ສຶກສາ

ສຶກສາ

Written by Super User

ສກມ ສີ​ໂຄດ​ຕະບອງ ​ແຂ່ງຂັນ​ສິລະ​ປະ-ວັນນະຄະ​ດີ ນັກຮຽນຊັ້ນ​ອະນຸບານ-ປະຖົມ​ສຶກສາ ທົ່ວເມືອງ

28311959 1328662990569183 1839649585 o   ​ຫ້ອງການສຶກສາທິການ ແລະ ກິລາເມືອງສີ​ໂຄດ​ຕະບອງ ນະຄອນຫຼວງວຽງຈັນ ​​ໄດ້​ຈັດ​ງານ​ແຂ່ງຂັນ​ສິລະ​ປະ-ວັນນະຄະ​ດີ ນັກຮຽນຊັ້ນ​ອະນຸບານ ​ແລະ ຊັ້ນ​ປະຖົມ​ສຶກສາ ທົ່ວ​ເມືອງ ປະຈຳສົກຮຽນ 2017-2018 ​ເມື່ອ​ທ້າຍ​ອາທິດ​ຜ່ານ​ມາ ທີ່​ໂຮງຮຽນ​ເອກະ​ຊົນ​ຊະນະ​ພົນ, ໂດຍມີ  ​ທ່ານ ສິນ​ໄຊ ສຸ​ທໍາ​ມະ​ວົງ ຮອງ​ຫົວໜ້າ​ຫ້ອງການ​ສຶກສາ​ທິການ ​ແລະ ກິລາ​ເມືອງ​ສີ​ໂຄດ​ຕະບອງ, ທ່ານ ​ເດດ​ຊະ​ພົນ ພິລະ​ໄຊ​ພິທັກ ຜູ້​ອໍານວຍ​ການໂຮງຮຽນ​ເອກະ​ຊົນ​ຊະນະ​ພົນ, ພ້ອມ​ດ້ວຍ​ຄະນະ​ອໍານວຍ​ການ​, ບັນດາຄູ-ອາຈານ, ພໍ່-ແມ່ຜູ້ປົກຄອງ ແລະ ນ້ອງນັກຮຽນໂຮ​ງຮຽນ​ຊັ້ນ​ອະນຸບານ ​ແລະ ຊັ້ນ​ປະຖົມ​ສຶກສາ ທົ່ວ​ເມືອງ​​ເຂົ້າ​ຮ່ວມ.

      ໂອກາດດັ່ງກ່າວ, ທ່ານ ສິນ​ໄຊ ສຸ​ທໍາ​ມະ​ວົງ ກ່າວໃຫ້ຮູ້ວ່າ: ການຈັດ​ງານ​ແຂ່ງຂັນ​ສິລະ​ປະ-ວັນນະຄະ​ດີ ນັກຮຽນຊັ້ນ​ອະນຸບານ ​ແລະ ຊັ້ນ​ປະຖົມ​ສຶກສາ ທົ່ວ​ເມືອງຄັ້ງນີ້, ກໍ່ເພື່ອເພື່ອເຮັດໃຫ້ຊາວໜຸ່ມ-ເຍົາວະຊົນ ມັກຮັກສິລະປະວັດທະນະທໍາຮີດຄອງປະເພນີອັນດີງາມຂອງຊາດລາວເຮົາ ແລະ ໃຊ້ເວລາວ່າງໃຫ້ເປັນປະໂຫຍດ ເພື່ອຫ່າງໄກຈາກຢາເສບຕິດ ພ້ອມທັງເປັນການຜັນຂະຫຍາຍແຜນຍຸດທະສາດ ແລະ ແຜນການແຂ່ງຂັນສິລະປະ-ວັນນະຄະດີ ໃຫ້ສອດຄ່ອງຕາມ 3 ລັກສະນະ ແລະ 5 ຫຼັກມູນການສຶກສາແຫ່ງຊາດ ທີ່ກະຊວງສຶກສາທິການ ແລະ ກິລາ ວາງອອກ ໃຫ້ປາກົດຜົນເປັນຈິງ.

      ການແຂ່ງຂັນສິລະປະ-ວັນນະຄະດີໃນຄັ້ງນີ້ ມີນັກຮຽນຊັ້ນ​ອະນຸບານ ​ແລະ ຊັ້ນ​ປະຖົມ​ສຶກສາ​ເຂົ້າ​ຮ່ວມແຂ່ງຂັນທັງໝົດ 22 ​ໂຮງຮຽນ. ​ໃນ​ນັ້ນ,  ຊັ້ນ​ອະນຸບານ ປະ​ເພດ​ຟ້ອນ ປະກອບ​ມີ 10 ​ໂຮງຮຽນ ຄື: ​ໂຮງຮຽນອະນຸບານ​ວຽງ​ຈັນ​ພັດທະນາ, ປິຍະ​ດາ, ສະ​ເຫຼີ​ມສຸກ, ​ແສງ​ວິໄລ, ຊະນະ​ພົນ, ຊ້າງ​ນ້ອຍ, ລິນ​ດ້າ, ​ແສງ​ສະຫວັນ, ອາກາດ, ສີ​ນະພາ, ຮຸ່ງ​ເຮືອງ, ພິມ​ພອນ​ພັດທະນາ, ນິຕ້າ, ພອນ​ທິບ, ​ແລະ ​ໂຮງຮຽນ​ອະນຸບານ ​ເກສອນ​ໄຊ​ສົງຄາມ. ສ່ວນ​ຊັ້ນ​ປະຖົມ​ສຶກສາ ປະກອບ​ມີ 12 ​ໂຮງຮຽນ ​ໃນ 2 ປະ​ເພດ ຄື: ປະ​ເພດ​ຟ້ອມມີ ​ໂຮງຮຽນ​ປະຖົມ ຊ້າງ​ນ້ອຍ, ນິຕ້າ, ພິມ​ພອນ​ພັດທະນາ, ​ເກສອນ​ໄຊ​ສົງຄາມ, ດາລາພອນ ​ແລະ ​ໂຮ​ງຮຽນ​ປະຖົມວຽງ​ຄໍາ. ສໍາລັບ​ປະ​ເພດ​ຮ້ອງ​ເພງ ປະກອບ​ມີ ​ໂຮງ​ຮຽນປະຖົມ​ໜອງ​ບົວທອງ​ໃຕ້, ສະ​ເຫຼີ​ມສຸກ, ນາ​ເລົ່າ, ຮຸ່ງ​ເຮືອງ, ຊະນະ​ພົນ ​ແລະ ​ໂຮງຮຽນ​ປະຖົມສີ​ນະພາ.

      ສໍາລັບຜົນການແຂ່ງຂັນຊັ້ນ​ອະນຸບານ ປະ​ເພດ​ຟ້ອນ ປາກົດວ່າ ອັນ​ດັບ​ທີ 1 ​​ໄດ້​ແກ່​ໂຮງຮຽນ​ອະນຸບານ ຮຸ່ງ​ເຮືອງ, ອັນ​ດັບ​ທີ 2 ​ໂຮງຮຽນອະນຸບານ ແສງ​ວິໄລ, ອັບ​ດັບ​ທີ 3 ​ໂຮງຮຽນ ອະນຸບານ​ຊ້າງ​ນ້ອຍ ​ແລະ ອັນ​ດັບ​ທີ 4 ​​​ໂຮງຮຽນ​ ອະນຸບານ​ຊະນະ​ພົນ. ສ່ວນ​ຊັ້ນ​ປະຖົມ​ສຶກສາ ປະ​ເພດ​ຟ້ອມ ອັນ​ດັບ​ທີ 1 ​ໄດ້​ແກ່ ໂຮງຮຽນ​ປະຖົມ ພິມ​ພອນ​ພັດທະນາ, ອັນ​ດັບ​ທີ 2 ​ໂຮງຮຽນປະຖົມ ​ເກສອນ​ໄຊ​ສົງຄາມ, ອັນ​ດັບ​ທີ 3 ​ໂຮງຮຽນປະຖົມ ດາລາພອນ ​ແລະ ອັນ​ດັບ​ທີ 4 ​ໂຮ​ງຮຽນ​ປະຖົມ​ນິຕ້າ. ສໍາລັບ​ປະ​ເພດ​ຮ້ອງ​ເພງ ອັນ​ດັບ​ທີ 1 ​​ໄດ້​ແກ່ ​ໂຮງ​ຮຽນ ສີ​ນະພາ, ອັນ​ດັບ​ທີ 2 ​ໂຮງຮຽນ​ປະຖົມ ຮຸ່ງ​ເຮືອງ, ອັນ​ດັບ​ທີ 3 ​ໂຮງຮຽນ​ປະຖົມ ຊະນະ​ພົນ ​ແລະ ​ອັນ​ດັບ​ທີ 4 ໂຮງຮຽນ​ປະຖົມສະ​ເຫຼີ​ມສຸກ.

​ໂດຍ​: ນາງ​ ຕຸ່ນ​ຄໍາ

Written by Super User

ສສກ-ມູນນິທິສັນຕິພາບສາກົນ ຮ່ວມຫາລື ກຽມຕ້ອນຮັບເຈົ້າຊາຍແຫ່ງລິກເຕັນສະໄຕ ທີ່ຈະມາຢ້ຽມຢາມ ສປປ ລາວ

28080303 1324288421006640 1851588278 o   ກະຊວງສຶກສາທິການ ແລະ ກິລາ (ສສກ) ແລະ ມູນນິທິສັນຕິພາບສາກົນ (International Peace Foundation) ຮ່ວມປຶກສາຫາລື ເພື່ອກະກຽມພິທີການຕ້ອນຮັບເຈົ້າຊາຍ ອັລເຟຣດ ແຫ່ງປະເທດລິກເຕັນສະໄຕ, ທັງເປັນປະທານສະພາທີ່ປຶກສາມູນນິທິດັ່ງກ່າວ ທີ່ມີແຜນຈະເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ຢ່າງເປັນທາງການ ໃນລະຫວ່າງວັນທີ 5-13 ພຶດສະພາ 2018 ນີ້.

ເມື່ອວັນທີ 12 ກຸມພາ ຜ່ານມາ ທີ່ຫ້ອງປະຊຸມສໍານັກງານ ກະຊວງສຶກສາທິການ ແລະ ກິລາ, ທ່ານ ຮສ.ປອ ຄຳຜາຍ ສີສະຫວັນ ຮອງລັດຖະມົນຕີ ກະຊວງສຶກສາທິການ ແລະ ກິລາ ໄດ້ໃຫ້ກຽດຕ້ອນຮັບການຢ້ຽມຄໍານັບຂອງ ທ່ານ ຢູວີ ໂມຣາເວດ ປະທານມູນນິທິ ມູນນິທິສັນຕິພາບສາກົນ, ມີບັນດາຫົວໜ້າ-ຮອງຫົວໜ້າກົມທີ່ກ່ຽວຂ້ອງ ແລະ ພາກສ່ວນທີ່ກ່ຽວຂ້ອງທັງ 2 ຝ່າຍເຂົ້າຮ່ວມ.

      ​ໂອກາດ​ດັ່ງກ່າວ, ທ່ານ ຢູວີ ໂມຣາເວດ ກ່າວວ່າ: ​ການເຂົ້າຢ້ຽມຄໍານັບຄັ້ງນີ້, ກໍ່ເພື່ອເປັນການປຶກສາຫາລືຮ່ວມກັບກະຊວງ ສສກ ໃນການກະກຽມພິທີການຕ້ອນຮັບເຈົ້າຊາຍ ອັລເຟຣດ ແຫ່ງປະເທດລິກເຕັນສະໄຕ ທັງເປັນປະທານສະພາທີ່ປຶກສາມູນນິທິດັ່ງກ່າວ ທີ່ມີແຜນຈະເດີນທາງມາຢ້ຽມຢາມ ແລະ ເຮັດວຽກຢູ່ ສປປ ລາວ ຢ່າງເປັນທາງການ ໃນລະຫວ່າງວັນທີ 5-13 ພຶດສະພາ 2018 ​ແລະ ລາຍງານຂໍທິດຊີ້ນຳກ່ຽວກັບແຜນການຈັດກິດຕ້ອນຮັບການເດີນທາງມາຢ້ຽມຢາມ ສປປ ລາວ ຂອງເຈົ້າຊາຍ ອັລເຟຣດ ແຫ່ງປະເທດລິກເຕັນສະໄຕ ຈຳນວນທັງໝົດ 4 ຄັ້ງ ໃນລະຫວ່າງເດືອນພະ​ຈິກ 2018 ເຖິງເດືອນ ມີນາ 2019 ທີ່ມະຫາວິທະຍາໄລແຫ່ງຊາດ ແລະ ມະຫາວິທະຍາໄລສຸພານຸວົງ. ນອກ​ຈາກນັ້ນ, ຍັງ​ໄດ້​ລາຍ​ງານການຄົ້ນຄວ້າ ແລະ ປຶກສາຫາລືຮ່ວມກັບກົມອົງການຈັດຕັ້ງສາກົນ, ກະຊວງການຕ່າງປະເທດ ໃນກອງປະຊຸມ ຄັ້ງວັນທີ 19 ມັງກອນ 2018.

      ສໍາລັບມູນນິທິດັ່ງກ່າວ ເປັນອົງການຈັດຕັ້ງສາກົນຂອງປະເທດອອສເຕຣຍ ທີ່ມີການຮ່ວມມືກັບອົງການຢູເນັສໂກ ແລະ ໄດ້ຮັບການອຸປະຖຳໂດຍເຈົ້າຂອງລາງວັນໂນເບລສາຂາສັນຕິພາບ ຈຳນວນ 20 ທ່ານ ແລະ ໃນໄລຍະຜ່ານມາ, ທາງມູນນິທິໄດ້ເຂົ້າຢ້ຽມຄໍານັບ ທ່ານ ລີຕູ້ ບົວປາວ ຮອງລັດຖະມົນຕີ ກະຊວງສຶກສາທິການ ແລະ ກິລາ ໃນເວລານັ້ນ (ປັດຈຸບັນທ່ານເຂົ້າຮັບເບ້ຍບຳນານແລ້ວ) ໃນວັນທີ 14 ກັນຍາ 2016, ທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີ ກະຊວງສຶກສາທິການ ແລະ ກິລາ ໃນວັນທີ 3 ພຶດສະພາ 2017 ແລະ ທ່ານ ຮສ. ປອ ກອງສີ ແສງມະນີ ຮອງລັດຖະມົນຕີ ກະຊວງສຶກສາທິການ ແລະ ກິລາ ໃນວັນທີ 7 ສິງຫາ 2017 ເພື່ອລາຍງານ   ວຽການການຮ່ວມມື ແລະ ລາຍງານວຽກງານດັ່ງກ່າວ ທີ່ໄດ້ຈັດຕັ້ງປະຕິບັດຮ່ວມມືກັນໃນຂະແໜງການສຶກສາ ແລະ ກິລາ.

​ໂດຍ: ນາງ ຕຸ່ນ​ຄໍາ

Written by Super User

ສສກ ຈັດກອງປະຊຸມ ກ່ຽວກັບຂອບວຸດທິ ແລະ ການປະກັນຄຸນະພາບການສຶກສາ ໃນພາກພື້ນ

28124996 1324288314339984 1067131766 o   ສູນປະກັນຄຸນະພາບການສຶກສາ ກະຊວງສຶກສາທິການ ແລະ ກິລາ ໄດ້ກອງປະຊຸມກ່ຽວກັບຂອບວຸດທິ ແລະ ການປະກັນຄຸນນະພາບການສຶກສາ ໃນພາກພື້ນ ໃນລະຫວ່າງວັນທີ 14-15 ກຸມພາ ຜ່ານມາ ທີ່ໂຮງແຮມ ດອນຈັນພາເລດ ນະຄອນຫຼວງວຽງຈັນ, ໃຫ້ກຽດເຂົ້າຮ່ວມຂອງ ທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີ ກະຊວງ​ສຶກສາ​ທິການ ​ແລະ ກິລາ, ທ່ານ Christian Rabj ຜູ້ຮັບຜິດຊອບວຽກງານຂອບວຸດທິ ແລະ ປະກັນຄຸນະພາບ ພາຍໃຕ້ໂຄງການແຊ, ທັງ​ເປັນຮອງຜູ້ອຳນວຍການໂຄງການຮ່ວມມືດ້ານວິຊາການລະຫວ່າງ ເຢຍລະມັນ ແລະ ອາຊຽນ ແລະ ທ່ານ ປັນຍາ ຈັນທະວົງ ວ່າການຜູ້ອໍານວຍການສູນປະກັນຄຸນະພາບ ກະຊວງ​ ສສກ, ພ້ອມ​ດ້ວຍປະທານຄະນະກຳມະການຂອບວຸດທິອາຊຽນ, ຜູ້ຊ່ຽວຊານການປະກັນຄຸນະພາບ, ປະທານຄະນະຮັບຜິດຊອບວຽກງານການປະກັນຄຸນະພາບພາຍໃຕ້ໂຄງການແຊ, ຜູ້ຕາງໜ້າຈາກອົງການຄຸ້ມຄອງຂອບວຸດທິການສຶກສາ, ການປະກັນຄຸນະພາບການສຶກສາ, ມະຫາວິທະຍາໄລທີ່ມາຈາກອາຊຽນ ແລະ ຢູ​ໂຣບ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

      ​ໂອກາດ​ດັ່ງກ່າວ, ທ່ານ ນາງ ແສງເດືອນ ຫຼ້າຈັນທະບູນ ​ກ່າວ​ໃຫ້​ຮູ້​ວ່າ: ກອງປະຊຸມກ່ຽວກັບການນຳໃຊ້ຂອບວຸດທິ ແລະ ການປະກັນຄຸນະພາບການສຶກສາ ເວົ້າລວມ ເວົ້າສະເພາະກໍ່ແມ່ນການເຊື່ອມໂຍງວຸດທິ (QF) ແລະ ການປະກັນຄຸນະພາບ (QA) ຂອງສປປ ລາວ ເຂົ້າກັບ ຂອບວຸດທິອາຊຽນ (AQRF) ແລະ ຂອບການປະກັນຄຸນະພາບຂອງອາຊຽນ (AQAF). ສຳລັບ ສປປ ລາວ ແລ້ວ ການພັດທະນາຊັບພະກອນມະນຸດ ຖືເປັນໝາກຫົວໃຈສຳຄັນສຳລັບການພັດທະນາປະເທດ ກໍ່ຄືການເຊື່ອມໂຍງກັບພາກພື້ນ ແລະ ສາກົນ. ໃນການພັດທະນາຊັບພະຍາກອນມະນຸດ ​ແລະ ລັດຖະບານ ຍາມໃດກໍ່ໄດ້ເນັ້ນໃຫ້ຖືເອົາຄຸນະພາບເປັນຕົ້ນຕໍ. ພ້ອມ​ດຽວ​ກັນ​ນັ້ນ, ​ໃນປັດຈຸບັນ ກະຊວງສຶກສາທິການ ແລະ ກິລາ ແມ່ນຢູ່ໃນໄລຍະປະຕິບັດແຜນພັດທະນາ 5 ປີ ຄັ້ງທີ 8 (2016-2020), ແຜນຍຸດທະສາດພັດທະນາການສຶກສາ 2016-2025 ແລະ ວິໃສທັດ 2030, ​ເຊິ່ງໃນບັນດາແຜນດັ່ງກ່າວນັ້ນ ກໍ່ໄດ້ເນັ້ນໃສ່ການພັດທະນາຄຸນະພາບຂອງສະຖາບັນການສຶກສາຊັ້ນສູງ ​ໂດ​ຍເປັນສິ່ງທີ່ທ້າທາຍຫຼາຍ ເນື່ອງຈາກວ່າ ຍັງຂາດບຸຄະລາກອນທີ່ຊຳນານງານ ແລະ ຍັງຂາດງົບປະມານ.

      ນອກຈາກ​ນັ້ນ, ເພື່ອຈັດຕັ້ງປະຕິບັດການເຊື່ອມໂຍງເສດຖະກິດອາຊຽນ AEC, ໃນຂະແໜງການສຶກສາ ຈະໄດ້ມີການແລກປ່ຽນນັກວິຊາການ ແລະ ນັກສຶກສາ ​ໂດຍໃນການເຊື່ອມໂຍງນັ້ນ ມັນຈຳເປັນຕ້ອງມີລະບົບຄຸ້ມຄອງວຸດທິການສຶກສາແຫ່ງຊາດ ແລະ ລະບົບປະກັນຄຸນະພາບການສຶກສາ ເປັນກົນໄກ ໃນການຂັບເຄື່ອນ ແລະ ຮັບຮູ້ຂອບວຸດທິການສຶກສາ ລະຫວ່າງບັບດາປະເທດໃນອາຊຽນດ້ວຍກັນ, ລາຍລະອຽດຂອງການເຊື່ອມໂຍງແມ່ນ ຈະໄດ້ອີງໃສ່ຜົນການຮຽນ ທີ່ໄດ້ກໍານົດໄວ້ ໃນຂອບວຸດທິການສຶກສາແຫ່ງຊາດ ຂອງແຕ່ລະປະເທດ.

      ສໍາລັບ​ກອງ​ປະຊຸມ​ດັ່ງກ່າວ ຖືເປັນນິມິດໝາຍອັນສຳຄັນ ສຳລັບການພັດທະນາຂອບວຸດທິການສຶກສາ ແລະ ລະບົບປະກັນຄຸນະພາບຂອງ ສປປ ລາວ. ​ໃນ​ນັ້ນ, ໄດ້ເຂົ້າໃຈຕື່ມກ່ຽວກັບຄວາມໝາຍ ຄວາມສຳຄັນຂອງຂອບວຸດທິການສຶກສາແຫ່ງຊາດ (NQF), ເຂົ້າໃຈກ່ຽວກັບກົນໄກໃນການເຊື່ອມໂຍງລະບົບວຸດທິ ແລະ ການປະກັນຄຸນະພາບ ຂອງບັນດາປະເທດໃນອາຊຽນ, ໄດ້ຮຽນຮູ້ຕື່ມກ່ຽວກັບການພັດທະນາຫຼັກສູດ ທີ່ເນັ້ນຜົນການຮຽນເປັນຕົ້ນຕໍ ແລະ ການຂຽນຜົນການຮຽນ ໂດ​ຍເຫັນໄດ້ເຖິງຄວາມໝາຍຄວາມສຳຄັນຂອງວຽກງານປະກັນພາຍໃນ (IQA) ແລະ ການປະກັນພາຍນອກ (EQA) ເຊິ່ງເປັນກົນໄກ ທີ່ສຳຄັນ ເພື່ອຕິດຕາມຊຸກຍູ້ການຮຽນ-ການສອນ ຢູ່ພາຍໃນສະຖາບັນການສຶກສາແຕ່ລະແຫ່ງ.

​ໂດຍ: ນາງ​ ຕຸ່ນ​ຄໍາ