ສຶກສາ

ສຶກສາ

Written by Super User

ມວນ​ຊົນ​ລາວ-ອິນ​ເດຍ ຫຼາຍ​ພັນ​ຄົນ ຮ່ວມ​ກິດຈະກຳ​​ໂຢຄະ ຄັ້ງ​ທີ 4 ສະຫຼອງວັນ​ໂຢຄະ​ສາກົນ

 36087698 1449464485155699 4431070390088892416 nການ​ນຳ​ພັກ-ລັດ​ຂອງລາວ ​ແລະ ອິນ​ເດຍ, ອົງການ​ຈັດ​ຕັ້ງສາກົນ, ພະນັກງານ, ຄູ-ອາຈານ, ທະຫານ-ຕຳຫຼວດ ​ແລະ ພໍ່-​ແມ່​ປະຊາຊົນ​ຊາວ​ລາວ ກໍ່​ຄື ຊາວ​ນະຄອນຫຼວງ​ວຽງຈັນ ຫຼາຍ​ພັນ​ຄົນ ​ເຂົ້າ​ຮ່ວມ​ກິດຈະກຳ​ໂຢຄະສຳລັບ​ການ​ປະສົມ​ກົມກຽວ ​ແລະ ສັນຕິພາບ ຄັ້ງ​ທີ 4 ປະຈຳ​ປີ 2018 ຫຼື “Yoga For Harmony & Peace That Luang, Vientiane” ​ເພື່ອ​ສ້າງ​ຂະ​ບວນການສະ​ເຫຼີ​ມ ສະຫຼອງ​ວັນ​ໂຢຄະ​ສາກົນ. ພ້ອມ​ກັນ​ນັ້ນ, ກໍ່​ຍັງ​ເປັນ​ການ​ຮັດ​ແໜ້ນ​ສາຍ​ພົວພັນ​ທາງ​ການ​ທູດ​ລະຫວ່າງ​ລາວ-ອິນ​ເດຍ ​ໃຫ້​ເຕີບ​ໃຫຍ່​ຂະຫຍາຍຕົວ​ຢ່າງ​ກວ້າງຂວາງ.

     

      ກິດຈະກຳ​ຄັ້ງ​ນີ້ ຈັດ​ຂຶ້ນ ​ເມື່ອ​ວັນ​ທີ 21 ມິຖຸນາ ຜ່ານ​ມາ ທີ່​ເດີ່ນ​ທາດຫຼວງ ​ເມືອງ​​​ໄຊ​ເຊ​ດຖາ ນະຄອນຫຼວງ​ວຽງ​ຈັນ, ​ໂດຍ​ໃຫ້​ກຽດ​ເຂົ້າ​ຮ່ວມ​ຂອງ ທ່ານ ບົວ​ລານ ສິລິ​ປັນຍາ ຮອງ​ລັດຖະມົນຕີ​ກະຊວງ​ສຶກສາ​ທິການ ​ແລະ ກິລາ ​ແລະ ທ່ານ ລາວີສັງກາ ອາ​ໂລ​ຊາ ​ເອກ​ອັກຄະ​ລັດຖະທູດ​ອິນ​ເດຍ ປະຈຳ​ສປປ ລາວ ພ້ອມ​ດ້ວຍ​ບັນດາຮອງ​ລັດຖະມົນຕີຈາກ​ກະຊວງ​ຕ່າງໆ, ​ອົງການຈັດ​ຕັ້ງສາກົນ, ພະນັກງານທຸກຂະ​ແໜງ​ການ, ຄູ-ອາຈານ, ທະຫານ-ຕຳຫຼວດ ​ແລະ ພໍ່-​ແມ່​ປະຊາຊົນ​ຊາວ​ລາວ ກໍ່​ຄື ຊາວ​ນະຄອນຫຼວງ​ວຽງຈັນ ​ເຂົ້າ​ຮ່ວມຫຼາຍ​ພັນ​ຄົນ.​ໂອກາດ​ນີ້, ທ່ານ ບົວ​ລານ ​ສິລິ​ປັນຍາ ກ່າວ​ວ່າ: ກິລາ​ໂຢຄະ​ແມ່ນ​ກິດຈະກຳ​ໜຶ່ງ​ທີ່​ສຳຄັນ​ໃນ​ການ​ພັດທະນາ​ຊັບພະ​ຍາກ​ອນມະນຸດ ​ແນ​ໃສ່​ສ້າງ​ໃຫ້​ຄົນ​ມີ​ການ​ຂະຫຍາຍຕົວ​ຮອບດ້ານ ດ້ານ​ຄວາມ​ຮູ້ຄວາມ​ສາມາດ, ດ້ານ​ສຸຂະພາບຮ່າງກາຍຈິດ​ໃຈ​ທີ່​ເຂັ້ມ​ແຂງ ​ແລະ ມີ​ສະມາທິ​ສູງ. ຄຽງ​ຄູ່​ກັນ​ນັ້ນ, ກໍ່​ຍັງ​ເປັນ​ກິລາ​ເພື່ອ​ສຸຂະພາບ​ປະ​ເພດ​ໜຶ່ງ​ທີ່​ໄດ້​ຮັບ​ຄວາມ​ນິຍົມ​ຈາກ​ມວນ​ຊົນ​ຢ່າງ​ກວ້າງຂວາງ​ໂດຍ​ບໍ່​ຈຳ​ແນ​ກ​ເພດ​ໄວ​ອາຍຸ​ຖານະທາງ​ສັງຄົມ. ນອກຈາກ​ນັ້ນ, ກິດຈະກຳ​ດັ່ງກ່າວ ຍັງ​​ເປັນ​ການ​ໂຄສະນາ​ປຸກລະດົມ​ມວນ​ຊົນ​ໃຫ້​ຫັນ​ມາ​ຫັດກາ​ຍະ​ບໍລິຫານ​ການ​ອອກກຳລັງ​ກາຍ, ການ​ຫຼິ້ນ​ກິລາ​ເພື່ອ​​ເສີມ​ສ້າງ​ສຸຂະພາບ​ຮ່າງກາຍ ​ແລະ ຈິດ​ໃຈ​ໃຫ້ມີ​ຄວາມ​ສົມບູນສາມາດ​ຕ້ານ​ພະຍາດ​ໂລຄາ ​ແລະ ສິ່ງ​ແວດ​ລ້ອມ​ພາຍ​ນອກ​ໄດ້​ອີກ​ດ້ວຍ.

      ​ໃນ​ງານ​ໂຢຄະ​ປີ​ນີ້ ກໍ່​ມີ​ຫຼາຍ​ກວ່າ 150 ປະ​ເທດ ​ໃນ​ທົ່ວ​ໂລກພ້ອມ​ກັນ​ຈັດ​ກິດຈະກຳ​​ແບບ​ດຽວ​ກັນ ເພື່ອລະດົມ​ມວນ​ຊົນ​ຫັນ​ມາ​ຫຼິ້ນກິລາໂຢຄະ​ໃຫ້​ມີ​ສຸຂະພາບ​ສົມບູນ​ແຂງ​ແຮງ ​ແລະ ມີ​ສີສັນຢ່າງເປັນ​ຂະ​ບວນການຟົດຟື້ນ ສະ​ເພາະ​ຢູ່​ສປປ ລາວ ນອກຈາກ ຈະ​ມີ​ການ​ລະດົມ​ຫຼິ້ນກິລາ​ໂຢຄະ​ແລ້ວ ພາຍ​ໃນ​ງານ​ກໍ່​ຍັງ​ມີ​ຫຼາຍ​ກິດຈະກຳ ​ເປັນ​ຕົ້ນ​ແມ່ນການ​ແຈກ​ເສື້ອ​ທີ່​ມີສັນຍາ​ລັກ​ຂອງ​ການສະ​ຫຼອງ​ວັນ​ໂຢຄະ​ສາກົນ​ ​ແລະ ອື່ນໆ​ອີກ.

​ໂດຍ​ສົງການ

Written by Super User

ຣັກບີ້​ລາວ ກຽມ​ສົ່ງ 6 ນັກ​ກິລາ​ ຮ່ວມ​ແຂ່ງຂັນທີ່ຍີ່ປຸ່ນ ທ້າຍເດືອນນີ້

35485155 1439225259512955 3192411502778777600 n  ສະຫະພັນ​ກິລາຣັກບີ້​ແຫ່ງ​ຊາດ​ລາວ ກຽມ​ສົ່ງ 6 ນັກ​ກິລາ​ທີມຊາດລາວ ເຂົ້າ​ຮ່ວມ​ການ​ແຂ່ງຂັນ ຣັກບີ້ ລາຍການ “RKU Child Fund Pass It Back Cup 2018” ທີ່​ປະ​ເທດຍີ່ປຸ່ນ ​ເປັນ​ເຈົ້າພາບ ​ໃນ​ທ້າຍ​ເດືອນ​ມິຖຸນາ​ນີ້.ອີງ​ຕາມ​ຂໍ້​ມູນ​ຈາກ​​ເຟຊບຸກສະຫະພັນ​ກິລາຣັກບີ້​ແຫ່ງ​ຊາດ​ລາວ ​ແຈ້ງໃຫ້​ຊາບ​ວ່າ: ສະຫະພັນ​ກິລາຣັກບີ້​ແຫ່ງ​ຊາດ​ລາວ ກຽມ​ສົ່ງ 6 ນັກ​ກິລາ​ທີມຊາດລາວ ​ເຂົ້າ​ຮ່ວມ​ການ​ແຂ່ງຂັນຣັກບີ້ ລາຍການ  “RKU Child Fund Pass It Back Cup 2018” ທີ່​ປະ​ເທດຍີ່ປຸ່ນ ​ເປັນ​ເຈົ້າພາບ ​ໃນ​ລະຫວ່າງ​ວັນ​ທີ 28 ມິຖຸນາ ຫາ 1 ກໍລະກົດ​ນີ້ ປະກອບ​ມີ ທີ​ມຍິງ 3 ນ້ອງ ຄື: ນາງ ມິນ​ລີ, ນາງ ​ເພັງ ​ແລະ ນາງ ​ເດືອ ວື ແລະ ທີມຊາຍອີກ 3 ຄົນ ຄື ທ້າວ ຕູ ຄື, ທ້າວ ​ເທບ​ປີ​ຊາ ​ແລະ ທ້າວ ​ໄທ ຮາ. ​ໂດຍ​ມີ 2 ຄູ​ເຝິກ ນຳພາ ທ່ານ ນາງ ທັດ​ສະ​ພອນ ຄຸມ​ທີ​ມຍິງ ​ແລະ ທ່ານ ​ເຢີ ຮາ ຄຸມ​ທີ​ມຊາຍ. ​ເຊິ່ງທັບ​ນັກ​ກິລາຣັກບີ້​ລາວ ທີ່​ຈະ​ເຂົ້າ​ຮ່ວມ​ແຂ່ງຂັນໃນຄັ້ງ​ນີ້ ​ແມ່ນຈະ​ໄດ້ຮ່ວມທີມກັບນັກກິລາຈາກ ສສ ຫວຽດນາມ ແລະ ຟີລິບປິນ ໃນນາມທີມມັງກອນເອເຊຍ.ສຳລັບການ​ແຂ່ງຂັນຣັກບີ້ ລາຍການ “RKU Child Fund Pass It Back Cup 2018” ທີ່​ປະ​ເທດຍີ່ປຸ່ນ ​ເປັນ​ເຈົ້າພາບ ​​ແມ່ນ​ຈັດ​ຂຶ້ນໂດຍ ສະຫະພັນກິລາຣັກບີ້ເອເຊຍ ຮ່ວມ​ກັບ ມະຫາວິທະຍາໄລ Ryutsu Keizai ທີ່​ມະຫາວິທະຍາໄລດັ່ງກ່າວ ​ແຂວງ​ອິບາຣາກິ ປະ​ເທດ​ຍີ່ປຸ່ນ.

ອຳ​ໄພ​ວັນ

Written by Super User

ວລ​ ສິລະ​ປະ​ ​ໄດ້​ຮັບ​ອຸປະກອນ​ການ​ຮຽນ-ການ​ສອນ ມູນຄ່າ 800 ລ້ານກວ່າກີບ ກຽມ​ນຳ​ໃຊ້​ເປີດ​ສົກຮຽນໜ້າ

35534069 1439225579512923 4281720702031101952 n 1   ວິທະຍາ​ໄລ (ວລ) ​ສິລະ​ປະ​ສຶກສາ ກົມ​ພະລະ​ ​ແລະ ສິລະ​ປະ​ສຶກສາ ກະຊວງ​ສຶກສາ​ທິການ ​ແລະ ກິລາ (ສສກ) ​ໄດ້​ຮັບ​ອຸປະກອນ​ການ​ຮຽນ-​ການ​ສອນ ​ເປັນ​ເຄື່ອງ​ສຽງ​ເກືອບ 40 ລາຍການ ລວມມູນ​ຄ່າ 800 ລ້ານ​ກວ່າ​ກີບ ກຽມ​ນຳ​ໃຊ້​ເຂົ້າ​ໃນ​ການຈັດ​ປະຕິບັດ​ການ​ຮຽນ-ການ​ສອນ ​ໃນສາຍ​ວິຊາ​ຮຽນສິລະ​ປະ​ດົນຕີ ​ລະດັບ​ປະລິນຍາ​ຕີ ລະບົບ 12+4, ລະດັບ​ຊັ້ນ​ສູງ 12+2 ​ແລະ ລະດັບ​ຊັ້ນ​ກາງ ລະບົບ 9+3 ​ໃນ​ສົກຮຽນ 2018-2019.

      ພິທີ​ກວດ ​ແລະ ມອບ-ຮັບ​ອຸປະກອນ​ການ​ຮຽນ​-ການ​ສອນ ເປັນ​ເຄື່ອງ​ສຽງ​ເກືອບ 40 ລາຍການ​ນີ້, ​ໄດ້​ມີ​ຂຶ້ນ​ເມື່ອ​ບໍ່​ດົນຜ່ານ​ມາ​ ທີ່​ຫໍສະ​ແດງ​ຂອງ​ວິທະຍາ​ໄລ​ສິລະ​ປະ​ສຶກສາ ​ເມືອງ​ຈັນທະ​ບູລີ ນະຄອນຫຼວງ​ວຽງ​ຈັນ, ​ໂດຍ​​ໃຫ້​ກຽດ​ເຂົ້າ​ຮ່ວມ ​ແລະ ກວດ​ສອບ​ຂອງ​ທ່ານ ​ແພງ​ມາ ​ໄຊ​ຍະ​ວົງ ຮອງ​ຫົວໜ້າ​ຫ້ອງການ ກະຊວງ ສສກ, ທ່ານ ຄຳ​ສີ ຄຳ​ພັນ​ທອງ ຮອງ​ຫົວໜ້າ​ກົມ​ພະລະ ​ແລະ ສິລະ​ປະ​ສຶກສາ ​ແລະ ທ່ານ ວິລະ​ວັນ ບຸນ​ສຸກ​ໄທ ຜູ້ອຳນວຍການ​ ວິທະຍາ​ໄລ​ ສິລະ​ປະ​ສຶກສາ ພ້ອມ​ດ້ວຍ​ຄະນະ ​ແລະ ​ບັນດາຜູ້​ຕາງໜ້າ​ກົມ, ວິ​ສາ​ຫະກິດ​ສ່ວນ​ບຸກຄົນ ​ເອັນ​ພີວີ ອິນ​ເຕີ​ຟາຍ (NPV Enterfrise) ຜູ້​ຈັດ​ຊື້​ອຸປະກອນ, ພະນັກງານ, ຄູ-ອາຈານ ​ແລະ ນ້ອງນັກ​ສຶກສາ​.

       ໂອກາດດັ່ງກ່າວ, ທ່ານ ສີ​ສຸກ ພັນ​ແພງ​ດີ ໄດ້​ໃຫ້​ສຳພາດ​ວ່າ: ວິທະຍາ​ໄລ ​ສິລະ​ປະ​ສຶກສາ ​ໄດ້​ຈັດ​ພິທີກວດ ແລະ ​ມອບ-ຮັບ​ໂຄງການ​ຈັດ​ຊື້​ອຸປະກອນການ​ຮຽນ​-ການ​ສອນ, ​ເຊິ່ງ​ເປັນອຸປະກອນ​​ເຄື່ອງ​ສຽງສຳລັບ​ປະກອບ​ເຂົ້າ​ໃນ​ສາຍ​ວິຊາ​ຮຽນ​ສິລະ​ປະ​ດົນຕີ ມີ ມິກ​ເຊີ, ລຳ​ໂພ່ງ ​ແລະ ອື່ນໆ ​ເກືອບ 40 ລາຍການ ລວມມູນ​ຄ່າ 800 ລ້ານ​ກວ່າ​ກີບ. ອຸປະກອນ​ເລົ່າ​ນີ້ ມີ​ຄວາມ​ໝາຍ​ມີສຳຄັນທີ່​ສຸດ ທີ່​ຈະປະກອບສ່ວນ​ເຂົ້າ​ໃນ​ການ​ເຝິກ​ທັກ​ສະການ​ຮຽນ​-ການ​ສອນ​ໃຫ້​ແກ່ນັກ​ສຶກສາ​ໄດ້​ມີ​ຄວາມ​ຮູ້​ຄວາມ​ສາມາດ​ໃນ​ການ​ປະຕິບັດ​ຕົວ​ຈິງ ​ແລະ ສາມາດ​ນຳ​ຄວາມ​ຮູ້​ດັ່ງກ່າວ​ໄປ​ປະກອບສ່ວນ​ຮັບ​ໃຊ້​ໃນວຽກ​ງານ​ສັງຄົມ​ທົ່ວ​ໄປ ​ໂດຍສະ​ເພາະຫຼັງ​ຈົບ​ການ​ສຶກສາ​ໄປ​ແລ້ວ ​​ກໍ່​ຈະໄດ້ໄປປະກອບ​ເຂົ້າ​ໃນ​ການ​ຮຽນ-ການ​​ສອນຕົວ​ຈິງ​ຢູ່​ໂຮງຮຽນ​ຕ່າງໆ. ນອກ​ຈາກນັ້ນ, ອຸປະກອນ​ນີ້ຍັງ​ຈະ​ໄດ້​ຮັບ​ໃຊ້​ເຂົ້າ​ໃນ​ວຽກ​ງານ​ການເຄື່ອນ​ໄຫວຂອງ​ກະຊວງ​ສຶກສາ​ທິການ ​ແລະ ກິລາ ​ໃນ​ການຈັດ​ງານ​ຕ່າງໆ ​ເຊັ່ນ​: ກອງ​ປະຊຸມ​ລະດັບ​ຊາດ, ການຈັດ​ງານ​ແຂ່ງຂັນ​ກິລາ​ນັກຮຽນທົ່ວ​ປະ​ເທດ ​ແລະ ກິລາ​ແຫ່ງ​ຊາດ ​ໃນ​ຕໍ່ໜ້າ​ອີກ​ດ້ວຍ. ສ່ວນ​ແຜນ​ສະ​ເພາະ​ຂອງວິທະຍາ​ໄລ​ ແມ່ນ​ຈະ​ຈັດ​ແຂ່ງຂັນ​ສິລະ​ປະອ້ອມ​ຂ້າງ​ສູນ​ກາງ​ໃນ​ມໍ່ໆ​ນີ້ ​ແລະ ​ແຜນ​ໃນ​ອະ​ຄົດ ກໍ່​ຈະ​ຈັດ​ແຂ່ງຂັນ​ສິລະ​ປະລະ​ດັບ​ຊາດ​ຕື່ມ​ອີກ.ສົກຮຽນ 2017-2018 ວິທະຍາ​ໄລ ​ສິລະ​ປະ​ສຶກສາ ​ໄດ້​ເປີດ​ສອນ​ຫຼັກ​ສູດ​ຂອງກະຊວງ​ສຶກສາ​ທິການ ​ແລະ ກິລາ ​ໃນ 2 ສາຍ​ວິຊາ​ຮຽນ ຄື: ສິລະ​ປະ​ດົນຕີ ​ແລະ ສິລະ​ປະກຳ ​ໃຫ້​ນັກ​ສຶກສາ​ ຈຳນວນ 515 ຄົນ ​ໃນ​ລະດັບ​ປະລິນຍາ​ຕີ ລະບົບ 12+4, ລະດັບ​ຊັ້ນ​ສູງ 12+2 ​ແລະ ລະດັບ​ຊັ້ນ​ກາງ ລະບົບ 9+3.

ໂດຍ ສົງການ