ສຶກສາ

ສຶກສາ

Written by Super User

ຄະນະນໍາ ສສກ ຮ່ວມປະຊຸມລັດຖະມົນຕີສຶກສາຂອງບັນດາປະເທດທີ່ມີການຮຽນ-ການສອນພາສາຝຣັ່ງ

ຄະນະນໍາກະຊວງສຶກສາທິການ ແລະ ກິລາ (ສສກ) ນໍາໂດຍທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີ ກະຊວງສຶກສາທິການ ແລະ ກິລາ ໄດ້ເຂົ້າຮ່ວມກອງປະຊຸມລັດຖະຕີສຶກສາຂອງບັນດາປະເທດທີ່ມີການຮຽນການ-ສອນພາສາຝຣັ່ງຂອງອົງການຈັດຕັ້ງສາກົນ CONFEMEN ຄັ້ງທີ 58 ໃນຫົວຂໍ້: “ການສຶກສາກ່ອນໄວຮຽນ, ການສຶກສາສໍາລັບທຸກຄົນ” ຫຼື “58eSession Ministériel de la CONFEMEN” ​ເມື່ອບໍ່ດົນຜ່ານມາ ທີ່ປະເທດການາດາ (CANADA), ​ໂດຍພາຍ​ໃຕ້ການເປັນປະທານຂອງທ່ານ Jacques BOUREIMA KI ເລຂາທິການໃຫຍ່ຂອງອົງການຈັດຕັ້ງສາກົນ CONFEMEN, ມີ​ລັດຖະມົນຕີສຶກສາແຫ່ງຊາດ ແລະ ການຮຽນຮູ້ທົ່ວປວງຊົນ ຂອງສາທາລະນະລັດກາບົງ «République de Gabon», ລັດຖະມົນຕີ-ຮອງລັດຖະມົນຕີ, ຫົວໜ້າກົມ-ຮອງກົມ, ເອກອັກຄາລັດຊະທູດ, ອຸປະທູດ, ຜູ້ຕາງໜ້າອົງການຈັດຕັ້ງສາກົນ, ສູນ ​ແລະ ສະຖາບັນຕ່າງໆທີ່ກ່ຽວຂ້ອງຈາກບັນດາປະເທດສະມາຊິກທີ່ມີການຮຽນ-ການສອນພາສາຝຣັ່ງທັງໝົດ 44 ປະເທດ​ເຂົ້າ​ຮ່ວມ.

ໃນໂອກາດດັ່ງກ່າວ, ທ່ານ ນາງ ແສງເດືອນ ຫຼ້າຈັນທະບູນ ໄດ້ເຂົ້າປຶກສາຫາລື ແລະ ແລກປ່ຽນບົດຮຽນກັບບັນດາລັດຖະມົນສຶກສາຈາກປະເທດຕ່າງໆ. ນອກຈາກ​ນັ້ນ, ຍັງໄດ້ພົບປະ 2 ຝ່າຍກັບສູນເຝິກອົບຮົມການບໍລິຫານການສຶກສາ (CIEP) ປະເທດຝຣັ່ງ ແລະ ຜູ້ປະສານງານກ່ຽວກັບການສຶກສາຂັ້ນສູງ ເພື່ອຊອກຫາຄູ່ຮ່ວມພັດທະນາລະຫວ່າງມະຫາວິທະຍາໄລຂອງປະເທດການາດາ ແລະ ມະຫາວິທະຍາໄລຂອງ ສປປ ລາວ ໃນອະນາຄົດອີກດ້ວຍ. ສໍາລັບການເຄື່ອນໄຫວກ່ຽວກັບອົງການຈັດຕັ້ງສາກົນ CONFEMEN, ທ່ານ ລັດຖະມົນຕີ ກະຊວງ ສສກ ຍັງໄດ້ພົບປະ ແລະ ໃຫ້ທິດທາງແກ່ຄົນເຊື້ອຊາດລາວ ທີ່ຕັ້ງຖິ່ນຖານຢູ່ປະເທດການາດາ ກ່ຽວກັບແນວທາງນະໂຍບາຍຂອງພັກ-ລັດຕໍ່ກັບຄົນເຊື້ອຊາດລາວອີກດ້ວຍ.

ຕະຫຼອດໄລຍະການປະຊຸມ, ທ່ານປະທານໄດ້ນໍາພາຄົ້ນຄວ້າເອກະສານ ແລະ ມະຕິຕົກລົງຕ່າງໆ ​​ເປັນ​ຕົ້ນ​ແມ່ນ ໄດ້ຄົ້ນຄວ້າ ແລະ ວາງແຜນການ 2 ປີຕໍ່ໜ້າ, ໄດ້ລົງຄະແນນສຽງເພື່ອຄັດເລືອກເອົາປະເທດທີ່ຈະເປັນປະທານໝູນວຽນໃນໄລຍະ 2 ປີຕໍ່ໜ້າ, ເຊິ່ງໄດ້ແກ່ປະເທດການາດາ ແລະ ໄດ້ກົດບັດເລືອກຕັ້ງເລຂາທິການໃຫຍ່ຄົນໃໝ່ ແທນທ່ານເລຂາທິການຄົນເກົ່າທີ່ໄດ້ເຂົ້າຮັບບໍານານ ​ແລະ ໃນກອງປະຊຸມຍັງໄດ້ເລືອກເອົາປະເທດເຈົ້າພາບໃນການຈັດກອງປະຊຸມ ຄັ້ງທີ 59 ໄດ້ແກ່ແຂວງເກເບັກ ປະເທດການາດາ.

ຂໍ້ມູນ​ໂດຍ: ພາກສ່ວນ​ທີ່​ກ່ຽວຂ້ອງ​ຂອງ​ກະຊວງ ສສກ

ຮຽບຮຽງ​ໂດຍ: ນາງ ຕຸ່ນ​ຄໍາ

Written by Super User

ບັ້ນສອບ​ເສັງຈົບ​ ມ4 ທົ່ວປະ​ເທດໄຂຂຶ້ນມື້ນີ້ ຂະນະ​ທີ່ ນວ ມີ​ນັກ​ສອບ​ເສັງ 10 ພັນ​ກວ່າ​ຄົນ

35114644 1431777226924425 771978581424209920 n   ບັ້ນ​ສອບ​ເສັງ​ຈົບ​ຊັ້ນ​ມັດທະຍົມ​ສຶກສາ​ຕອນ​ຕົ້ນ ປີ​ທີ 4 (ມ4) ສົກຮຽນ 2017-2018 ​ໄດ້​ໄຂ​ຂຶ້ນ​ຢ່າງ​ເປັນ​ທາງ​ການ​ ​ໃນ​ຕອນ​ເຊົ້າມື້​ນີ້ (​12 ມິຖຸນາ​) ​ໂດຍ​ມີ​ນັກ​ສອບ​ເສັງ​ທັງໝົດ 93.598 ຄົນ, ຍິງ 44.945 ຄົນ ແບ່ງ​ເປັນ 548 ສູນ ​ແລະ ມີ 4.526 ຫ້ອງ​ສອບເສັງ ​ໃນ​ຂອບ​ເຂດທົ່ວ​ປະ​ເທດ. ​ຂະນະ​ທີ່, ນະຄອນຫຼວງວຽງ​ຈັນ (ນວ) ມີນັກສອບເສັງທັງໝົດ 10.424 ຄົນ, ຍິງ 5.303 ຄົນ, ​ແບ່ງ​ອອກເປັນ 28 ສູນສອບເສັງ ຈັດ​ເປັນ 542 ຫ້ອງ​ສອບ​ເສັງ ຈາກ 148 ​ໂຮງຮຽນ.

   ອີງຕາມຂໍ້ມູນການໃຫ້ສຳພາດຂອງທ່ານ ນາງ ປອ. ສີສຸກ ວົງວິຈິດ ຫົວໜ້າກົມສາມັນສຶກສາ ກະຊວງສຶກສາທິການ ແລະ ກິລາ ເມື່ອບໍ່ດົນຜ່ານມາໃຫ້ຮູ້ວ່າ: ​ບັ້ນ​ສອບ​ເສັງ​ຈົບ​ຊັ້ນ​ມັດທະຍົມ​ສຶກສາ​ຕອນ​ຕົ້ນ ປີ​ທີ 4 (ມ4) ສົກຮຽນ 2017-2018  ແມ່ນໄດ້ໄຂ​ຂຶ້ນ​ຢ່າງ​ເປັນ​ທາງ​ການ ​ໃນ​ຂອບ​ເຂດ​ທົ່ວປະ​ເທດ ໃນມື້ນີ້ (12 ມິຖຸນາ), ໂດຍ​ມີ​ນັກ​ສອບ​ເສັງ​ທັງໝົດ 93.598 ຄົນ, ຍິງ 44.945 ຄົນ ແບ່ງ​ເປັນ 548 ສູນ ​ແລະ ມີ 4.526 ຫ້ອງ​ສອບເສັງ, ​ເຊິ່ງຈະ​ທໍາ​ກາ​ນສອບ​ເສັງ​​ສອບເສັງ 6 ວິຊາ​ ຄື: ພາສາ​ລາວ-ວັນນະຄະດີ, ຄະນິດສາດ, ສຶກ​ສາ​ພົນລະເມືອງ, ວິທະຍາສາດ​ທຳ​ມະ​ຊາດ, ວິຊາ​ວິທະຍາສາດ​ສັງຄົມ ແລະ ພາສາ​ອັງກິດ​, ໂດຍ​ຈະ​ໄດ້ດໍາ​ເນີ​ນ​ໄປ​ຈົນ​ເຖິງ​ວັນ​ທີ 14 ມິຖຸນາ​ນີ້.

        ພ້ອມ​ດຽວ​ກັນ​ນັ້ນ, ທ່ານ ນາງ ປອ. ສີ​ສຸກ ວົງ​ວິຈິດ ຍັງໄດ້ຮຽກຮ້ອງໃຫ້ຜູ້ບໍລິຫານການສຶກສາທຸກຂັ້ນ ພ້ອມດ້ວຍຄູ-ອາຈານ ແລະ ນ້ອງນັກຮຽນໄດ້ມີສະຕິຕື່ນຕົວຕໍ່ຄວາມຮັບຜິດຊອບຢູ່ໃນບັ້ນສອບເສັງໃຫ້ປະຕິບັດໄດ້ດີກ່ອນເກົ່າ ແລະ ບໍ່ໃຫ້ມີບັນຫາອື່ນເກີດຂຶ້ນ ຮັບປະກັນວວ່າຄະແນນທີ່ເສັງໄດ້ແມ່ນມີຄຸນະພາບແທ້ໆ, ຈຶ່ງບໍ່ໃຫ້ມີການລັກເອົາຄໍາຕອບເຂົ້າກ່າຍ, ບໍ່ກ່າຍໝູ່ ທີ່ເປັນປາກກົດການຫຍໍ້ທໍ້ຕ່າງໆ; ຮຽກຮ້ອງມາຍັງຄະນະກໍາມະການທຸກພາກສ່ວນ ທຸກສູນສອບເສັງ ຈົ່ງເພີ່ມຄວາມຮັບຜິດຊອບໃນໜ້າທີ່ວຽກງານໃຫ້ດີຂຶ້ນກວ່າເກົ່າ ແນໃສ່ເຮັດໃຫ້ການຈັດຕັ້ງການສອບເສັງຈົບຊັ້ນ  ໄດ້ຮັບຜົນສໍາເລັດ, ມີຄວາມຖືກຕ້ອງ, ໂປ່ງໃສ, ເປັນທໍາ ແລະ ການນັບຄະແນນກໍ່ຂໍໃຫ້ທັນຕາມກໍານົດເວລາ; ຮຽກຮ້ອງໃຫ້ນັກຮຽນທັງໝົດຈົ່ງປະຕິບັດຕົນໃຫ້ເປັນນັກສອບເສັງທີ່ດີ, ມີລະບຽບວິໄນ, ປະຕິບັດຕາມກົດລະບຽບຂອງການສອບເສັງທີ່ກໍານົດ, ເຄັງຄັດໃນການປະຕິບັດໂມງເວລາ, ມີສະຕິໃນການເດີນທາງ, ຄໍານຶງເຖິງຄວາມປອດໄພ ຫຼີກເວັ້ນບໍ່ໃຫ້ເກີດອຸບັດຕິເຫດ ຮັບປະກັນໃຫ້ນັກຮຽນທຸກຄົນໄດ້ເຂົ້າຮ່ວມສອບເສັງຈົນສຸດກົກສຸດປາຍ ແລະ ໄດ້ຮັບຜົນສໍາເລັດດ້ວຍດີ. ພ້ອມກັນນັ້ນ, ຍັງຮຽກຮ້ອງມາຍັງພໍ່-ແມ່ຜູ້ປົກຄອງ, ອໍານາດການປົກຄອງທຸກພາກສ່ວນ ຈົ່ງອໍານວຍຄວາມສະດວກ, ໃຫ້ກໍາລັງໃຈແກ່ລູກຫຼານທີ່ໄດ້ເຂົ້າຮ່ວມການສອບເສັງຢ່າງຄົບຖ້ວນ ແລະ ໄດ້ຮັບຜົນສໍາເລັດຢ່າງຈົບງາມ.

        ຂະນະດຽວກັນ, ອີງຕາມຂໍ້ມູນຈາກພະແນກສຶກສາທິການ ແລະ ກິລາ ນະຄອນຫຼວງ​ວຽງ​ຈັນ ໄດ້ໃຫ້ຊາບວ່າ: ການ​ສອບ​ເສັງ​ຈົບ​ຊັ້ນ​ມັດທະຍົມ​ສຶກສາ (ມ4) ທົ່ວ​ນະຄອນຫຼວງ​ວຽງຈັນ ແມ່ນມີ​ນັກ​ສອບ​ເສັງທັງ​ໝົດ 10.424 ຄົນ, ຍິງ 5.303 ຄົນ, ກໍາ​ມະ​ການ​ຍາມ​ຫ້ອງ​ເສັງມີ 1.117 ຄົນ, ກໍາ​ມະ​ການກວດ​ບົດ 305 ຄົນ, ຈັດ​ເປັນ 28 ສູນສອບເສັງ ຄື: ເມືອງຈັນທະບູລີ ຈັດເປັນ 1 ສູນສອບເສັງ, ເມືອງສີໂຄດຕະບອງຈັດເປັນ 3 ສູນສອບເສັງ , ເມືອງໄຊເຊດຖາ ຈັດເປັນ 4 ສູນສອບເສັງ, ເມືອງສີສັດຕະນາກ ຈັດເປັນ 3 ສູນສອບເສັງ, ເມືອງນາຊາຍທອງ ຈັດເປັນ 3 ສູນສອບເສັງ, ເມືອງໄຊທານີ ຈັດເປັນ 7 ສູນສອບເສັງ, ເມືອງຫາດຊາຍຟອງ ຈັດເປັນ 3 ສູນສອບເສັງ, ເມືອງສັງທອງ ຈັດເປັນ 1 ສູນສອບເສັງ ແລະ ເມືອງປາກງື່ມ ຈັດເປັນ 3 ສູນສອບເສັງ.

 (ບຸນ​ທະວີ)

Written by Super User

ຄວາມຕ້ອງການຄູທົ່ວປະເທດມີເຖິງ 19 ພັນກວ່າຄົນ ຂະນະທີ່ໂກຕາຄູສົກນີ້ ມີພຽງ 1.850 ຄົນ

35051954 1430880147014133 631958739154370560 n   ສະຖານ​ການ​ສຶກສາ​ຫຼາຍ​ແຫ່ງ ທັງ​​​ຕົວ​ເມືອງ ​ແລະ ຊົນນະບົດ ​ໃນ​ຂອບ​ເຂດ​ທົ່ວ​ປະ​ເທດ ຍັງ​ມີ​ຄວາມ​ຕ້ອງການ​ຄູສູງເຖິງ 19.757 ຄົນ ​​ເພື່ອ​ພັດທະນາ​ຊັບພະຍາກອນ​ມະນຸດ ກໍ່​ຄື ນັກຮຽນ-ນັກ​ສຶກສາ ທີ່​ເປັນ​ໜໍ່​ແໜ່​ງຂອງ​ປະ​ເທດ​ຊາດ. ຂະນະ​ທີ່​ໂກ​ຕາຄູ​ໃນ​ສົກ 2017-2018 ​ມີ​ພຽງ​ແຕ່ 1.850 ຄົນ​ເທົ່າ​ນັ້ນ.ເມື່ອ​ວັນ​ທີ 7 ມິຖຸນາ ຜ່ານ​ມາ, ທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີ ກະຊວງສຶກສາທິການ ແລະ ກິລາ ໄດ້ຊີ້ແຈງຂໍ້ສົນໃຈຂອງສະມາຊິກສະພາແຫ່ງຊາດ (ສສຊ)  ກ່ຽວກັບການປະຕິບັດນະໂຍບາຍຕໍ່ນັກຮຽນໂຮງຮຽນຊົນເຜົ່າ  ແລະ ການຈັດແບ່ງໂກຕາລັດຖະກອນຄູ ປີ 2018  ຕໍ່ກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ 8 ວ່າ:  ອີງຕາມການສຳຫຼວດລັດຖະກອນຄູ ລວມທັງຄູອາສາສະໝັກໃນຈຳນວນໂຮງຮຽນທັງໝົດ 12.744 ແຫ່ງທົ່ວປະເທດ ເຫັນວ່າຍັງມີຄວາມຕ້ອງການຄູ 19.757 ຄົນ. ​ໃນ​ຂະນະ​ທີ່​ໂກ​ຕາຄູ ທີ່​ລັດຖະບານ​ຈັດ​ແບ່ງ​ໃຫ້​ໃນ​ສົກ​ 2017-2018 ແມ່ນ​ມີ​ພຽງ 1.850 ຄົນ. ​ໃນ  ນັ້ນ, ​ແຂວງ​ທີ່​ໄດ້​ໂກ​ຕາ​ຫຼາຍ​ກວ່າໝູ່​ແມ່ນ  ​ສະຫວັນ​ນະ​ເຂດ ຈຳນວນ 172 ຄົນ ​ແລະ ​ໄດ້ໜ້ອຍກວ່າໝູ່​ແມ່ນ​ແຂວງ​ໄຊ​ສົມບູນ ຈຳນວນ 68 ຄົນ.

       ພ້ອມ​ກັນ​ນັ້ນ, ທ່ານ ນາງ ແສງເດືອນ ຫຼ້າຈັນທະບູນ ​ໄດ້​ຍົກ​ໃຫ້​ເຫັນເຖິງ​ເຫດຜົນ​ຄວາມ​ຕ້ອງການ​ຄູ​ຈໍານວນ​ດັ່ງກ່າວ ວ່າ: ຍ້ອນ​ການ​ນຳ​ໃຊ້​ຄູ​​ສິດສອນຢູ່ໂຮງຮຽນ​ຫຼາຍ​ແຫ່ງໃນ​ໄລຍະ​​ຜ່ານ​ມາ ​ບໍ່​ຖືກຕ້ອງ​ຕາມ​ເປົ້າໝາຍ,  ບໍ່ຖືກ​ຕາມ​ສາຂາ​ວິຊາ ຫຼື ​ເອົາ​ຄູ​ສອນເລກ​ໄປ​ສອນພາສາ​ລາວ,  ​ເອົາ​ຄູ​ພາສາ​ລາວ ​ໄປ​ສອນ​ພາສາ​ອັງກິດ,  ຄູບາ​ງສາຂາ​ວິຊາ​ມີ​ໜ້ອຍ ​ແຕ່​ບາງ​ສາຂາ​ວິຊາ​ມີ​ໜ້ອຍ, ​ເຊິ່ງ​ເປັນ​ທີ່​ມາ​ຂອງ​​ຄຳ​ວ່າ “ຄູ​ເຫຼືອ​ບໍ່ພໍ”. ​ສະ​ນັ້ນ, ມາ​ຮອດປີ 2018 ການ​ນຳກະຊວງສຶກສາທິການ ແລະ ກິລາ ໄດ້ປັບປຸງ​ວຽກງານ​ດັ່ງກ່າວ ​ໂດຍ​ມອບ​ໃຫ້​ໂຮງຮຽນ​ເປັນ​ຜູ້​ຄັດເລືອກເອົາຄູທີ່ໄດ້ຄຸນະພາບ, ຄູ​ທີ່ຜ່ານການສອບເສັງບັນຈຸ ແນໃສ່ເຮັດໃຫ້ການຮຽນ-ການສອນ ມີປະສິດທິພາບ ແລະ ອື່ນໆ.

       ສຳລັບການປະຕິບັດນະໂຍບາຍຕໍ່ນັກຮຽນໂຮງຮຽນຊົນເຜົ່ານັ້ນ,  ທ່ານ ນາງ ແສງເດືອນ ຫຼ້າຈັນທະບູນ ​ໄດ້ຊີ້ແຈງວ່າ:  ປັດຈຸບັນທົ່ວປະເທດ ມີໂຮງຮຽນສາມັນກິນນອນຊົນເຜົ່າ 32 ແຫ່ງ,  ມີນັກຮຽນທັງໝົດ 14.216 ຄົນ. ໃນນັ້ນ, ນັກຮຽນໃນແຜນ​ເກື​ອບ 10.000 ຄົນ,  ຍິງ 4.335 ຄົນ ​ໂດຍໄດ້ມີ​ນະ​ໂຍບາຍຮັບເບ້ຍລ້ຽງ 200.000 ກີບຕໍ່ເດືອນ  ພ້ອມເຄື່ອງອຸດໜູນຕ່າງໆ. ສ່ວນນັກຮຽນນອກແຜນ ມີ 4.222 ຄົນ (ບໍ່ໄດ້ຮັບເບ້ຍລ້ຽງ).  ພ້ອມນັ້ນ ກະຊວງສຶກສາທິການ ແລະ ກິລາ  ຍັງໄດ້ອອກຂໍ້ຕົກລົງວ່າດ້ວຍການຄຸ້ມຄອງໂຮງຮຽນສາມັນກິນນອນຊົນເຜົ່າ,  ຂໍ້ຕົກລົງວ່າດ້ວຍນະໂຍບາຍຄູ-ນັກຮຽນ ຊົນເຜົ່າ  ແລະ ຂໍ້ຕົກລົງວ່າດ້ວຍລະບຽບຄຸ້ມຄອງຄູ ແລະ ນັກຮຽນຊົນເຜົ່າ.

(ບຸນ​ທະວີ)