• moes
  • Border-schools
  • borther

ສສກ ປະກາດພະນັກງານການນຳຂັ້ນກົມ ແລະ ຫ້ອງການ 7 ທ່ານ ພັກການ-ຮັບອຸດໜູນບຳນານ

ສສກ ປະກາດພະນັກງານການນຳຂັ້ນກົມ ແລະ ຫ້ອງການ 7 ທ່ານ ພັກການ-ຮັບອຸດໜູນບຳນານ 

118661416 656644591653506 4759909531824233255 n

    ກະຊວງສຶກສາທິການ ແລະ ກິລາ (ສສກ) ໄດ້ຈັດພິທີປະກາດພະນັກງານການນຳຂັ້ນກົມ ແລະ ຫ້ອງການ ອອກພັກການ  -   ຮັບ ອຸດໜູນ       ບຳນານ  ຈຳນວນ 7 ທ່ານ ພ້ອມທັງຍ້ອງຍໍສັນລະເສີນຜົນງານ ຄຸນງາມຄວາມດີທີ່ໄດ້ປະກອບ ສ່ວນເຫື່ື່ອແຮງ   ເຂົ້າໃນການພັດທະນາວຽກງານ      ການສຶກສາ ຕະຫຼອດໄລຍະຜ່ານມາ ຢ່າງສົມກຽດ.

   

      ພິທີດັ່ງກ່າວ, ໄດ້ຈັດຂຶ້ນເມື່ອວັນທີ 21 ສິງຫາ ຜ່ານມາ ທີ່ຫ້ອງປະຊຸມ ກະຊວງສຶກສາທິການ ແລະ ກິລາ, ໂດຍພາຍໃຕ້ການ ເປັນປະທານຂອງທ່ານ ນາງ ຂັນທະລີ ສີຣິພົງພັນ ຮອງລັດຖະມົນຕີ ກະຊວງສຶກສາທິການ ແລະ ກິລາ, ມີທ່ານ ຮສ.ປອ ພຸດ ສິມມາລາວົງ ຮອງລັດຖະມົນຕີ ສສກ ແລະ ທ່ານ ສົມພູ ພົງສາ ຜູ້ຊ່ວຍລັດຖະມົນຕີ, ຮອງປະທານ ແລະ ເລຂາທິການ ຄະນະກຳມະການໂອແລມປິກແຫ່ງຊາດ ພ້ອມດ້ວຍບັນດາຫົວໜ້າ-ຮອງຫົວໜ້າກົມຈັດຕັ້ງ ແລະ ພະນັກງານ, ຫົວໜ້າ-ຮອງຫົວໜ້າກົມ, ສູນ ຕະຫຼອດຮອດພະນັກງານທີ່ກ່ຽວຂ້ອງພາຍໃນເຂົ້າຮ່ວມ.

      ໂອກາດນີ້, ທ່ານ ນາງ ວຽງແກ້ວ ພົມມະວົງ ຫົວໜ້າກົມຈັດຕັ້ງ ແລະ ພະນັກງານ ກະຊວງ ສສກ ໄດ້ຜ່ານຂໍ້ຕົກລົງ ວ່າດ້ວຍການອອກພັກການ-ຮັບອຸດໜູນບຳນານ ຈຳນວນ 7 ທ່ານ ພ້ອມທັງຜ່ານດຳລັດຂອງນາຍົກລັດຖະມົນຕີ ວ່າດ້ວຍການຍ້ອງຍໍຜູ້ທີ່ມີຜົນງານດີເດັ່ນປະກອບສ່ວນສ້າງສາພັດທະນາປະເທດຊາດ ກໍຄື ໃນຂະແໜງການສຶກສາ ຈຳນວນ 5 ທ່ານ ແລະ ຍ້ອງຍໍຂອງທ່ານລັດຖະມົນຕີ ກະຊວງ ສສກ ຈຳນວນ 2 ທ່ານ ທີ່ມີຜົນງານປະກອບສ່ວນດ້ານເຫື່ອແຮງ ແລະ ສະຕິປັນຍາ ໃນການປະຕິບັດໜ້າທີ່ວຽກງານການສຶກສາຕະຫຼອດໄລຍະຜ່ານມາ, ຊຶ່ງເປັນການປະກອບສ່ວນອັນສຳຄັນໃນການພັດທະນາປະເທດຊາດ.

       ພ້ອມດຽວກັນນັ້ນ, ທ່ານ ນາງ ຂັນທະລີ ສີຣິພົງພັນ ໄດ້ກ່າວໃຫ້ຮູ້ວ່າ: ພິທີປະກາດພະນັກງານການນຳຂັ້ນສູງອອກພັກການ-ຮັບອຸດໜູນບຳນານ ຈຳນວນ 7 ທ່ານ ຖືວ່າເປັນພິທີທີ່ກະທັດຮັດ ແລະ ມີຄວາມໝາຍອັນໜັກແໜ້ນຫຼາຍ, ຊຶ່ງທັງ 7 ທ່ານລ້ວນແຕ່ເປັນພະນັກງານອາວຸໂສ ແລະ ມີປະສົບການລະອິດລະອ້ຽວຫຼາຍ ລວມອາຍຸການທີ່ເຂົ້າສັງກັດລັດນີ້ ຖືວ່າຢູ່ໃນໄລຍະຂອງການອຸທິດເຫື່ອແຮງໃຫ້ແກ່ວຽກງານການສຶກສາ, ການສ້າງຊັບພະຍາກອນມະນຸດ ແລະ ວຽກງານອື່ນໆຂອງປະເທດຊາດຢູ່ໃນທ້ອງຖິ່ນ ແລະ ສູນກາງຢ່າງສົມກຽດ. ເຖິງຢ່າງໃດກໍຕາມ, ຕາງໜ້າຄະນະນຳກະຊວງສຶກສາທິການ ແລະ ກິລາ ຂໍສະແດງຄວາມຍ້ອງຍໍຊົມເຊີຍ ແລະ ຂອບໃຈຕໍ່ຜົນງານຄວາມດີຂອງທັງ 7 ທ່ານ ທີ່ໄດ້ອຸທິດ ແລະ ປະກອບສ່ວນເຂົ້າໃນວຽກງານການສຶກສາ ແລະ ກິລາຂອງລາວໃຫ້ດີຂຶ້ນ ແລະ ຮຽກຮ້ອງບັນດາທ່ານຈົ່ງສືບຕໍ່ສຶກສາອົບຮົມລູກຫຼານ, ຄອບຄົວ ກໍຄື ສະມາຊິກຢູ່ໃນຂັ້ນຮາກຖານ ເພື່ອນອ້ອມຂ້າງ ແລະ ໃນໜ່ວຍພັກຂອງພວກເຮົາ ເພື່ອໃຫ້ຄຳປືກສາ, ໃຫ້ບົດຮຽນ, ໃຫ້ປະສົບການ ແລະ ໃຫ້ຜູ້ປະຈຳການ. ສ່ວນຜູ້ປະຈຳການ ແມ່ນພະຍາຍາມບຸກບືນສູ້ຊົນ ມີຫຍັງທີ່ບໍ່ເຂົ້າໃຈສາມາດປະສານພົວພັນນຳບັນດາທ່ານດັ່ງກ່າວ ເພື່ອມາຮ່ວມໃນຂະບວນການເຄື່ອນໄຫວໃນການດຳເນີນວຽກງານສຳຄັນຕ່າງໆ ກໍຄື ການດຳເນີນໃນໜ່ວຍພັກຢ່າງຕໍ່ເນື່ອງ ເພື່ອສືບຕໍ່ສົ່ງເສີມຂະບວນການພັກໃຫ້ເຕີບໃຫຍ່ຂະຫຍາຍຕົວຂຶ້ນເລື້ອຍໆ.

       ສຳລັບ 7 ທ່ານ ທີ່ອອກພັກການ-ຮັບອຸດໜູນບຳນານ ພ້ອມທັງໄດ້ຮັບໃບຍ້ອງຍໍຈາກລັດຖະບານ 5 ທ່ານ ປະກອບມີ ທ່ານ ຄຳພອນ ໄຊສົມພູ ຫົວໜ້າຫ້ອງການສົ່ງເສີມການສຶກສາພາກເອກະຊົນ, ທ່ານ ນາງ ປທ ອາລົງກົດ ສໍແສງອິນ ຮອງຫົວໜ້າຫ້ອງການ ອຸຍແນດສະໂກ, ທ່ານ ປທ ທິບພະມົນ ຈັນທະລັງສີ ຮອງຫົວໜ້າຫ້ອງການ ກະຊວງ ສສກ,  ທ່ານ ແພງມາ ໄຊຍະວົງ ຮອງຫົວໜ້າຫ້ອງການ ກະຊວງ ສສກ ແລະ ທ່ານ ຄຳພັນ ອ່ອນພັນ ຮອງຫົວໜ້າກົມພະລະ ແລະ ສິລະປະສຶກສາ. ສ່ວນ 2 ທ່ານ ທີ່ອອກພັກການ-ຮັບອຸດໜູນບຳນານ ແລະ ໄດ້ຮັບການຍ້ອງຍໍຈາກທ່ານລັດຖະມົນຕີ ກະຊວງ ສສກ ມີທ່ານ ນາງ ກັນຫາ ສັກບົວວົງ ຫົວໜ້າພະແນກ, ກົມຈັດຕັ້ງ ແລະ ພະນັກງານ ແລະ ທ່ານ ນາງ ວົງມະນີ ພິໄຊ ຮອງຫົວໜ້າຂະແໜງ ຫ້ອງການສົ່ງເສີມການສຶກສາພາກເອກະຊົນ. 

ໂດຍ ສົງການ

 

Print Email