ສຶກສາ

ສຶກສາ

Written by Super User

ອີ​ຢູ ຮ່ວມມືກັບ ລົດຖີບແຫ່ງຊາດ ຈັດ​ຖີບ​ລົດ​ເພື່ອ​ສຸຂະພາບ ສະຫຼອງ​ວັນ​ສັບປະ​ດາ​ການ​ປ່ຽນ​​ແປງ​ດິນ​ຟ້າ​ອາກາດ

 35065582 1431777160257765 6504965369814319104 n   ສະຫະພາບຢູໂຣບ ຫຼື ​ອີ​ຢູ ປະຈຳ​ສປປ ລາວ ຮ່ວມ​ກັບ ສະຫະພັນ​ລົດຖີບ​ແຫ່ງ​ຊາດລາວ ຈັດ​ກິດຈະກຳ​ຖີບ​ລົດ​ມິດຕະພາບ ​ເສີມ​ສ້າງ​ສຸຂະພາບ​​ໃຫ້​ມວນ​ຊົນ​ຊາວ​ນະຄອນຫຼວງ​ວຽງ​ຈັນ ​ເວົ້າ​ລວມ, ​ເວົ້າ​ສະ​ເພາະ​ແມ່ນ​ນັກ​ກິລາ​ຖີບ​ລົດ​ລາວ ​ໃຫ້ມີ​ສຸຂະພາບແຂງ​ແຮງ ​ແນ​ໃສ່ສ້າງ​ຂະ​ບວນການສະ​ເຫຼີ​ມ ສະຫຼອງ​ວັນ​ສັບປະດາ​ການ​ປ່ຽນ​ແປງ​ດິນ​ຟ້າ​ອາກາດ ​ໃຫ້​ມີ​ບັນຍາກາດຟົດຟື້ນ, ເບີກບານມ່ວນຊື່ນ ແລະ ມີຄວາມໝາຍສຳຄັນເລິກເຊິ່ງ.

      ກິດຈະກຳ​ຄັ້ງ​ນີ້ ​ແມ່ນ​ໄດ້​ມີ​ຂຶ້ນ ​ເມື່ອ​ວັນ​ທີ 9 ມິ​ຖຸນາ ຜ່ານ​ມາ ທີ່ຜາມ​ສວນສະຫຼອງ​ໄຊ ​ເຈົ້າ​ອານຸວົງ ​(​ແຄມ​ຂອງ) ເມືອງ​ຈັນທະ​ບູລີ ນະຄອນຫຼວງ​ວຽງ​ຈັນ, ​ໂດຍ​ໃຫ້​ກຽດ​ເຂົ້າ​ຮ່ວມ​ເປັນ​ປະທານ​ຂອງ ທ່ານ ລີ​ໂອ ຟາ​ເບີ້ ​ເອກ​ອັກ​ຄະ​ລັດ​ຖະທູດ ອົງການ​ອີ​ຢູ ປະຈຳ ສປປ ລາວ, ມີ​ທ່ານ ຄຳ​ໄດ ​ແກ້ວມະນີ ຮອງ​ປະທານ ​ທັງ​ເປັນ​ຜູ້​ປະຈຳການ​ສະຫະພັນ​ລົດຖີບ​ແຫ່ງ​ຊາດ​ລາວ ພ້ອມ​ດ້ວຍ​ຄະນະ​ບໍລິຫານ​ງານສະຫະພັນ, ພະນັກງານ​ອົງການ​ອີ​ຢູ, ຊາວ​ຕ່າງຊາດ​ຈາກປະ​ເທດຕ່າງໆ​ໃນ​ທົ່ວ​ໂລກ ທີ່​ມາ​ປະຕິບັດ​ໜ້າ​ທີ່ຢູ່​ລາວ ຕະຫຼອດ​ຮອດນັກ​ກິລາ​ລົດຖີບລະດັບ​ທີ​ມຊາດ ​​ແລະ ສະໝັກ​ຫຼິ້ນ​ອ້ອມ​ຂ້າງ​ສູນ​ກາງ​ເຂົ້າ​ຮ່ວມຢ່າງ​ຫຼວງ​ຫຼາຍ.

       ກ່ອນ​ຈະ​ມີ​ການ​ປ່ອຍ​ຕົວ​ຂະ​ບວນລົດຖີບ ​ເພື່ອ​ສ້າງ​ຂະ​ບວນການສະ​ເຫຼີ​ມສະຫຼອງ ​ສັບປະດາ​ການ​ປ່ຽນ​ແປງ​ດິນ​ຟ້າ​ອາກາດ ປະຈຳ​ປີ 2018 ຈະ​ເລີມ​ຂຶ້ນ, ທ່ານ ລີ​ໂອ ຟາ​ເບີ້ ກ່າວ​ວ່າ: ກິດຈະກຳ​ຖີບ​ລົດ​ເພື່ອ​ສົ່ງ​ເສີມ​ໃຫ້​ພໍ່-​ແມ່​ປະຊາຊົນ​ຊາວ​ລາວ ກໍ່​ຄື ຊາວ​ນະຄອນຫຼວງ​ວຽງ​ຈັນ ​ແລະ ບັນດາ​ຊາວ​ຕ່າງ​ຊາດ​ຈາກ​ປະ​ເທດ​ຕ່າງໆ ທີ່​ໄດ້​ມາ​ດຳລົງ​ຊີວິດ​ເພື່ອ​ປະຕິບັດ​ໜ້າ​ທີ່ວຽກ​ງານຂອງ​ຕົນຢູ່​ສປປ ລາວ ​ເປັນ​ກິດຈະກຳ​ໜຶ່ງ​ທີ່​ຈັດ​ຂຶ້ນ​ຄື​ກັບ​ທຸກໆ​ປີ ​ເພື່ອ​ສ້າງ​ຂະ​ບວນການສະຫຼອງວັນ​ສັບປະດາ​ການ​ປ່ຽນ​ແປງ​ດິນ​ຟ້າ​ອາກາດ ​ໃຫ້​ມີ​ຄວາມ​ໝາຍ​ຢ່າງ​ເລິກ​ເຊິ່ງ ສະ​ນັ້ນ ຂໍ​ໃຫ້​ພໍ່​-​ແມ່​ປະຊາຊົນ​ຊາວ ​ແລະ ຊາວ​ຕ່າງປະ​ເທດ ຈົ່ງ​ພ້ອມພຽງ​ກັນ​ປະກອບສ່ວນ​ເຫືອ​ແຮງ​​​ເຮັດ​ໃຫ້​ກິດຈະກຳ​ຄັ້ງ​ນີ້ ດຳ​​ເນີນ​ໄປ​ດ້ວຍ​ຜົນສຳ​ເລັດ​ຢ່າງ​ຈົບງາມ.

      ກິດຈະກຳ​ຖີບ​ລົດ​ມິດຕະພາບ ​ເພື່ອ​ສຸຂະພາບ ​​ແລະ ສ້າງ​ຄວາມ​ສາມັກ​ຄີ​ໃນລາຍການ​ດັ່ງກ່າວ ມີ​ນັກ​ກິລາ​ລົດຖີບ​ລະດັບ​ຊາດ ​ແລະ ທີ​ມຊາດ ​ຕະຫຼອດຮອດ​ມື​ສະມັກ​ຫຼິ້ນ​ເຂົ້າ​ຮ່ວມ​ 520 ຄົນ, ຍິງ 150 ຄົນ ​ໃຫ້​ກຽດ​ຖື​ທຸງຊາດ​ລາວ​ປ່ອຍ​ຂະ​ບວນລົດ​ຂອງ​ທ່ານ ລັດສະໝີ ສູນ​ດາລາ ​ເລຂາທິການ​ສະຫະພັນ​ລົດຖີບ​ແຫ່ງ​ຊາດ​ລາວ ສຳລັບ​ໄລຍະ​ທາງ​ໃນ​ກາ​ນຖີບ​ລົດ 20 ກິ​ໂລ​ແມັດ ຈາກ​ສວນ​ສະຫຼອງ​ໄຊ​ເຈົ້າ​ອານຸວົງ ​ໄປ​ທາງ​ຫຼັກ 10 ​ໄຟ​ແດງ​ບ້ານໜອງ​ໄຮ ​ເມືອງ​ຫາດ​ຊາຍ​ຟອງ ຜ່ານ​ທາງ​ໂຮງໝໍ​ເຊ​ດຖາ​ທິຣາດ ບ້ານ​ດອນ​ກອຍ ​ເມືອງ​ສີ​ສັດຕະ​ນາກ ຜ່ານ​ໄຟ​ແດງ​ໄອ​ເຕັກ ລ້ຽວ​​ໄຟ​ແດງໄປ​ທາງ​ທາດຫຼວງ ຜ່ານ​ທາງ​ໜອງ​ສະພັງ​ເລັນ​ ​ແລະ ຜ່ານ​​ໄຟ​ແດງ​ໜອງ​ບອນ ອອກ​ມາ​ວົງວຽນ​ຫໍ​ມູນ​ເຊື້ອ​ກອງທັບ ກ່ອນ​ຈະ​ໄປ​ຢຸດ​ທີ່​ສວນ​ປະຕູ​ໄຊ ​ເພື່ອ​ຮ່ວມ​ຖ່າຍຮູບ​ເປັນ​ທີ່​ລະນຶກ.

​ໂດຍ ສົງການ

Written by Super User

ທີ​ວີ​ລາວ ຮ່ວມມືຫຼາຍພາກສ່ວນ ຮັບສັນຍານຖ່າຍທອດສົດ ບານ​ໂລກ 2018 ມອບ​ຄວາມສຸກ​ໃຫ້​ແຟນບານລາວ

35102442 1431777150257766 3131552103957266432 n   ສະຖານີ​ໂທລະພາບ​ ທີ​ວີ​ລາວ ຮ່ວມ​ກັບ​ຫຼາຍ​ພາກສ່ວນ ​ໄດ້​ຮັບ​ລິກຂະ​ສິດ​ສັນຍານການຖ່າຍ​ທອດ​ສົດການ​ແຂ່ງ​ຂັນກິລາ​ເຕະບານ​ໂລກ 2018 ທີ່​ປະ​ເທດ​ຣັດ​ເຊຍ ຮັບ​ກຽດ​ເປັນ​ເຈົ້າພາບ ລະ​ຫວ່າງວັນ​ທີ 14 ມິ​ຖຸ​ນາ ຫາ 15 ກໍ​ລະ​ກົດ 2018 ຕັ້ງ​ແຕ່ນັດ​ທຳ​ອິດ ​ຈົນ​ເຖິງ​ນັດ​ຊີງ​ຊະ​ນະ​ເລີດ ລວມທັງ​ໝົດ 64 ນັດ ​ເພື່ອ​ມອບ​ຄວາມສຸກ​ໃຫ້​ແຟນບານ​ຊາວ​ລາວ ​ແລະ ຊາວ​ຕ່າງປະ​ເທດ​ຢູ່​ສປປ ລາວ ​ໄດ້​ຕິດຕາມ​ຊົມ ​ແລະ ​ເຊຍ​ກັນ​ຢ່າງ​ສະໜຸກ​ສະໜາ​ນມ່ວນ​ຊື່ນ​.

   ​ພິ​ທີ​ຖະ​ແຫຼງ​ການ​ຜູ້​ໃຫ້​ການ​ສະ​ໜັບ​ສະ​ໜູນ​ຂອງ ທີ​ວີ​ລາວ ທີ່​ຊື້​ລິ​ຂະສິດ​ພາບ​ຖ່າຍ​ທອດ​ສົດ​ບານ​ໂລກ 2018 ແຫ່ງ​ດຽວ​ໃນ ສ​ປ​ປ ລາວ ​ໄດ້​ມີ​ຂຶ້ນ ເມື່ອ​ວັນ​ທີ​ 7 ມິ​ຖຸ​ນາ ຜ່ານ​ມາ ທີ່​ໂຮງ​ແຮມ​ແລນ​ມາກ ແມ່ຂອງ ຣິເວີໄຊ ນະຄອນຫຼວງວຽງຈັນ, ໂດຍມີ ທ່ານ ປອ. ຫົງ​ຄຳ ສຸວັນ​ນ​ະ​ວົງ ປະ​ທານ​ສະຖານີໂທ​ລະ​ພາບ​ທີ​ວີ​ລາວ ແລະ ທ່ານ ທັນ​ສະ​ໄໝ ຊາ​ມຸນ​​ຕີ ຫົວ​ໜ້າ​ຄະ​ນະ​ພັດ​ທະ​ນາ​ຄຸນ​ະ​ພາບ​ການ​ບໍ​ລິ​ການ​ຂອງ ບໍ​ລິ​ສັດ ລາວ​ໂທ​ລະ​ຄົມ ຜູ້​ສະ​ໜັບ​ສະ​ໜູນຫຼັກ​ຂອງ ທີ​ວີ​ລາວ ໃນ​ການ​ຖ່າຍ​ທອດ​ສົດ​, ມີ​ຜູ້​ຕາງ​ໜ້າ​ບັນດາ​ພາກສ່ວນ​ທີ່​ໃຫ້ການສະ​ໜັບ​ສະ​ໜູນ​ຮ່ວມຢ່າງ ກ້ອງ​ຮັບ​ສັນຍານ ອິນ​ໂຟ​ແຊັດ, ໂຄ​ຄາ-ໂຄ​ລາ, ການ​ບິນ​ລາວ, ເຊບ​ໂລ​ເລດ, ລາ​ມິ​ນາ ແລະ ໄອ​ເຕັກ​ມໍ ຕະຫຼອດ​ຮອດ​ສື່​ມວນ​ຊົນ ເຂົ້າ​ຮ່ວມ​.

​       ໂອກາດ​ນີ້, ທ່ານ ປອ. ຫົງ​ຄຳ​ ສະ​ວັນ​ນ​ະ​ວົງ ກ່າວ​ວ່າ: ຕ້ອງ​ຂໍ​ຂ​ອບ​ໃຈ​ເປັນ​ຢ່າງ​ສູງ​ມາ​ຍັງ​ບັນດາພາກ​ສ່ວນ​ ທີ່​​ໃຫ້ການ​ຮ່ວມ​ມືກັນ​ຊື້​ສັນຍານ​ການຖ່າຍ​ທອດ​ສົດການແຂ່ງຂັນເຕະບານ​ໂລກ 2018 ​ເຊິ່ງຈະ​ຈັດ​ຂຶ້ນ ​ໃນ​ວັນ​ທີ 14 ມິຖຸນາ​ນີ້ ​ເຊິ່ງ​ເປັນ​ສ່ວນ​ໜຶ່ງ​ໃນ​ການ​ມອບ​ຄວາມ​ສຸ​ກ ແລະ ຄວາມ​ເບີກ​ບານ​ມ່ວນ​ຊື່​ນ ໃຫ້​ແຟນ​ບານ​ຊາວ​ລາວ ​ແລະ ຊາວ​ຕ່າງປະ​ເທດ​ທີ່​ມາ​ທ່ອງ​ທ່ຽວ​ໃນ​ໄລຍະ​ນີ້ ສະ​ນັ້ນ ແຟນ​ບານ​ທຸກ​ທ່ານ​ຈົ່ງ​ພ້ອມ​ກັນ​ກຽມ​ຈິດ​ກຽມ​ໃຈ ​ໂດຍ​ສະ​ເພາະ​​ເລື່ອງ​ຂອງ​ສຸຂະພາບ​ສ່ວນ​ຕົວ​ກຽມ ​ເພື່ອ​ກຽມ​ຄວາມ​ພ້ອມ​ຕິດຕາມ​ຊົມ ​ແລະ ​ເຊຍ​ການ​ແຂ່ງຂັນ​ບານ​ໂລກ ຄັ້ງ​ນີ້ ຢ່າງ​ເຕັມ​ອີ່​ມ ​ເຊິ່ງຈະ​ມີ​ການ​ຮັບ​ສັນຍານ​ການຖ່າຍ​ທອດຈາກ​ກ້ອງຮັບ​ສັນຍານ ອິນ​ໂຟ​ແຊັດ (Info sat) ຕັ້ງ​ແຕ່ນັດ​ທຳ​ອິດ ​ຈົນ​ເຖິງ​ນັດ​ຊີງ​ຊະ​ນະ​ເລີດ ລວມທັງ​ໝົດ 64 ນັດ ​ໃນ​ໄລຍະ​ນີ້​ກ້ອງ​ດັ່ງກ່າວ ​ໄດ້​ມີ​ນະ​ໂຍບາຍ​ພິ​ເສດ​ຂາຍ​ກ້ອງ​ໜຶ່ງພຽງ 5 ​ແສນ​ກີບ ​ແລະ ສາມາດ​ຮັບ​ຊົມ​ໄດ້​ຕະຫຼອດ​ໄປ ​ໂດຍ​ບໍ່​ໄດ້​ເສຍ​ຄ່າ​ໃດໆ. ນອກຈາກ​ນັ້ນ, ​​ແຟນບານ​ຜູ້​ທີ່​ຕ້ອງການ​ຊົມ ​ແລະ ​ເຊຍ  ທີ​ມ​ຊາດ​ທີ່​ຕົນ​ເອງ​ມັກ-ຮັກ​ໂດຍ​ເຕົ້າ​ໂຮມ​ໄປ​ເຊຍ​ນອກ​ບ້ານ ທາງບໍລິສັດ ຄົມ​ປັນຍາ ອິນ​ເຕີ​ເທນ​ເມັນ ກໍ່​ຍັງ​ໄດ້ຕິດ​ຕັ້ງ​ຈໍ​ໂທລະພາບ​ຂະໜາດ​ໃຫຍ່ ​ໄວ້​ຄ່ອຍ​ຕ້ອນຮັບ​ອີກ​ດ້ວຍ ​​ສະຖານ​ທີ່​ຈະ​ຈັດ​ຂຶ້ນ ທີ່​ສູນ​ການ​ຄ້າ ​ໄອ​ເຕັກ​ມໍ ​ເມືອງ​ໄຊ​ເຊ​ດຖາ ນະຄອນຫຼວງ​ວຽງ​ຈັນ ສະຖານ​ທີ່​ດັ່ງກ່າວ​ສາມາດ​ຮັບ​ຕ້ອນ​ແຟນບານ​ໄດ້​ຫຼາຍ​ພັນ​ຄົນ, ​ໃນ​ນັ້ນ ກໍ່​ຍັງ​ມີ​ກິດຈະກຳ​ແຈກ​ໂຊກ​ຫຼາຍ​ລາຍການ​ຈາກ​ບໍລິສັດ ທີ່​​ໃຫ້ການຮ່ວມ​ມື​ກັນ ​ເປັນ​ຕົ້ນ​ແມ່ນ​ການ​ແຈກ​ລາງວັນ​ຂອງ​ບໍລິສັດ ລັດ​ວິ​ສາ​ຫະກີດ ລາວ​ໂທລະ​ຄົມ ​ແລະ ບໍລິສັດ​ອື່ນໆ​ອີກ.

    ​ໂດຍ ສົງການ

Written by Super User

ສົກນີ້ ນັກຮຽນ​ເສັງ​ຈົບ​ຊັ້ນ​ປະຖົມທົ່ວເມືອງສີ​ສັດຕະ​ນາກ ມີ 1 ພັນ​ກວ່າຄົນ

35143840 1431777246924423 6964088912671145984 n   ສົກຮຽນ 2017-2018, ນັກຮຽນ​ເສັງ​ທີ່ສອບເສັງຈົບ​ຊັ້ນ​ປະຖົມ​ສຶກສາ (ປ5) ທົ່ວເມືອງ​ສີ​ສັດຕະ​ນາກ ມີຈໍານວນ 1.115 ຄົນ, ຍິງ 556 ຄົນ. ​ໃນ​ນັ້ນ, ​ເສັງ​ໄດ້​ສົມບູນ 839 ຄົນ ແລະ ​​ເສັງໄດ້​ອະນຸລົມ ມີ 276 ຄົນ ຄິດ​ໄລ່ທັງ​ໝົດໄດ້ 100 ​ເປີ​ເຊັນ.ຫ້ອງການ​ສຶກສາ​ທິການ ​ແລະ ກິລາ​ ເມືອງ (ສກມ) ​ສີ​ສັດຕະ​ນາກ ນະຄອນຫຼວງວຽງຈັນ ​ໄດ້​ຈັດ​ພິທີ​ສະຫຼຸບ​ຜົນ​ການ​ສອບ​ເສັງ​ຈົບ​ຊັ້ນ​ປະຖົມສຶກສາ (ປ5) ທົ່ວ​ເມືອງ ພ້ອມ​ມອບ​ໃບ​ປະກາດ​ ເມື່ອ​ວັນ​ທີ 8 ມິ​ຖຸນາ ຜ່ານ​ມາ ທີ່​ສະ​ໂມ​ສອນ​ວິທະຍາ​ໄລ​ເຕັກ​ນິກ​ສັບພະ​ວິຊາ, ​ໂດຍ​ໃຫ້​ກຽດ​ເຂົ້າ​ຮ່ວມຂອງ​ທ່ານ ສຸດ​ທະ​ໜູ ຫຼອງ​ພົນ ຫົວໜ້າຫ້ອງການກວດກາພັກ-ລັດ ເມືອງສີສັດຕະນາກ, ທ່ານ ນາງ ຄໍາ​ຫວັນ ລາດຊະ​ຂັນຕີ ຫົວໜ້າ​ຂະ​ແໜງ​ອະ​ນຸບານ ​ແລະ ປະຖົມ​ສຶກສາ ພະແນກສຶກສາທິການ ແລະ ກິລາ ນະຄອນຫຼວງ​ວຽງ​ຈັນ, ທ່ານ ຄໍາ​ສິງ ດວງ​ດາລາ ​ຫົວໜ້າ​ຫ້ອງການ​ສຶກສາ​ທິການ ​ແລະ ກິລາ​ເມືອງ​ ພ້ອມ​ດ້ວຍຄະນະ, ຄະນະ​​ອໍານວຍ​ການ, ຄູ-ອາຈານໂຮງຮຽນ​ພາກ​ລັດ ​ແລະ ​ເອກະ​ຊົນ ​ແລະ ພາກສ່ວນ​ທີ່​ ກ່ຽວຂ້ອງຢ່າງພ້ອມພຽງ.

​​       ໃນ​ພິທີ, ທ່ານ ຄໍາ​ພົນ ​ໄຊ​ຍະ​ເພັດ ຮອງຫົວໜ້າ​ຫ້ອງການ​ສຶກສາ​ທິການ ​ແລະ ກິລາ​ເມືອງ​ ​ໄດ້​ລາຍ​ງານ​ໃຫ້​ຮູ້​ວ່າ: ​ໃນສົກຮຽນ 207-2018 ນັກຮຽນຊັ້ນປະຖົມສຶກສາ (ປ5) ທົ່ວເມືອງ ມີທັງໝົດ 1.115 ຄົນ, ຍິງ 556 ຄົນ, ມີໜ້າສອບເສັງຕົວຈິງ ແລະ ເສັງໄດ້ທັງໝົດ ຈໍານວນ ຈໍານວນ 1.115 ຄົນ, ຍິງ 556 ຄົນ. ​ໃນ​ນັ້ນ, ​ເສັງ​ໄດ້​ສົມບູນ ມີ 839 ຄົນ, ຍິງ 446 ຄົນ ​ແລະ ​​ເສັງໄດ້​ອະນຸລົມ 276 ຄົນ, ຍິງ 110 ຄົນ ຄິດ​ໄລ່ທັງ​ໝົດໄດ້ 100 ​ເປີ​ເຊັນ, ເຊິ່ງການສອບເສັງໄດ້ແບ່ງອອກເປັນ 6 ສູນ, ແຕ່ລະສູນແມ່ນໄດ້ 100 ເປີເຊັນ ໂດຍສອບເສັງໃນ 4 ວິຊາ ຄື: ວິຊາຄະນິດສາດ, ຫັດແຕ່ງ, ຂຽນທວາຍ-ຄໍາຖາມ ແລະ ວິຊາໂລກອ້ອມຕົວ, ເຊິ່ງຄະແນນສູງສຸດ ແມ່ນ 10 ຄະແນນ, ຕໍ່າສຸດ ແມ່ນ 2-3 ຄະແນນ.

        ນອກຈາກນັ້ນ, ຍັງມີນັກຮຽນທີ່ໄດ້ຄະແນນດີເດັ່ນອັນດັບທີ 1 ແມ່ນນາງ ສຸລິສາ ແກ້ວປະເສີດ ໂຮງຮຽນປະຖົມ ສະຖາພອນ ໄດ້ 39 ຄະແນນ, ອັນດັບທີ 2 ມີ 11 ຄົນ, ຍິງ 9 ຄົນ, ອັນດັບທີ 3 ມີ 8 ຄົນ (ຍິງ), ນັກຮຽນທີ່ໄດ້ຄະແນນດີເດັ່ນບໍ່ຫຼຸດ 7 ຂອງແຕ່ລະໂຮງຮຽນ ມີ 26 ໂຮງຮຽນ, ນັກຮຽນໂຮງຮຽນທີ່ສອບເສັງໄດ້ຄະແນນສົມບູນ 100 ເປີເຊັນ ມີ 6 ໂຮງຮຽນ ຈໍານວນ 158 ຄົນ, ຍິງ 77 ຄົນ ແລະ ນັກຮຽນໂຮງຮຽນທີ່ສອບເສັງໄດ້ຄະແນນສົມບູນ 85 ເປີເຊັນ ຫາ 99 ເປີເຊັນ ມີ 10 ໂຮງຮຽນ ຈໍານວນ 339 ຄົນ, ຍິງ 209 ຄົນ.ສໍາລັບ​ບົດຮຽນ​ທີ່​ຖອດ​ຖອນ​ໄດ້ ​ແມ່ນ​ທາງ​ຜູ້​ອໍານວຍ​ການ ​ແລະ ຄູ-ອາຈານ​ໂຮງຮຽນ ​ໄດ້​ເອົາ​ໃຈ​ໃສ່​ບໍາລຸງ​ໃຫ້​ນັກຮຽນ​ຢ່າງ​ທົ່ວ​ເຖິງ​ນັບ​ຕັ້ງ​ແຕ່​ເລີ່​ມ​ເຂົ້າ​ຮຽນ, ວິຊາ​ການ ​ແລະ ຄູ​ສອນ​ຕົວ​ຈິງຂອງ​ແຕ່ລະ​ໂຮງຮຽນ ​ໄດ້​ຕິດຕາມ​ສະພາບ​ການ​ຕ່າງໆ​ທີ່​ພົວພັນ​ເນື້​ອ​ໃນ​ໂຄງການ​ຫຼັກສູດ​ໃຫ້​ແທດ​ເໝາະ​ກັບ​ຍຸກສະ​ໄໝ, ຊອກ​ຮູ້​ເອົາ​ບົດຮຽນ ​ແລະ ​ເອົາ​ໃຈ​ໃສ່​ສິດສອນ​ຕາມ​ແຜນການ​ທີ່​ວາງ​ໄວ້​ໃຫ້​ມີ​ໝາກຜົນ​ ​ທາງ​ດ້ານ​ປະລິມານ ​ແລະ ຄຸນະພາບ​ສູງ​ຂຶ້ນ.

 ​ໂດຍ: ນາງ ຕຸ່ນ​ຄໍາ