• moes
  • Border-schools
  • borther

ສລດ ສ້າງ-ພັດທະນາຫຼັກສູດຝຶກອົບຮົມໄລຍະສັ້ນ 4 ຫຼັກສູດ

ສລດ ສ້າງ-ພັດທະນາຫຼັກສູດຝຶກອົບຮົມໄລຍະສັ້ນ 4 ຫຼັກສູດ

118457647 315922562975368 1832294830855127697 nສູນພັດທະນາຜູ້ປະກອບກິດຈະການ ລາວ-ອິນເດຍ (ສລດ) ຈັດກອງ​ປະ​ຊຸ​ມ​ສ້າງ ແລະ ພັດ​ທະ​ນາ​ຫຼັກ​ສູດ​ຝຶກ​ອົບ​ຮົມ​ໄລ​ຍະ​ສັ້ນ. ໃນນີ້, ມີຫຼັກ​ສູດ​ການ​ພັດ​ທະ​ນາ​ເວັບ​ໄຊ​ດ້ວຍ​ພາ​ສາ​ໂປ​​ຣແກ​ຣມ (Web Programming), ການ​ປະ​ກອບ​ກິດ​ຈະ​ການ 3 ເດືອນ (Entrepreneurship), ການ​ສ້າງ​ຕັ້ງ​ວິ​ສາ​ຫະ​ກິດ​ໃໝ່ (New Enterprise Creation) ແລະ ທຸ​ລະ​ກິດ​ຄອບ​ຄົວ (Family Business) ເພື່ອໃຫ້ມີ​ເຄື່ອງມື ​ແລະ ອຸປະກອນ​ຮັບ​ໃຊ້​ໃນ​ການ​ຝຶກ​ອົບຮົມ, ມີ​ເອກະສານ ​ແລະ ຄູ່​ມື​ຄູ.

        ກອງ​ປະ​ຊຸ​ມ​ສ້າງ ແລະ ພັດ​ທະ​ນາ​ຫຼັກ​ສູດ​ຝຶກ​ອົບ​ຮົມ​ໄລ​ຍະ​ສັ້ນ​ 4 ຫຼັກສູດ ຄັ້ງ​ທີ 1 ປະ​ຈຳ​ປີ 2020 ໄດ້ມີຂຶ້ນ ລະຫວ່າງ​ວັນ​ທີ 26-28 ສິງຫາ ຜ່ານມາ ທີ່ຫ້ອງປະຊຸມຂອງ ສລດ ບ້ານຫາດຊາຍຂາວ ເມືອງຫາດຊາຍຟອງ ນະຄອນຫຼວງວຽງຈັນ, ໂດຍພາຍໃຕ້ການເປັນປະທານຮ່ວມຂອງທ່ານ ພູວຽງ ພູມີໄລ ຜູ້ອຳນວຍການ ສະຖາບັນພັດທະນາອາຊີວະສຶກສາ ແລະ ທ່ານ ສາຍສະໝອນ ງາມສີ ຜູ້ອຳນວຍການ ສູນພັດທະນາຜູ້ປະກອບກິດຈະການ ລາວ-ອິນເດຍ, ມີວິທະຍາກອນ ແລະ ສຳມະນາກອນ ຈາກ 17 ແຂວງ ແລະ 1 ນະຄອນຫຼວງ ເຂົ້າຮ່ວມ 44 ທ່ານ.

       ໂອກາດນີ້, ທ່ານ ສາຍສະໝອນ ງາມສີ  ໄດ້ກ່າວວ່າ: ສູນພັດທະນາຜູ້ປະກອບກິດຈະການ ລາວ-ອິນເດຍ ແມ່ນສູນໜຶ່ງທີ່ໄດ້ຮັບການຊ່ວຍເຫຼືອຈາກລັດຖະບານອິນເດຍ ໃຫ້ແກ່ ສປປ ລາວ ພາຍໃຕ້ການສະໜັບສະໜູນຂອງການລິເລີ່ມເຂົ້າໃນການເຊື່ອມໂຍງອາຊຽນ ຫຼື The Initiative for ASEAN Integration (IAI) ຊຶ່ງໄດ້ຮັບການສ້າງຕັ້ງຂຶ້ນໃນວັນທີ 27 ພະຈິກ 2004 ພາຍໃຕ້ການຊີ້ນຳຂອງກະຊວງສຶກສາທິການ ແລະ ກິລາ ແລະ ມີສະຖາບັນພັດທະນາຜູ້ປະກອບກິດຈະການປະເທດອິນເດຍ (EDII) ເປັນຜູ້ສະໜັບສະໜູນ ແລະ ຊ່ວຍເຫຼືອທາງດ້ານທີ່ປຶກສາ, ຍົກລະດັບທາງດ້ານວິຊາການ, ຫຼັກສູດ ແລະ ອຸປະກອນການຝຶກອົບຮົມຕ່າງໆ, ໃຫ້ການຮ່ວມມືຢ່າງໃກ້ຊິດໃນວຽກງານວິຊາການ ແລະ ຝຶກອົບຮົມກັບສູນພັດທະນາຜູ້ປະກອບກິດຈະການ ລາວ-ອິນເດຍ.

        ສລດ ເປັນ​ຫົວ​ໜ່ວຍ​ວິ​ຊາ​ການ​ໜຶ່ງ​ພາຍ​ໃຕ້​ການ​ຄຸ້ມ​ຄອງ​ທາງ​ດ້ານ​ວິ​ຊາ​ການຂອງ​ກົມ​ອາ​ຊີ​ວະ​ສຶກ​ສາ ກະ​ຊວງ ສສກ, ມີ​ພາ​ລະ​ບົດ​ບາດໃນ​ການ​ຈັດ​ຕັ້ງ​ຝຶກ​ອົບ​ຮົມ, ການ​ພັດ​ທະ​ນາຫຼັກ​ສູດ, ຜະ​ລິດ​ສື່​ການ​ຮຽນການ​ສອນ ແລະ ສົ່ງ​ເສີມ​ຜູ້​ປະ​ກອບ​ກິດ​ຈະ​ການ​ຂະ​ໜາດ​ນ້ອຍ ແລະ ກາງ ເພື່ອ​ສົ່ງ​ເສີມການ​ສຶກສາ​ໃຫ້​ແກ່ຜູ້​ປະກອບ​ກິດຈະການ ແລະ ພັດທະນາຊັບພະຍາກອນມະນຸດໃຫ້ມີຄວາມຮູ້ຄວາມສາມາດ, ມີທັກສະ ເພື່ອນຳໄປປະກອບອາຊີບ ຫຼື ນຳໄປໝູນໃຊ້ໃນການດຳລົງຊີວິດປະຈຳວັນໃຫ້ເກີດດອກອອກຜົນ, ​ປູກ​ຈິດ​ສໍານຶກ​ຄວາມ​ຮູ້​ທາງ​ດ້ານ​ທຸລະ​ກິ​ດ ​ແລະ ​ໃຫ້​ບໍລິການ​ດ້ານ​ການຝຶກ​ອົບຮົມ​ໃຫ້​ມີ​ຫຼາກຫຼາຍຫົວ​​ຂໍ້ເພີ່ມ​ຂຶ້ນ, ​ຊຶ່ງຫຼັກ​ສູດ​ການ​ພັດ​ທະ​ນາ​ເວັບ​ໄຊ​ດ້ວຍ​ພາ​ສາ​ໂປ​​ຣແກ​ຣມ (Web Programming), ການ​ປະ​ກອບ​ກິດ​ຈະ​ການ 3 ເດືອນ (Entrepreneurship), ການ​ສ້າງ​ຕັ້ງ​ວິ​ສາ​ຫະ​ກິດ​ໃໝ່ (New Enterprise Creation) ​ແລະ ທຸ​ລະ​ກິດ​ຄອບ​ຄົວ (Family Business) ​ເປັ​ນຫຼັກ​ສູດ​ຝຶກ​ອົບຮົມ​ໄລຍະ​ສັ້ນ​  ແລະ  ​ສອດຄ່ອງ​ກັບສະ​ພາບ​ການ​ໃນ​ປັດ​ຈຸ​ບັນ. ​ດັ່ງ​ນັ້ນ, ​ສູນ​ຈຶ່ງ​ເຫັນ​ໄດ້​ເຖິງ​ຄວາມ​ສຳ​ຄັນ​ກັບ​ຫົວ​ຂໍ້​ການ​ຝຶກ​ອົບ​ຮົມ​ດັ່ງ​ກ່າວ​ ​ເພື່ອ​ເປັນ​ອີກ​ຕົວ​ເລືອກ​ໜຶ່ງໃນການ​ສົ່ງ​ເສີມ​ການ​ສຶກສາ​ກ່ຽວກັບການ​ປະກ​ອບກິດຈະການ ​ແລະ ການກໍ່ສ້າງ​​ຜູ້​ປະກອບ​ກິດຈະການ​ໃໝ່​ໃຫ້​ມີຫຼາຍ​ຂຶ້ນ ​ໂດຍ​ສະ​ເພາະ​ແມ່ນກຸ່ມ​ໄວໜຸ່ມໃຫ້ສາ​ມາດ​ນຳ​ເອົາ​ຄວາມ​ຮູ້​ດັ່ງ​ກ່າວ​ໄປ​ປັບ​ໃຊ້​ໃນການ​ປະ​ກອບ​ອາ​ຊີບ​ຂອງ​ຕົນ​ເອງ​ໄດ້.

 

 

Print Email