ສຶກສາ

ສຶກສາ

Written by Super User

ກົມການສຶກສາກ່ອນໄວຮຽນ ສສກ ທົບທວນນິຕິກໍາຕ່າງໆທີ່ກ່ຽວຂ້ອງ

35134094 1433915523377262 8580076868961566720 n  ກົມ​ການ​ສຶກສາກ່ອນ​ໄວ​ຮຽນ ກະຊວງ​ສຶກສາ​ທິການ ​ແລະ ກິລາ (ສສກ) ​ໄດ້​ຈັດ​ກອງ​ປະຊຸມ​ທົບ​ທວນ​ນິຕິ​ກໍາ​ຕ່າງ​ໆ ​ເພື່ອຄົ້ນຄວ້າ​ກົດ​ໝາຍ, ດໍາລັດ, ບົດ​ແນະ​ນໍາ, ຂໍ້​ຕົກລົງ, ​ແຈ້ງ​ການ ​ແລະ ບົດ​ວິ​ໄຈ ທີ່​ກ່ຽວຂ້ອງ​ກັບ​ການ​ສຶກສາກ່ອນ​ໄວ​ຮຽນ. ພ້ອມ​ກັນ​ນີ້, ຍັງສົນທະນາ ​ແລະ ປະກອບ​ຄໍາ​ຄິດ​ຄໍາ​ເຫັນ​ໃສ່​ການ​ກໍານົດ​ຮ່າງ, ຫົວຂໍ້, ​ເນື້ອ​ໃນ​ຂອງ​ນະ​ໂຍບາຍ​ການ​ສຶກສາກ່ອນ​ໄວ​ຮຽນ.

ກອງ​ປະຊຸມ​ດັ່ງ​ກ່າວ, ​ໄດ້​ຈັດ​ຂຶ້ນເມື່ອວັນ​ທີ 11 ມິຖຸນາ ຜ່ານ​ມາ ທີ່​ຫ້ອງ​ປ​ະຊຸມ​ກະຊວງ​ສຶກສາ​ທິການ ​ແລະ ກິລາ, ​ໂດຍ​​ໃຫ້​ກຽດ​ເປັນ​ປະທານ​ຂອງ​ທ່ານ ຮສ.ປອ ຄໍາ​ຜາຍ ສີສະ​ຫວັນ ຮອງ​ລັດຖະມົນ​ຕີ ກະຊວງ​ສຶກສາ​ທິການ ​ແລະ ກິລາ, ມີ​ທ່ານ ປອ. ມີ​ທອງ ສຸວັນ​ວິ​ໄຊ ຫົວໜ້າ​ກົມ​ການສຶກສາ​ກ່ອນ​ໄວ​ຮຽນ ພ້ອມ​ດ້ວຍ​ຄະນະ, ຫົວໜ້າ​ຂະ​ແໜງ, ໜ່ວຍ​ງານ, ວິຊາ​ການ ​ແລະ ພະນັກງານ​ທີ່​ຮັບຜິດຊອບ​ວຽກ​ງານທີ່​ກ່ຽວ​ຂ້ອງ​ເຂົ້າ​ຮ່ວມ​ຢ່າ​ງພ້ອມພຽງ.

​ໃນກອງປະຊຸມ, ທ່ານ ນາງ ສີ​ພາ​ພອນ​ ມະນີ​ວັນ ຮອງ​ຫົວໜ້າ​ກົມ​ການ​ສຶກສາກ່ອນ​ໄວ​ຮຽນ ​ໄດ້​ສະ​ເໜີ​ແນວ​ຄວາມ​ຄິດ​ຂອງ​ການ​ພັດທະນາ​ນະ​ໂຍບາຍ​ການ​ສຶກສາກ່ອນ​ໄວ​ຮຽນ ​ໃນ​ສົກຮຽນ 2016-2017 ທົ່ວ​ປະ​ເທດ​ມີ​ສະຖານ​ການ​ສຶກສາກ່ອນ​ໄວ​ຮຽນ ທັງ​ໝົດ 3.056 ​ແຫ່ງ. ​ໃນ​ນັ້ນ, ​ເປັນ​ໂຮງຮຽນ​ລ້ຽງ​ເດັກ ​ແລະ ​ໂຮງຮຽນ​ອະນຸບານ​ລັດ 2.638 ​ແຫ່ງ, ​ໂຮງຮຽນ​ເອກະ​ຊົນ 417 ​ແຫ່ງ. ຖ້າ​ແບງອອກ​ກໍ່​ຈະ​ມີ​​ໂຮງຮຽນ​ອະນຸບານ 2.545 ​ແຫ່ງ, ​ໂຮງຮຽນ​ລ້ຽງ​ເດັກ ​ແລະ ​ໂຮງຮຽນ​ອະນຸບານ 443 ​ແຫ່ງ ​ແລະ ​ເປັນ​ໂຮງຮຽນ​ລ້ຽງ​ເດັກ​ສະ​ເພາະ​ມີ 68 ​ແຫ່ງ; ມີ​ຫ້ອງ​ກຽມ​ປະຖົມ​ຈໍານວນ 2.388 ຫ້ອງ, ຫ້ອງ​ດ່ຽວ 2.265 ຫ້ອງ ​ແລະ ຫ້ອງ​ຄວບ​ກັບ ປ1 ມີ​ຈໍານວນ 123 ຫ້ອງ; ມີ​ຈໍານວນ​ນັກ​ຮຽນ​ຊັ້ນ​ລ້ຽງ​ເດັກ ​ແລະ ອະນຸ​ບານ​ສຶກສາ​ ຈໍານວນ 214.000 ຄົນ. ​ໃນ​ນັ້ນ, ມີ​ເດັກ​ອາຍຸ 0-2 ປີ ຈໍານວນ 13.517 ຄົນ, ​ເດັກ​ອາຍຸ 3-4 ປີ ຈໍານວນ 96.985 ຄົນ, ​ເດັກ​ອາຍຸ 5 ປີ ຈໍານວນ 57.378 ຄົນ, ມີ​ຄູ​ສອນ​ໃນ​ຊັ້ນ​ລ້ຽງ​ເດັກ ​ແລະ ອະນຸບານ​ທັງ​ໝົດ 9.607 ຄົນ. ​ໃນ​ນັ້ນ, ຄູ​ລັດ​ 12.308 ຄົນ,​ ຄູ​ໃນ​ໂຮງຮຽນ​ເອກະ​ຊົນ 2.710 ຄົນ. ອັດຕາ​ການ​ເຂົ້າ​ຮຽນ​ຂອງ​ເດັກ ອາຍຸ 3-5 ປີ ບັນລຸ 52,2 ​ເປີ​ເຊັນ (​ເພີ່ມ​ຂຶ້ນ 1,6 ​ເປີ​ເຊັນ) ​ແລະ ​ເດັກ​ອາຍຸ 5 ປີ ບັນລຸ 74,4 ​ເປີ​ເຊັນ (​ເພີ່ມ​ຂຶ້ນ 4,4 ​ເປີ​ເຊັນ). ​ຢ່າງ​ໃດ​ກໍ່ຕາມ​,ຍັງ​ມີ 32 ​ເມືອງ ​ໃນ 7 ​ແຂວງ ທີ່​ມີ​ອັດຕາ​ເຂົ້າ​ຮຽນ​ຂອງ​ເດັກ 5 ປີຕໍ່າ​ກວ່າ 60 ​ເປີ​ເຊັນ. ​ເຖິງ​ແມ່ນ​ວ່າ ອັດ​ຕາ​ການ​​ເຂົ້າ​ຮຽນ​ຂອງ​ເດັກ​ໃນ​ຊັ້ນ​ອະ​ນຸບານ​ສຶກສາ​ໄດ້​ບັນລຸ​ຄາດໝາຍ ​ແຕ່​ບັນຫາ​ທີ່​ພົບ​ກໍ່​ຄື​ດ້ານ​ຄຸ​ນະພາບການ​ຮຽນ-​ການ​ສອນ​, ຄູ​ຍັງ​ບໍ່​ພຽງພໍ ​ແລະ ຫ້ອງ​ຮຽນກໍ່​ຍັງ​ບໍ່ພຽງພໍກັບຄວາມ​ຮຽກຮ້ອງ​ຕ້ອງການ. ພ້ອມ​ກັນ​ນັ້ນ, ວຽກລ້ຽງ​ເດັກ​ກໍ່​ຍັງ​ບໍ່​ທັນ​ໄດ້​ຮັບ​ການ​ເອົາ​ໃຈ​ໃສ່​ຈັດ​ຕັ້ງປະຕິບັດ.

      ສໍາລັບ​ແຜນ​ດໍາ​ເນີນ​ການ​ພັດທະນາ​ນະ​ໂຍບາຍ​ການ​ສຶກສາກ່ອນ​ໄວ​ຮຽນ ມີ​ເປົ້າ​ໝາຍ​ລວມ​ເພື່ອ​ສ້າງ​ນະ​ໂຍບາຍ​ວ່າ​ດ້ວຍ​ການ​ສຶກສາກ່ອນ​ໄວ​ຮຽນໃຫ້​ສາມາດ​ນໍາ​ໃຊ້​ໃນ​ຂອບ​ເຂດ​ທົ່ວ​ປະ​ເທດ. ທັງ​ນີ້, ​ກໍ່ເພື່ອ​ທົບ​ທວນຄືນ​ບັນ​ດາ​ນິຕິ​ກໍາ​ທີ່​ກ່ຽວຂ້ອງ​ສໍາລັບ​ການ​ສຶກສາ​ກ່ອນ​ໄວ​ຮຽນ, ສ້າງ​ນະ​ໂຍບາຍ​ວ່າ​ດ້ວຍ​ການ​ສຶກສາກ່ອນ​ໄວ​ຮຽນ, ຮັບຮອງ ​ແລະ ​ເຜີຍ​ແຜ່​ນະ​ໂຍບາຍ​ວ່າ​ດ້ວຍ​ການ​ສຶກສາ​​ກ່ອນ​ໄວ​ຮຽນ. ສໍາລັບ​ເນື້ອ​ໃນ ​ແມ່ນ​ຄົ້ນຄວ້າ​ເອກະສານ​ນິຕິ​ກໍາ​ທີ່​ກ່ຽວຂ້ອງ, ສ້າງ​ນະ​ໂຍບາຍ​ວ່າ​ດ້ວຍ​ການ​ສຶກສາກ່ອນ​ໄວ​ຮຽນ, ສະ​ເໜີ​ຜ່ານ ​ປັບປຸງ ​ແລະ ຮັບຮອງ, ​ດໍາ​ເນີນ​ການ​ຂໍອະນຸມັດ​ນໍາ​ໃຊ້ ​ແລະ ​ເຜີຍ​ແຜ່​ນະ​ໂຍບາຍ. ສ່ວນ​ຄາດ​ຄະ​ເນ​ຜົນ​ໄດ້​ຮັບ ​ແມ່ນ​ມີ​ບົດ​ສະຫຼຸບ​ການ​ຄົ້ນຄວ້າ​ເອກະສານ​ນິຕິ​ກໍາ​ກ່ຽວ​ກັບ​ການ​ສຶກສາ​ກ່ອນ​ໄວ​ຮຽນ, ມີ​ຮ່າງ​ນະ​ໂຍບາຍ​ວ່າ​ດ້ວຍ​ການ​ສຶກສາກ່ອນ​ໄວ​ຮຽນ ​ໄດ້​ຮັບຮອງ ​ແລະ ປະກາດ​ໃຊ້ ​ແລະ ​ເຜີຍ​ແຜ່​ນະ​ໂຍບາຍ​ວ່າ​ດ້ວຍ​ການ​ສຶກສາກ່ອນ​ໄວ​ຮຽນ.

      ສໍາ​ລັບ​ກອງ​ປະຊຸມ​ຄັ້ງ​ນີ້, ​ໄດ້​ດໍາ​ເນີນ​ເປັນ​ເວລາ 2 ວັນ ​ໂດຍ​​ໄດ້​ມີ​ການສະ​ເໜີ​ນິຕິ​ກໍາທີ່​ກ່ຽວຂ້ອງ​ກັບ​ການ​ສຶກສາ​ກ່ອນ​ໄວ​ຮຽນ; ຄົ້ນຄວ້າ​ນິຕິ​ກໍາ​ທີ່​ກ່ຽວຂ້ອງ​ກັບ​ການ​ສຶກສາກ່ອນ​ໄວ​ຮຽນ ​ໂດຍ​ສະ​ເພາະ​ແມ່ນ ສະ​ເໜີ​ຂອບ​ການ​ຄົ້ນຄວ້າ​ເອກະສານ, ສະ​ເໜີ​ຮ່າງ​ບັນທຶກ​ເນື້ອ​ໃນ​ການ​ຄົ້ນຄວ້າ, ​ແນະ​ນໍາ​ວິທີ​ຄົ້ນຄວ້າ ​ແລະ ສະ​ເໜີ​ກຸ່ມ​ຄົ້ນຄວ້າ; ສົນທະນາ​ປະກອບ​ຄໍາ​ຄິດ​ຄໍາ​ເຫັນ ​ແລະ ສະ​ເໜີ​ແຜນ​ສືບ​ຕໍ່​ປະຕິບັດ​ກິດ​ຈະ​ກໍາ​ການ​ພັດທະນາ​ນະ​​ໂຍບາຍ​ການ​ສຶກສາກ່ອນ​ໄວ​ຮຽນ​.

(ບຸນ​ທະວີ)

Written by Super User

ຄະນະພັກຮາກຖານ ວລ ສັບພະວິຊາ ປະເມີນໜ່ວຍພັກແຂງ-​ຮູ້ນໍາພາຮອບດ້ານ 2017

35241126 1433915356710612 480234423808163840 n   ຄະນະ​ພັກ​ຮາກ​ຖານ ວິທະຍາ​ໄລ (ວລ) ເຕັກນິກ ສັບ​ພະ​ວິຊາ ​ໄດ້ຈັດ​ກອງ​ປະຊຸມ​ປະ​ເມີນ​ການ​ກໍ່ສ້າງ​ໜ່ວຍ​ພັກ​ເຂັ້ມ​ແຂງ-​ຮູ້​ນໍາພາ​ຮອບດ້ານ ປະ​ຈໍາປີ 2017 ​ແລະ ຜ່ານທິດ​ທາງ​ແຜນການ​ປະ​ຈໍາປີ 2018 ເມື່ອ​ວັນ​ທີ 8 ມິຖຸນາ ຜ່ານ​ມາ ທີ່​ຫ້ອງ​ປະຊຸມວິທະຍາ​​ໄລດັ່ງກ່າວ​, ​ໂດຍ​​​ເປັນ​ກຽ​ດ​ເຂົ້າ​ຮ່ວມ​ຂອງ​ສະຫາຍ ພູທອນ ສິລິ​ອຸດົມ ຮອງ​ຫົວ​ໜ້າ​ຫ້ອງ​ການຄະນະ​ພັກ ກະຊວງ​ສຶກສາ​ທິການ ​ແລະ ກິລາ, ສະຫາຍ ພົງ​ສະຫວັນ ອ້ວນ​ປໍ​ມະນີ ​ເລຂາ​ຄະນະ​ພັກ​ຮາກ​ຖານ ວິ​ທະຍາ​ໄລ​ ເຕັກນິກ​ ສັບ​ພະ​ວິຊາ ​ແລະ ສະຫາຍ ສຸກ​ສະຫວັນ ສີ​ນຸວົງ ປະທານ​ກວດ​ກາ ຄະນະ​ພັກ​ຮາກ​ຖານ ວິທະຍາ​ໄລ ​ເຕັກ​ນິກສັບພະ​ວິຊາ, ພ້ອມ​ດ້ວຍ​​ເລຂາ-​ຮອງ​ເລຂາ​ໜ່ວຍ​ພັກ, ຄະນະ​ປະ​ເມີນ​ຈາກ​ກະຊວງ​ສຶກສາ​ທິການ ​ແລະ ກິລາ, ສະມາຊິ​ພັກສົມບູນ ​ແລະ ສໍາຮອງ​ຢ່າງ​ພ້ອມພຽງ.

      ​​ໂອກາດ​ດັ່ງກ່າວ, ສະຫາຍ ສຸກ​ສະຫວັນ ສີ​ນຸວົງ​ ​ໄດ້​ຜ່ານ​ບົດ​ສະຫຼຸ​ບການ​ກໍ່ສ້າງ​ໜ່ວຍ​ພັກ​ເຂັ້ມ​ແຂງ-​ຮູ້​ນໍາພາ​ຮອບດ້ານ ປະ​ຈໍາປີ 2017 ຂອງ​ຄະນະ​ພັກ​ຮາກ​ຖານ ວິທະຍາ​ໄລ​ ເຕັກນິກ​ ສັບພະ​ວິຊາ ​ເປັນ​ຕົ້ນ​ແມ່ນ​ຕີ​ລາຄາ​ດ້ານ​ດີ ​ແລະ ດ້ານ​ອ່ອນ ຂໍ້ຄົງຄ້າງ​ການ​ເຄື່ອ​ນ​ໄຫ​ວນໍາພາ ຫຼື​ ກໍ່ສ້າງ​ໜ່ວຍ​ພັກ​ແຂງ 4 ດ້ານ​ ຄື: ດ້ານ​ການ​ເມືອງ, ​ດ້ານ​ແນ​ວຄິດ, ດ້ານ​ການຈັ​ດຕັ້ງ ​ແລະ ດ້ານ​ແບບ​ແຜນ​ວິທີ​ນໍາພາ; ຕີ​ລາຄາ​ຜົນ​ໄດ້​ຮັບ​ດ້ານ​ດີ ​ແລະ ດ້ານ​ອ່ອນ ​ຂໍ້ຄົງຄ້າງ​ການ​ນໍາພາ​ຂອງ​ໜ່ວຍ​ພັກຕາມ 5 ​ເນື້ອ​ໃນ ຮູ້​ນໍາພາ​ຮອບດ້ານ ຄື: ຮູ້​ນໍາພາ​ດ້ານ​ການ​ເມືອງ-​ແນວ​ຄິດ; ຮູ້​ນໍາພາ​ດ້ານວິຊາ​ສະ​ເພາະ, ການ​ພັດທະນາ​ເສດຖະກິດ, ວັດທະນະ​ທໍາ-​ສັງຄົມ​ຕາມ​ໜ້າ​ທີ່​ການ​ເມືອງ​ຂອງ​ແຕ່ລະ​ປະ​ເພດ​ໜ່ວຍ​ພັກ; ຮູ້​ນໍາພາ​ປັບປຸງ​ອໍານາດ​ປົກຄອງ, ບັນ​ດາ​ອົງການ​ການຈັດ​ຕັ້ງ​ມະຫາຊົນ; ຈັດ​ຕັ້ງ​ນໍາພາ​ວຽກ​ງານ​ປ້ອງ​ກັນຊາ​ດ-ປ້ອງ​ກັນ​ຄວາມ​ສະຫງົບ​ໃຫ້​ມີ​ຄວາມ​ໜັກ​ແໜ້ນ​ເຂັ້ມ​ແຂງ ​ແລະ ການ​ປັບປຸງ​ກໍ່ສ້າ​ງພາຍ​ໃນ​ພັກ ​ແລະ ກໍ່ສ້າງ​ພະນັກງານ​ທີ່ຢູ່​ໃນ​ຄວາມ​ຮັບຜິດຊອບ​ຂອງ​ຄະນະ​ພັກ​ຮາກ​ຖານ. ສ່ວນ​ການ​ຕີ​ລາຄາ​ ແມ່ນສາມາດ​ບັນລຸ​ໄດ້ 93,63 ​ເປີ​ເຊັນ ​ແລະ ບັນລຸ​ໄດ້​ມາດ​ຖານ​ໜ່ວຍ​ພັກ​ເຂັ້ມ​ແຂງ-​ຮູ້​ນໍາພາ​ຮອບດ້ານ.ສໍາລັບ​ທິດ​ທາງ​ແຜນການ​ກໍ່ສ້າງ​ຮາກ​ຖານ​ພັກ​ເຂັ້ມ​ແຂງ-​ຮູ້​ນໍາພາ​ຮອບ​ດ້ານ​ປີ 2018 ​ແມ່ນ​ຈະ​ສ້າງ​ໃຫ້​ໜ່ວຍ​ພັກ​ມີ​ຄວາມ​ເຂັ້ມ​ແຂງ, ມີ​ຄວາມ​ເປັນ​ເອກະ​ພາບ, ນໍາພາ​ສ້າງ​ໜ່ວຍ​ພັກຮູ້​ນໍ​າພາ​ຮອບດ້ານ​ໃນ​ແຕ່ລະ​ດ້ານ​ໄດ້​ຕາມ​ຄາດໝາ​ຍ 90 ​ເປີ​ເຊັນ; ສ້າງ​ໜ່ວຍ​ພັກ​ມີ​ຄວາມ​ປອດ​ໃສ​ ເຂັ້ມ​ແຂງ ​ໜັກ​ແໜ້ນ​ໃຫ້​ບັນລຸ​ຄາດໝາຍ 90 ​ເປີ​ເຊັນຂຶ້ນ​ໄປ ​ແລະ ຕັ້ງໜ້າ​ສູ້​ຊົນ​ປະຕິບັດໜ້າ​ທີ່​ໃນ​ແຕ່​ລະ​ດ້ານ​ໃຫ້​ບັນລຸ​ຄາດໝາຍ 90 ​ເປີ​ເຊັນຂຶ້ນ​ໄປ.

(ບຸນທະວີ)

Written by Super User

ລັດ​ຢຶນຢັນການ​ຊົດ​ເຊີຍ​ຜົນກະທົບໃນໂຄງການສ້າງ​ທາງ​ດ່ວນແຕ່ນະຄອນຫລວງ​ວຽງຈັນ-ບໍ່​ເຕັນ ຈະໃຫ້​ເຫມາະ​ສົມ

  35328252 1433915503377264 1340048080027779072 nທ່ານ ບຸນ​ຈັນ ສິນ​ທະ​ວົງ ລັດຖະມົນຕີ​ກະຊວງໂຍທາ​ທິການ ​ແລະ ຂົນ​ສົ່ງ ​ໄດ້​ລາຍ​ງານ​ກ່ຽວກັບ​ວຽກງານ​ຊົດ​ເຊີຍ​ສິ່ງ​ກິດ​ຂວາງຕ່າງໆຕາມ​ແລວໂຄງການກໍ່ສ້າງເສັ້ນ​ທາງດ່ວນ​ແຕ່ນະຄອນຫລວງ​ວຽງຈັນຫາບໍ່​ເຕັນ (ຊ່ວງ​ທີ 1 ​ແຕ່ນະ ຄອນຫລວງ​ວຽງຈັນ-ວັງ​ວຽງ) ຕໍ່ກອງປະຊຸມສະພາແຫ່ງຊາດທີ່ດໍາເນີນໃນປັດຈຸບັນ​ນີ້​ວ່າ: ກຸ່ມ​ບໍລິສັດ​ກໍ່ສ້າງ​-ລົງທຶນ ​ແລະ ຖື​ຮຸ້ນ​ຈຳກັດ ​ແຂວງຢູນນານ ສປ ຈີນ ​ໄດ້​​ຈ້າງບໍລິສັດທີ່​ປຶກສາ​ສິ່ງ​ແວດ​ລ້ອມ​ລາວ ​ຈຳກັດ ເພື່ອຮ່ວມ​ກັບ​ອົງການ​ປົກຄອງ​ແຂວງວຽງຈັນ ​ແລະ ນະຄອນຫລວງ​ວຽງຈັນ ໃນການຄິດໄລ່ຄ່າຊົດ​ເຊີຍ​ສິ່ງ​ກີດ​ຂວາງຕ່າງໆ. ມາຮອດປັດຈຸບັນ ​ໄດ້​ລົງກວດກາ​ແຕ່​ລະ​ບ້ານລວມມີ​ທັງໝົດ 65 ບ້ານໃນ 4 ​ເມືອງ. ​ໃນ​ນັ້ນຢູ່​ແຂວງວຽງຈັນ​ກວມ 3 ​ເມືອງມີ 40 ບ້ານ ​ແລະ ນະຄອນຫລວງ​ວຽງຈັນກວມ 1 ​ເມືອງ, ມີ 25 ບ້ານ ​ແລະ ​ໄດ້​ຄົ້ນຄວ້າ​ກ່ຽວກັບ​ລາຄາ​ຫົວໜ່ວຍ​ໄກ່​ເກ່ຍຂອງ​ແຂວງວຽງຈັນ ​ແລະ ນະຄອນ​ຫລວງ​ວຽງຈັນ, ຜູ້​ທີ່​ຖືກ​ຜົນ​ກະທົບ​ຮ່ວມ​ກັບຄະນະ​ກຳມະການ​ໄກ່​ເກ່ຍຂອງ​ທັງ​ສອງ​ແຂວງ ​ແລະ ໄດ້​ພິຈາລະນາອອກ​ຂໍ້​ຕົກລົງ​ວ່າ​ດ້ວຍການ​ຮັບຮອງ​ເອົາ​ລາຄາ​ຫົວໜ່ວຍຊົດ​ເຊີຍຜົນ​ກະທົບ​ໂຄງການ​ກໍ່ສ້າງ​ທາງ​ດ່ວນໃນຊ່ວງດັ່ງກ່າວ ​ແລະ ຄາດ​ວ່າຈະ​ທົດ​ແທນ​ຄືນ​ໃນ​ໄວໆນີ້ ແລະ ​ໃນ​ວັນ​ທີ 11 ມິຖຸນານີ້, ທ່ານ ອານຸພາບ ຕຸ​ນາ​ລົມ ປະທານ​ສະພາ​ປະຊາຊົນນະຄອນຫລວງ​ວຽງຈັນ​ໄດ້​ໃຫ້​ສຳພາດ​ ກ່ຽວກັບ​ການ​ຊົດ​ເຊີຍ​ຜູ້​ໄດ້​ຮັບ​ຜົນ​ກະທົບ​ການກໍ່ສ້າງ​ທາງ​ດ່ວນ​ດັ່ງກ່າວວ່າ: ນະ​ໂຍບາຍຊົດ​ເຊີຍ​ຜູ້​ໄດ້​ຮັບ​ຜົນ​ກະທົບໃນ​​ໂຄງການ​ທາງ​ດ່ວນນະຄອນຫລວງ​ວຽງຈັນ-ບໍ່​ເຕັນ ​ແມ່ນ​ເປັນ​ບັນຫາ​ສຳຄັນ, ​ເນື່ອງ​ຈາກ​ເປັນ​ໂຄງການ​ໃຫຍ່ ​ແລະ ຜູ້​ໄດ້​ຮັບ​ຜົນ​ກະທົບ​ກໍ​ມີຫລາຍ, ສະ​ນັ້ນທາງສະພານະຄອນຫລວງ​ວຽງຈັນກໍ​ໄດ້​ເອົາ​ໃຈ​ໃສ່​ໃນ​ການ​ລົງ​ຊີ້ນຳ​ໃຫ້​ສັງຄົມ​ເຂົ້າ​ໃຈ ​ແລະ ການ​ຊົດ​ເຊີຍກໍ​ອາດ​ແບ່ງ​ເປັນ 2 ແບບຄື: ຊົດ​ເຊີຍ​ດ້ວຍ​ເງິນ ​ແລະ ການ​ເວນ​ຄືນທີ່​ດິນ, ພ້ອມ​ທັງ​ຈັດ​ສັນພຶ້ນທີ່​ໃຫ້, ​ຊຶ່ງ​ບັນຫາ​ດັ່ງ​ກ່າວ, ລັດຖະບານ​ຈະ​ໃຫ້ການ​ຊົດ​ເຊີຍ​ຜູ້​ໄດ້​ຮັບ​ຜົນ​ກະທົບ​ຢ່າງ​​ເຫມາະສົມ ແລະ ເມື່ອ​ສະພາ​ແຫ່ງ​ຊາດ​ເຫັນ​ດີຕໍ່​ຮ່າງ​ນະ​ໂຍບາຍ​ຊົດ​​ເຊີຍ​ໃຫ້​ແກ່​ປະຊາຊົນທີ່​ຖືກ​ຜົນ​ກະທົບ​ຈາກ​ໂຄງການ​ກໍ່ສ້າງ​ທາງ​ດ່ວນແຕ່ນະຄອນຫລວງ​ວຽງຈັນຫາບໍ່​ເຕັນແລ້ວ ກໍ​ພ້ອມ​ຈະ​ດຳ​ເນີນ​ການທັນທີ.

ເສດຖະກິດ-ສັງຄົມ