“ເທບພະລັກ” ນັກກິລາເຈັດສະກີລາວ ຄວ້າທີ 3 ລາຍການ ຊີງແຊ໋ມໂລກ ທີ່ປະເທດໄທ

ກິລາ

Written by ອ້ວນດຳ

“ເທບພະລັກ” ນັກກິລາເຈັດສະກີລາວ ຄວ້າທີ 3 ລາຍການ  ຊີງແຊ໋ມໂລກ ທີ່ປະເທດໄທ

25353124 1271138692988280 230689054 o    ທ້າວ ເທບພະລັກ ໄຂຄໍາພິທູນ ສາມາດສ້າງປະຫວັດສາດໜ້າໃໝ່ໃຫ້ວົງການກິລາເຈັດສະ
ກີລາວ ຫຼັງຄວ້າອັນດັບທີ 3 ປະເພດເຮືອ AMATEUR RUNABOUT STOCK ຮຸ່ນ
1.100 ແຮງມ້າ  ໃນການແຂ່ງຂັນ ເຮືອເຈັດສະກີຊີງແຊ໋ມໂລກ ຫຼື “Jet ski World Cup
Thailand 2017” ທີ່ຫາດຈອມທຽນ ແຂວງພັດທະຍາ ປະເທດໄທ ເປັນເຈົ້າພາບ.

      ເມື່ອຕອນບ່າຍວັນທີ 12 ທັນວາ ຜ່ານມາ ທີ່ດ່ານສາກົນ ຂົວມິດຕະພາບ ລາວ-ໄທ 1  ນະຄອນຫຼວງວຽງຈັນ-ແຂວງໜອງຄາຍ ໄດ້ມີ
ພິທີຕອນຮັບ ທ້າວ ເທບພະລັກ ໄຂຄໍາພິທູນ ຮີໂຣກິລາເຈັດສະກີລາວ ທີ່ໄດ້ສ້າງປະຫວັດສາດໜ້າໃໝ່ໃຫ້ວົງການກິລາເຈັດສະກີລາວ ໃນ
ການເຂົ້າຮ່ວມແຂ່ງຂັນຊີງແຊ໋ມໂລກ ໄດ້ເດີນທາງມາຮອດບ້ານເກີດ ນະຄອນຫຼວງວຽງຈັນ ໂດຍໃຫ້ກຽດຕ້ອນຮັບຢ່າງອົບອຸ່ນ ແລະ  ສົມ
ກຽດຂອງ ທ່ານ ຄໍາສະຫວັນ ໂຄດໄຊ ຮອງຫົວໜ້າພະແນກສຶກສາທິການ ແລະ ກິລານະຄອນຫຼວງວຽງຈັນ, ມີຄະນະບໍລິຫານງານສະຫະ
ພັນເຈັດສະກີນະຄອນຫຼວງວຽງຈັນ ຕະຫຼອດຮອດມວນຊົນຊາວນະຄອນຫຼວງວຽງຈັນ ຮ່ວມສະແດງຄວາມຍິນດີນຳຢ່າງຫຼວງຫຼາຍ.

      ໂອກາດນີ້, ທ່ານ ຄໍາສະຫວັນ ໂຄດໄຊ ກ່າວສະແດງຄວາມຍິນດີຕ້ອນຮັບ ແລະ ຂໍຍ້ອງຍໍຊົມເຊີຍຕໍ່ກັບສະຫະພັນເຈັດສະກີນະຄອນ
ຫຼວງວຽງຈັນ ໂດຍສະເພາະຕົວນັກກິລາເອງທີ່ທຸ້ມເທທັງເຫື່ອແຮງ ແລະ ເຝິກຊ້ອມຢ່າງໜັກ ຈົນສາມາດສ້າງກຽດ ແລະ ຊື່ສຽງມາມາສູ່ປະ
ເທດຊາດ ກໍ່ຄື ນະຄອນຫຼວງວຽງຈັນ ໂດຍສາມາດຍາດໄດ້ອັນດັບmu 3  ໃນລາຍການແຂ່ງຂັນລະດັບໂລກ  ເຊິ່ງເປັນຜົນງານຄັ້ງປະຫວັດ
ສາດຂອງວົງການກິລາເຈັດສະກີລາວເຮົາ. ຢ່າງໃດກໍ່ຕາມ,ຂໍໃຫ້ສືບຕໍ່ເຝິກຝົນຫຼໍ່ຫຼອມຕົວເອງໃຫ້ດີກວ່າເກົ່າເພື່ອສືບຕໍ່ສ້າງຜົນງານໃຫ້ອອກ
ມາດີກວ່າເກົ່າໃນອະນາຄົດ.

        ຂະນະດຽວກັນ, ເທບພະລັກ ໄຂຄໍາພິທູນ ໃຫ້ສໍາພາດວ່າ: ລາຍການດັ່ງກ່າວ ມີນັກກິລາຈາກ 33 ປະເທດ ໃນທົ່ວໂລກ ເຂົ້າຮ່ວມ
ແລະ ມີການຊີງໄຊ 20  ກວ່າລາຍການ  ສະເພາະນ້ອງກໍ່ໄດ້ລົງແຂ່ງຂັນປະເພດເຮືອ  AMATEUR  RUNABOUT  STOCK ຮຸ່ນ
1.100 ແຮງມ້າ ສາມາດຍາດໄດ້ອັນດັບ 3 ຜົນງານຄັ້ງນີ້ນ້ອງມີຄວາມພາກພູມໃຈເປັນຢ່າງສູງ ທີ່ໄດ້ສ້າງກຽດ ແລະ ຊື່ສຽງໃຫ້ປະເທດຊາດ
ຕະຫຼອດການເຝິກຊ້ອມ 1 ເດືອນທີ່ຜ່ານມາ ສາມາດພັດທະນາຂຶ້ນຢ່າງຫຼາຍ. ຢ່າງໃດກໍ່ຕາມ,  ຕ້ອງຂໍຂອບໃຈມາຍັງຜູ້ໃຫ້ການສະໜັບສະ
ໜູນ ທີ່ຊຸກຍູ້ໃຫ້ນ້ອງປະສົບຜົນສໍາເລັດ ໂດຍສະເພາະ ມັງກອນທອງ ຟາມ, ທີມວຽງຈັນ  ເຈັດສະກີ, ສະຫະພັນເຈັດສະກີນະຄອນຫຼວງ
ວຽງຈັນ ແລະ ສະໂມສອນລອຍນໍ້າເຈັດສະກີ ເຊິ່ງນ້ອງຂໍສັນຍາວ່າ ຈະສືບຕໍ່ພັດທະນາຕົນເອງໃຫ້ດີກວ່າເກົ່າແລະເຮັດໜ້າທີ່ນີ້ໃຫ້ດີທີ່ສຸດ
ເພື່ອເຮັດໃຫ້ຕົນເອງສາມາດກ້າວໄປສູ່ຈຸດສູງສຸດ ກໍ່ຄື ແຊ໋ມໂລກ ມາໃຫ້ໄດ້.

      ສໍາລັບການແຂ່ງຂັນລາຍການ Jet ski World Cup Thailand 2017, ສປປ ລາວ ສົ່ງນັກກິລາ ເຂົ້າຮ່ວມ 3 ຄົນປະກອບດ້ວຍ:
ທ້າວ ເທບພະລັກ ໄຂຄໍາພິທູນ ອາຍຸ 18 ປີລົງແຂ່ງຂັນ ຮຸ່ນ 1.100 ແຮງມ້າ, ສ່ວນ ທ້າວ ສົມໃຈ ໄຂຄໍາພິທູນ ອາຍຸ 30 ປີ ກັບ ທ້າວ ບິນລີ
ກັນສີລາ ອາຍຸ 24 ປີ ລົງແຂ່ງຂັນຮຸ່ນ 1.800 ແຮງມ້າ. ໂດຍຜົນງານແມ່ນ ເທບພະລັກ ສາມາດຍາດໄດ້ອັນດັບ 3ໃນລາຍການ ຮຸ່ນ 1.100
ແຮງມ້າ, ສ່ວນຊະນະເລີດ ແລະ ຮອງຊະນະເລີດ ເປັນນັກກີລາຈາກເຈົ້າພາບໄທ.

      ໃນການຕ້ອນຮັບຄັ້ງນີ້ ໄດ້ມີການແຫ່ຂະບວນລົດຢ່າງເປັນຂະບວນນຳພານ້ອງ ເທບພະລັກ ໄຂຄໍາພິທູນອອກຈາກດ່ານສາກົນຂົວມິດ
ຕະພາບ ລາວ-ໄທ 1 ມາຕາມເສັ້ນທາງທ່າເດື່ອ ໄປສູ່ເສັ້ນທາງແຄມຂອງ ແລະ ປິດທ້າຍທີ່ສວນປະຕູໄຊໂດຍມີຂະບວນລົດແຫ່ງປະມານ 10
ກວ່າຄົນ ສ້າງຄວາມປື້ມປິຕິຍິນດີໃຫ້ພໍ່-ແມ່ປະຊາຊົນຊາວນະຄອນຫຼວງວຽງຈັນ ຢ່າງຟົດຟື້ນ.