• moes
  • Border-schools
  • borther

ລັດຖະມົນຕີ ສສກ ແນະນຳການໄຂສົກຮຽນໃໝ່ທົ່ວປະເທດ ຕ້ອງຄວບຄູ່ກັບການປ້ອງກັນ ໂຄວິດ-19 ພ້ອມທຳຄວາມຊິນເຄີຍການດຳລົງຊີວິດແບບໃໝ່

ລັດຖະມົນຕີ ສສກ ແນະນຳການໄຂສົກຮຽນໃໝ່ທົ່ວປະເທດ ຕ້ອງຄວບຄູ່ກັບການປ້ອງກັນ ໂຄວິດ-19  
ພ້ອມທຳຄວາມຊິນເຄີຍການດຳລົງຊີວິດແບບໃໝ່

118661416 656644591653506 4759909531824233255 nທ່ານລັດຖະມົນຕີ ກະຊວງສຶກສາທິການ ແລະ ກິລາ (ສສກ) ໄດ້ແນະນຳໃຫ້ ບັນດາໂຮງຮຽນ ແລະ ສະຖາບັນການສຶກສາ ທັງພາກລັດ ແລະເອກະ ຊົນ ໃນຂອບເຂດທົ່ວປະເທດ ກຽມໄຂສົກຮຽນໃໝ່ 2020-2021 ໃນວັນທີ 1 ກັນຍາ ທີ່ຈະເຖິງນີ້ ພ້ອມທັງສືບຕໍ່ປະຕິບັດມາດຕະການປ້ອງກັນ ຄວບຄຸມ ແລະ ແກ້ໄຂການລະບາດຂອງເຊື້ອພະຍາດ ໂຄວິດ-19 ຢ່າງເຂັ້ມງວດ. ຂະນະທີ່ ຜູ້ບໍລິຫານການສຶກສາ ແລະ ຄູອາຈານ ຈະຕ້ອງໄດ້ທົບທວນຄືນກ່ຽວກັບຮູບແບບການຈັດການຮຽນການສອນ ເພື່ອໃຫ້ກາຍເປັນຄວາມຊິນເຄີຍໃນການດຳລົງຊີວິດປະຈຳວັນແບບໃໝ່ (New Normal).

        ທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີ ກະຊວງສຶກສາທິການ ແລະ ກິລາ ໄດ້ໃຫ້ສຳພາດຕໍ່ສື່ມວນຊົນ ໃນວັນທີ 26 ສິງຫາ ຜ່ານມາ ວ່າ: ປີນີ້ພວກເຮົາໄດ້ຮັບຜົນກະທົບຈາກການລະບາດຂອງພະຍາດ ໂຄວິດ-19 ເຮັດໃຫ້ຂະແໜງການສຶກສາ ແລະ ກິລາ ກໍຄື ກັບຂະແໜງການອື່ນໆ ທີ່ໄດ້ຮັບຜົນກະທົບໃນຫຼາຍດ້ານ ເປັນຕົ້ນແມ່ນ ການຮຽນບໍ່ປົກກະຕິ, ມີຄວາມຫຍຸ້ງຍາກໃນການປະຕິບັດມາດຕະການຮັກສາໄລຍະຫ່າງ, ຜ້າອັດປາກ-ອັດດັງບໍ່ພຽງພໍ, ນັກຮຽນທີ່ສຶກສາຢູ່ຕ່າງປະເທດບໍ່ໄດ້ກັບໄປສືບຕໍ່ຮຽນ, ທຶນການສຶກສາຂອງຫຼາຍປະເທດຖືກໂຈະ, ມີຄວາມສ່ຽງສູງຂອງນັກສຶກສາຈົບໃໝ່ ທີ່ຈະບໍ່ໄດ້ເຂົ້າສູ່ພາກແຮງງານ ແລະ ບັນຫາອື່ນໆ. ເຖິງຢ່າງໃດກໍຕາມ, ຄະນະນຳກະຊວງສຶກສາທິການ ແລະ ກິລາ ໄດ້ມີການປຶກສາຫາລືກັບກົມວິຊາການທີ່ກ່ຽວຂ້ອງ ແລະ ປະເມີນສະພາບການເປັນປົກກະຕິ ເພື່ອສືບຕໍ່ເຮັດໃຫ້ການຈັດການຮຽນການສອນສືບຕໍ່ດຳເນີນໄປ ທັງຮັບປະກັນຄຸນນະພາບການສຶກສາໃນສະພາບແວດລ້ອມໃໝ່.

       ສະເພາະປະຕິທິນການຈັດການຮຽນການສອນ ສຳລັບສົກຮຽນ 2020-2021 ແມ່ນຈະໄດ້ດຳເນີນໄປເປັນປົກກະຕິຄ້າຍຄືກັບທຸກປີ ກໍຄື ໃນວັນທີ 1 ກັນຍາ 2020 ເປັນມື້ໄຂສົກຮຽນໃໝ່ໃນຂອບເຂດທົ່ວປະເທດ. ທັງນີ້, ເພື່ອເປັນການສືບຕໍ່ປະຕິບັດມາດຕະການປ້ອງກັນ ຄວບຄຸມ ແລະ ແກ້ໄຂການລະບາດຂອງເຊື້ອພະຍາດອັກເສບປອດຈາກເຊື້ອຈຸລະໂລກສາຍພັນໃໝ່ຂອງຄະນະສະເພາະກິດແຫ່ງຊາດ ຈຶ່ງຮຽກຮ້ອງໃຫ້ສະຖານການສຶກສາທຸກແຫ່ງ ຈົ່ງທົບທວນມາດຕະການ, ການກຽມຄວາມພ້ອມຂອງບຸກຄະລາກອນ, ຈັດການສຸຂະສຶກສາໃຫ້ຄວາມຮູ້ແກ່ຜູ້ບໍລິຫານ-ຄູອາຈານ ແລະ ນັກຮຽນນັກສຶກສາ ເປັນຕົ້ນແມ່ນການປະຕິບັດມາດຕະການຮັກສາໄລຍະຫ່າງ, ໃສ່ຜ້າອັດປາກ-ອັດດັງ, ສົ່ງເສີມການລ້າງມືໃສ່ສະບູເປັນປົກກະຕິໃຫ້ກາຍເປັນວັດທະນະທຳ, ຫຼີກລ່ຽງການຈັດກິດຈະກຳທີ່ມີຈຳນວນຜູ້ເຂົ້າຮ່ວມຫຼາຍ ແລະ ຟຸມເຟືອຍ. ຕໍ່ລູກຫຼານ-ນັກຮຽນ ນັກສຶກສາ ຖ້າຫາກມີອາການບໍ່ສະບາຍໃຫ້ພັກຜ່ອນຢູ່ເຮືອນ ແລະ ໄປພົບແພດໝໍ, ຖ້າຫາກພົບຜູ້ຮຽນທີ່ມີອາການບໍ່ສະບາຍແມ່ນໃຫ້ແຍກໄວ້ຫ້ອງພະຍາບານກ່ອນ ເພື່ອປະສານຫາຜູ້ປົກຄອງ ຫຼື ແພດໝໍທີ່ຢູ່ໃກ້ ແລະ ປະຕິບັດມາດຕະການອື່ນໆທີ່ກ່ຽວຂ້ອງ.

       ນອກຈາກນັ້ນ, ທ່ານລັດຖະມົນຕີ ຍັງໄດ້ກ່າວໃຫ້ຮູ້ຕື່ມວ່າ: ສຳລັບຜູ້ບໍລິຫານການສຶກສາ ແລະ ຄູອາຈານ ຈະຕ້ອງໄດ້ທົບທວນຄືນກ່ຽວກັບຮູບແບບການຈັດການຮຽນການສອນ ຈະປັບປ່ຽນຫຍັງແດ່ເພື່ອໃຫ້ກາຍເປັນຄວາມຊິນເຄີຍໃນການດຳລົງຊີວິດປະຈຳວັນແບບໃໝ່ (New Normal) ຈະນຳໃຊ້ເຕັກໂນໂລຊີ ເຂົ້າມາຊ່ວຍຄືແນວໃດ, ຈະນຳໃຊ້ຊ່ອງໂທລະພາບສຶກສາ ແລະ ກິລາ ໃຫ້ເກີດປະໂຫຍດສູງສຸດແກ່ການພັດທະນາວິຊາຊີບຄູ, ກຸ່ມໂຮງຮຽນ ແລະ ກຸ່ມເປົ້າໝາຍຜູ້ຮຽນທີ່ເຂົ້າບໍ່ເຖິງອິນເຕິເນັດແນວໃດ. ພ້ອມດຽວກັນນີ້, ກະຊວງສຶກສາທິການ ແລະ ກິລາ ຈະໄດ້ຈັດພິມ ແລະ ແຈກຢາຍປຶ້ມແບບຮຽນໃຫ້ພຽງພໍກັບນັກຮຽນທີ່ຢູ່ເຂດຊົນນະບົດ-ຫ່າງໄກ ຮັບປະກັນວ່ານັກຮຽນການສຶກສາກ່ອນໄວຮຽນ, ປະຖົມສຶກສາ ແລະ ມັດທະຍົມສຶກສາຕອນຕົ້ນ ຈະໄດ້ຮັບພຽງພໍຖ້າຫາກມີເຫດການສຸກເສີນທີ່ບໍ່ຄາດຄິດເກີດຂຶ້ນໃນຕໍ່ໜ້າ. ສ່ວນພໍ່ແມ່ຜູ້ປົກຄອງໃນເຂດທີ່ບໍ່ສາມາດເຂົ້າເຖິງຜ້າອັດປາກ-ອັດດັງ ຂໍໃຫ້ຊ່ວຍລູກຫຼານຂອງທ່ານ ໃນການຫຍິບຜ້າອັດປາກ-ອັດດັງ ໂດຍນຳໃຊ້ຜ້າສະອາດ ແລະ ວັດຖຸທີ່ສາມາດຫາໄດ້ໃນທ້ອງຖິ່ນ ເພື່ອເປັນການຫຼຸດຜ່ອນຄ່າໃຊ້ຈ່າຍຂອງຄອບຄົວ. ປັດຈຸບັນເປັນລະດູມໍລະສຸມ ມີຝົນຕົກໜັກເກືອບທຸກພາກຂອງປະເທດ ການເດີນທາງຂອງລູກຫຼານ ແລະ ພໍ່ແມ່ຜູ້ປົກຄອງອາດພົບຄວາມບໍ່ສະດວກ ແລະ ມີຄວາມສ່ຽງທີ່ຈະເກີດໄພອັນຕະລາຍ. ດັ່ງນັ້ນ, ຈຶ່ງຮຽກຮ້ອງໃຫ້ຜູ້ບໍລິຫານການສຶກສາ ແລະ ກິລາແຕ່ລະຂັ້ນ ແລະ ພໍ່ແມ່ຜູ້ປົກຄອງຈົ່ງຕິດຕາມແຈ້ງການພະຍາກອນອາກາດຢ່າງໃກ້ຊິດ ແລະ ໃຫ້ການແຈ້ງເຕືອນສະຖານການສຶກສາໃນຂອບເຂດຄວາມຮັບຜິດຊອບຂອງທ່ານຢ່າງຕັ້ງໜ້າ.

        ສຳລັບນັກຮຽນນັກສຶກສາ ແລະ ພໍ່ແມ່ຜູ້ປົກຄອງທີ່ມີລູກຫຼານ ກຳລັງສຶກສາຢູ່ຕ່າງປະເທດ ຈົ່ງຕິດຕາມແຈ້ງການມາດຕະການ ແລະ ຂ່າວສານຈາກສະຖານເອກອັກຄະລັດຖະທູດ ສປປ ລາວ ເປັນປົກກະຕິ ພ້ອມກັນປະຕິບັດລະບຽບການຂອງປະເທດເຈົ້າພາບ ແລະ ມາດຕະການເຂົ້າ-ອອກ ສປປ ລາວ ດ້ວຍຄວາມຮັບຜິດຊອບສູງ. ທັງນີ້, ເພື່ອເປັນການເຊີດຊູຄຸນສົມບັດ, ປະເພນີອັນດີງາມຂອງຄົນລາວ ໃນເວທີພາກພື້ນ ແລະ ສາກົນ ຜ່ານການປະພຶດປະຕິບັດຂອງພວກເຮົາ.

         ຕອນທ້າຍ, ທ່ານ ນາງ ແສງເດືອນ ຫຼ້າຈັນທະບູນ ຍັງໄດ້ຮຽກຮ້ອງມາຍັງຜູ້ບໍລິຫານ, ຄູອາຈານ, ລູກຫຼານນັກຮຽນ ນັກສຶກສາ ຕະຫຼອດຮອດພໍ່ແມ່ຜູ້ປົກຄອງ ແລະ ທົ່ວສັງຄົມ ຈົ່ງສຸມທຸກສະຕິປັນຍາ ທ່າແຮງຂອງຕົນເພື່ອເຂົ້າຮ່ວມ ແລະ ປະກອບສ່ວນຕໍ່ວຽກງານການສຶກສາ, ສ້າງສະພາບແວດລ້ອມການສຶກສາຕາມທິດການຮຽນຮູ້ຕະຫຼອດຊີວິດ, ມີຄຸນນະພາບ, ມີຄວາມເທົ່າທຽມ ແລະ ປະຊາຊົນບັນດາເຜົ່າບໍ່ວ່າເຂົາເຈົ້າຈະຢູ່ບ່ອນໃດຂອງ ສປປ ລາວ ສາມາດເຂົ້າເຖິງໄດ້.

 

ບົວລະພາ

Print Email