ສຶກສາ

ສຶກສາ

Written by Super User

ເຈົ້າພາບ ຄອງເຈົ້າຫຼຽນຄຳ ງານແຂ່ງຂັນກິລາເຂດ 4 ເມືອງ  ເໜືອ 2018 ແລ້ວພົບກັນໃໝ່ປີ 2020 ທີ່ເມືອງວຽງຄຳ

28503939 356195151528836 1910761000 o   ທັບນັກກິລາເມືອງນ້ຳບາກ ເຈົ້າພາບ ສ້າງຜົນງານໄດ້ຢ່າງໂດດເດັ່ນ ຫຼັງຍາດໄດ້ທັງໝົດ 8 ຫຼຽນຄໍາ, 6 ຫຼຽນເງິນ ແລະ 2 ຫຼຽນທອງ ລວມ 16 ຫຼຽນ ເປັນອັນດັບ 1 ຂອງຕາຕາລາງ ປິດສາກງານແຂ່ງຂັນກິລາເຂດ 1 ທີ່ມາຈາກ 4 ເມືອງເໜືອ ຄື: ເມືອງງອຍ, ເມືອງວຽງຄໍາ, ເມືອງໂພນທອງ ແລະ ເມືອງນໍ້າບາກ ຄັ້ງທີ 4 ທີ່ເມືອງນ້ຳບາກ ເປັນເຈົ້າພາບ ໃນປີ 2018 ແລ້ວພົບກັນໃໝ່ ປີ 2020 ທີ່ເມືອງວຽງຄຳ ຮັບກຽດເປັນເຈົ້າພາບຄັ້ງຕໍ່ໄປ.ພິທີປິດງານແຂ່ງຂັນໄດ້ຈັດຂຶ້ນໃນຕອນເຊົ້າຂອງວັນທີ 26 ກຸມພາ 2018 ທີ່ເດີ່ນໂຮງຮຽນ ມສ ນ້ຳຖ້ວມ ເມືອງນ້ຳບາກ ແຂວງຫຼວງພະບາງ, ໂດຍການເປັນທານຂອງ ທ່ານ ສົມພອນ ສີອຸດົມພັນ ເຈົ້າເມືອງນ້ຳບາກ, ມີ ທ່ານ ເອິງ ລໍສະຫວັນ ຫົວຫນ້າພະແນກສຶກສາທິການ ແລະ ກິລາແຂວງຫຼວງ ພະບາງ ພ້ອມດ້ວຍບັນດາເຈົ້າເມືອງທັງ 4 ເມືອງ, ຄະນະນຳ, ຄູເຝິກ, ກໍາມະການຕັດສິນ ແລະ ນັກກິລາເຂົ້າຮ່ວມ.

 

      ການຈັດງານໃນຄັ້ງນີ້ ກໍ່ເພື່ອໃຫ້ນັກກິລາໄດ້ມີໂອກາດພົບປະແລກປ່ຽນບົດຮຽນທາງດ້ານກິລາສົ່ງເສີມ ແລະ ສ້າງນັກກິລາຂອງເມືອງເຂົ້າຮ່ວມງານແຂ່ງຂັນກິລາໃນລະດັບຕ່າງໆ, ສ້າງຄວາມສາມັກຄີຮັກແພງເຊິ່ງກັນແລະກັນ, ທັງເປັນການຕ້ອນຮັບປີທ່ອງທ່ຽວລາວ ແລະ ຄັດເລືອກເອົານັກກິລາເຂົ້າຮ່ວມແຂ່ງຂັນງານມະຫາກໍາກິລາແຫ່ງຊາດ ຄັ້ງທີ 11 ທີ່ແຂວງຊຽງແຂວງ ເປັນເຈົ້າພາບ ໃນທ້າຍປີນີ້. ສຳລັບງານແຂ່ງຂັນກິລາເຂດ 1 ທີ່ມາຈາກ 4 ເມືອງເໜືອດັ່ງກ່າວ ໄດ້ຈັດແຂ່ງຂັນລະຫວ່າງ ວັນທີ 23-26 ກຸມພາ 2018 ປະກອບມີທັງໝົດ 7 ປະເພດກິລາຄື: ເຕະບານຍິງ-ຊາຍ, ບານສົ່ງຍິງ-ຊາຍ, ກະຕໍ້ຍິງ-ຊາຍ, ດອກປີກໄກ່ຍິງ-ຊາຍ, ໜ້າເກັກຍິງ-ຊາຍ, ໝາກຂ່າງຊາຍ ແລະ ແລ່ນ-ລານ.ຜ່ານການແຂ່ງຂັນຜົນປາກົດວ່າ ທັບນັກກິລາເມືອງນ້ຳບາກ ເຈົ້າພາບ ສາມາດກວາດມາໄດ້ເຖິງ 8 ຫຼຽນຄໍາ, 6 ຫຼຽນເງິນ ແລະ 2 ຫຼຽນທອງ ລວມ 16 ຫຼຽນ ເປັນອັນດັບ 1 ຂອງຕາຕະລາງ, ອັນດັບທີ 2 ເມືອງງອຍ ຍາດໄດ້ 4 ຫຼຽນຄໍາ, 2 ຫຼຽນເງິນ ແລະ 6 ຫຼຽນທອງ ລວມ 12 ຫຼຽນ, ອັນດັບທີ 3 ເມືອງວຽງຄຳ ຍາດໄດ້ 4 ຫຼຽນຄໍາ  6 ຫຼຽນເງິນ ແລະ 6 ຫຼຽນທອງ ລວມ 16 ຫຼຽນ ແລະ ອັນດັບທີ 4 ເມືອງໂພນທອງ ຍາດໄດ້ 3 ຫຼຽນຄຳ, 5 ຫຼຽນເງິນ ແລະ 5 ຫຼຽນທອງ  ລວມ 13 ຫຼຽນ.  ຕອນທ້າຍຂອງພິທີ, ທ່ານ ສົມພອນ ສີອຸດົມພັນ ເຈົ້າເມືອງນ້ຳບາກ ໄດ້ໃຫ້ກຽດມອບທຸງກິລາ ໃຫ້ເມືອງວຽງຄຳ ເພື່ອເປັນເຈົ້າພາບ ຄັ້ງທີ 5 ໃນປີ 2020 ແລະ ກ່າວຮັບທຸງໂດຍ ທ່ານ ອ່ອນຕາ ວັນນະຈັກ ເຈົ້າເມືອງວຽງຄຳ.

ໂດຍ: ແຈັກກີ້ ສກຂ ຫຼວງພະບາງ.

Written by Super User

 ນັກ​ກິລາຢູ​ໂດ​ລາວ 29 ຄົນ ​ຮັບ​​ໃບ​ຢັ້ງຢືນ​ປະ​ເພດຟ້ອນກາ​ຕະ ແລະ ສອບເສັງຂຶ້ນດັ້ງ

      28584429 356192164862468 606418161 oນັກ​ກິລາຢູ​ໂດ​ລາວ 29 ຄົນ ​ໄດ້​ຮັບ​​ໃບ​ຢັ້ງຢືນ​ກ່ຽວ​ກັບ​ການ​ເຝິກອົບຮົມກຍົກ​ລະດັບ​ຄວາມ​ຮູ້​ຄວາມ​ສາມາດກິລາ​ຢູ​ໂດ ປະ​ເພດ​ຟ້ອນ​ກາ​ຕະ ​ແລະ ສອບ​ເສັງ​ຂຶ້ນ​ດັ້ງ ຈາກ​ສະຫະພັນ​ຢູ​  ໂດ​ແຫ່ງ​ປະ​ເທດ​ຍີ່ປຸ່ນ ພາຍ​ໃຕ້​ໂຄງການ ຍີ່ປຸ່ນ-ອາຊຽນ ຈິຕະຄີໂອຍ.​ເມື່ອ​​ວັນ​ທີ 26 ກຸມພາ ຜ່ານ​ມາ ​ທີ່​ສູນ​ບູ​ໂດ ​ເຊັນ​ເຕີ ລາວ-ຍີ່ປຸ່ນ (ຂ້າງ​ສະໜາມກິລາ​ເຈົ້າ​ອານຸວົງ) ​ເມືອງ​ຈັນທະ​ບູລີ ນະຄອນຫຼວງ​ວຽງ​ຈັນ ​ໄດ້​ມີ​ພິທີ​ປິດການເຝິກອົບຮົມ​ກິລາ​ຢູ​ໂດ ຟ້ອນກາ​ຕະ ​ແລະ ສອບ​ເສັງ​ຂຶ້ນ​ດັ້ງ ປະຈຳ​ປີ 2018 ພາຍ​ໃຕ້​ໂຄງການ ຍີ່ປຸ່ນ-ອາຊຽນ ຈິຕະຄີໂອຍ ພາຍຫຼັງ​ໄດ້​ດຳ​ເນີນ​ເຝິກ​ອົບຮົມ​ມາ​ແຕ່​ວັນ​ທີ 22 ກຸມພາ 2018, ​ໂດຍໃຫ້ກຽດເຂົ້າຮ່ວມ ​ແລະ ມອບ​ຂອງ ທ່ານ ໂມໂຕນາຣິ ສາເມະຊິມາ ຜູ້​ຊ່ຽວຊານ​ສາຍ​ດຳລະດັບ 8 ດັ້ງ, ຜູ້ອໍານວຍການຝ່າຍການສຶກສາ ຈາກສະຖາບັນຢູໂດໂຄໂດກັນ ປະເທດຍີ່ປຸ່ນ ທັງເປັນວິທະຍາກອນ, ມີທ່ານ ​ເຂັມຊາດ ພິລາ​ພັນ​ເດຊ ປະທານສະຫະພັນຢູໂດແຫ່ງຊາດລາວ ​ແລະ ທ່ານ ຊະຊີໂຣ ຢາມາໂມະໂຕະ ຜູ້​ຊ່ຽວຊານສາຍ​ດຳ​ລະດັບ 7 ດັ້ງ ທັງ​ເປັນຜູ້ຈັດການຝ່າຍການຂຶ້ນດັ້ງ​ໃຫ້ນັກກິລາຈາກ​ສະຫະພັນ​ຢູ​ໂດ​ປະ​ເທດ​ຍີ່ປຸ່ນ ພ້ອມ​ດ້ວຍ​ຄະນະ​ບໍລິຫານ​ງານ​ສະຫະພັນ​ກິລາ​ດັ່ງກ່າວ, ນັກກິລາມາຈາກບັນດາສະໂມສອນອ້ອມ​ຂ້າງ​ສູນ​ກາງ, ນັກ​ກິລາທີມຊາດ ແລະ ອະດີດນັກ​ກິລາທີມຊາດ ​ເຂົ້າ​ຮ່ວມ​ເປັນ​ສັກຂີ​ພິຍານ.

       ​ໂອກາດ​ນີ້, ທ່ານ ຄຳບໍ່ ສີປະເສີດ ຮອງ​ປະທານ ​ແລະ ​ເລຂາທິການ​ສະຫະພັນ​ຢູ​ໂດ​ແຫ່ງ​ຊາດ​ລາວ ກ່າວ​ວ່າ: ​ ການ​ເຝີິກອົບຮົມ​ໃນ​ຄັ້ງ​ນີ້ ​ໄດ້​​ໃຊ້​ເວລາດຳ​ເນີນ​ການ​ຮຽນ​ຮູ້ກ່ຽວ​ກັບ​ກິລາ​ຢູ​ໂດ ປະ​ເພດ​ຟ້ອນ​ກາ​ຕະ ​ແລະ ການ​ສອບ​ເສັງ​ຂຶ້ນ​ດັ້ງ ສາຍ​ດຳ ​ລະດັບສາຍ​ນໍ້າ​ຕານ​ຂຶ້ນ 1 ​ດັ້ງ​ສາຍ​ດຳ, ສາຍ​ດຳ​ 2 ດັ້ງ, ສາຍ​ດຳ 3 ດັ້ງ ​ແລະ ສາຍ​ດຳ 4 ດັ້ງ ໃຫ້​ນັກ​ກິລາ​ຢູ​ໂດ​ລາວ ​ເຊິ່ງ​ໃນ​ໄລຍະ 5 ວັນ ລະຫວ່າງວັນທີ 22-26 ກຸມພາ 2018 ຮູ້​ຄວາມ​ສາມາດປະເພດຟ້ອນກາ​ຕະ ກ່ຽວ​ກັບ​ທັກ​ສະ​, ​ເທັກ​ນິກ, ຄວາມ​ຄ່ອງ​ຕົວ ​ແລະ ຄວາມ​ສາມາດ​ຕ່າງໆ​ ໃນ​ລະດັບ​ຂັ້ນພື້ນຖານ ທັງ​ພາກ​ທິດ​ສະ​ດີ ​ແລະ ການ​ປະຕິບັດ​ຕົວ​ຈິງ ເພື່ອ​​​ສົ່ງ​ເສີມ​​ໃຫ້​ນັກ​ກິລາ​ລາວ ສາມາດ​ຮັບປະກັນ​ໃນ​ການ​ສ້າງ​ຜົນງານ​ເຂົ້າ​ຮ່ວມ​ແຂ່ງຂັນ​ງານ​ກິລາລະດັບ​ພາກ​ພື້ນ ​ແລະ ສາກົນ​ໃນ​ຕໍ່ໜ້າ. ​ໃນ​ໂອກາດ​ດັ່ງກ່າວ ກໍ່ມີ ນາ​ງ ສົມ​ສຸດາ​ລັດ ​ແຫວນ​ວັນ​ຄຳ ທີ່​ໄດ້ສອບ​ເສັງສາຍ​ນໍ້າຕານ ຂຶ້ນ​ສາຍ​ດຳ 1 ດັ້ງ ​ແຕ່​ປີ 2017 ກໍ່​ໄດ້​ຮັບ​​ໃບ​ຢັ້ງຢືນ​ຈາກ​ສະຫະພັນ​ຢູ​ໂດ​ສາກົນ ໃຫ້​ຂຶ້ນ​ເປັນ​ສາຍ​ດຳ 1 ດັ້ງ ຢ່າງ​ເປັນ​ທາງ​ການ ສ່ວນ​ນັກ​ກິລາ​ທີ່​ເຫຼືອ​ນັ້ນ ຈຳນວນ 29 ຍັງ​ໄດ້​ຮັບ​ການ​ໃບ​ຢັ້ງຢືນ​ຮັບຮອງການ​ເຝິກອົບຮົມຍົກ​ລະດັບ​ຄວາມ​ຮູ້​ຄວາມ​ສາມາດກິລາ​ຢູ​ໂດ ປະ​ເພດ​ຟ້ອນ​ກາ​ຕະ ຕື່ມ​ອີກ.

       ທ່ານ ຄຳບໍ່ ສີປະເສີດ ກ່າວ​ຕື່ມ​ອີກ​ວ່າ: ສະຫຼຸບ​ແລ້ວ​ການ​ສອບ​ເສັ້ງຂຶ້ນ​ດັ້ງ ສາຍ​ດຳ ຂອງ​ນັກ​ກິລາ​ໃນ​ຈຳນວນ 29 ຄົນນັ້ນ ​ແມ່ນ​ຍັງ​ເຫຼືອພຽງ 28 ຄົນ ຖັດຈາກ ນາງ ສົມ​ສຸດາ​ລັດ ​ແຫວນ​ວັນ​ຄຳ​ ​ແລະ ມີ​ອີກ 2 ຄົນ ທີ່​ບໍ່​ສາມາດ​ຜ່ານ​ການ​ສອບ​ເສັງ​ໄດ້ ຍັງ​ຢູ່​ລະດັບ​ສາຍ​ນໍ້າຕານ​ຄື​ເກົ່າ ​ສົ່ງ​ຜົນ​ໃຫ້​ຍັງ​ເຫຼືອ​ຜູ້​ທີ່​ສາມາດ​ເຂົ້າ​ຮ່ວມ​ສອບ​ເສັງ​ໄດ້​ມີ​ພຽງ 27 ຄົນ, ​ໃນ​ນັ້ນ ສອບ​ເສັງ​ລະດັບ​ສາຍ​ນໍ້າຕານ ຂຶ້ນ​ສາຍ​ດຳ 1 ດັ້ງມີ 13 ຄົນ, ຍິງ 5 ຄົນ. ສອບ​ເສັງ​ສາຍ​ດຳ 1 ດັ້ງ ຂຶ້ນ ສາຍ​ດຳ 2 ດັ້ງ ມີ 9 ຄົນ, ຍິງ 4 ຄົນ. ສອບ​ເສັງ​ສາຍ​ດຳ 2 ດັ້ງ ຂຶ້ນ 3 ດັ້ງ ມີ 3 ຄົນ ​ແລະ ສອບ​ເສັງ​ສາຍ​ດຳ 3 ດັ້ງ ຂຶ້ນ 4 ດັ້ງ​ມີ 2 ຄົນ ສ່ວນ​ຜົນ​ຄະ​ແນນການ​ສອບ​ເສັງຂອງ​ນັກ​ກິລາ​ຢູ​ໂດ​ລາວ ​ຈະ​ຜ່ານ​ ຫຼື​ ບໍ່​ຜ່ານ​ນັ້ນ ​ແມ່ນ​ຂຶ້ນ​ກັບທາງ​ສະຫະພັນ​ຢູ​ໂດ​ສາກົນ ຈະ​ສົ່ງຜົນ​ການ​ສອບ​ເສັງ​ກັບ​ຄືນ​ມາຫາ ສະຫະພັນູ​ໂດ​ແຫ່ງ​ຊາດ​ລາວ ​ພາຍຫຼັງຕື່ມ​ອີກ.   

​ໂດຍ ສົງການ  

Written by Super User

ລັດຖະມົນຕີ ສສກ ຕ້ອນຮັບ ຄະນະນຳສະມາຄົມມິດຕະພາບ ໄຊຕະມະ-ລາວ

28310320 1330601463708669 1691903195 o   ທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະ ກິລາ ໄດ້ໃຫ້ກຽດຕ້ອນຮັບການເຂົ້າຢ້ຽມຄຳນັບຂອງ ທ່ານ ​ໄອ​ດາ ຢູຊິ ຮອງ ປະທານສະມາຄົມມິດຕະພາບ ໄຊຕະມະ-ລາວ ພ້ອມດ້ວຍຄະນະ ​ໃນວັນທີ 20 ກຸມພາ ຜ່ານມາ ທີ່ສໍານັກກະຊວງສຶກສາທິການ ແລະ ກິລາ, ມີບັນດາຫົວໜ້າ-ຮອງຫົວໜ້າກົມ, ພະນັກງານວິຊາການ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.ການເຂົ້າຢ້ຽມຄໍານັບໃນຄັ້ງນີ້, ແມ່ນເພື່ອລາຍງານກ່ຽວກັບ ການ​ຮ່ວມ​ມື​ໃນ​ໄລຍະ​ຜ່ານ​ມາ, ນໍາ​ເອົາ​ປຶ້ມ​ບັນທຶກ ການ​ຮ່ວມ​ມື ​ແລະ ການ​ເຄື່ອນ​ໄຫວ​ປະຕິບັດ​ວຽກງານ​ຢູ່​ໃນ ສປປ ລາວ,​ ​ເຊິ່ງ​ໃນ​ໄລຍະ 20 ປີ ປີ ​ແຫ່ງ​ການ​ພົວພັນ, ຮ່ວມ​ມື​ທີ່​ມີ​ຄຸນຄ່າ​ຫຼາຍ ລະຫວ່າງ 2 ປະເທດ ເປັນຕົ້ນແມ່ນໃນດ້ານການສຶກສາ, ສາທາລະນະສຸກ ແລະ ດ້ານທຸລະກິດຕ່າງໆ. ນອກຈາກ​ນັ້ນ, ​ໃນ​ໄລຍະ​ຜ່ານ​ມາ ຍັງ​ໄດ້​ຊ່ວຍ​ເຫຼືອ ​ແລະ ຈັດສົ່ງຕຽງຄົນເຈັບ ຈຳນວນ 1.000 ຕຽງ ມາໃຫ້ກະຊວງສາທາລະນະສຸກ ແລະ ສົມທົບກັບວຽກງານອື່ນໆທີ່ສະມາຄົມດັ່ງກ່າວໃຫ້ການສະໜັບສະໜູນ ໂດຍສະເພາະແມ່ນສະມາຄົມກິລາບານເຕະຂອງປະເທດຍີປຸ່ນ ທີ່ສ້າງໂຮງຮຽນກິລາບານເຕະ ແລະ ໄດ້ມາເຄື່ອນໄຫວເປັນເວລາ 3 ປີ. ສໍາລັບທິດທາງສະມາຄົ​ມ  ຢາກສ້າງບຸຄະລາກອນທາງດ້ານສີມືແຮງງານ ໃນການເຝິກອົບຮົບວິຊາຊີບ ໄລຍະ 3-5 ປີ ໃນນາມໄຊຕະມະ-ລາວ ຈະສຸມໃສ່ ​ແລະ ຕັ້ງໜ້າ​ໃນການຊ່ວຍເຫຼືອ ໂດຍສະເພາະວຽກງານການສຶກສາ ​ແລະ ກິລາ ​ໃຫ້​ມີ​ຜົນ​ສໍາ​ເລັດ​ເປັນ​ກ້າວໆ.

      ໂອກາດດັ່ງກ່າວ, ທ່ານ ນາງ ແສງ​ເດືອນ ຫຼ້າຈັນທະບູນ ກໍ່ໄດ້ກ່າວວ່າ: ໃນນາມຕາງໜ້າໃຫ້ຄະນະນໍາກະຊວງ ສສກ ມີຄວາມດີໃຈຫຼາຍທີ່ການມາຢ້ຽມຢາມຂອງສະມາຄົມດັ່ງກ່າວ. ຕະຫຼອດໄລຍະ 20 ຜ່ານມາ ທີ່ໄດ້ມີການຮ່ວມມືກັນນີ້, ເຫັນໄດ້ເຖິງຜົນງານຂອງສະມາຄົມ ໄຊຕະມະ-ລາວ ຢ່າງຫຼວງຫຼາຍ ເປັນຕົ້ນແມ່ນໃນດ້ານການສຶກສາ, ສາທາລະນະສຸກ ແລະ ດ້ານທຸລະກິດຕ່າງໆ. ນອກຈາກນີ້, ຍັງສະແດງຄວາມຂອບໃຈທີ່ໄດ້ມາຊ່ວຍເຫຼືອ ແລະ ພ້ອມທີ່ຈະໃຫ້ການຮ່ວມມື ລະຫວ່າງ 2 ພາກສ່ວນ ໃນການຂະຫຍາຍການຮ່ວມມືຈາກດ້ານການສຶກສາ, ສາທາລະນະສຸກ ໄປສູ່ຂົງເຂດວຽກງານອື່ນໆຕາມຄວາມສາມາດ​. ຢ່າງໃດກໍ່ຕາມ, ສຳລັບມິດຕະພາບແຫ່ງການຮ່ວມມື ແລະ ການຊ່ວຍເລືອໃນໄລຍະຜ່ານມາ ເປັນຕົ້ນແມ່ນການຊ່ວຍເຫຼືອຕຽງຄົນເຈັບ ຈຳນວນ 1.000 ຕຽງ ທາງ​ຄະນະ​ຮັບຜິດຊອບ ກໍ່​ໄດ້​ແຈກ​ຢາຍ​​ໄປ​ບ່ອນ​ຕ່າງໆ ​ເປັນ​ຕົ້ນ​ແມ່ນ​ໂຮງໝໍ ຫຼື ສຸກສາລາ ທີ່ຢູ່ເຂດຫ່າງໄກສອກຫຼີກ.

​ໂດຍ: ນາງ ຕຸ່ນ​ຄໍາ