ສຶກສາ

ສຶກສາ

Written by Super User

 ສສກ - ສະຖາບັນການສຶກສາ ສ ເກົາຫຼີ ຫາຫຼືຮ່ວມມືພັດທະນາຊັບພະຍາກອນມະນຸດແບບຍືນຍົງ

34962602 1430879810347500 1191122996731838464 n   ຄະນະນໍາ ກະຊວງສຶກສາທິການ ແລະ ກິລາ (ສສກ) ແລະ ມະຫາວິທະຍາໄລ ສັບພະວິຊາ ສ ເກົາຫຼີ ໄດ້ມີການຫາລືຮ່ວມມື 2 ຝ່າຍ ເພື່ອແລກປ່ຽນຄວາມຮູ້ໃນການພັດທະນາຊັບພະຍາກອນມະນຸດແບບຍືນຍົງ.ເມື່ອວັນທີ 6 ມິຖຸນາ ຜ່ານມາ ທີ່ສໍານັກງານ ກະຊວງສຶກສາທິການ ແລະ ກິລາ, ທ່ານ ນາງແສງເດືອນ ຫຼ້າຈັນທະບູນ ລັດຖະມົນຕີ ກະຊວງສຶກສາທິການ ແລະ ກິລາ ໄດ້ໃຫ້ກຽດຕ້ອນຮັບການເຂົ້າຢ້ຽມຄໍານັບຂອງທ່ານ ດຣ. ນາງ Joh Namjoo ຕາງໜ້າ​ຈາກ​ມະຫາວິທະຍາ​ໄລ ສັບພະ​ວິຊາ ສ ​ເກົາຫຼີ ພ້ອມ​ດ້ວຍ​ຄະນະ, ມີບັນດາຄະນະນຳຈາກພາກສ່ວນ​ທີ່​ກ່ຽວຂ້ອງ​ເຂົ້າ​ຮ່ວມ

     

 

      ໃນການພົບປະດັ່ງກ່າວ, ທ່ານ ດຣ. ນາງ Joh Namjoo ກ່າວໃຫ້ຮູ້ເຖິງຈຸດປະສົງຂອງການເດີນທາງມາລາວຄັ້ງນີ້, ແມ່ນເພື່ອເປັນການສ້າງສາຍພົວພັນລະຫວ່າງ 2 ປະເທດ ກໍ່ຄື ສ ເກົາຫຼີ ແລະ ສປປ ລາວ ພ້ອມທັງການຮ່ວມມືລະຫວ່າງ​ວິທະຍາ​ໄລ ​ເຕັກນິກ​ປາກ​ປ່າ​ສັກ ​ແລະ ມະຫາວິທະຍາ​ໄລ ສັບພະ​ວິຊາ ສ ​ເກົາຫຼີ ​ຈະ​ໄດ້​ດໍາ​ເນີນ​ການ​ເຊັນ​ບົດ​ບັນທຶກ​ຄວາມ​ເຂົ້າ​ໃຈ (MOU) ວ່າ​ດ້ວຍ​ການ​ຮ່ວມ​ມື 2 ຝ່າຍ ເພື່ອແລກປ່ຽນຄວາມຮູ້ທາງດ້ານວິຊາການ ແລະ ການພັດທະນາຊັບພະຍາກອນມະນຸດແບບຍືນຍົງ, ​ແລ​ກປ່ຽນ​ຄວາມ​ຮູ້​ທາງ​ດ້ານ​ວິຊາ​ການ​ຂອງ​ພະນັກງານ, ຄູ-ອາຈານ ​ແລະ ​ແລກປ່ຽນ​ນັກ​ຮຽນ-ນັກ​ສຶກສາ. ນອກຈາກ​ນັ້ນ, ຍັງ​ໄດ້​ປຶກສາ​ຫາລື​ກ່ຽວ​ກັບ​ສາຂາ​ວິຊາທີ່​ເຫັນ​ວ່າ​ມີ​ຄວາມ​ຈໍາ​ເປັນ​ໃນ​ກາ​ນພັດທະນາ​ນັກຮຽນ-ນັກ​ສຶກສາ​ຂອງ​ລາວ ​ແລະ ການ​ຮ່ວມ​ມື​ໃນ​ດ້ານ​ຕ່າງໆ ​ເພື່ອ​ເຮັດ​ໃຫ້ການ​ສຶກສາ​ຂອງ​ລາວ​ມີ​ບາ​ດກ້າວ​ຂະຫຍາຍຕົວ​ສູງ​ຂຶ້ນ​ເລື້ອຍໆ.

      ຂະນະດຽວກັນ, ທ່ານ ນາງ ແສງເດືອນ ຫຼ້າຈັນທະບູນ ​ໄດ້​ກ່າວ​ສະ​ແດງ​ຄວາມ​ຂອບ​ໃຈ​ຕໍ່​ທາງ​ຄະນະ​ດັ່ງກ່າວ ​ໃນ​ການ​ຮ່ວມ​ມື​​ໃນ​ຂະ​ແໜງ​ການ​ສຶກສາ ​ແລະ ກິລາ ​ໂດຍ​ສະ​ເພາະ​ການແລກປ່ຽນຄວາມຮູ້ທາງດ້ານວິຊາການ ແລະ ການພັດທະນາຊັບພະຍາກອນມະນຸດແບບຍືນຍົງ, ​ແລ​ກປ່ຽນ​ຄວາມ​ຮູ້​ທາງ​ດ້ານ​ວິຊາ​ການ​ຂອງ​ພະນັກງານ, ຄູ-ອາຈານ ​ແລະ ​ແລກປ່ຽນ​ນັກ​ຮຽນ-ນັກ​ສຶກສາ. ສໍາລັບ​ໃນ​ໄລຍະ​ຜ່ານ​ມາ ທຶນ​ການ​ສຶກສາ​ສ່ວນ​ຫຼາຍ​​ແມ່ນທຶນ​ຂອງ​ລັດຖະບານ​ທີ່​ເປັນ​ທຶນ​ພາຍ​ໃນ, ຖ້າ​ເປັນ​ທຶນ​ຕ່າງປະ​ເທດ ​ແມ່ນ​ເປັນການ​ຮ່ວມ​ມື ​ແລະ ຢາກ​ສະ​ເໜີ​ໃຫ້​ທາງມະຫາວິທະຍາ​ໄລ ສັບພະ​ວິຊາ ສ ​ເກົາຫຼີ ​ຖ້າ​ຢາ​ກ​ໃຫ້​ທາງ​ສະ​ຖາ​ບັນອາຊີວະ​ສຶກສາ​ຂອງ​ລາວ ສະ​ໜອງ​ນັກຮຽນ-ນັກ​ສຶກສາໃຫ້ນັ້ນ ຕ້ອງ​ໄດ້​ມີ​ການ​ປະສານ​ສົມທົບກັບ​ພາກສ່ວນ​ຕ່າງໆ ​ເປັນ​ຕົ້ນ​ການ​ກະກຽມ​ຄວາມ​ພ້ອມ​ໃຫ້​ເຂົາ​​ເຈົ້າ​ໃນ​ເລື່ອງ​ພາສາ, ສະໜອງ​ອາຊີບ, ວິຊາ​ສະ​ເພາະ ​ແລະ ອື່ນໆ. ຄຽງ​ຄູ່​ກັນ​ນັ້ນ, ຖ້າ​ເປັນ​ໄປ​ໄດ້​ແມ່ນ​ຢາກ​ໃຫ້​ຊ່ວຍ​ເຫຼືອ​ທາງ​ດ້ານ​ອຸປະກອນ​ເຝິກ, ​ໄອ​ທີ, ຫໍ​ສະມຸດ ​​ແລະ ອຸປະກອນ​ຕ່າງໆ ທີ່​ເຫັນ​ວ່າ​ຈໍາ​ເປັນ​ໃນ​ສະຖາ​ອາຊີວະ​ສຶກສາໃນ​ຂອບ​ເຂດ​ທົ່ວ​ປະ​ເທດ​ໃຫ້​ມີ​ການ​ຮຽນ-ການ​ສອນ ສາມາດພັດທະນາສາຂາ​ວິຊາ​ໃຫ້​​ເທົ່າ​ທຽບ​ກັບ​ພາກ​ພື້ນ ​ແລະ ສາກົນ​ເທື່ອ​ລະ​ກ້າວ.

 ​ໂດຍ: ນາງ ຕຸ່ນ​ຄໍາ

Written by Super User

ໜ່ວຍ​ພັກ ວສປ ກໍ່ສ້າງ ​ແລະ ຂະຫຍາຍ​ພັກໄດ້ 8 ສະຫາຍ ສົກ 2017-2018 ​

34929224 1430879943680820 817467610848296960 n   ໜ່ວຍ​ພັກ ​ວິທະຍາ​ໄລ ​ສິລະ​ປະ​ສຶກສາ (ວສປ) ກົມ​ພະລະ ​ແລະ ສິລະ​ປະ​ສຶກສາ ກະຊວງ​ສຶກສາ​ທິການ ​ແລະ ກິລາ (ສສກ) ສາມາດຈັດ​ຕັ້ງ​ປະຕິບັດ​ວຽກ​ງານ​ກໍ່ສ້າງ ​ແລະ ຂະຫຍາຍ​ພັກ ​ໄດ້​ 8 ສະຫາຍ ໃນ​ສົກຮຽນ 2017-2018.​ເມື່ອ​ວັນ​ທີ 6 ມິຖຸນາ ຜ່ານ​ມາ ທີ່​ຫ້ອງປະຊຸມວິທະຍາ​ໄລ​ ສິລະ​ປະ​ສຶກສາ ບ້ານ​ສີ​ບຸນ​ເຮືອງ ​ເມືອງ​ຈັນທະ​ບູລີ ນະຄອນ​ຫຼວງ​ວຽງ​ຈັນ, ໄດ້ມີພິທີ​ເລື່ອນ​ສະມາຊິກ​ພັກ​ສຳຮອງ​ຂຶ້ນ​ເປັນ​ສະມາຊິກ​ພັກ​ສົມບູນ ແລະ  ຮັບ​ເອົາ​ມະຫາ​ຊົນ​ຜູ້​ກ້າວໜ້າ​ເຂົ້າ​ເປັນ​ສະມາຊິກ​ພັກສຳຮອງ, ໂດຍພາຍ​ໃຕ້​ກາຍ​ການ​ເປັນ​ປະທານ​ຂອງ​ສະຫາຍ ວິລະ​ວັນ ບຸນ​ສຸກ​ໄທ ​ເລຂາ​ໜ່ວຍ​ພັກ ​ວິທະຍາ​ໄລ​ ສິລະ​ປະ​ສຶກສາ,​ ມີ​ສະຫາຍ ສີ​ສຸກ ພັນ​ແພງ​ດີ ຮອງ​ເລຂາ​ໜ່ວຍ​ພັກ​ ວິທະຍາ​ໄລ​ ສິລະ​ປະ​ສຶກສາ ພ້ອມ​ດ້ວຍ​ສະມາຊິກ​ອາວຸ​ໂສ​ບຳນານ ​ແລະ ສະມາຊິກ​ພັກ​ສົມບູນ ​ແລະ ສະມາຊິກ​ພັກສຳຮອງ​ເຂົ້າ​ຮ່ວມ 37 ສະຫາຍ.

      ໃນພິທີ, ສະຫາຍ ສີ​ສຸກ ພັນ​ແພງ​ດີ ​ໄດ້​ຜ່ານ​ມະຕິ​ຕົກລົງ​ຂອງ​ຄະນະ​ພັກ​ ກະຊວງ​ສຶກສາ​ທິການ ​ແລະ ກິລາ ວ່າ​ດ້ວຍ​ການ​ເລື່ອນ​ສະມາຊິກ​ພັກ​ສຳຮອງ​ຂຶ້ນ​ເປັນ​ສະມາຊິກ​ພັກ​ສົມບູນ​ ຈຳນວນ 4 ສະຫາຍ, ຍິງ 1 ສະຫາຍ ​ແລະ ຮັບ​ເອົາ​ມະຫາ​ຊົນ​ຜູ້​ກ້າວໜ້າ​ເຂົ້າ​ເປັນ​ສະມາຊິກ​ພັກ​ສຳຮອງ ຈຳນວນ 4 ສະຫາຍ, ຍິງ 1 ສະຫາຍ.ຂະນະດຽວກັນ​ນັ້ນ​, ສະຫາຍ ວິລະ​ວັນ ບຸນ​ສຸກ​ໄທ ກໍ່​ໄດ້​ເນັ້ນ​ໜັກ​​ໃຫ້​ບັນ​ດາ​ສະມາຊິກ​ພັກ​ສຳຮອງ ​ແລະ ສະມາຊິກ​ພັກ​ສົມບູນ ກຳ​​ແໜ້ນ​ແນວທາງ​ນະ​ໂຍບາຍ​ຂອງ​ພັກ ພ້ອມ​ກັນ​ຈັດ​ຕັ້ງ​ປະຕິບັດ​ດ້ວຍ​ຜົນສຳ​ເລັດ​ຢ່າງ​ຈົບງາມ ​ແລະ ຍິ່ງ​ໃຫຍ່​ກວ່າ​ເກົ່າ ​ໂດຍ​ສະ​ເພາະສຸມ​ໃສ່​ວຽກ​ງານ​ການ​ກໍ່ສ້າງ​ພັກ ​ແລະ ປັບປຸງ​ຕົນ​ເອງ​ຕາມ 5 ຫຼັກການ ​ແລະ 3 ທິດ​ນຳ, ໜ້າ​ທີ່​ຂອງ​ສະມາຊິກ​ພັກ, ສິດ​ຂອງ​ສະມາຊິກ​ພັກ​ສົມບູນ-ສຳຮອງ, ພັນທະ ​ແລະ ຜົນ​ປະ​ໂຫຍ​ດຂອງ​ສະມາຊິກ​ພັກ, ບັນດາ​ຂໍ້​ຫ້າມ​ສຳລັບ​ສະມາຊິກ​ພັກ ​ແລະ ຄວາມ​ສາມັກຄີ​ເປັນ​ປືກ​ແຜ່ນ, ການ​ປະຕິບັດ​ກົດລະບຽບ​ຂອງ​ພັກ, ການ​ປະຕິບັດ​ໜ້າ​ທີ່​ການ​ເມືອງ​ທີ່​ຂັ້ນ​ເທິງ​ມອບ​ໝາຍ​ໃຫ້, ການ​ເປັນ​ແບບຢ່າງ​ນຳ​ໜ້າ ​ແລະ ສ້າງ​ຜົນງານ​ປະກອບສ່ວນ​ເຂົ້າ​ໃນ​ການ​ກະກຽມ​ກອງ​ປະຊຸມ​ໃຫຍ່ ຄັ້ງ​ທີ 10 ຂອງ​ໜ່ວຍ​ພັກ ວສປ ​ທີ່​ຈະ​ໄຂ​ຂຶ້ນ​ໃນ​ທ້າຍ​ປີ​ນີ້.

      ສຳລັບສົກຮຽນ 2017-2018 ໜ່ວຍ​ພັກ ວສປ ມີ​ສະມາຊິກ​ພັກ​ສົມບູນ​ທັງໝົດ 37 ສະຫາຍ, ສະມາຊິກ​ພັກ​ສຳຮອງ 4 ສະຫາຍ ​ແລະ ມີ​ພະນັກງານ​ຄູ-ອາຈານ 64 ທ່ານ, ຍິງ 19 ທ່ານ. ສ່ວນ​ນັກ​ສຶກສາ 515 ຄົນ. ​ໃນ​ນັ້ນ, ວິທະຍາ​ໄລ​ ສິລະ​ປະ​ສຶກສາ ​ໄດ້​ເປີດ​ສອນ​ຫຼັກ​ສູນ​ຂອງກະຊວງ​ສຶກສາ​ທິການ ​ແລະ ກິລາ ສາຍ​ວິຊາ​ຮຽນ ສິລະ​ປະ​ດົນຕີ ​ແລະ ສິລະ​ປະກຳ ​ໃນ​ລະດັບ​ປະລິນຍາ​ຕີ ລະບົບ 12+4, ລະດັບ​ຊັ້ນ​ສູງ ລະບົບ 12+2 ​ແລະ ລະດັບ​ຊັ້ນ​ກາງ ລະບົບ 9+3.

ໂດຍ ສົງການ   

Written by Super User

 ສສກ ຍ້ອງຍໍ ທູດ​ອອສເຕຣເລຍ ປະຈໍາລາວ ທີ່ມີຜົນງານດີເດັ່ນ​ພັດທະນາ​​ຂະ​ແໜງ​ການ​ສຶກສາ-ກິລາ

35078208 1430879747014173 8683858740715192320 n 1   ກະຊວງ​ສຶກສາ​ທິການ ​ແລະ ກິລາ (ສສກ) ​ໄດ້ຈັດ​ພິທີມອບ​ໃບ​ຍ້ອງຍໍ​ໃຫ້​ແກ່ ທ່າ​ນ ແອນ​ເດຣສ​​ ​ເຊີ​ບູຣດ ​ເອກອັກ​ຄະ​ລັດຖະທູດ​ແຫ່ງ​ປະ​ເທດອອສເຕຣເລຍ ປະ​ຈໍາ ສປປ ​ລາວ ທີ່​​ມີ​ຜົນງານ​ດີ​ເດັ່ນ​ປະກອບສ່ວນ​ວຽກ​ງານ​ຫຼາຍໆ​ດ້ານ​ເຂົ້າ​ໃນ​ການ​ພັດທະ​ນາວຽກງານ​ຂະ​ແໜງ​ການ​ສຶກສາ ​ແລະ ກິລາຂອງລາວ​ຈົນ​ໄດ້​ຮັບ​ຜົນ​ສໍາ​ເລັດ​ຕະຫຼອດມາ ໃນວັນທີ 6 ມິຖຸນາ ຜ່ານ​ມາ ທີ່​ຫ້ອງ​ປະຊຸມ​ສໍານັກກະຊວງ​ສຶກສາ​ທິການ ​ແລະ ກິລາ, ​ໂດຍໃຫ້​ກຽດ​ຕາງໜ້າມອບ​ຂອງທ່ານ​ ນາງ​ ແສງ​ເດືອນ ຫຼ້າ​ຈັນທະ​ບູນ ລັດຖະມົນຕີ​ ກະຊວງ​ສຶກສາ​ທິການ ​ແລະ ກິ​ລາ​, ມີ​ບັນດາຫົວໜ້າ​ກົມ, ຮອງ​ກົມ ​ແລະ ພາກສ່ວນ​ທີ່​ກ່ຽວຂ້ອງ ພ້ອມ​ດ້ວຍພະນັກງານວິຊາເຂົ້າ​ຮ່ວມ​​ເປັນ​ສັກຂີ​ພິຍານ.

     

      ການປະກອບສ່ວນຊ່ວຍເຫຼືອຂອງທ່ານເອກອັກ​ຄະ​ລັດຖະທູດ​ແຫ່ງ​ປະ​ເທດອອສເຕຣເລຍ ປະ​ຈໍາ ສປປ ​ລາວ ໃນໄລຍະຜ່ານມານັ້ນ, ​ແມ່ນ​ໄດ້​ປະຕິບັດ​ໜ້າ​ທີ່​ຢ່າງຕັ້ງໜ້າປະກອບສ່ວນໃນວຽກງານພັດທະນາທາງດ້ານການສຶກສາ-ກິລາ ແລະ ມີ​ຜົນງານ​ດີ​ເດັ່ນ​ຫຼາຍໆ​ດ້ານ​ຕໍ່​ກັບ​ການ​ຮ່ວມ​ມື ລະຫວ່າງ ກະຊວງ​ສຶກສາ​ທິກ​ານ ​ແລະ ກິລາ ກັບ​ສະຖານ​ທູດ​ອອສເຕຣເລຍ ປະ​ຈໍາ ສປປ ​ລາວ, ​ເຊິ່ງທ່ານ​ແມ່ນ​ຜູ້​ໜຶ່ງ​ທີ່​ໄດ້​ຂົນຂວາຍ​ຊອກ​ຫາ​ທຸກ​ແຫຼ່ງທຶນ​ຈາກ​ລັດຖະບານ​ອອສເຕຣເລຍ  ​ແລະ ຈາກ​ບັນດາ​ຄູ່​ຮ່ວມ​ມື​ພັດທະນາ​ຕ່າງໆ ມາສະ​ໜັບສະ​ໜູນ​ໃຫ້​ແກ່​ວຽກ​ງານ​ຂະ​ແໜງ​ການ​ສຶກສາ ​ແລະ ກິລາ ດ້ວຍ​ດີ​ຕະຫຼອດ​ມາ ​ແລະ ​​ໃນ​ໄລຍະ​ຜ່ານ​ມາ​ທາງ​ສະຖານທູດ ​ໄດ້​ໃຫ້ການ​ສະໜັບ​ສະ​ໜູນ​ໃນ​ການຈັດ​ຕັ້ງ​ປະຕິບັດ​ໂຄງການ​ຕ່າງໆ ທີ່​ກ່ຽວຂ້ອງ​ກັບ​ວຽກ​ງານ​ການ​ພັດທະນາ​ການ​ສຶກສາ ​ທີ່​ມີ​ມູນ​ຄ່າ​ຫຼາຍ​ລ້ານ, ​ເຊິ່ງ​ເຫັນ​ໄດ້​ໃນ​ບາງ​ກິດຈະ​ກໍາ​ຫຼັກ ຄື: ທ່ານ​ໄດ້​ເປັນ​ປະທານ​ຮ່ວ​ມ​ໃນ​ກອງ​ປະຊຸມ​ຂອງ​ໜ່ວຍງານ​ວິຊາ​ການ​ຂະ​ແໜງ​ການ​ສຶກສາ ​(ESWG) ເປັນ​ຕົ້ນ​ແມ່ນ​ ​ໄດ້​ເປັນປະທານຮ່ວມ​ໃນ​ກອງ​ປະຊຸມ​ລະດັບ​ຜູ້​ບໍລິຫານ​ຂອງ​ໜ່ວຍ​ງານ​ວິຊາ​ການ​ຂະ​ແໜງ​ການ​ສຶກສາ (ESWG Meeting-Executive Level), ກອງ​ປະຊຸມ​ຂອງ​ຄະນະ​ຮັບຜິດຊອບ​ການ​ຄຸ້ມ​ຄອງ​ແຜນ​ງານ​ການ​ປັບປຸງ​ຄຸນະພາບ ​ແລະ ຂະຫຍາຍ​ໂອກາດ​ການ​ເຂົ້າ​ຮຽນ​ສໍາລັບ​ການ​ສຶກສາ​ຂັ້ນ​ພື້ນຖານຢູ່ ສປປ ລາວ (BEQUAL) ​ແລະ ກອງ​ປະຊຸມ​ອື່ນໆ ​ເພື່ອ​ປຶກສາ​ຫາລື ​ແລະ ​ແລກປ່ຽນ​ຄໍາ​ຄິດ​ຄໍາ​ເຫັນ​ເຂົ້າ​ໃນ​ການຈັດ​ຕັ້ງ​ປະຕິບັດ​ແຜນ​ພັດທະນາ​ຂະ​ແໜງ​ການ​ສຶກສາ ​ແລະ ກິລາ (ESDP), ​ເປົ້າ​ໝາຍ​ການ​ພັດທະນາ​ແບບ​ຍືນ​ຍົງ (SDGs), ​ເປັນ​ຄູ່​ຮ່ວມ​ປະສານ​ງານ​ຂອງ​ກອງ​ທຶນ​ສາກົນ ​ເພື່ອ​ການ​ພັດທະນາ​ການ​ສຶກສາ (GPE) ​ແລະ ບັນ​ຫາ​ອື່ນໆ​ຕື່ມ​ອີກ.

       ນອກຈາກ​ນັ້ນ, ຍັງ​ໄດ້​ຊ່ວຍ​ໃນ​ການ​ສ້າງ​ສະ​ຖາ​ບັນ ລາວ​-ອອສເຕຣເລຍ ​ເພື່ອ​ສະໜັບສະໜູນ​ໃຫ້​ແກ່​ວຽກງານ​ການ​ພັດທະນາ​ຊັບພະຍາກອນ​ມະນຸດ, ​ເຊິ່ງ​ແບ່ງ​ອອກ​ເປັນ 2 ​ໄລຍະ ຄື: ​ໄລຍະ​ທີ 1 ​ແມ່ນ​ລະຫວ່າງ​ປີ 2013-2017 ມີ​ຈໍານວນ​ເງິນ​ທັງ​ໝົດ 2 ລ້ານ​ໂດ​ລາອອສເຕຣເລຍ ​ແລະ ​ໄລຍະ​ທີ 2 ​ແມ່ນລະຫວ່າງປີ 2017-2021, ຊຸກຍູ້​ການຈັດ​ຕັ້ງ​ປະຕິບັດວຽກ​ງານ​ອາຫານ​ໂຮງຮຽນ, ວຽກ​ງານ​ນໍ້າ ​ແລະ ສຸຂະ​ພິບານ​ໃນ​ໂຮງຮຽນ ​ເພື່ອ​ຊ່ວຍ​ເພິ່ມອັດຕາ​ການ​ເຂົ້າ​ຮຽນ​ຂອງ​ນັກຮຽນ​ໃນ​ເຂດ​ຫ່າງ​ໄກ​ສອກຫຼີກໃຫ້​ພວກ​ເຂົາ​ໄດ້​ເຂົ້າ​ຮຽນ​ໜັງສື​ຫຼາຍ​ຂຶ້ນ, ຊ່ວຍ​ໃນ​ກາ​ນຈັດ​ຕັ້ງ​ປະຕິບັດ​ກິດຈະ​ກໍາ​ຕ່າງໆ​ຂອງ​ຂະ​ແໜງ​ການ​ສຶກສາ ​ແລະ ກິລາ. ນອກກຈາກນີ້, ລັດຖະບານອອສເຕຣເລຍ ຍັງ​ໄດ້​ໃຫ້ການ​ສະໜັບສະໜູນ ​ໂດຍ​ສະ​ເພາະ​ໃຫ້​ທຶນ​ການ​ສຶກສາ​ໃນ​ການ​ກໍ່ສ້າງ​ພະນັກງານ​ເຕັກນິກ​ທີ່​ມີ​ຄຸນ​ວຸດ​ທິ​ໃນ​ລະດັບ​ຊັ້ນ​ສູງ, ປະລິ​ຍາ​ຕີ ​ແລະ ປະລິນຍາ​ໂທ ສາມາດ​ປະກອບສ່ວນ​ເຂົ້າ​ໃນ​ການ​ພັດທະນາ​ເສດຖະກິດ-ສັງຄົມ​ຂອງ ສປປ ລາວ, ສະ​ເລ່ຍ​ແລ້ວ​ມີ 40 ທຶນ​ຕໍ່​ປີ, ​​ໃຫ້​ທຶນ​ການ​ສຶກສາ​ແກ່​ນັກຮຽນ​ທຸກ​ຍາ​ກທີ່ຢູ່​ຕ່າງ​ແຂວງ ​ເພື່ອ​ເຂົ້າ​ຮຽນ​ຕໍ່​​ທີ່​ມະຫາວິທະຍາ​ໄລ​ແຫ່ງ​ຊາດ ຈໍານວນ 64 ທຶນ​ຕໍ່​ປີ ​ແລະ ​ໃຫ້​ທຶນ​ການ​ເຝິກ​ອົບຮົມ​ໃນ​ໄລຍະ​ສັ້ນ ​ເພື່ອ​ສ້າງ​ຄວາມ​ອາດ​ສາມາດ​ໃຫ້​ແກ່​ພະນັກງານ​ກະຊວງ​ສຶກສາ​ທິການ ​ແລະ ກິລາ ​ໃນ​ດ້ານ​ຕ່າງໆ ຈໍານວນ​ໜຶ່ງ​ອີກ​ດ້ວຍ.

ໂດຍ: ນາງ ຕຸ່ນ​ຄໍາ