ສຶກສາ

ສຶກສາ

Written by Super User

ລອລ ສ້າງຄວາມເຂັ້ມແຂງດ້ານການພັດທະນາບຸຄະລາກອນກິລາ ໃຫ້ຜູ້ບໍລິຫານສະຫະພັນ ປະເພດກິລາໂອແລມປິກ

29993773 1367857119983103 1289204932 o   ຫ້ອງການເລຂາທິການ ຄະນະກໍາມະການໂອແລມປິກແຫ່ງຊາດລາວ (ລອລ) ກະຊວງສຶກສາທິການ ແລະ ກິລາ ໄດ້ຈັດເຝິກອົບຮົມວຽກງານການພັດທະນາບຸຄະລາກອນກິລາ ເພື່ອສ້າງຄວາມເຂັ້ມແຂງໃຫ້ຜູ້ບໍລິຫານບັນດາສະຫະພັນກິລາ ປະເພດກິລາໂອແລມປິກ ທັງເປັນການແລກປ່ຽນບົດຮຽນກ່ຽວກັບການບໍລິຫານລະຫວ່າງສະຫະພັນກິລາປະເພດຕ່າງໆ.

    ກອງປະຊຸມດັ່ງກ່າວໄດ້ຈັດຂຶ້ນ ໃນວັນທີ 29 ມີນາ ຜ່ານມາ ທີ່ສູນເຝິກອົບຮົມຜູ້ບໍລິຫານການສຶກສາ ແລະ ກິລາ ເມືອງວັງວຽງ ແຂວງວຽງຈັນ, ໂດຍມີ ທ່ານ ສົມພູ ພົງສາ ຜູ້ຊ່ວຍລັດຖະມົນຕີ ກະຊວງສຶກສາທິການ ແລະ ກິລາ ທັງເປັນຮອງປະທານ ແລະ ເລຂາທິການຄະນະກໍາມະການໂອແລມປິກແຫ່ງຊາດລາວ, ທ່ານ ສຈ.ປອ ສົມສີ ຍໍພັນໄຊ ວ່າການອະທິການບໍດີ ມະຫາວິທະຍາໄລແຫ່ງຊາດ ທັງເປັນປະທານສະຫະພັນກິລາມະຫາວິທະຍາໄລແຫ່ງຊາດລາວ, ທ່ານ ປອ. ສຸດຖະໜອມ ອິນທະວົງ ວ່າການຫົວໜ້າຫ້ອງການເລຂາທິການຄະນະກໍາມະການໂອແລມປິກແຫ່ງຊາດລາວ ກະຊວງສຶກສາທິການ ແລະ ກິລາ ແລະ ທ່ານ ແກ້ວເພັດ ເສນາຄໍາ ຮອງຫົວໜ້າພະແນກສຶກສາທິການ ແລະ ກິລາ ແຂວງວຽງຈັນ ພ້ອມດ້ວຍຫົວໜ້າ-ຮອງຫົວໜ້າກົມ, ພະແນກ, ຄະນະສະຫະພັນກິລາແຫ່ງຊາດ ແລະ ພະນັກງານ ແລະ ຄະນະຮັບຜິດຊອບກອງປະຊຸມເຂົ້າຮ່ວມຢ່າງພ້ອມພຽງ.

       ໂອກາດນີ້, ທ່ານ ສົມພູ ພົງສາ ໄດ້ກ່າວໄຂກອງປະຊຸມຢ່າງເປັນທາງການ ພ້ອມທັງໃຫ້ຮູ້ຈຸດປະສົງໃນການຈັດກອງປະຊຸມໃນຄັ້ງນີ້ ແມ່ນເພື່ອເປັນການທົບທວນຄືນກ່ຽວກັບການບໍລິຫານຈັດການສະຫະພັນກິລາແຫ່ງຊາດ ໂດຍສະເພາະແມ່ນປະເພດກິລາໂອແລມປິກ, ເປັນການແລກປ່ຽນບົດຮຽນກ່ຽວກັບການບໍລິຫານລະຫວ່າງສະຫະພັນກິລາປະເພດຕ່າງໆ ພ້ອມທັງເປັນການປຶກສາຫາລື ແລະ ຊອກຫາມາດຕະການຕ່າງໆໃນການແກ້ໄຂບັນຫາທີ່ເປັນການກົດໜ່ວງແກ່ການພັດທະນາກິລາ-ກາຍະກໍາ ເວົ້າລວມ, ເວົ້າສະເພາະແມ່ນການບໍລິຫານວຽກງານສະຫະພັນກິລາປະເພດຕ່າງໆ ແລະ ເພື່ອສ້າງຄວາມເຂັ້ມແຂງໃຫ້ຜູ້ບໍລິຫານບັນດາສະຫະພັນກິລາປະເພດກິລາໂອແລມປິກ ທາງດ້ານວຽກງານການພັດທະນາບຸຄະລາກອນກິລາ ເປັນຕົ້ນແມ່ນການບໍລິຫານໃນອົງກອນກິລາ, ການບໍລິຫານທັກສະທີ່ຊໍານານ, ການບໍລິຫານສິ່ງປິ່ນອ້ອມກິລາ, ການບໍລິຫານຊັບພະຍາກອນ, ການບໍລິຫານກິດຈະກໍາກິລາຕ່າງໆ ເພື່ອເຮັດໃຫ້ວຽກງານກິລາລາວພັດທະນາຂຶ້ນໄປເລື້ອຍໆ.

       ກອງປະຊຸມເຝິກອົບຮົມວຽກງານການພັດທະນາບຸຄະລາກອນກິລາໃຫ້ຜູ້ບໍລິຫານບັນດາສະຫະພັນກິລາປະເພດກິລາໂອແລມປິກຄັ້ງນີ້ ແມ່ນຈະດໍາເນີນໄປເປັນເວລາ 4 ວັນ ລະຫວ່າງວັນທີ 28-31 ມີນາ 2018 ໂດຍຜູ້ເຂົ້າຮ່ວມຈະໄດ້ຮັບຮູ້ກ່ຽວກັບການບໍລິຫານ ແລະ ພັດທະນາກິລາກ້າວເຂົ້າສູ່ໂອແລມປິກ, ບາງປັດໄຈສໍາຄັນການບໍລິຫານເພື່ອພັດທະນານັກກິລາ, ການບໍລິຫານງານແຂ່ງຂັນກິລາ 1 ປະເພດ, ວຽກງານການຕະຫຼາດຂອງອົງກອນກິລາ, ການສ້າງແຮງຈູງໃຈໃນກິລາ-ກາຍະກໍາ. ນອກຈາກນີ້, ຍັງໄດ້ແບ່ງກຸ່ມຄົ້ນຄວ້າ ແລະ ແລກປ່ຽນສົນທະນາ, ຕາງໜ້າແຕ່ລະກຸ່ມຂຶ້ນລາຍງານ ແລ້ວສັງລວມໂດຍຫຍໍ້ກ່ຽວກັບຜົນກອງປະຊຸມໃນຄັ້ງນີ້.

(ບຸນທະວີ)

Written by Super User

ສສກ ມອບ ສູນໄອເອັມຊີ ຂຶ້ນກັບສະຖາບັນວິທະຍາສາດການສຶກສາ

29943181 1367856993316449 1342086776 o   ກະຊວງ​ສກສາ​ທິການ ​ແລະ ກິລາ (ສສກ) ​ໄດ້​ຈັດ​ພິທີ ມອບ-​ຮັບ ສູນ​ໂຄສະນາ​ຂ່າວສານ​ການ​ສຶກສາ ​ແລະ ກິລາ (​ໄອ​ເອັມຊີ) ​ໄປ​ຂຶ້ນກັບ​ສະ​ຖາ​ບັນ​ຄົ້ນຄວ້າວິທະຍາສາດ​ການ​ສຶກສາ (ສວສ)​ເມື່ອ​ວັນ​ທີ 28 ມີນາ ຜ່ານ​ມາ ທີ່​ຫ້ອງ​ປະຊຸມ​ສະ​ຖາ​ບັນດັ່ງກ່າວ, ​ໂດຍ​ຕາງໜ້າ​ກ່າວ​ມອບ​ຂອງທ່ານ ນາງ ຂັນ​ທະ​ລີ ສີຣິພົງພັນ ຫົວໜ້າ​ຫ້ອງການ ກະຊວງ​ສຶກສາ​ທິການ ​ແລະ ກິລາ ​ແລະ ກ່າວ​ຮັບ​ຂອງ​ທ່ານ ປອ. ອ່ອນ​ແກ້ວ​ ນວນ​ນະ​ວົງ ຜູ້ອຳນວຍການ​ສະ​ຖາ​ບັນ​ຄົ້ນຄວ້າວິທະຍາສາດການ​ສຶກສາ, ໂດຍເປັນກຽດເຂົ້າຮ່ວມ​ຂອງທ່ານ ຮສ.ປອ ຄຳ​ຜາຍ ສີສະ​ຫວັນ ຮອງ​ລັດຖະມົນຕີ ກະຊວງ​ສຶກສາ​ທິການ ​ແລະ ກິລາ, ພ້ອມດ້ວຍຄະນະອຳນວຍການ ສວສ, ຕາງໜ້າກົມຈັດຕັ້ງ ແລະ ພະນັກງານ ສສກ ແລະ ຜູ້ອຳນວຍການ​ສູນ​​ໂຄສະນາ​ຂ່າວສານ​ການ​ສຶກສາ ​ແລະ ກິລາ, ຕະຫຼອດຮອດ      ພະນັກງານ ​ແລະ ພາກສ່ວນ​ທີ່​ກ່ຽວຂ້ອ​ງ​ເຂົ້າ​ຮ່ວມ.

       ໃນໂອກາດ​ດັ່ງກ່າວ, ທ່ານ ນາງ ຂັນ​ທະ​ລີ ສີຣິພົງພັນ ​ໄດ້ກ່າວ​ໃຫ້ຮູ້ເຖິງປະຫວັດຄວາມເປັນມາ, ພາລະ ບົດບາດ ສິດ ແລະ ໜ້າທີ່ ຕະຫຼອດຮອດຜົນງານໃນການຈັດຕັ້ງປະຕິບັດວຽກງານຂອງສູນ​ໄອ​ເອັມຊີ, ເຊິ່ງໃນ​ໄລຍະ​ຜ່ານ​ມາ​ ສູນ​ດັ່ງກ່າວ​ແມ່ນ​ຂຶ້ນ​ກັບ​​ຫ້ອງການ​ກະຊວງ​ສຶກສາ​ທິການ ​ແລະ ກິລາ, ໂດຍໄດ້​ສຸມ​ໃສ່​ປະຕິບັດ​ໜ້າ​ທີ່​ວຽກ​ງານໃຫ້​ສຳ​ເລັດ​ຫຼາຍ​ດ້ານ ຕາມ​ການ​ມອບ​ໝາຍ​ຂອງ​ການຈັດ​ຕັ້ງ ກໍ່​ຄື ຄະນະ​ນຳ​ຂອງ​ກະຊວງ​ສຶກສາ​ທິການ ​ແລະ ກິລາ ​ໂດຍ​ສະ​ເພາະ​ແມ່ນ​ການ​ໂຄສະນາ​ເຜີຍ​ແຜ່​ຜົນງານ​ການ​ເຄື່ອນ​ໄຫວ​ປະຕິບັດ​ໜ້າ​ທີ່​ຂອງ​ຄະນະ​ພັກ-ຄະນະ​ນຳ​ ຢູ່​ພາຍ​​ໃນ​ກະຊວງ ​ແລະ ຕ່າງ​ແຂວງ, ​ໄດ້​ນຳ​ສະ​ເໜີ​ວຽກ​ງານ​ການ​ພັດທະນາ​ການ​ສຶກສາ ​ແລະ ກິລາ ຢູ່​ພາຍ​ໃນ ​ແລະ ຕ່າງປະ​ເທດ.

       ນອກຈາກ​ນັ້ນ, ສູນ​ດັ່ງກ່າວຍັງ​ໄດ້​ຜະລິດ ​ແລະ ຈັດ​ຈຳ​ໜ່ວຍ​ໜັງສືພິມ​ສຶກສາ-ກິລາ ​ລາຍ​ວັນ, ວາລະສານ, ລາຍການ​ໂທລະພາບ​ສຶກສາ-​ກິລາ ອອກ​ອາ​ກາ​ດທາງ​ໂທລະພາບ​ແຫ່ງ​ຊາດ, ວິທະຍຸ​ກະຈາຍສຽງ ​ແລະ ສື່​ມວນ​ຊົນ​ຕ່າງໆ. ​ໃນ​ນັ້ນ, ຍັງ​ເປັນ​ກະບອກ​ສຽງ​ເພື່ອ​ຕອບ​ໂຕ້​ຢ່າງ​ທັນ​ການ​ກ່ຽວ​ກັບ​ຂໍ້​ມູນ​ຂ່າວ​ສານ​ທີ່​ບໍ່​ຖືກຕ້ອງ ​ໃສ່​ຮ້າຍ​ປ້າຍ​ສີ ຫວັງ​ທຳລາຍ ມ້າງ​ເພ ​​ໂດຍ​ສະ​ເພາະ​ວຽກ​ງານ​ສຶກສາ-​ກິລາ ກໍ່​ຄື: ຄວາມ​ບໍ່​ຄ້ອງ​ຕົວ​ຢູ່​ໃນ​ວຽກ​ງານ​ສຶກສາ-​ກິລາ, ​ໄດ້ຕຳ​ນິວິຈານ ​ແລະ ຈຳກັດ​ປາກົດກາ​ນຫຍໍ້​ທໍ້​ຕ່າງໆ ​​ຜ່ານ​ສື່​ໂຄສະນາ​ຢ່າງ​ທັນ​ການ. ພ້ອມ​ນັ້ນ, ຍັງໄດ້​ສ້າງ​ເຄື່ອຄ່າ​ຍ​ໂຄສະນາວຽກ​ງານ​ຂ່າວສານການ​ສຶກສາ-ກິລາ ປະຈຳ​ພະ​ແນ​ກສຶກສາ​ທິການ ​ແລະ ກິລາ​ແຂວງ ​ແລະ ນະຄອນຫຼວງວຽງຈັນ ​ໃນ​ທົ່ວ​ປະ​ເທດ ກໍ່​ຄື ​ໄດ້​ມີ​ເຄື່ອຄ່າ​ຍຕາ​ໜ່າງຜູ້​ຮັບຜິດຊອບ​ວຽກ​ງານ​ໂຄສະນາຂ່າວ​ສານໃນ​ທົ່ວ​ປ​ເທດ, ​ໂດຍ​ໃນ​​ແຕ່ລະ​ປີ​ກໍ່ໄດ້ມີ​ພິທີ​ສະຫຼຸບ​ ມອບ​ລາງວັນ​ໃຫ້​ຜູ້​ທີ່​ມີ​ຜົນງາ​ນດີ​ເ​ດັ່ນ​ໃນ​ການ​ປະກອບສ່ວນ​​ເຂົ້າ​ໃນ​ການ​ໂຄສະນາ​ວຽກ​ງານ​ດັ່ງກ່າວ​ພາຍ​ໃນ​ແຂວງຕ່າງໆ, ​ໃນ​ແຕ່ລະ​ປີ​ກໍ່​ໄດ້​ມີ​ການຈັດ​ເຝິກອົບຮົມ ຖອດ​ຖອນ​ບົດຮຽນ ມີ​ການ​ຍ້ອງຍໍ​ປະຈຳ​ປີ​ຢ່າງ​ເປັນ​ປົກ​ຕິ.

       ​ພ້ອມດຽວ​ກັນນີ້, ທ່ານ ຮສ.ປອ ຄຳ​ຜາຍ ສີສະ​ຫວັນ ​ໄດ້​ກ່າວ​ໂອລົມໃຫ້ທິດເຍືອງທາງວ່າ: ສູນ​ໂຄສະນາ​ຂ່າວສານ​ການ​ສຶກສາ ​ແລະ ກິລາ ມີ​ທີ່​ຕັ້ງ ​ແລະ ພາລະ​ບົດບາດ​ອັນ​ໃຫຍ່​ຫຼວງ ​ເລີ່​ມຈາກ​ວຽກ​ງານ​ຂ່າວສານ​ເປັນ​ວຽກ​ງານ​ພາຫະນະ​ສື່​ມວນ​ຊົນ ​ແຕ່​ໃນ​ຂະນະ​ດຽວ​ກັນ​ນັ້ນ ກໍ່​ຍັງ​ເປັນ​ພາຫະນະ​ອັນ​ແຫຼມ​ຄົມ​ຂອງ​ພັກ, ຂອງ​ລັດ, ​ເປັນ​ກະບອກ​ສຽງ​ຂອງອົງກຄະນະ​ພັກ ກະຊວງ​ສຶກສາ​ທິການ ​ແລະ ກິລາ, ​ເປັນ​ກະບອກ​ສຽງ​ຂອງ​ຄະນະ​ນຳ ​ແລະ ຄະນະ​ລັດຖະມົນຕີ, ​ເຊິ່ງ​ເຫັນ​ວ່າ​ສູນ​ດັ່ງກ່າວ​ນີ້​ ມີ​ບົດບາດ​ອັນ​ສຳຄັນ​ເປັນ​ພິ​ເສດ ​ເຊິ່ງຍາມ​ໃດ​ພັກ​ກໍ່​ໃຫ້​ຄວາມ​ສຳຄັນ​ຕໍ່​ວຽກງານ​ໂຄສະນາ​ຂ່າວສານ, ​ເຫັນ​ວ່າ​ໃນ​ໄລຍະ​ຜ່ານ​ມາ​ສູນ​​ໂຄສະນາ​ຂ່າວສານ​ການ​ສຶກສາ ​ແລະ ກິລາ ​ໄດ້​ເຮັດ​ໜ້າ​ທີ່​ການ​ເມືອງ​ຂອງ​ຕົນ​ເອງ​ໄດ້​ສຳ​ເລັດ ​ໂດຍ​ໄດ້​ໂຄສະນາ​ຂ່າວສານ​ການ​ເຄື່ອນ​ໄຫວ​ວຽກ​ງານຂອງ​ຄະນະ​ນຳພາຍ​ໃນກະຊວງ ຕະຫຼອດ​ເຖິງ​ບັນດາ​ເຫດການ​ຕ່າງໆ​ທີ່​ເກີດ​ຂຶ້ນ​ຢູ່​ໃນ​ຂະ​ແໜງ​ການ​ສຶກສາ-ກິລາ​ຂອງ​ພວກ​ເຮົາ ຮັບປະກັນ​ທາງ​ດ້ານ​ເນື້ອ​ໃນ  ​ແລະ ຮູບ​ການ ລວມທັງສື່​ສິ່ງ​ພິມ, ​ໂທລະພາບ ​ແລະ ສື່​ວິທະຍຸ.

        ມາ​ຮອດ​ປັດຈຸບັນ​ນີ້, ​ເນື່ອງ​ຈາກ​ທົ່ວ​ພັກ ທົ່ວ​ລັດ ​ໄດ້​ມີ​ການ​ປັບປຸງ​ອົງ​ປະກອບ​ການຈັດ​ຕັ້ງ ແລະ ການ​ເຄື່ອນ​ໄຫວ​ຂອງ​ປະ​ເທດ. ສະ​ນັ້ນ​, ນີ້ກໍ່​ເປັນກົດ​ເກນ​ໜຶ່ງ​​ທີ່​ມີ​ການ​ປ່ຽນ​ແປງ​ໄປ​ຕາມ​ຫຼັກ​ປັດ​ສະຍາ ປ່ຽນ​ຈາກ​ອັນ​​ເກົ່າ​ໄປ​ສູ່​ອັນ​ໃໝ່ ​ເພື່ອ​ໃຫ້​ທັນ​ກັບ​ສະພາບ​ຄວາມ​ເປັນ​ຈິງ​ຂອງ​ຍຸກ​ສະ​ໄໝ ຈຶ່ງ​ເນັ້ນ​ໜັກ​ໃຫ້​ທາງ​ສະ​ຖາ​ບັນ​ຄົ້ນຄວ້າ​ວິທະຍາສາດການ​ສຶກສາ ກໍ່​ຄື ສູນ​ໂຄສະນາ​ຂ່າວສານ​ການ​ສຶກສາ ​ແລະ ກິລາ ສືບ​ຕໍ່​ປະຕິບັດ​ບັນດາ​ຫຼັກການ ​ໂດຍ​ສະ​ເພາະ ລັກສະ​ນະ​ຕ່າງໆ​ຂອງ​ສື່​ມວນ​ຊົນ, ກ່ອນ​ອື່ນ​ໝົດ​ໃນ​ການ​ໂຄສະນາ​ກໍ່​ຕ້ອງ​ຮັບປະກັນ​ໃຫ້​ໄດ້​ໃນ​ລັກ​ສະ​ນະ​ພັກ ລັກສະນະ​ຊົນ​ຊັ້ນ ​ແລະ ລັກສະນະ​ຊາດ​ໃຫ້​ໄປ​ຄ່ຽງຄູ່​ກັນ, ຕ້ອງ​​ເຮັດ​ໜ້າທີ່ໂຄສະນາ​ແນວທາງນະ​ໂຍບາຍ​ກ່ຽວ​ກັບ​ການ​ພັດທະນາ​ກາ​ນສຶກສາ​ຂອງ​ເຮົາ​ໃນ​ຖານະ​ທີ່​ເປັນ​ໃຈກາງ​ແຫ່ງ​ການ​ພັດທະນາ​ຊັບພະຍາກອນ​ມະນຸດ, ສ້າງ​ກຳລັງ​ແຮງ​ງານ​ທີ່​ມີຄຸນະພາບ​ໃຫ້​ແກ່​ປະ​ເທດ​ຊາດ​ບ້ານ​ເມືອງ ​ແລະ ​ໃນ​ຕໍ່​ໜ້າ ກໍ່​ຄື ​ໄລຍະ​ແຕ່​ນີ້​ຮອດ​ປີ 2030 ​ໃຫ້​ຢຶດໝັ້ນ​ຢູ່​ໃນ​ວິ​ໄສ​ທັດ​ແຫ່ງ​ການ​ພັດທະນາ​ຊັບພະຍາກອນ​ມະນຸດ ກໍ່​ຄື ວິ​ໄສ​ທັດ​ແຫ່ງ​ການ​ພັດທະນາ​ວຽກ​ງານ​ສຶກສາ ​ແລະ ກິລາ​ ​ໂດຍ​ສ້າງ​ໃຫ້​ຄົນ​ລາວ​ກາຍ​ເປັນ​ພົນລະ​ເມືອງ​ດີ ຮັກ​ຊາດ ມີ​ນໍ້າ​ໃຈຢຶດໝັ້ນ​ໃນ​ອຸດົມ​ການ​, ຮູ້​ເຄົາລົບ​ກົດໝາຍ, ມີ​ຄວາມ​ຮູ້​ທາງ​ດ້ານ​ວິທະຍາສາດ, ມີ​ຄວາມ​ສາມາດ​ໃນ​ການ​ປະຕິບັດ​ໜ້າ​ທີ່​ວິຊາ​ສະ​ເພາະ​ແບບ​ມື​ອາຊີບ, ມີ​ສຸຂະ​ພາບເຂັ້ມ​ແຂງ ສີວິ​ໄລ​ທາງ​ດ້ານ​ຈິດ​ໃຈ, ສາມາດ​ປະກອບ​ສ່ວນ​​ເຂົ້າ​ໃນ​ການ​ພັດທະນາ​ເສດຖະກິດ​-ສັງຄົມ​ຂອງ​ປະ​ເທດ​ຊາດ ຕະຫຼອດ​ເຖິງ​ການ​ແຂ່ງຂັນ​ເຊື່ອມ​ໂຍງ​ກັບ​ພາກ​ພື້ນ ​ແລະ ສາກົນ.

       ນອກຈາກນັ້ນ, ທ່ານ​ຍັງ​ຮຽກຮ້ອງ​ມາ​ຍັງ​ພາກສ່ວນ​ທີ່​ກ່ຽວຂ້ອງ​ທີ່​ຮັບຜິດຊອບ​ວຽກ​ງານ​ສື່​ສິ່ງ​ພິມ​ຈົ່ງ​ພ້ອມ​ກັນ​ສືບ​ຕໍ່​​ໂຄສະນາ​ວຽກ​ງານ​ພາຍ​ໃນ​ຂະ​ແໜງ​ການ​ສຶກສາ ​ແລະ ກິລາ​ໃຫ້​ດີ​ຂຶ້ນ ​ແລະ ​ເກີດ​ຜົນ​ປະ​ໂຫຍ​ດຢ່າງ​ສູງ​ສຸດ ພ້ອມ​ທັງ​ປັບປຸງ​ແກ້​ໄຂ​ບັນຫາ​ທີ່​ຍັງ​ບໍ່​ທັນ​ສອດ​ຄອງ, ຮັບປະກັນຄວາມຖືກຕ້ອງ ແລະ ​ແທດ​​ເໝາະກັບສະພາບ​ຄວາມ​ເປັນ​ຈິງ.

(ບົວລະພາ)

Written by Super User

ສກມ ຈັນທະບູລີ ເປີດບັ້ນສອບເສັງຫັດຂຽນງາມຂອງນ້ອງນັກຮຽນຊັ້ນປະຖົມ

 29995803 1367857456649736 73411190 o   ຫ້ອງການສຶກສາທິການ ແລະ ກິລາເມືອງ (ສກມ) ຈັນທະບູນລີ ນະຄອນຫຼວງວຽງຈັນ ໄດ້ຈັດພິທີ​ເປີດ​ບັ້ນສອບ​ເສັງຫັດຂຽນງາມຂອງນັກຮຽນຊັ້ນປະຖົມທົ່ວເມືອງ ​ປະຈຳສົກຮຽນ 2017-2018 ໃນວັນ​ທີ 27 ມີນາ ຜ່ານມາ ​ທີ່​ໂຮງຮຽນປະຖົມສົມບູນ ນາໄຮ່ດຽວ, ​ໂດຍ​ພາຍ​ໃຕ້ການ​ເປັນ​ປະທານຂອງ​ທ່ານ ທອງດີ ແກ້ວມີໄຊ ຫົວໜ້າຫ້ອງການສຶກສາທິການ ແລະ ກິລາເມືອງ, ທ່ານ ອິນຖາ ສຸພັນເດດ ຮອງຫົວໜ້າຫ້ອງການສຶກສາທິການ ແລະ ກິລາເມືອງ, ມີຄະນະ​ຮັບຜິດຊອບ​ການ​ສອບ​ເສັງ, ຄູ​ຍາມ​ຫ້ອງ​ສອບ​ເສັງຕະຫຼອດຮອດນ້ອງ​ນັກຮຽນຊັ້ນປະຖົມ​ທົ່ວເມືອງເຂົ້າຮ່ວມສອບເສັງ ​ທັງໝົດ 172 ຄົນ​.

​      ໂອກາດ​ດັ່ງກ່າວ, ທ່ານ ຄຳແສນ ພວງເພັດ ຫົວໜ້າໝ່ວຍງານສຶກສາກ່ອນໄວຮຽນ ແລະ ສຶກສາຂັ້ນພື້ນຖານ ຫ້ອງການສຶກສາທິການ ແລະ ກິລາເມືອງ ໄດ້​ກ່າວ​ວ່າ: ການຈັດ​ສອບ​ເສັງ​ຫັດຂຽນງາມຄັ້ງນີ້, ກໍ່​ເພື່ອ​ກະຕຸກ​ຊຸ​ກຍູ້ຂະ​ບວນການ​ຮຽນ-ການ​ສອນດ້ານພາສາລາວໃຫ້ຖືກຕ້ອງຕາມຫຼັກໄວຍາກອນ ແລະ ຍົກລະດັບຄຸນະພາບການສຶກສາດ້ານການຂຽນພາສາລາວໃນຊັ້ນປະຖົມທົ່ວເມືອງໃຫ້ນັບມື້ນັບດີຂຶ້ນເປັນລຳດັບ, ອີກຢ່າງກໍ່ເພື່ອໃຫ້ຜູ້ຮຽນມີພອນສະຫວັນທາງດ້ານການຂຽນງາມ, ມີຄວາມຫ້າວຫັນຕໍ່ວຽກງານ ການເຝິກຂຽນ, ໃນການຈັດກິດຈະກຳການຮຽນ-ການສອນຊັ້ນປະຖົມສຶກສາໃຫ້ດີຂຶ້ນໄປເລື້ອຍໆ. ນອກຈາກນັ້ນ, ກໍ່ເພື່ອເລັ່ງໃສ່ນັກຮຽນຊັ້ນປະຖົມສຶກສາ ແຕ່ ປ1-ປ5 ທັງພາກລັດ ແລະ ເອກະຊົນທົ່ວເມືອງຈັນທະບູລີ ເພື່ອພ້ອມກັນວັດ ແລະ ປະເມີນດ້ານກິດຈະກຳການຂຽນພາສາລາວຂອງຄູ ແລະ ນັກຮຽນໃນແຕ່ລະໂຮງຮຽນອີກດ້ວຍ.

ສຳລັບການ​ສອບ​ເສັງ​ຫັດຂຽນງາມຂອງນ້ອງນັກຮຽນຊັ້ນປະຖົມທົ່ວເມືອງໃນຄັ້ງນີ້, ແມ່ນເປັນຄັ້ງທີ 5 ໂດຍມີ​ນັກ​ສອບ​ເສັງ​ຫັດຂຽນງາມທົ່ວເມືອງທັງໝົດ 172 ນ້ອງ, ເປັນຍິງ 144 ນ້ອງ, ຈັດ​ເປັນ 5 ຫ້ອງ​ສອບ​ເສັງ​. ໃນນີ້, ຂັ້ນ ປ1 ມີ​ນັກ​ສອບເສັງ​ 36 ນ້ອງ, ຍິງ 25 ນ້ອງ, ຂັ້ນ ປ2 ມີ​ນັກ​​ສອບເສັງ​ 36ນ້ອງ, ຍິງ 31 ນ້ອງ, ຂັ້ນ ປ3 ມີ​ນັກ​​ສອບເສັງ​ 34 ນ້ອງ, ຍິງ 31 ນ້ອງ, ຂັ້ນ ປ4 ມີ​ນັກ​ສອບເສັງ​ 34 ນ້ອງ, ຍິງ 26 ນ້ອງ, ຂັ້ນ ປ5 ມີ​ນັກ​ສອບເສັງ​ 32 ນ້ອງ, ຍິງ 31 ນ້ອງ, ແຕ່ລະຂັ້ນ ອັນດັບທີ 1 ຫາອັນດັບທີ 3 ຈະໄດ້ຮັບເງິນລາງວັນພ້ອມຂັ້ນ.

​      ທ່ານ ທອງດີ ແກ້ວມີໄຊ ​ໄດ້ກ່າວ​ສະ​ແດງ​ຍ້ອງຍໍ​ຊົມ​ເຊີຍ​ຕໍ່ຄະນະ​ຮັບຜິດຊອບ​ການ​ສອບ​ເສັງຫັດຂຽນງາມຂອງນ້ອງນັກຮຽນປະຖົມ ພ້ອມທັງລະດົມໃຫ້ນ້ອງນັກຮຽນມີຄວາມຫ້າວຫັນ, ຕັ້ງໃຈໃນການສຶກສາຮໍ່າຮຽນ, ເຝິກຂຽນ​ແຕ່​ຊັ້ນ ປ ກຽມໃຫ້ຖຶກຕ້ອງຕາມຫຼັກໄວຍາກອນລາວ, ໄມ້ເອກ, ໄມ້ໂທ, ອັກຄະລະ, ພະຍັນຊະນະເປັນຕົ້ນ, ຕ້ອງມີການວັດ ແລະ ປະເມີນຜົນຂອງການຂີດຂຽນຕັ້ງແຕ່ຂັ້ນເລີ່ມຕົ້ນໄປ ວ່າເຂົາເຈົ້າໄດ້ໝ້ອຍຫຼາຍສຳໃດ. ພ້ອມກັນນັ້ນ, ເຮັດແນວໃດຈະສາມາດຄັດເລືອກນ້ອງນັກຮຽນເກັ່ງທາງດ້ານພາສາລາວແຕ່ຊັ້ນປະຖົມເປັນຕົ້ນໄປ ຕ້ອງປະຕິບັດລະບຽບຫຼັກການຢ່າງເຄັ່ງຄັດ ແລະ ຖືເອົາການສອບເສັງໃນຄັ້ງນີ້ ເປັນແບບຢ່າງໃຫ້ແກ່ໝູ່ຄູ່ຢູ່ໃນແຕ່ລະໂຮງຮຽນນຳໄປຈັດຕັ້ງປະຕິບັດໃຫ້ເກີດອອກດອກຜົນໄດ້.

                                                   ໂດຍ: ສີວອນ (ສຶກສາ-​ກິລາ ນວ)