝິກ​ແອບ​ເຕັກນິກ​ຂັ້ນ​ພື້ນຖານ​ໃຫ້​ແກ່​ນ້ອງໆ​ນັກຮຽນ ​ແລະ ນັກ​ກິລາຮຸ່ນ​​ສືບ​ທອດ​ທີ່​ເມືອງດັ່ງກ່າວ ​ເພື່ອ​ສ້າງ​ພື້ນຖານ​ໂຄງ​ລ່າງກິລາ​ບານ​ສົ່ງ ​ເລັ່ງພັດທະນາ​ນັກ​ກິລາ​ຂອງ​ແຂວງ ກຽມ​ຮັບ​ໃຊ້​ໃນ​ການ​ເຂົ້າ​ຮ່ວມ​ງານ​ມະຫາກຳ​ກິລາ​ນັກຮຽນ​ມັດທະຍົມ​ສຶກສາ ທົ່ວ​ປະ​ເທດ ຄັ້ງທີ 7 ທີ່​ແຂວງ​ສາລະ​ວັນ ກຽມ​ເປັນ​ເຈົ້າພາບ​ໃນ​ປີ 2020, ​​ໃຫ້​ກຽດ​ເຂົ້າ​ຮ່ວມ ​ແລະ ​ເປັນ​ວິທະຍາກອນ​ໂດຍ​ ທ່ານ ຊີງຕາໂລະ ຢາໂນະ ອາສາສະໝັກຈາກອົງການໄຈກາ, ທ່ານ ນາງ ແວວມະນີ ວັດຊະລະຈິດ ວິຊາ​ການຂະ​ແໜງ​ກິລາ​ລະດັບ​ສູງ ພະ​ແນ​ກສຶກສາ​ທິການ ​ແລະ ກິລາ​ແຂວງ​ສະຫວັນ​ນະ​ເຂດ ທັງ​ເປັນ​ຄູ​ເຝິກ​ກິລາ​ບານ​ສົ່ງ​ຂອງ​ແຂວງ​ສະຫວັນ​ນະ​ເຂດ ພ້ອມ​ດ້ວຍ​ຕາງ​ໜ້າຫ້ອງການ​ສຶກສາທິການ ແລະ ກິລາ​ເມືອງອຸທຸມພອນ, ຄະນະອຳນວຍການ​ໂຮງຮຽນ ມສ ອຸທຸມພອນ, ​ໂຮງຮຽນ​ມັດທະຍົມ​ສຶກສາ​ໄຊ​ຍະ​ເພັດ, ຄູ-ອາຈານ​ແລະ ນ້ອງໆ​ນັກຮຽນ ​ເຂົ້າ​ຮ່ວມ.

       ​ໂອກາດ​ນີ້, ທ່ານ ນາງ ແວວມະນີ ວັດຊະລະຈິດ ກ່າວ​ໃຫ້​ຊາບ​ວ່າ : ສຳລັບກິດຈະກຳ​ເຝິກ​ແອບ​ໃນ​ຄັ້ງ​ນີ້ ​ແມ່ນ​ເປັນ​ການ​ຮ່ວມ​ມື​ລະຫວ່າງ ຂະ​ແໜງ​ກິລາ​ລະດັບ​ສູງ ພະ​ແນ​ກສຶກສາ​ທິການ ​ແລະ ກິລາ​ແຂວງ​ສະຫວັນ​ນະ​ເຂດ ຮ່ວມ​ກັບ ອາສາສະໝັກຈາກອົງການໄຈກາ ​ແລະ ຫ້ອງການ​ສຶກສາທິການ ແລະ ກິລາເມືອງ 3 ​ແຫ່​ງ ປະກອບ​ມີ: ເມືອງອຸທຸມພອນ, ​ເມືອງຈຳພອນ ແລະ ​ເມືອງສອງຄອນ. ​ເຊິ່ງການ​ເຝິກ​ແອບ​ດັ່ງກ່າວ ​ແມ່ນ​ຈະ​ມີ​ຂຶ້ນ ລະຫວ່າງ​ວັນ​ທີ 19-23 ມີນາ 2018 ​ໂດຍ​ທາງ​ພວກ​ເຮົາ​ຈະ​ເລີ່​ມ​ເຝິກ​ແອບ​ຢູ່​ເມືອງອຸທຸມພອນ ​ໃນ​ລະຫວ່າງ​ວັນ​ທີ 19-20 ມີນາ 2018, ​ເມືອງ​ຈຳ​ພອນ ​ໃນ​ວັນ​ທີ 21-22 ມີນາ 2018 ​ແລະ ​ໃນ​ວັນ​ທີ 23 ມີນາ 2018 ຈະ​ລົງ​ໄປ​ທີ່​ເມືອງ​ສອງ​ຄອນ. ຈຸດປະສົງ​ໃນ​ການ​ເຝິກ​ແອບ​ໃຫ້​ຄັ້ງ​ນີ້ ​ແມ່ນ​ເພື່ອສືບຕໍ່ລົງເຝິກແອບເຕັກນິກພື້ນຖານສ້າງນັກກິລາບານສົ່ງຮຸ່ນສືບທອດ ກະກຽມໃສ່ງານກິລານັກຮຽນມັດທະຍົມສຶກສາ ທົ່ວປະເທດ ຄັ້ງທີ 7 ​ໃນປີ 2020 ທີ່ແຂວງສາລະວັນ ​ເປັນ​ເຈົ້າພາບ ​ແລະ ເປົ້າໝາຍໃນ​ການ​ພັດທະນາ​ດັ່ງກ່າວ ​ແມ່ນເລັ່ງໃສ່ 3 ເມືອງດັ່ງກ່າວ​ ​ໃຫ້​ມີ​ພື້ນຖານ​ທີ່​ດີ ກ່ອນ​ຈະ​ກ້າວ​ຂຶ້ນ​ໄປ​ເປັນນັກກິລາລະດັບແຂວງ ແລະ ລະດັບຊາດ ໃນອະນາຄົດ.

       ສຳລັບການ​ລົງ​ເຝິກ​ແອບ​ຢູ່​ທີ່​ເມືອງ​ອຸທຸມພອນ ​ແມ່ນ​ມີ​ນັກຮຽນ​ເຂົ້າ​ຮ່ວມ​ທັງ​ໝົດ 44 ຄົນ, ​ຍິງ 23 ຄົນ ທີ່​ມາ​ຈາກ ໂຮງຮຽນມັດທະຍົມ​ສຶກສາ​ອຸທຸມພອນ ​ແລະ ​ໂຮງຮຽນ​ມັດທະຍົມ​ສຶກສາ​ໄຊ​ຍະ​ເພັດ ​ແລະ ມີຄູ-ອາຈານ ນຳພາ​ເຂົ້າ​ຮ່ວມ​ຈຳນວນ 4 ທ່ານ ແລະ ຕາງໜ້າຫ້ອງການສຶກສາທິການ ແລະກິລາເມືອງ ລົງຕິດຕາມນຳ​ອີກ.

ອຳ​ໄພ​ວັນ

Written by Super User

 ສສກ ຖອດ​ຖອນ​ບົດຮຽນ​ວຽກ​ງານ​ຄົ້ນຄວ້າ-ສັງ​ລວມ ປີ 2017

29343010 185754455542760 5854716319156404224 o    ກະຊວງ​ສຶກສາ​ທິການ ​ແລະ ກິລາ (ສສກ) ຖອດ​ຖອນ​ບົດຮຽນ​ວຽກ​ງານ​ຄົ້ນຄວ້າ-ສັງ​ລວມ, ການ​ບໍລິຫານ​ຫ້ອງການ, ການຈັດ​ຕັ້ງ​ປະຕິບັດ​ຄໍາ​ຂວັນ 3 ດີ, ການ​ເປັນ​ເສນາ​ທິການ​, ການ​ປະສານ​ງານ​ ​ແລະ ການ​ບໍລິການ​ຮັບ​ໃຊ້​ເປັນ​ມື​ອາຊີບ​ທັນ​ສະ​ໄໝ​ທີ່​ດີ ປະ​ຈໍາປີ 2017 ໃນ​ລະ​ຫວ່າງ​ວັນ​ທີ 19-21 ມີນາ ຜ່ານ​ມາ ທີ່​ສະ​ໂມ​ສອນ​ໄຟຟ້າ ​ເມືອງ​ແກ້ວ​ອຸດົມ ​ແຂວງ​ວຽງ​ຈັນ, ໂດຍໃຫ້​ກຽດ​ເຂົ້າ​ຮ່ວມ​ຂອງ​ທ່ານ ນາງ ປອ. ດາລາ​ວອນ ກິດ​ຕິ​ພັນ ຮອງ​ຫົວໜ້າ​ຫ້ອງການ ກະຊວງ​ສຶກສາ​ທິການ ​ແລະ ກິລາ, ພ້ອມ​ດ້ວຍ​ຜູ້​ຮັບຜິດຊອບວຽກ​ງານຄົ້ນຄວ້າ-ສັງ​ລວມ, ວຽກ​ບໍລິຫານ​ຮັບ​ໃຊ້​ຫ້ອງການ ຈາກ​ຫ້ອງການ, ກົມ, ສະ​ຖາ​ບັນ, ສູນ ​ແລະ ພະ​ແນ​ກສຶກສາ​ທິການ ​ແລະ ກິລາ​ແຂວງ/ນະຄອນຫຼວງວຽງ​ຈັນ ​ເຂົ້າ​ຮ່ວມ 137 ທ່ານ.

      ​​

 

      ໂອກາດ​ດັ່ງກ່າວ, ທ່ານ ນາງ ດາລາ​ວອນ ກິດ​ຕິ​ພັນ ​ໄດ້​ລາຍ​ງານ​ໃຫ້​ຮູ້​ວ່າ: ກະຊວງ​ສຶກສາ​ທິການ ​ແລະ ກິລາ ​ໄດ້​ມອບ​ໃຫ້​ຫ້ອງການ​ກະຊວງ (ພະ​ແນ​ກຄົ້ນຄວ້າ-ສັງ​ລວມ) ​ເປັນ​ຈຸດ​ປະສານ​ໃນ​ການຈັດ​ຕັ້ງ​ປະຕິບັດ​ໂທລະສັບ​ສາຍ​ດ່ວນ​ຂອງ​ສະພາ​ແຫ່ງ​ຊາດ ​ແລະ ຂອງ​ລັດຖະບານ ​ໂດຍ​ປະສານ​ສົມທົບ​ກັບ​ບັນດາ​ຫ້ອງການ, ກົມ, ສະ​ຖາບັນ, ສູນ ​ແລະ ພະ​ແນ​ກສຶກສາ​ທິການ ​ແລະ ກິລາ​ແຂວງ/ນະຄອນຫຼວງ​ວຽງ​ຈັນ ​ໃນ​ການ​ຕອບ​ຂໍ້​ຊັກ​ຖາມ ​ແລະ ຄໍາ​ສະ​ເໜີ​ຂອງ​ປະຊາຊົນ​ບັນດາ​ເຜົ່າ. ຜ່ານ​ການຈັດ​ຕັ້ງ​ປະຕິບັດ​ໂທລະສັບ​ສາຍ​ດ່ວນ​ຂອງ​ສະພາ ​ແລະ ຂອງ​ລັດຖະບານ ກະຊວງ​ສຶກສາ​ທິການ ​ແລະ ກິລາ ​ເຫັນ​ໄດ້​ຄວາມ​ສໍາຄັນ​ຂອງ​ວຽກ​ງານ​ໂທລະສັບ​ສາຍ​ດ່ວນ ​ເນື່ອງ​ຈາກ​ວ່າ​ວຽກ​ງານ​ດັ່ງກ່າວ ກາຍ​ເປັນ​ຊ່ອງ​ທາງ​ໜຶ່ງ​ທີ່​ເປີດ​ໂອກາດ​ໃຫ້​ປະຊາຊົນ ກໍ່​ຄື ພະນັກງານ-ລັດຖະກອນ ​ໄດ້​ສະ​​ແດງ​ຄໍາ​ຄິດ​ຄໍາ​ເຫັນ ​ແລະ ຊັກ​ຖາມ ກ່ຽວ​ກັບ​ວຽກ​ງານ​ສຶກສາ ​ແລະ ກິລາ ​ໂດຍ​ກົງ. ພ້ອມດຽວ​ກັນ​ນັ້ນ, ວຽກ​ງານ​ສາຍ​ດ່ວນ​ຍັງ​ເປັນ​ເຄື່ອງມື​ໜຶ່ງ​ໃນ​ການ​ສະໜອງ​ຂໍ້​ມູນ ​ເພື່ອ​ໃຫ້​ສາມາດ​ຕິດຕາມ​ກວດກາ​ການ​ປະຕິບັດ​ວຽກ​ງານ​ຂອງ​ຂະ​ແໜງ​ສຶກສາ ​ແລະ ກິລາ ​ເພາະວ່າ​ເປັນ​ຂະ​ແໜງ​ການ​ທີ່​ໃຫຍ່, ​ເຊິ່ງອາດຈະ​ເຮັດ​ໃຫ້​ຕິດຕາມ​ກວດ​ກາ​ບໍ່​ທົ່ວ​ເຖິງ. ນອກຈາກ​ນັ້ນ, ​​ໃນ​ປີ 2017 ຂະ​ແໜງ​ສຶກສາ ​ແລະ ກິລາ ​ໄດ້​ຮັບ​ຂໍ້​ສັກ​ຖາມ​ຈາກ​ສາຍ​ດ່ວນ​ສະພາ​ແຫ່ງ​ຊາດ ຈໍານວນ 34 ຄໍາ​ຖາມ ​ແລະ ​ໄດ້​ປະສານ​ກັບ​ພາກສ່ວນ​ຕ່າງໆ ​ເພື່ອ​ຕອບ​ຄໍາ​ຖາມ​ດັ່ງກ່າວ, ພ້ອມ​ທັງ​ໄດ້​ເຜີຍ​ແຜ່​ຄໍາ​ຕອບ​ໃນ​ໜັງສືພິມ ສໍາ​ເລັດ​ຜົນ.

       ສໍາລັບ​ກອງ​ປະຊຸມດັ່ງ​ກ່າວ, ຍັງ​ໄດ້​ຮັບ​ຟັງ​ການ​ສະຫຼຸບວຽກ​ງານ​ການຈັດ​ຕັ້ງ​ປະຕີບັດ​ຄໍາ​ຂວັນ 3 ດີ, ວຽກງານຄຸ້ມ​ຄອງ ​ແລະ ການ​ບໍລິຫານຮັບ​ໃຊ້​ຫ້ອງການ​ຂອງ​ຂະ​ແໜງ​ການ​ສຶກສາ ​ແລະ ກິລາ ປະ​ຈໍາປີ 2017 ​ແລະ ທິດ​ທາງ​ແຜນການ ​ປີ 2018 ຈາກ​ບັນ​ກາ​ຫ້ອງການ, ກົມ, ສະ​ຖາ​ບັນ, ສູນ ​ແລະ ພະ​ແນ​ກສຶກສາ​ທິການ ​ແລະ ກິລາ​ແຂວງ/ນະຄອນຫຼວງ​ວຽງ​ຈັນ. ນອກຈາກ​ນັ້ນ, ຜູ້​ເຂົ້າ​ຮ່ວມ​ກອງ​ປະຊຸມ ຍັງ​ໄດ້​ປະກອບຄໍາ​ເຫັນ​ໃສ່​ຮ່າງ​ບົດ​ສະຫຼຸບ ​ແລະ ທິດ​ທາງ​ແຜນການ, ຮັບ​ຟັງ​ການ​ລາຍ​ງານ​ສະພາບ​ການຈັດ​ຕັ້ງ​ປະຕິບັດ​ວຽກ​ງານ​ສາຍ​ດ່ວນ ​ແລະ ວຽກ​ງານ​ສື່ສານ​ຂອງ​ພະ​ແນ​ກຄົ້ນຄວ້າ-ສັງ​ລວມ, ຮັບ​ຟັງ​ການ​ລາຍ​ງານ​ການແລກປ່ຽນບົດຮຽນວຽກ​ງານ 3 ດີ, ຮັບ​ຟັງ​ການ​ລາຍ​ງານ​ເອກະສານ​ຄວາມ​ເຂົ້າ​ໃຈ, ​ແຮງ​ບັນດານ​ໃຈ​ໃນ​ການ​ປະຕິບັດ​ງານ. ​ ຫຼັງ​ຈາກ​ນັ້ນ, ​ແບ່ງ​ກຸ່ມ​ຄົ້ນຄວ້າ​ເອກະສານ​ທັກສະ​ໃນ​ການ​ຂຽນ​ບົດ​ລາຍ​ງານ, ບົດ​ບັນທຶກ, ມະຕິ​ກອງ​ປະຊຸມ, ຜ່ານ​ຮ່າງ​ບົດ​ບັນທຶກ​ຜົນ​ສໍາ​ເລັດ​ຂອງ​ກອງ​ປະຊຸມ ​ແລະ ຮັບຮອງ​ເອົາ​ທິດ​ທາງ​ແຜນການ ປີ 2018 ​ແລະ ຫ້ອງການ​ກະຊວງ​ສຶກສາ​ທິການ ​ແລະ ກິລາ ຍັງ​ໄດ້​ມອບ​ຂອງ​ຂວັນ​ໃຫ້​ພາກສ່ວນ​ຕ່າງໆ ທີ່​ປະຕິບັດ​ໃນ​ການ​ສົ່ງ​ບົດ​ສະຫຼຸບ​ປະ​ຈໍາ​ເດືອນ​ເປັນ​ປົກກະຕິ ​ແລະ ທັນ​ກັບ​ກໍາ​ນົດ​ເວລາ ຄົບ​ຖ້ວນ 12 ​ເດືອນ.

ໂດຍ: ນາງ ຕຸ່ນ​ຄໍາ