• moes
  • Border-schools
  • borther

ໄຊ​ຍະ​ບູລີ ​ໄຂ​ສົກຮຽນ​​ໃໝ່ທົ່ວແຂວງຢ່າງເປັນທາງການ

ໄຊ​ຍະ​ບູລີ ​ໄຂ​ສົກຮຽນ​​ໃໝ່ທົ່ວແຂວງຢ່າງເປັນທາງການ

    118804631 548635349241029 5679663079604595797 nແຂວງ​ໄຊ​ຍະ​ບູລີ​ ​ໄດ້​ຈັດພິທີໄຂສົກຮຽນ​ໃໝ່ 2020-2021 ທົ່ວ​ແຂວງຢ່າງ​ເປັນທາງ​ການ ​ໃນ​ວັນ​ທີ 1 ກັນຍາ ຜ່ານມາ ທີ່​ສະໂມສອນພະແນກສຶກສາທິການ ແລະ ກິລາ ແຂວງໄຊຍະບູລີ ​ໂດຍ​ການ​ໃຫ້ກຽດ​ເຂົ້າຮ່ວມ​ຂອງທ່ານ ປອ ສົມລິດ ເປືອກແກ້ວ ຮອງເລຂາພັກແຂວງ ປະທານສະພາປະຊາຊົນແຂວງໄຊຍະບູລີ, ທ່ານ ນາງ ບຸນພັກ ອິນທະປັນຍາ ຄະນະປະຈໍາພັກແຂວງ, ຮອງເຈົ້າແຂວງ ຜູ້ຊີ້ນໍາຂົງເຂດວັດທະນະທຳ-ສົງຄົມ, ທ່ານ ອ່ອນຕາ ພົມມະຈິດ ຫົວໜ້າພະແນກສຶກສາທິການ ແລະ ກິລາ ແຂວງໄຊຍະບູລີ, ມີກໍາມະການປະຈໍາພັກແຂວງ, ກໍາມະການພັກແຂວງ, ຜູ້ປະຈໍາການຄະນະສະມາຊິກສະພາແຫ່ງຊາດເຂດເລືອກຕັ້ງທີ 7,

 ຫົວໜ້າ-ຮອງຫົວໜ້າພະແນກການອ້ອມຂ້າງແຂວງ, ຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າ-ຮອງຫົວໜ້າຫ້ອງການອ້ອມຂ້າງເມືອງ, ຜູ້ອໍານວຍການໂຮງຮຽນ, ນາຍບ້ານ, ນັກທຸລະກິດ, ພໍ່ຄ້າຊາວຂາຍ, ຄູອາຈານ, ນັກຮຽນ ນັກສຶກສາພາຍໃນເມືອງເຂົ້າຮ່ວມຢ່າງພ້ອມພຽງ.        

​     ໃນ​ພິທີ, ທ່ານ ອ່ອນຕາ ພົມມະຈິດ ຜ່ານບົດລາຍງານໃຫ້ຮູ້ວ່າ: ສຳລັບສົກຮຽນໃໝ່ 2020-2021 ແມ່ນສົກຮຽນໜຶ່ງທີ່ມີຄວາມສຳຄັນຫຼາຍ ເປັນປີເລີ່ມຂອງການຈັດຕັ້ງປະຕິບັດແຜນພັດທະນາການສຶກສາ ແລະ ກິລາ ກໍຄື ແຜນພັດທະນາເສດຖະກິດ-ສັງຄົມ 5 ປີ ແຫ່ງລັດ ຄັ້ງທີ IX (2021-2025) ໂດຍປະຕິບັດຕາມຕາມແຈ້ງການຂອງຫົວໜ້າຫ້ອງການ ກະຊວງສຶກສາທິການ ແລະ ກິລາ ສະບັບເລກທີ 2569/ຫກ ລົງວັນທີ 17 ສິງຫາ 2020 ວ່າດ້ວຍການໄຂສົກຮຽນໃໝ່.  ສຳລັບສົກຮຽນນີ້ ທົ່ວແຂວງມີໂຮງຮຽນອະນຸບານ-ລ້ຽງເດັກ 322 ແຫ່ງ. ໃນນີ້, ເອກະຊົນ 19 ແຫ່ງ, ຄາດວ່າມີນັກຮຽນລ້ຽງເດັກ 1.517 ຄົນ, ຍິງ 727, ນັກຮຽນອານຸບານ 16.227 ຄົນ, ຍິງ 7.966 ຄົນ, ມີໂຮງຮຽນປະຖົມສຶກສາທັງໝົດ 383 ແຫ່ງ, ຄາດວ່າມີນັກຮຽນ 36.622 ຄົນ, ຍິງ 17.929 ຄົນ, ຄາດວ່າຫຼຸດລົງ 1.000 ຄົນ, ໂຮງຮຽນມັດທະຍົມທັງໝົດ 102 ແຫ່ງ. ໃນນີ້, ມີຊັ້ນມັດທະຍົມສຶກສາຕອນຕົ້ນ 39 ແຫ່ງ, ມັດທະຍົມສົມບູນ 63 ແຫ່ງ (ເປັນໂຮງຮຽນສົງ 6 ແຫ່ງ ຕອນຕົ້ນ 4 ແຫ່ງ) ຄາດວ່າມີນັກຮຽນ 37.704 ຄົນທຽບໃສ່ສົກຮຽນຜ່ານມາເພີ່ມຂຶ້ນ 1.796 ຄົນ.

        ໂອກາດນີ້, ທ່ານ ປອ ສົມລິດ ເປືອກແກ້ວ ກ່າວວ່າ: ສົກຮຽນ 2019-2020 ຜ່ານ​ມາ ພາຍ​ໃຕ້​ການ​ຊີ້​ນຳ ນຳພາ​ຂອງ​ຄະນະພັກ-ອົງການ​ປົກ​ຄອງ​ແຕ່ລະ​ຂັ້ນ, ຄວາມ​ເປັນ​ເຈົ້າ​ການຂອງ​ຜູ້​ບໍລິຫານ​ການ​ສຶກສາ, ຄູສອນໃນຂອບເຂດທົ່ວ​ແຂວງ ​ແລະ ການ​ປະກອບ​ສ່ວນຢ່າງຕັ້ງໜ້າຈາກທຸກພາກສ່ວນ​ສັງຄົມ ​ເຮັດ​ໃຫ້ການ​ພັດທະນາ​ການ​ສຶກສາ ແລະ ກິລາ​ຂອງ​ແຂວງ​ສືບ​ຕໍ່​ຂະຫຍາຍຕົວທາງດ້ານປະລິມານ ແລະ ຄຸນນະພາບ ເຮັດໃຫ້ລູກ​ຫຼານ​ປະຊາຊົນ​ບັນດາ​ເຜົ່າ​ໄດ້​ເຂົ້າ​ຮຽນ​ເພີ່ມຂຶ້ນ ເລີ່ມ​ແຕ່​ລ້ຽງ​ເດັກ-ອະນຸບານ, ປະຖົມ​ສຶກສາ, ມັດທະຍົມສຶກສາ​ຕອນ​ຕົ້ນ-ຕອນ​ປາຍ ​ແລະ ​ເຂົ້າ​ຮຽນ​ຕໍ່​ວິຊາ​ຊີບ. ຄຸນ​ນະພາ​ບການ​ຮຽນການ​ສອນ ໄດ້​ຮັບ​ການ​ປັບປຸງ​ໃຫ້​ດີ​ຂຶ້ນ. ​ຄູ​ອາຈານ​ສ່ວນ​ໃຫຍ່​ມີ​​ແນວ​ຄິດອຸ່ນອ່ຽນທຸ່ນທ່ຽງ ມີຄວາມຈູບ​ຈ້າວ​ຫ້າວຫັນ​, ມີ​ນ້ຳ​ໃຈ​ຮັກ​ອາຊີບ​ແພງ​ເດັກ​. ຄູ​ຈຳນວນ​ໜຶ່ງ​ໄດ້​ອົບຮົມ​​ຍົກລະດັບກ່ຽວ​ກັບ​ວິທີສິດສອນການ​ນຳ​ໃຊ້ຫຼັກສູດ ແລະ ປຶ້​ມ​ແບບຮຽນ​ໃໝ່ຊັ້ນປະຖົມສຶກສາ ໄດ້ຍົກ​ລະດັບ​ຄູໄລຍະສັ້ນ, ໄລຍະຍາວຢ່າງ​ເປັນ​ລະບົບຕໍ່ເນື່ອງ, ຊຶ່ງຈຸດປະສົງກໍເພື່ອ​ປະກາດ​ໃຫ້​ທົ່ວ​ສັງຄົມ​ຮັບ​ຮູ້​ວ່າ ​ແຂວງ​ໄຊ​ຍະ​ບູລີ ກໍຄື​ເມືອງໄຊ​ຍະ​ບູລີ ​ໄດ້​ເລີ່​ມຕົ້ນ​ດໍາ​ເນີນການ​ຮຽນການ​ສອນ​ເປັນ​ທາງ​ການ, ສ້າງ​ທຸກ​ເງື່ອນ​ໄຂ​ເພື່ອ​ຈັດການ​ຮຽນການ​ສອນ​ໃຫ້​ທ່ວງທັນ​ກໍານົດເວລາ ແລະ ຖືກຕ້ອງຕາ​ມກົດໝາຍ​ການ​ສຶກສາ​ວາງ​ອອກ.

       ນອກຈາກນີ້, ທ່ານຮອງເລຂາພັກແຂວງ ປະທານສະພາປະຊາຊົນແຂວງໄຊຍະບູລີ ຍັງໄດ້ກ່າວໃຫ້ຮູ້ອີກວ່າ: ອີກດ້ານ​ໜຶ່ງ​ ແມ່ນເພື່ອ​ເປັນ​ການ​ສ້າງເງື່ອນໄຂກະຕຸກ​ຊຸກຍູ້​ໃຫ້​ຜູ້​ບໍລິຫານ​ການ​ສຶກສາ-ກິລາ, ຄູອາຈານ, ທຸກ​ການຈັດ​ຕັ້ງ, ທຸກ​ພາກສ່ວນ​ເສດຖະກິດ-​ສັງຄົມ ​ເອົາ​ໃຈ​ໃສ່​ເຮັດ​ໜ້າ​ທີ່​ຂອງ​ຕົນ​ດ້ວຍ​ຄວາມ​ຮັບຜິດຊອບ ຮັບປະກັນໃຫ້ນັກຮຽນນັກສຶກສາໄດ້ເຂົ້າຮຽນ​ນັບ​ແຕ່​ວັນ​ໄຂ​ສົກຮຽນໃໝ່​ນີ້​ເປັນ​ຕົ້ນ​ໄປ.

ຫຼັງຈາກນັ້ນ, ໃນພິທີ ບັນດາຄະນະປະທານ ແລະ ຜູ້ເຂົ້າຮ່ວມ ໄດ້ຮ່ວມກັນຕັດແທບຜ້າ, ປ່ອຍໝາກປູມເປົ້າຂຶ້ນສູ່ທ້ອງຟ້າ ເພື່ອເປັນສັນຍາລັກໃນການໄຂສົກຮຽນໃໝ່ຢ່າງເປັນທາງການ.

 

ໂດຍ: ນາລີ ແພງວິໄລ

Print Email