ສຶກສາ

ສຶກສາ

Written by Super User

ມສ ວຽງຈັນ ສຳ​ເລັດງານສັບປະດາການຮຽນຮູ້ດ້ານວິທະຍາສາດ ຄັ້ງທີ IV

30070426 1368753059893509 623124558 oໂຮງຮຽນມັດທະຍົມສົມບູນວຽງຈັນ (ມສ ວຽງຈັນ) ຈັດພິທີສະຫຼຸບງານສັບປະດາການຮຽນຮູ້ດ້ານວິທະຍາສາດ ຄັ້ງທີ 4 ໃນວັນທີ 29 ມີນາ ຜ່ານມາ ທີ່ສະໂມສອນກິລາໃນຮົ່ມຂອງໂຮງຮຽນດັ່ງກ່າວ, ໂດຍເປັນກຽດເຂົ້າຮ່ວມຂອງ ທ່ານ ໄຊຍະເດດ ຊົງມີໄຊ ຫົວໜ້າພະແນກມັດທະຍົມປາຍ ກົມ​ສາມັນສຶກສາ ກະຊວງສຶກສາທິການ ແລະ ກິລາ, ທ່ານ ບຸນທັນ ແສງມະນີ ຫົວໜ້າຂະແໜງການມັດທະຍົມປາຍ ພະແນກສຶກສາທິການ ແລະ ກິລາ ນະຄອນຫຼວງວຽງຈັນ ແລະ ທ່ານ ນາງ ວຽງສຸວັນ ພະໄຊສົມບັດ ຜູ້ອຳນວຍການໂຮງຮຽນ ມສ ວຽງຈັນ, ມີຜູ້ຕາງໜ້າຈາກມະຫາວິທະຍາໄລແຫ່ງຊາດ, ອຳນວຍການ-ຮອງອຳນວຍການໂຮງຮຽນອ້ອມຂ້າງ, ຫົວໜ້າກົມ, ຮອງກົມ, ພະນັກງານ, ຄູ-ອາຈານ ແລະ ແຂກທີ່ຖືກເຊີນ ຕະຫຼອດຮອດນ້ອງນັກຮຽນເຂົ້າຮ່ວມຢ່າງພ້ອມພຽງ.

      ​ໂອກາດ​ດັ່ງກ່າວ, ທ່ານ ນາງ ວຽງສຸວັນ ພະໄຊສົມບັດ ກ່າວວ່າ: ຈຸດປະສົງຂອງງານສັບປະດາການຮຽນຮູ້ດ້ານວິທະຍາສາດ ຄັ້ງທີ 4 ແມ່ນໄດ້ຈັດຂຶ້ນຢ່າງຍິ່ງໃຫຍ່ກວ່າປີຜ່ານມາ ເພື່ອຈັດຕັ້ງຜັນຂະຫຍາຍແຜນຍຸດທະສາດປະຕິຮູບການສຶກສາແຫ່ງຊາດ ແລະ ປະຕິບັດຕາມແຜນການກະຊວງສຶກສາທິການ ແລະ ກິລາ ທີ່ໃຫ້ຈັດຕັ້ງການຮຽນ-ການສອນ ພາກທິດສະດີ ແລະ ພາກປະຕິບັດຕົວຈິງ, ການຮຽນຮູ້ໃນຫ້ອງ ແລະ ນອກຫ້ອງຮຽນ ຄຽງຄູ່ກັນ, ການສຶກສາຮຽນຮູ້ດ້ານວິທະຍາສາດ ແມ່ນວຽກງານໜຶ່ງທີ່ສຳຄັນໄດ້ສ້າງໂອກາດໃຫ້ນັກຮຽນໄດ້ເຝິກຝົນ, ສະແດງຄວາມຮູ້ຄວາມສາມາດ, ສະຕິປັນຍາ, ຫົວຄິດປະດິດສ້າງທາງດ້ານວິທະຍາສາດທຳມະຊາດ, ວິທະຍາສາດສັງຄົມ ແລະ ວັດທະນະທຳອັນດີງາມຂອງຊາດ. ສຳລັບງານສັບປະດາການຮຽນຮູ້ວິທະຍາສາດປະຈຳປີ 2018 ແມ່ນຈັດຂຶ້ນລະຫວ່າງວັນທີ 5-29 ມີນາ 2018 ຈຶ່ງສໍາເລັດ, ເຊິ່ງການແຂ່ງຂັນດັ່ງກ່າວປະກອບມີ: ການຖາມ-ຕອບວິທະຍາສາດ, ການແຂ່ງຂັນທົດລອງຟີຊິກສາດ, ເຄມີສາດ, ຊີວະສາດ, ການແຂ່ງຂັນຈະຫຼວດນ້ຳ, ການສະເໜີບົດຂອງນັກຮຽນ 1 ຫົວຂໍ້ 1 ຊັ້ນ 1 ວິຊາ, ການຄິດເລກໄວ, ການສາທິດ, ການຫຼິ້ນເກມ, ສະແດງຜົນງານຂອງແຕ່ລະຈຸຕ່າງໆ. ນອກຈາກນີ້, ຍັງມີການວາງສະແດງວັດທະນະທຳລາວ-ອາຊຽນ, ການແຕ່ງອາຫານ, ສິ່ງປະດິດສ້າງຂອງນັກຮຽນ, ການສະແດງຄວາມສາມາດດ້ານສິລະປະ, ຮ້ອງເພງ, ຂັບລຳຕ່າງໆຂອງນ້ອງນັກຮຽນ.

      ຂະນະ​ທີ່ ທ່ານ ທອງພັນ ອຸໄລທອນ ຮອງຜູ້ອຳນວຍການໂຮງຮຽນ ມສ ວຽງຈັນ ຮັບຜິດຊອບວຽກງານວິຊາການ ໄດ້ຜ່ານບົດລາຍງານ ກ່ຽວກັບງານສັບປະດາການຮຽນຮູ້ດ້ານວິທະຍາສາດ ຄັ້ງທີ 4 ປະຈໍາປີ 2018 ​ໃຫ້​ຊາບວ່າ: ການຈັດຕັ້ງປະຕິບັດງານສັບປະດາການຮຽນຮູ້ວິທະຍາສາດ ໃນສົກ 2017-2018 ແມ່ນໄດ້ດຳເນີນໄປຕາມແຜນການ ແລະ ບັນລຸຄາດໝາຍ ທີ່ກຳນົດໄວ້. ສໍາລັບງານແຂ່ງຂັນງານສັບປະດາການຮຽນຮູ້ດ້ານວິທະຍາສາດຄັ້ງນີ້, ແມ່ນໄດ້ຈັດຕັ້ງປະຕິບັດມາແຕ່ວັນທີ 5-29 ມີນາ 2018 ແລະ ການວາງສະແດງກິດຈະກຳຕ່າງໆ ແມ່ນເລີ່ມແຕ່ວັນທີ 26-29 ມີນາ 2018 ປະກອບມີ 2 ພາກສ່ວນຄື: ວາງສະແດງການຮຽນ-ການສອນແຕ່ລະວິຊາ ຈຳນວນ 13 ຈຸວິຊາ ແລະ ວາງສະແດງວັດທະນະທຳລາວ ແລະ ອາຊຽນ, ຮັບເຊີນຈາກພາກສ່ວນອື່ນມີທັງໝົດ 12 ຮ້ານ ແລະ ຮ້ານຂາຍອາຫານຂອງນັກຮຽນ 50 ຮ້ານ. ນອກຈາກນັ້ນພວກເຮົາຍັງມີການແຂ່ງຂັນເຄື່ອງປະດິດສ້າງສີໄມ້ລາຍມືຂອງນ້ອງນັກຮຽນ ແລະ ກໍ່ຍັງມີເວທີໃຫ້ນັກຮຽຂຶ້ນສະແດງຄວາມສາມາດໃນການຮ້ອງເພງ, ລຳ, ຟ້ອນ ແລະ ເຕັ້ນ, ແຕ່ລະຈຸວິຊາເປັນເຈົ້າການ ຈັດວາງສະແດງ, ກິດຈະກຳ, ຫຼິ້ນເກມ, ສາທິດຕ່າງໆຢູ່ຕໍ່ໜ້າບຸດ ແລະ ເທິງເວທີ.

ອຳ​ໄພ​ວັນ

Written by Super User

 ຊາວໜຸ່ມ 2 ພາກສ່ວນ ສ້າງຂະບວນການຊົມເຊີຍ ແລະ ຮັບຕ້ອນວັນສຳຄັນຂອງຊາດ

29955360 1368752969893518 1652320481 o   ຄະນະຊາວໜຸ່ມ ປະຊາຊົນ ປະຕິວັດລາວຂອງອົງການກາແດງລາວ ແລະ ສະຖາບັນເສດຖະກິດ-ການເງິນ (ດົງຄຳຊ້າງ) ໄດ້ຮ່ວມມືກັນສ້າງຂະບວນການຊາວໜຸ່ມບໍລິຈາກເລືອດ ເພື່ອຊົມເຊີຍວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 63 ປີ ແລະ ຄໍານັບຮັບຕ້ອນວັນສ້າງຕັ້ງຄະນະຊາວໜຸ່ມ ປະຊາຊົນ ປະຕິວັດລາວ ຄົບຮອບ 63 ປີ ເມື່ອວັນທີ 30 ມີນາ ຜ່ານມາ ທີ່ສະຖາບັນເສດຖະກິດ-ການເງິນ, ໂດຍໃຫ້ກຽດເຂົ້າຮ່ວມຂອງທ່ານ ທອງພະຈັນ ສອນນະສິນ ຮອງເລຂາຄະນະພັກຮາກຖານ, ຮອງປະທານອົງການກາແດງລາວ, ທ່ານ ຟອງ ສີສຸພັນ ພົມມະວົງ ຄະນະພັກຮາກຖານ, ຮອງຫົວໜ້າ ສະຖາບັນເສດຖະກິດ-ການເງິນ, ພ້ອມດ້ວຍພະນັກງານ, ຄູ-ອາຈານ, ນັກສຶກສາ ເຂົ້າຮ່ວມ.

 

 

     ພາຍໃນກິດຈະກຳຄັ້ງນີ້, ປະກອບມີການບໍລິຈາກເລືອດຂອງຄູ-ອາຈານ, ນັກສຶກສາ ແລະ ບຸກຄົນອ້ອມຂ້າງ, ເຊິ່ງເລືອດທີ່ບໍລິຈາກໄດ້ແມ່ນມີຈຳນວນ 121 ຖົງ, ໂດຍລື່ນຄາດໝາຍທີ່ກຳນົດໄວ້ໃນເບື້ອງຕົ້ນ. ພ້ອມດຽວກັນນີ້, ຍັງມີການສາທິດປະຖົມພະຍາບານຈາກອາສາສະໝັກກູ້ຊີບກາແດງລາວ ໂດຍຜູ້ເຂົ້າຮ່ວມສາມາດທົດລອງ ແລະ ເຝິກຊ້ອມໃນຫົວຂໍ້ຕ່າງໆ ໃນການປະຖົມພະຍາບານ. ສຳລັບຂະບວນການດັ່ງກ່າວ, ແມ່ນໄດ້ສ້າງໂອກາດ ແລະ ປະສົບການອັນດີໃຫ້ແກ່ຊາວໜຸ່ມໃນການປະກອບສ່ວນໃນວຽກງານມະນຸດສະທຳ.ນອກຈາກນັ້ນ, ໃນຕອນແລງຂອງມື້ດຽວກັນທັງ 2 ພາກສ່ວນຍັງໄດ້ສ້າງຂະບວນການແຂ່ງຂັນກິລາເຕະບານມິດຕະພາບ ເພື່ອຮັດແໜ້ນຄວາມສາມັກຄີຮັກແພງ, ເຊິ່ງບັນຍາກາດແມ່ນເຕັມໄປດ້ວຍຄວາມໝາຍ ແລະ ຟົດຟື້ນ.

(ໂດຍ ສົງການ)


Written by Super User

 ພະນັກງານ-ລັດຖະກອນ ສສກ ​ເຊື່ອມ​ຊຶມ​ມູນເຊື້ອວັນສ້າງຕັ້ງພັກ ຄົບຮອບ 63 ປີ

29993696 1368752689893546 1988025918 o    ພະນັກງານ-ລັດຖະກອນ ກະຊວງ​ສຶກສາ​ທິການ ​ແລະ ກິລາ (ສສກ) ​ໄດ້ຮັບຟັງການປາຖະກະຖາ​ເຊື່ອມ​ຊຶມມູນເຊື້ອວັນສ້າງຕັ້ງພັກປະຊາຊົນ ປະຕິວັດລາວ ຄົບຮອບ 63 ປີ (22 ມີນາ 1955-22 ມີນາ 2018) ເມື່ອວັນທີ 30 ມີນາ ຜ່ານມາ ທີ່ສະ​ໂມ​ສອນ​ໃຫຍ່ (​ຊັ້ນ 2) ມະຫາວິທະຍາ​ໄລ​ແຫ່ງ​ຊາດ, ໂດຍໃຫ້ກຽດບັນຍາຍ​ເອກະສານຂອງ​ສະຫາຍ ຮສ.ປອ ກອງ​ສີ ​ແສງ​ມະນີ ຮອງ​ເລຂາ​ຄະນະ​ພັກ ຮອງ​ລັດຖະມົນຕີ ກະຊວງ​ສຶກສາ​ທິການ ​ແລະ ກິລາ, ມີ​ບັນດາ​ຄະນະ​ພັກ​ກະຊວງ, ຫົວໜ້າ​ຫ້ອງການ​-ຮອງ​ຫົວໜ້າ​ຫ້ອງການ​, ກົມ, ສູນ, ສະ​ຖາ​ບັນ, ມະຫາວິທະຍາ​ໄລ​ແຫ່ງ​ຊາດ, ວິທະຍາ​ໄລ ​ແລະ ພາກສ່ວນ​ຕ່າງໆ​ອ້ອມ​ຂ້າງ ກະຊວງ​ສຶກສາ​ທິການ ​ແລະ ກິລາ ​ຈຳນວນ 350 ກວ່າ​ສະຫາຍເຂົ້າ​ຮ່ວມ.

     

      ໂອກາດດັ່ງກ່າວ, ສະຫາຍ ຮສ.ປອ ກອງ​ສີ ​ແສງ​ມະນີ ໄດ້ກ່າວໃຫ້ຮູ້ວ່າ: ຊາດ​ລາວ ​ແມ່ນ​ຊາດ​ໜຶ່ງ​ທີ່​ມີ​ປະຫວັດ​ແຫ່ງ​ການ​ກຳ​ເນີ​ດ, ຄົງ​ຕົວ ​ແລະ ຂະຫຍາຍຕົວ​ຍາວ​ນານ​ມາ​ຫຼາຍ​ພັນ​ປີ, ມີ​ປະຫວັດສາດ​ອັນ​ເກົ່າ​​ແກ່, ມີ​ມູນ​ເຊື້ອ​ທີ່​ສະຫງ່າ​ອົງອາດ ​ແລະ ຈົບງາມ​ມາ​ແຕ່​ບູຮານ​ນະ​ການ ຄື: ມູນ​ເຊື້ອ​ດຸ​ໝັ່ນ​ໃນ​ການ​ອອກ​ແຮງ​ງານ, ມູນ​ເຊື້ອ​ສາມັກຄີ​ປອງ​ດອງ, ມູນ​ເຊື້ອ​ແພງ​ຊາດ, ມູນ​ເຊື້ອ​ວັດທະນະທຳ​ທີ່​ເປັນ​ເອກະ​ລັກ​ອັນ​ດີງາມ ​ແລະ ອັນ​ພົ້ນ​ເດັ່ນ​ກວ່າ​ໝູ່​ແມ່ນ​ມູນ​ເຊື້ອ​ແຫ່ງ​ການ​ຕໍ່ສູ້​ບໍ່​ຍອມ​ຈຳ​ນົນ ຕ້ານ​ການ​ຮຸກ​ຮານ​ຂອງ​ສັດ​ຕູ້​ຢ່າງ​ເດັດດ່ຽວ​ໜຽວ​ແໜ້ນ​ຂອງ​ບັນດາ​ບັນພະ​ບູລຸດລາວ​ເຮົາ ​ໃນ​ການ​ທ້ອນ​ໂຮມ, ປົກ​ປັກ​ຮັກສາ ​ແລະ ສ້າງສາ​ປະ​ເທດ​ຊາດ ​ເພື່ອ​ຄວາມ​ຢູ່​ເຢັນ​ເປັນ​ສຸກ​ຂອງ​ປະຊາຊົນ​ລາວ​ບັນດາ​ເຜົ່າ​ໃນ​ແຕ່​ລະ​ຍຸກ ​ແຕ່​ລະສະ​ໄໝ​ ສືບ​ທອດ​ຕໍ່​ກັນ​ມາ​ຈົນ​ເຖິງ​ປັດຈຸບັນ.

       ນອກຈາກ​ນັ້ນ, ພັກປະຊາຊົນປະຕິວັດລາວ ເປັນພັກນຳພາອັນສະຫຼາດສ່ອງໃສ, ຕະຫຼອດໄລຍະ 63 ປີຜ່ານມາ, ພັກໄດ້ນຳພາກຳລັງປະກອບອາວຸດ ແລະ ປວງຊົນລາວທັງຊາດ, ທຸກເຂດແຂວງທົ່ວປະເທດໃຊ້ທຸກເຫື່ອແຮງ, ສະຕິປັນຍາ ເພື່ອນຳພາປະເທດຫຼຸດພົ້ນອອກຈາກແອກປົກຄອງຂອງພວກລ່າເມືອງຂຶ້ນແບບເກົ່າ ແລະ ແບບໃໝ່, ເດັດດ່ຽວຕໍ່ສູ້ບໍ່ຍອມຈຳນົນ ແລະ ເປັນນັກປະຕິວັດທີ່ເສຍສະຫຼະເລືອດເນື້ອ ເພື່ອປະກາດເອກະລາດ ແລະ ຍາດເອົາຜືນແຜ່ນດິນອັນຄົບຖ້ວນມາສູ່ປະຊາຊົນລາວທັງຊາດ.

       ທັງນີ້, ເພື່ອຫຼຸດພົ້ນອອກຈາກແອກປົກຄອງຂອງພວກລ່າເມືອງຂຶ້ນແບບເກົ່າ ແລະ ແບບໃໝ່ ຈຶ່ງເຮັດໃຫ້ພັກປະຊາຊົນ ປະຕິວັດລາວ ຖືກດຳເນີນເກີດຂຶ້ນໃນວັນທີ 22 ມີນາ 1955 ​ໂດຍໄດ້ນຳພາການຕໍ່ສູ້ຕ້ານຈັກກະພັດຜູ້ຮຸກຮານຢ່າງເດັດດ່ຽວໜຽວແໜ້ນ, ເຖິງວ່າການຕໍ່ສູ້ຈະຍືດ​ເຍື້ອຍາວນານ ແຕ່ພັກກໍ່ໄດ້ນຳພາປະຊາຊົນຕໍ່ສູ້ຢ່າງມີໄຫວພິບສະຫຼຽວສະຫຼາດ, ຈົນເຖິງວັນທີ 2 ທັນວາ 1975 ຈຶ່ງສາມາດຍາດໄດ້ອິດສະຫຼະພາບ ແລະ ຜືນ​ແຜນດິນອັນຄົບຖ້ວນ ສະຖາປະນາເປັນສາທາລະນະລັດ ປະຊາທິປະໄຕ ປະຊາຊົນລາວ ຈົນເຖິງປັດຈຸບັນ ແລະ ພັກປະຊາຊົນປະຕິວັດລາວ ກໍ່ໄດ້ນຳພາສ້າງສາ ແລະ ພັດທະນາປະເທດຊາດກ້າວສູ່ຄວາມຈະເລີນຮຸ່ງເຮືອງ ປະເທດຊາດຫຼຸດພົ້ນອອກຈາກສະຖານະພາບຄວາມດ້ອຍພັດທະນາ ກ້າວຂຶ້ນສູ່ເສັ້ນທາງສັງຄົມນິຍົມຕາມຈຸດປະສົງເປົ້າໝາຍຂອງພັກປະຊາຊົນປະຕິວັດລາວໄດ້ວາງໄວ້.

      ໂດຍ: ນາງ ຕຸ່ນ​ຄໍາ