ສຶກສາ

ສຶກສາ

Written by Super User

ຜູ້ບໍລິຫານສະຖາບັນສ້າງຄູທົ່ວປະເທດ ທົບທວນວຽກງານການປະຕິບັດແຜນສົກ 2017-2018

36656129 1464275303674617 3726001424836853760 nກົມ​ສ້າງຄູ ກະຊວງ​ສຶກສາ​ທິການ ​ແລະ ກິລາ (ສສກ) ​ໄດ້​ຈັດກອງ​ປະຊຸມ​ຜູ້​ບໍລິຫານ​ສະ​ຖາ​ບັນ​ສ້າງຄູ ຄັ້ງ​ທີ 23 ປະ​ຈໍາ​ສົກ 2017-2018 ​ແລະ ສະຫຼຸບ​ວຽກ​ງານ​ຂະ​ແໜງ​ການ​ຍ່ອຍ​ການ​ສຶກສາຄູ ສໍາລັບ 6 ​ເດືອນ ຕົ້ນ​ປີ ເມື່ອ​ວັນ​ທີ 5 ກໍ​ລະ​ກົດ ຜ່ານ​ມາ ທີ່​ສະ​ໂມ​ສອນ ວິທະຍາ​ໄລ​ ຄູດົງ​ຄໍາ​ຊ້າງ, ໂດຍ​​ໃຫ້​ກຽດ​ເປັນ​ປະທານ​ຂອງ​ທ່ານ ຮສ.ປອ ກອງ​ສີ ​ແສງ​ມະນີ ຮອງ​ລັດຖະມົນຕີ​ ກະຊວງ​ສຶກສາ​ທິການ ​ແລະ ກິ​ລາ, ມີ​ຫົວໜ້າ​-ຮອງ​ຫົວ​ໜ້າ​ກົມ, ຜູ້​ບໍລິຫານ​ສະ​ຖາ​ບັນ​ສ້າງຄູທົ່ວ​ປະ​ເທດ, ພະນັກງາ​ນ, ວິຊາ​ການ ​ແລະ ຄະນະ​ຮັບຜິດຊອບ​ກ່ຽວຂ້ອງ​ເຂົ້າ​ຮ່ວມ​ຢ່າງ​ພ້ອມພຽງ.

​ໂອກາດ​ດັ່ງ​ກ່າວ, ທ່ານ ​ເກດພັນລັກ ວ່າການ​ຫົວໜ້າ​ກົມ​ສ້າງ​ຄູ ກະຊວງ​ສຶກສາ​ທິການ ​ແລະ ກິລາ ​ໄດ້ຜ່ານ​ຮ່າງ​ບົດສະຫຼຸບ​ການ​ປະຕິບັດ​ແຜ​ນສົກ 2017-2018 ​​ໂດຍ​ມີ​ຜົນ​ສໍາ​ເລັດ​ຫຼາຍ​ດ້ານ ​ເປັນ​ຕົ້ນ​ແມ່ນ ​ໄດ້​ສືບ​ຕໍ່​ປະ​ຕິ​ບັດ​ການ​ຄັດ​ເລືອກ​ຜູ້​ເຂົ້າ​ຮຽນ​ຕາ​ມມາດຕະຖານ ​ແລະ ​ເງື່ອນ​ໄຂ​ທີ່​ວາງອອກ; ​ໄດ້​ເປີດ​ສາຍ​ຮຽນ​ຕາມ​ທ່າ​ແຮງ​ຂອງ​ວິ​ທະຍ​າ​ໄລ​ຄູ​ແຕ່ລະ​ແຫ່ງ; ການ​ຮັບ​ນັກຮຽນ​ຄູ​​ໄດ້​ມີ​ທ່າອ່ຽງຫຼຸ​ດລົງ. ທັງ​ນີ້, ​ກໍ່ເພື່ອ​ແກ້​ໄຂ​ບັນ​ຫາ​ຄູ​ເຫຼືອ-​ບໍ່ພໍ. ພ້ອມ​ກັນ​ນັ້ນ, ກໍ່​ໄດ້​ສະໜອງ​ອຸ​ປະ​ກອນ​ຫ້ອງ​ທົດ​ລອງ ​ແລະ ສື່​ການ​ຮຽນ-​ການ​ສອນ​ປະ​ເພດ​ຕ່າງໆ ​ເຮັດ​​ໃຫ້​ວິທະຍາ​ໄລ​ຄູ​ທຸກ​​ແຫ່ງ ມີ​ມາດ​ຕະຖານ​ການ​ສ້າງ​ຄູ​ທີ່​ໃກ້​ຄຽງ​ກັນ. ສິ່ງ​ດັ່ງກ່າວ ສາມາດ​​ເອື້ອ​ອໍານວຍ​ໃຫ້​ແກ່​ການ​ຮຽນ-​ການ​ສອນ​ໃຫ້​ມີ​ຄຸນະພາ​ບ​ເທື່ອ​ລະ​ກ້າວ. ຂະນະ​ດຽວ​ກັນ​ນັ້ນ, ​ເພື່ອ​ສະໜອງ​ຄວາມ​ຕ້ອງການ​ຄູ​ໃນ​ແຕ່​ລະສາຍ​ວິຊາ​ໃຫ້​ສອດ​ຄ່ອງ​ກັບ​ຜົນ​ສໍາ​ຫຼວດຄວາມ​ຕ້ອງການ​ຄູປະ​ຈໍາ​ປີ ​ແຕ່​ລະວິ​ທະຍາ​ໄລ​ຄູ ​ໄດ້​ທົບ​ທວນ​ການ​ເປີດ​ສາຍຮຽນ ​ໂດຍ​ອີງ​ໃສ່​ຄວາມ​ພ້ອມ​ຂອງ​ຕົນ ​ເພື່ອ​ສ້າງ​ໃຫ້​ກາຍ​ເປັນ​ສູນ​ແຫ່ງ​ການ​ພັດທະນາ ​ແລະ ສູນ​ແຫ່ງ​ຄວາມ​ເປັນ​ເລີດ​ໃນ​ແຕ່​ລະສາຍ​ວິຊາ.

ສໍາ​ລັບແຜນ​ພັດທະນາ​ວຽກ​ງານ​ສ້າງ​ຄູ ສົກ 2018-2019 ​ໄດ້​ວາງ​ແຜນ​ງານ​ຈຸ​ດສຸມ ​ໂດຍ​ສະ​ເພາະ​​ແມ່ນ​ປັບປຸງ​ຫຼັກສູດ​ສ້າງ​ຄູ​ໃນ​ທຸກ​ຊັ້ນ ​ແລະ ທຸກ​ສາຍໃຫ້​ມີ​ຄວາມ​ສອດຄ່ອງ ​ແລະ ກົມກຽ​ວກັບ​ຫຼັກສູດ​ການ​ສຶກສາກ່ອນ​ໄວ​ຮຽນ ​ແລະ ຫຼັກ​ສູ​ດສາຍ​ສາມັນ​ສຶກສາ​ທີ່​ມີ​ການ​ປັບປຸງ​ໃໝ່​ໃຫ້​ດີ​ຂຶ້ນ, ​ຍົກ​ຄຸນະພາບ​ການ​ສອນ​ຂອງ​ຄູ​ໃນ​ສະ​ຖາ​ບັນ​ສ້າງ​ຄູ​ໃຫ້​ສູງ​ຂຶ້ນ​, ການ​ສະໜອງ​ການ​ບໍາລຸງ​ຄູ​ໃຫ້​ເປັນ​ລະບົບ ​ເພື່ອ​ພັດທະນາ​ວິຊາ​ຊີບ​ຄູ​ແບບ​ຕໍ່​ເນື່ອງ, ປັບປຸງ​ເຄື່ອຂ່າ​ຍການ​ພັດທະນາ​ວິຊາ​ຊີ​ບຄູ​ໃຫ້​ໜັກ​ແໜ້ນ, ການ​ສ້າງ​ຄວາມ​ເຂັ້ມ​ແຂງ​ໃຫ້​ແກ່​ການ​ປະກັນ​ຄຸນະພາ​ບພາຍ​ໃນ ​ແລະ ປັບປຸງ​ການ​ບໍລິຫານ​ຈັດການ​ໃນ​ສະ​ຖາ​ບັນ​ສ້າງຄູ; ວາງ​ແຜນ ​ແລະ ຄຸ້ມ​ຄອງ​ກ່ຽວ​ກັບ​ຄວາມ​ຕ້ອງການ ​ແລະ ກາ​ນສະໜ​ອງຄູ, ຄັດ​ເລືອກ​ເອົາ​ນັກຮຽນ​ທີ່​ໄດ້​ມາດຕະຖານ​​ເຂົ້າ​ຮຽນ​ຄູ.

​​ໂອກາດ​ດຽວ​ກັນ, ທ່ານ ຮສ.ປ​ອ ກອງ​ສີ ​ແສງ​ມະນີ ກໍ່​ໄດ້​ກ່າວ​ສະ​ແດງ​ຄວາມ​ຍ້ອງຍໍ​ຊົມ​ຊີ​ຍຕໍ່​ຜົ​ນສໍາ​ເລັດ​ທີ່​ສາມາ​ດຍາດ​ມາ​ໄດ້, ພ້​ອມທັງ​ເນັ້ນໜັກ​ໃຫ້​ສືບ​ຕໍ່​ປະຕິ​ຮູບ​ຫຼັກສູດ​ການ​ຮຽນ-​ການ​ສອນ​ທຸກ​ສາຍ​ຮຽນ​ຕາມ​ທິດ​ຫຼຸດຜ່ອນ​ທິດ​ສະ​ດີ ​ແລະ ​ເພີ່ມ​ພາກ​ປະຕິບັດ​ຕົວ​ຈິງ​ໃຫ້​ຫຼາຍ​ຂຶ້ນ; ​ໃຫ້​ຮີບ​ຮ້ອນ​ປັບປຸງ​ຍຸດ​ທະ​ສາດ​ການ​ພັດທະ​ນາ​ຄູ ​ໂດຍ​ອີງ​ໃສ່​ຜົນ​ການ​ສໍາ​ຫຼວດຄູ​ໃຫ້​ສໍາ​ເລັດ​ໂດຍ​ໄວ ​ແນ່​ໃສ່​ບັນ​ລຸ​ບັນດາ​ຄາດໝາຍ​ທາງ​ດ້ານ​ຄຸນະພາບ ​ແລະ ປະລິ​ມານ​ກໍ່ສ້າງ​ຄູ​ແຕ່​ລະ​ຊັ້ນ, ​ແຕ່​ລະສາຍ​ໃນ​ແຕ່ລະ​ປີ ​ແຕ່​ນີ້​ຮອດ​ປີ 2025; ​ໃຫ້​ສືບ​ຕໍ່​ການ​ພັດທະນາ​ວິຊາ​ຊີບ​ຄູ​ທັງ​ໃນ​ສະ​ຖາ​ບັນ​ສ້າງ​ຄູ ​ແລະ ​ເຂດ​ບໍລິການໃຫ້​ເນັ້ນ​ໃສ່​ການ​ພັດທະນາ​ດ້ານພາສາ​ອັງກິດ ​​ແລະ ນໍາ​ໃຊ້ ​ໄອ​ຊີ​ທີ ​ເຂົ້າ​ໃນ​ການ​ຮຽນ-​ການ​ສອນ, ພ້ອມ​ທັງສ້າງ​ແຜນພັດທະນາ​ໃນ​ການ​ຍົກ​ລະ​ດັບ​ຄູ​ສອນ ​​ໂດຍ​ມີ​ຄາດໝາຍ​ໃນ​ແຕ່ລະ​ປີ; ​ໃຫ້​ວິທະຍາ​ໄລ​ຄູ​ປະສານ​ສົມ​ທົບ​ກັບ​ພະ​ແນ​ກສຶກສາ​ທິການ ​ແລະ ກິລາ​ແຂວງ, ຫ້ອງການ​ສຶກສາ​ທິການ ​ແລະ ກິລາ​ເມືອງ ​ເພື່ອ​ຫັນ​ໂຮງຮຽນ​ມັດທະ​ຍົມ​ສຶກສາ​ທີ່ມີຢູ່​ແລ້ວ​ໃຫ້​ເປັນ​ໂຮ​ງຮຽນ​ມັດທະຍົມ​ສາທິດ​ທີ່​ຂຶ້ນ​ກັບ​ວິທະຍາ​ໄລ​ຄູ ຫຼື ສ້າງ​ຕັ້ງ​ຂຶ້ນ​ໃໝ່ ​ເລີ່​ມ​ແຕ່​ສົກຮຽນ 2018-2019 ​ເປັນ​ຕົ້ນ​ໄປ; ​ເລີ່​ມ​ແຕ່​ສົກຮຽນ 2018-2019 ​ເປັນ​ຕົ້ນ​ໄປ ການ​ປະຕິບັດ​ແຜນການ​ສ້າງ​ຄູ ​ແມ່ນ​ຈັດ​ສອບ​ເສັງ​ຄັດ​ເລືອກ 100​ ​ເປີ​ເຊັນ, 20 ​ເປີ​ເຊັນ ຈະ​ໄດ້​ຮັບ​ເບ້ຍລ້ຽງ ​ໂດຍ​ອີງ​ຕາມ​ຜົນ​ການ​ຮຽນ ​ແລະ ຄະ​ແນນ​ການ​ປະພຶດ; ​ໃຫ້​ຈັດ​ຕັ້ງ​ການ​ຍົກ​ລະດັບ​ຄູປະ​ຈໍາການຍາມ​ພັກທ້າຍ​ປີຮຽນ​ເປັນ​ຊຸດ​ໃນ​ສາມ​ຫຼັກສູດ​ຄືນ​ໃໝ່; ​ໃຫ້​ສືບ​ຕໍ່​ເພີ່ມ​ທະວີ​ການ​ລົງ​ເຮັດ​ວຽກກັບ​ຮາກ​ຖານ​ໃນ​ເຂດ​ບໍລິການ​ຂອງ​ຕົນ​ ​ເພື່ອ​ໃຫ້​ເຫັນ​ໄດ້​ເຖິງ​ສະພາບ​ບັນ​ຫາ​ຕົວ​ຈິງ​ຂອງ​ວຽກ​ງານ​ການ​ສຶກສາ​ຂັ້ນ​ພື້ນຖານ ​ແນ​ໃສ່​ແກ້​ໄຂ​ບັນຫາ​​ທາງ​ດ​້ານການ​ຈັດກາ​ນຮຽນ-​ກາ​ນສອນ​​ໃຫ້​ມີ​ຄຸນະພາບ​ດີ​ຂຶ້ນ  ພ້​ອມທັງ​ໃຫ້​ບັນລຸ​ເປົ້າ​ໝາຍ​ການ​ສຶກສາ​ເພື່ອ​ການ​ພັດທະນາ​ແບ​ຍືນ​ຍົງ; ​ໃຫ້​ສືບ​ຕໍ່​ປະຕິບັດ​ນະ​​ໂຍບາຍ​ຕໍ່​ຄູ-​ອາຈານ​ທີ່​ປະຕິບັດ​ໜ້າ​ທີ່​ໃນ​ວິທະຍາ​ໄລ​ຄູ​ໃຫ້​ສອດຄ່ອງ, ​ແທດ​ເໝາະ​ກັບ​ຄວາມ​ສາມາດ ​ແລະ ຜົນງານ​ຕົວ​ຈິງ​ຊອງ​ຄູ​ສອນ.

(ບຸນທະວີ)

Written by Super User

ສສກ ຕີລາຄາວຽກງານຜູ້ບໍລິຫານອາຊີວະສຶກສາທົ່ວປະເທດ ປະຈຳປີ 2018

36637434 1464275423674605 5521934925848117248 n   ກົມ​ອາຊີວະ​ສຶກສາ ກະຊວງ​ສຶກສາ​ທິການ ​ແລະ ກິລາ ​ໄດ້​ຈັດ​ກອງ​ປະຊຸມ ​ເພື່ອ​ສະຫຼຸບ ​ແລະ ຕີ​ລາຄາ​ຄືນ​ກ່ຽວ​ກັບ​ວຽກ​ງານຜູ້​ບໍລິຫານ​ອາຊີວະ​ສຶກສາ​ທົ່ວ​ປະ​ເທດ ປະຈຳ​ສົກ​ສຶກສາ 2017-2018 ພ້ອມ​ທັງ​ວາງ​ທິດ​ທາງ​ແຜນການ​ໃນ​ຕໍ່ໜ້າ​ ສົກ 2018-2019 ໃຫ້​ລະອຽດຊັດ​ເຈນ.ກອງ​ປະຊຸມ​ດັ່ງກ່າວ, ​ໄດ້​ຈັດ​ຂຶ້ນ​ເມື່ອ​ວັນທີ 5 ກໍລະກົດ​ ຜ່ານ​ມາ ທີ່ຫ້ອງ​ປະຊຸມ​ສູນ​ເຝິກອົບຮົມ​ສູນ​ກາງ​ແນວ​ລາວ​ສ້າງ​ຊາດ ນະຄອນຫຼວງ​ວຽງ​ຈັນ, ​ໂດຍ​ພາຍ​ໃຕ້​ການ​ເປັນ​ປະທານ​ຂອງທ່ານ ຮສ. ປອ ກອງ​ສີ ​ແສງມະນີ ຮອງ​ລັດຖະມົນຕີ ກະຊວງ​ສຶກສາ​ທິການ ​ແລະ ກິລາ, ມີ​ທ່ານ ໜູ​ພັນ ອຸດສາ ຫົວໜ້າ​ກົມ​ອາຊີວະ​ສຶກສາ ກະຊວງ​ສຶກສາ​ທິການ ​ແລະ ກິລາ, ພ້ອມ​ດ້ວຍ​ຜູ້ຕາງໜ້າ​ຈາກ​ກົມ, ຜູ້ອຳນວຍການ-ຮອງ​ຜູ້ອຳນວຍການ, ວິທະຍາ​ໄລ, ​ໂຮງຮຽນ​ເຕັກນິກ-​ວິຊາ​ຊີບ ພາກ​ລັດ ​ແລະ ​ເອກະ​ຊົນ ຕະຫຼອດ​ຮອດ​ພະນັກງານ ​ແລະ ພາກສ່ວນ​ທີ່​ກ່ຽວຂ້ອງ​ເຂົ້າ​ຮ່ວມ.

​       ໃນ​ໂອກາດ​ດັ່ງກ່າວ, ທ່ານ ໜູພັນ ອຸດສາ ​ໄດ້​ຜ່ານ​ຮ່າງ​ບົດ​ສະຫຼຸບ​ການຈັດ​ຕັ້ງ​ປະຕິບັດ​ວຽກ​ງານ​ອາຊີວະ​ສຶກສາ ປະຈຳ​ສົກ 2017-2018 ວ່າ: ​ໃນ​ໄລຍະ​ຜ່ານ​ມາ​, ກົມ​ອາຊີວະ​ສຶກສາ ກະຊວງ​ສຶກສາ​ທິການ ​ແລະ ກິລາ ສາມາດ​ຈັດ​ຕັ້ງ​ປະຕິບັດ​ວຽກ​ງານ​ທາງ​ດ້ານ​ຕ່າງໆ​ຈົນມີ​ຜົນສຳ​ເລັດຫຼາຍ​ດ້ານ ​ເປັນ​ຕົ້ນ​ແມ່ນ​ການ​ກໍ່ສ້າງ, ປັບປຸງ ​ແລະ ຂະຫຍາຍ​ຄວາມ​ອາດ​ສາມາດ​ຂອງ​ວຽກ​ງານ​ອາຊີວະ​ສຶກສາ; ສົ່ງ​ເສີມ​ສັງຄົມ ​ແລະ ພາກສ່ວນ​ທຸລະ​ກິດ ປະກອບສ່ວນ​ເຂົ້າ​ໃນ​ການ​ພັດທະນາ​ອາຊີວະ​ສຶກສາ; ປັບປຸງ​ຮູບ​ແບບ ​ແລະ ພັດທະນາ​ຫຼັກສູດ​ອາຊີວະ​ສຶກສາ ​ແລະ ​ເຝິກອົບຮົມ​ວິຊາ​ຊີບ; ກໍ່ສ້າງ-​ບຳລຸງ​ຄູ ​ແລະ ພັດທະນາ​ບຸຄະລາ​ກອນ​ອາຊີວະ​ສຶກສາ ​ແລະ ​ເຝິກອົບຮົມ​ວິຊາ​ຊີບ; ປະກັນ​ຄຸນະ​ພາບ​ຂອງ​ວຽກ​ງານ​ອາຊີວະ​ສຶກສາ ​ແລະ ​ເຝິກອົບຮົມ​ວິຊາ​ຊີບ; ພັດທະນາ​ລະບົບ​ຂໍ້​ມູນ​ຂ່າວ​ສານ​ອາຊີວະ​ສຶກສາ ​ແລະ ​ເຝິກອົບຮົມ; ປັບປຸງ​ກົງ​ຈັດການ​ຄຸ້ມ​ຄອງ​ສາຍ​ອາຊີວະ ​ແລະ ​ເຝິກອົບຮົມ​ວິຊາ​ຊີບ; ສ້າງ​ນະ​ໂຍບາຍ ​ແລະ ​ເຄື່ອງມື​ຄຸ້ມ​ຄອງ​ອາຊີວະ​ສຶກສາ ​ແລະ ​ເຝິກອົບຮົມ​ວິຊາ​ຊີບ.

      ສ່ວນ​ທິດ​ທາງ​ແຜນການ​ໃນ​ຕໍ່ໜ້າ ສົກປີ 2018-2019  ​ແມ່ນ​ສືບ​ຕໍ່​ກໍ່ສ້າງ, ປັບປຸງ ​ແລະ ຂະຫຍາຍ​ຄວາມ​ອາດ​ສາມາດ​ຂອງ​ສະຖານ​ອາຊີວະ​ສຶກສາ; ສົ່ງ​ເສີມ​ສັງຄົມ ​ແລະ ພາກສ່ວນ​ທຸລະ​ກິດປະກອບສ່ວນ​ເຂົ້າໃນ​ການ​ພັດທະນາ​ອາຊີວະ​ສຶກສາ; ປັບປຸງ​ຮູບ​ແບບ-ຫຼັກສູດ​ອາຊີວະ​ສຶກສາ ​ແລະ ​ເຝິກອົບຮົມວິຊາ​ຊີບ; ປະກັນ​ຄຸນະພາບ​ຂອງ​ວຽກ​ງານ​ອາຊີວະ​ສຶກສາ ​ແລະ ​ເຝິກອົບຮົມ​ວິຊາ​ຊີບ; ພັດທະນາ​ລະບົບ​ຖານ​ຂໍ້​ມູນ​ຂ່າວສານ​ອາຊີວະ​ສຶກສາ ​ແລະ ​ເຝິກອົບຮົມ; ປັບປຸງ​ກົງຈັກ​ການ​ຄຸ້ມ​ຄອງ​ສາຍ​ອາຊີວະ​ສຶກສາ ​ແລະ ​ເຝິກອົບຮົມ​ວິຊາ​ຊີບ; ສ້າງ​ນະ​ໂຍ​ບາຍ ​ແລະ ​ເຄື່ອງມື​ຄຸ້ມ​ຄອງ​ອາຊີວະ​ສຶກສາ ​ແລະ ​ເຝິກອົບຮົມ ​ແລະ ການ​ຮ່ວມ​ມື​ກັບ​ສາກົນ.

       ​ໃນ​ກອງ​ປະຊຸມ​ຄັ້ງ​ນີ້​, ຜູ້​ເຂົ້າ​ຮ່ວມ​ໄດ້​ຮັບ​ຟັງ​ການຜ່ານ​ຮ່າງ​ບົດ​ສະຫຼຸບ​ການຈັດ​ຕັ້ງ​ປະຕິບັດ​ວຽກ​ງານ​ອາຊີວະ​ສຶກສາ ປະຈຳ​ສົກ 2017-2018 ​ແລະ ທິດ​ທາງ​ແຜນການໆ​ຈັດ​ຕັ້ງປະຕິບັດ​ວຽກ​ງານ ສົກ 2018-2019; ການ​ປັບປຸງ​ກົດໝາຍ​ວ່າ​ດ້ວຍ​ອາຊີວະສຶກສາ; ວຽກ​ງານ​ຂໍ້​ມູນ​ຂ່າວສານ​ອາ​ຊີວະ​ສຶກສາ ​ໃນ​ການ​ນຳ​ໃຊ້ Applicaton ​ແລະ ການ​ແນະ​ແນວ​ວິຊາ​ຊີບ, ການ​ເກັບ​ກຳ​ຂໍ້​ມູນ​ນັກຮຽນ-​ນັກ​ສຶກສາ, ການ​ຕິດຕາມ​ອະ​ດີດ​ນັກຮຽນ-ນັກ​ສຶກສາ; ການ​ພັດທະນາ​ຄູ​ອາຊີວະ​ສຶກສາ ​ໃນ​ຫຼັກສູດ​ຄູ​ອາຊີວະ​ສຶກສາ, ​ແຜນ​ພັດທະນາ​ຄູ​ອາຊີວະ​ສຶກສາ, ການ​ຊັບຊ້ອນ ​ແລະ ບັນຈຸ​ຄູ​ອາຊີວະ​ສຶກສາ; ບົດຮຽນ​ໃນ​ການ​ຮ່ວມ​ມື​ກັບ​ສະຖານ​ປະກອບ​ການ ວິທະຍາ​ໄລ​ຕັກ​ນິກ-ວິຊາ​ຊີບ ​ແຂວງ​ຈຳປາ​ສັກ, ຫຼວງ​ພະ​ບາງ ​ແລະ ວິທະຍາ​ໄລ ​ກະສິກຳ ດົງ​ຄຳ​ຊ້າງ ​ແລະ ການ​ຄຸ້ມ​ຄອງ​ບໍລິຫານ​ໂຮງຮຽນ​ວິຊາ​ຊີບ​ແບບ​ປະສົມ.

ບົວລະພາ

Written by Super User

ຄະນະນໍາ ສສກ ພົບປະນັກສຶກສາ ວລ ສິລະປະ ປີສຸດທ້າຍກຽມສຳເລັດການສຶກສາ

36088280 1449464428489038 4903118438727155712 n   ຄະນະ​ນຳ​ຂັ້ນ​ສູງ​ ກະຊວງ​ສຶກສາ​ທິການ ​ແລະ ກິລາ ໄດ້ພົບ​ປະ​ໂອ້​ລົມຕໍ່​ພະນັກງານ, ຄູ-ອາຈານ ​ແລະ ນັກຮຽນ-ນັກ​ສຶກສາ ວິທະຍາໄລ (ວລ) ສິລະປະສຶກສາ ປີ​ສຸດ​ທ້າຍ​ ໃນ 3 ລະບົບ ເນື່ອງ​ໃນ​ໂອກາດ​ຈະ​ສຳ​ເລັດ​ການ​ສຶກສາ ​ໃນ​ທ້າຍ​ສົກຮຽນ 2017-2018 ໂດຍໄດ້​ເນັ້ນ​ໃຫ້​ທຸກ​ຄົນ​ຮັກ​​ໃນອາຊີບ ​ແລະ ສືບ​ຕໍ່​ພັດທະນາ​ຕົນ​ເອງ.

​      ເມື່ອ​ວັນ​ທີ 22 ມິຖຸນາ ຜ່ານ​ມາ ທີ່​ສະ​ໂມ​ສອນ​ວິທະຍາ​ໄລ ​ສິລະ​ປະ​ສຶກສາ (ສີບຸນເຮືອງ), ທ່ານ ບົວ​ລານ ສິລິ​ປັນຍາ ຮອງ​ລັດຖະມົນຕີ​ ກະຊວງ​ສຶກສາ​ທິການ ​ແລະ ກິລາ ໄດ້​​ພົບ​ປະໂອລົມຕໍ່​ພະນັກງານ, ຄູ-ອາຈານ ​ແລະ ນັກຮຽນ-ນັກ​ສຶກສາ ວິທະຍາໄລ (ວລ) ສິລະປະສຶກສາປີ​ສຸດ​ທ້າຍ​ ໃນ 3 ລະບົບ ເນື່ອງ​ໃນ​ໂອກາດ​ຈະ​ສຳ​ເລັດ​ການ​ສຶກສາ ​ໃນ​ທ້າຍ​ສົກຮຽນ 2017-2018, ມີ​ທ່ານ ບຸນ​ສຸກ ທິລະ​ສັກ ຫົວໜ້າ​ກົມ​ພະລະ ​ແລະ ສິລະ​ປະ​ສຶກສາ ກະຊວງ​ສຶກສາ​ທິການ ​ແລະ ກິລາ, ທ່ານ ວິ​ລ​ະວັນ ບຸນ​ສຸ​ກໄທ ຜູ້ອຳນວຍການ ວິທະຍາ​ໄລ​ ສິລະ​ປະ​ສຶກສາ ພ້ອມ​ດ້ວຍ​ຄະນະ, ພະນັກງານ, ຄູ-ອາຈານ ​ແລະ ນັກຮຽນ-ນັກ​ສຶກສາ ປີ​ສຸດ​ທ້າຍ​ໃນ 3 ລະບົບ​ເຂົ້າ​ຮ່ວມຮັບຟັງ.

      ​ໂອກາດ​ດັ່ງກ່າວ, ທ່ານ ສີ​ສຸກ ພັນ​ແພງ​ດີ ຮອງ​ຜູ້ອຳນວຍການ ວິທະຍາ​ໄລ ​ສິລະ​ປະ​ສຶກສາ ໄດ້​ກ່າວ​ລາຍ​ງານ​ຫຍໍ້​ກ່ຽວ​ກັບ​ຜົນສຳ​ເລັດ​ ໃນ​ການຈັດ​ຕັ້ງ​ປະຕິບັດ​ຫຼັກສູດ​ການ​ຮຽນ-ການ​ສອນຂອງນັກຮຽນ-ນັກ​ສຶກສາ ປີ​ສຸດ​ທ້າຍ​ທັງ 3 ລະບົບ​ ປະກອບ​ມີ ຫຼັກສູດ​ຊັ້ນ​ກາງ (9+3) ຮຸ່ນ​ທີ 6 ​ເລີ່​ມຕົ້ນຮຽນ​ມາ​ແຕ່​ສົກຮຽນ 2015-2016 ມີ​ນັກສຶກສາ​ທັງ​ໝົດ 80 ຄົນ ​ເປັນ​ຍິງ 76 ຄົນ ​ແລະ ​ໃນ​ທ້າຍ​ສົກຮຽນ​ນີ້ ມີ​ນັກສຶກສາ​ສອບ​ເສັງ​ຜ່ານ​ໜ່ວຍ​ກິດ​ ຈຳນວນ 13 ວິຊາ ທັງ​ໝົດ 75 ຄົນ ​ເປັນ​ຍິງ 71 ຄົນ; ຫຼັກສູດ​ຊັ້ນ​ສູງ (12+2) ຮຸ່ນ​ທີ 6 ​ແຍກ​ສາຍ ສິລະ​ປະກຳ ​ແລະ ສິລະ​ປະ​ດົນຕີ ​ເບື້ອງຕົ້ນ ໃນສົກຮຽນ 2016-2017 ​ມີ​ນັກສຶກສາ 84 ຄົນ ​ເປັນ​ຍິງ 66 ຄົນ ​ແລະ ​ໃນ​ທ້າຍ​ສົກຮຽນ​ນີ້ ມີ​ນັກສຶກສາ​ສອບ​ເສັງ​ຜ່ານ​ໜ່ວຍ​ກິດ​ ສາຍ​ສິລະ​ປະກຳ ຈຳນວນ 8 ວິຊາ ທັງ​ໝົດ 23 ຄົນ ​ເປັນ​ຍິງ 18 ຄົນ ​ແລະ ສາຍ​ສິລະ​ປະດົນຕີ ຈຳນວນ 6 ວິຊາ ທັງ​ໝົດ 61 ຄົນ ​ເປັນ​ຍິງ 48 ຄົນ ລວມທັງ​ໝົດ 84 ຄົນ ​ເປັນ​ຍິງ 66 ຄົນ ​ແລະ ຫຼັດສູ​ກປະລິນຍາ​ຕີ (12+4) ຮຽນ​ລວມ (ຮຸ່ນ​ທຳ​ອິດ) ຮັບ​ນັກ​ສຶກສາ​ໃນ​ສົກຮຽນ 2014-2015 ​ເບື້ອງ​ຕົ້ນ​ມີ​ຜູ້​ເຂົ້າ​ຮຽນ 79 ຄົນ ​ເປັນ​ຍິງ 67 ຄົນ ​ໃນ​ທ້າຍ​ສົກຮຽນ​ນີ້ ມີ​ນັກສຶກສາ​ສອບ​ເສັງ​ຜ່ານ​ໜ່ວຍ​ກິດ ຈຳນວນ 7 ລາຍ​ວິຊາ ທັງ​ໝົດ 75 ຄົນ ​ເປັນ​ຍິງ 64 ຄົນ.

      ຂະນະ​ດຽວກັນນີ້, ທ່ານ ບົວ​ລານ ສິລິ​ປັນຍາ ກໍ່​ໄດ້​ກ່າວ​ສະແດງຄວາມ​ຊົມ​ເຊີຍ ​ແລະ ​ໃຫ້​ທິດ​ຊີ້ນຳ​ແກ່​ນັກຮຽນ-ນັກ​ສຶກສາ ທັງ 3 ລະບົບ ທີ່​ກຳລັງ​ຈະ​ຈົບ​​ໄວໆນີ້ ຈົ່ງ​ພ້ອມ​ກັນ​ສຶບຕໍ່​ການປະກອບ​ອາຊີບ​ທີ່​ຕົນ​ເລືອກຢ່າງ​ຕັ້ງໜ້າ ​ແລະ ສືບ​ຕໍ່​ພັດທະນາ​ຕົວ​ເອງ ຫຼື ສືບ​ຕໍ່ການ​ສຶກສາ​​ໃນລະບົບທີ່​ດີ​ຂຶ້ນໄປ​ອີກ ເຮັດ​ໃຫ້​ເປັນ​ໄປ​ຕາມ​ເປົ້າ​ໝາຍ​ທີ່​ວາງ​ໄວ້ ​ເພາະ​ທຸກ​ອາຊີບ​ມີ​ຄວາມສຳຄັນ​ຕ່າງ​ກັນ ​ແລະ ສາມາດສ້າງລາຍ​ໄດ້​ທີ່​ດີ​ແຕກ​ຕ່າງ​ກັນ​ໄປ, ພ້ອມ​ກັບ​​ເປັນ​ແບບຢ່າງ​ທີ່​ດີ, ຮູ້​ຮັກສາ​ມັກ​ຄີ, ຮູ້​ບຸນຄຸນຄູ-ອາຈານ, ພໍ່​ແມ່-ໝູ່ຄູ່, ຮູ້​ຈັກ​ອົດທົນ, ຮູ້ຈັກປະ​ຫຍັດ, ນັບຖື​ປະຕິບັດ​ລະບຽບ​ບ້ານ​ເມືອງ ແລະ​ ທີ່​ສຳຄັນ ຕ້ອງຮັກ​ໃນ​ວິຊາ​ອາຊີບ​ທີ່​ຕົນ​ຮຽນ​ຈົບ​ມາ ​ເພື່ອ​ໄປ​ນຳ​ໃຊ້​ໃນ​ການ​ປະກອບ​ອາຊີບຢູ່ໃນ​ສັງຄົມ ​ແລະ ປະ​ເທດ​ຊາດ​ໃນ​ຂັ້ນ​ຕໍ່​ໄປ.

ພ້ອມ​ກັນ​ນັ້ນ, ທ່ານ​ຍັງ​ໄດ້​ແນະນຳໃຫ້​ພະນັກງານ ​ແລະ ຄູ-ອາຈານທຸກ​ຄົນ​ໃນ​ວິທະຍາ​ໄລ​ ສິລະ​ປະ​ສຶກສາ ຈົ່ງ​ສືບ​ຕໍ່​ພັດທະນາ​ຕົນ​ເອງ, ​ເປັນ​ແບບຢ່າງ​ທີ່​ດີ ​ແລະ ​ໃຫ້​ນັກ​ສຶກສາ​ນັບຖື, ພ້ອມ​ກັນຫາ​ວິທີ​ແກ້​ໄຂ​ຈຸດ​ອ່ອນ, ຊ່ວຍ​ເບິ່ງ​ແຍງ, ສະໜັບສະໜູນນັກ​ສຶກສາທີ່​ຮຽນ​ຈົບ ​ແລະ ​ຕ້ອງການ​ສືບ​ຕໍ່ການ​ຮຽນ​ໃນ​ລະບົບ​ຊັ້ນ​ສູງ, ປະລິນຍາ​ຕີ, ປະລິນຍາ​ໂທ ​ແລະ ອື່ນໆ ທັງ​ພາຍ​ໃນ ​ແລະ ຕ່າງປະ​ເທດ.

 

ອຳໄພວັນ