ຂ່າວປະຈໍາວັນທີ 18 ກັນຍາ 2018
ຂ່າວກອງປະຊຸມ
ສູນປະກັນຄຸນນະພາບການສຶກສາ ສສກ ເຜີຍແຜ່ຂອບວຸດທິອາຊຽນ
ສູນປະກັນຄຸນນະພາບການສຶກສາ ກະຊວງສຶກສາທິການ ແລະ ກິລາ (ສສກ) ໄດ້ຈັດກອງປະຊຸມເຜີຍແຜ່ຂອບວຸດທິອາຊຽນ ເມື່ອວັນທີ 14 ກັນຍາ ຜ່ານມາ ທີ່ຫ້ອງປະຊຸມໂຮງແຮມ ນິວຢູສຸກ ນະຄອນຫຼວງວຽງຈັນ, ໂດຍໃຫ້ກຽດເປັນປະທານຂອງທ່ານ ປັນຍາ ຈັນທະວົງ ວ່າການຜູ້ອໍານວຍການສູນປະກັນຄຸນນະພາບການສຶກສາ ກະຊວງສຶກສາທິການ ແລະ ກິລາ, ມີຫົວໜ້າ-ຮອງຫົວໜ້າພະແນກ, ຕາງໜ້າຈາກຫ້ອງການ, ມະຫາວິທະຍາໄລ, ພະນັກງານ, ວິຊາການ ແລະ ຄະນະຮັບຜິດຊອບວຽກງານທີ່ກ່ຽວຂ້ອງເຂົ້າຮ່ວມຢ່າງພ້ອມພຽງ.
ໂອກາດດັ່ງກ່າວ, ທ່ານ ປັນຍາ ຈັນທະວົງ ໄດ້ກ່າວໃຫ້ຮູ້ກ່ຽວກັບການຈັດກອງປະຊຸມຄັ້ງນີ້, ແມ່ນເພື່ອເປັນການເປີດກວ້າງ ໂດຍຈະບໍ່ເປັນພຽງເຜີຍແຜ່ໃຫ້ຮູ້ຈັກເທົ່ານັ້ນ ແຕ່ຈະໃຫ້ເຫັນເຖິງຂອບວຸດທິອາຊຽນ ທີ່ຈະມີການເຊື່ອມໂຍງກັບ AEC ຫຼື ການເຄື່ອນຍ້າຍສີມືແຮງງານ, ນັກຮຽນ, ພະນັກງານວິຊາການເປັນແນວໃດ, ຈະເປັນເຄື່ອງມືແນວໃດ, ໃນຕໍ່ໜ້າການເຊື່ອມໂຍງກັບອາຊຽນຈະເຮັດແນວໃດ, ຂະແໜງການຕ່າງໆຈະຕ້ອງຮັບຮູ້ກ່ຽວກັບຄວາມສໍາຄັນຂອງຂອບວຸດທິອາຊຽນ, ການເຊື່ອມໂຍງ ຫຼື ລະບົບຂອງ ສປປ ລາວ ໃນຕໍ່ໜ້າຈະເຊື່ອມກັບອາຊຽນແນວໃດ ແລະ ຈະມີຄວາມກຽມພ້ອມແນວໃດ.
ໃນກອງປະຊຸມເຜີຍແຜ່ຂອບວຸດທິອາຊຽນຄັ້ງນີ້, ຜູ້ເຂົ້າຮ່ວມຍັງໄດ້ຮັບຟັງການລາຍງານກ່ຽວກັບການພັດທະນາຂອບວຸດທິການສຶກສາແຫ່ງຊາດ, ການຈັດຕັ້ງການປະກັນຄຸນນະພາບການສຶກສາ ແລະ ການເຊື່ອມໂຍງ, ລາຍງານການຈັດຕັ້ງປະຕິບັດເຊື່ອມໂຍງເຂົ້າກັບອາຊຽນຂອງຂະແໜງ ການທ່ອງທ່ຽວ, ພ້ອມທັງສົນທະນາລວມ ແລະ ນໍາສະເໜີຜົນການຄົ້ນຄວ້າ.
(ບຸນທະວີ)
ກົມແຜນການ ສສກ ຫາລືວຽກງານຄຸ້ມຄອງແຜນການຊ່ວຍເຫຼືອທາງການ ໄຕມາດ 3-4 ປີ 2018
ກົມແຜນການ ກະຊວງສຶກສາທິການ ແລະ ກິລາ (ສສກ) ໄດ້ຈັດກອງປະຊຸມປຶກສາຫາລື ແລະ ແລກປ່ຽນຄຳຄິດຄຳເຫັນກ່ຽວກັບການຈັດຕັ້ງປະຕິບັດວຽກງານໃນການຄຸ້ມຄອງແຜນງານ ແລະ ໂຄງການຊ່ວຍເຫຼືອທາງການ ເພື່ອການພັດທະນາ (ODA) ໃນຂະແໜງການສຶກສາ ແລະ ກິລາ ປະຈຳໄຕມາດ 3 ແລະ ແຜນການຈັດຕັ້ງປະຈິບັດ ປະຈຳໄຕມາດ 4 ປີ 2018 ເມື່ອວັນທີ 14 ກັນຍາ ຜ່ານມາ ທີ່ຫ້ອງປະຊຸມ ກະຊວງສຶກສາທິການ ແລະ ກິລາ, ໂດຍພາຍໃຕ້ການເປັນປະທານຂອງທ່ານ ນາງ ຄຳປະເສີດ ກິຕິຍະວົງ ຮອງຫົວໜ້າກົມແຜນການ ກະຊວງສຶກສາທິການ ແລະ ກິລາ, ມີຮອງຫົວໜ້າກົມທີ່ກ່ຽວຂ້ອງ, ຜູ້ອຳນວຍການສູນ, ຫົວໜ້າ-ຮອງຫົວໜ້າພະແນກ, ພະນັກງານ ວິຊາການທີ່ກ່ຽວຂ້ອງເຂົ້າຮ່ວມ.
ໂອກາດດັ່ງກ່າວ, ທ່ານ ນາງ ຄຳປະເສີດ ກິຕິຍະວົງ ໄດ້ກ່າວກ່ຽວກັບການຈັດກອງປະຊຸມໃນຄັ້ງນີ້, ແມ່ນເພື່ອປຶກສາຫາລື ແລະ ແລກປ່ຽນຄຳຄິດຄຳເຫັນກ່ຽວກັບການຈັດຕັ້ງປະຕິບັດວຽກງານໃນການຄຸ້ມຄອງແຜນງານ ຫຼື ໂຄງການຊ່ວຍເຫຼືອທາງການ ເພື່ອການພັດທະນາ (ODA) ໃນຂະແໜງການສຶກສາ ແລະ ກິລາ ປະຈຳໄຕມາດ 3 ແລະ ແຜນການຈັດຕັ້ງປະຈິບັດ ປະຈຳໄຕມາດ 4 ປະຈຳປີ 2018 ແລະ ຕິດຕາມການສະຫຼຸບ-ລາຍງານຄວາມຄືບໜ້າຂອງການຈັດຕັ້ງປະຕິບັດໂຄງການຕ່າງໆ ໃຫ້ບັນລຸໄປຕາມຈຸດປະສົງ ແລະ ເປົ້າໝາຍທີ່ໄດ້ວາງໄວ້, ພ້ອມທັງຜ່ານບົດລາຍງານການເບີກຈ່າຍ 6 ເດືອນຕົ້ນປີ ແລະ ແຜນ 6 ເດືອນທ້າຍປີ ປະຈຳປີ 2018 ແລະ ນຳສະເໜີຮ່າງຂໍ້ຕົກລົງຂອງລັດຖະມົນຕີ ສະບັບປັບປຸງໃໝ່ ວ່າດ້ວຍການແຕ່ງຕັ້ງຄະນະຊີ້ນຳລວມ ແລະ ຄະນະຮັບຜິດຊອບໃນການຈັດຕັ້ງປະຕິບັດວຽກງານຄຸ້ມຄອງແຜນງານ ແລະ ໂຄງການຊ່ວຍເຫຼືອທາງການ ໃນຂະແໜງການສຶກສາ ແລະ ກິລາ ແລະ ເພື່ອຊອກຫາວິທີແກ້ໄຂບັນຫາຮ່ວມກັນໃຫ້ແທດເໝາະກັບສະພາບການຈັດຕັ້ງປະຕິບັດວຽກງານຕົວຈິງໃນປັດຈຸບັນ ແລະ ຕໍ່ໜ້າ.
ອຳໄພວັນ
ຂ່າວກິລາ
ຕ້ອງນຳວິທະຍາສາດການກິລາ ເຂົ້າຊ່ວຍພັດທະນາກິລາລະດັບສູງ ຫາກຢາກປະສົບຜົນສຳເລັດ ໃນ “ຫັງໂຈວ ເກມ 2022”
ການສະໜອງງົບປະມານໃນໄລຍະເຝິກແອບເບື້ອງຕົ້ນຍັງຊັກຊ້າ ຍັງເປັນສາເຫດໃຫ້ການສະໜອງ ອຸປະກອນເຝິກແອບ ແລະ ອັດຕາບຳລຸງ ໃຫ້ນັກກິລາບາງປະເພດ ຊຸດເອຊຽນ ເກມ 2018 ບໍ່ເປັນໄປຕາມແຜນການທີ່ວາງໄວ້. ຂະນະທີ່ໃນຕໍ່ໜ້າ ຕ້ອງເອົາລະບົບວິທະຍາສາດການກິລາ ເຂົ້າມາຊ່ວຍໃນການພັດທະນາກິລາລະດັບສູງ ຫາກຢາກປະສົບຜົນສຳເລັດ ໃນງານແຂ່ງຂັນກິລາລະດັບພາກພື້ນ ແລະ ສາກົນ ເວົ້າລວມ, ເວົ້າສະເພາະແມ່ນງານມະຫາກຳກິລາເອຊຽນ ເກມ ຄັ້ງທີ 19 ທີ່ເມືອງຫັງໂຈວ ສປ ຈີນ ເປັນເຈົ້າພາບ ໃນປີ 2022.
ອີງຕາມຂໍ້ມູນຈາກບົດລາຍງານກ່ຽວກັບ ຜົນສຳເລັດການເຂົ້າຮ່ວມແຂ່ງຂັນງານມະຫາກຳກິລາເອຊຽນ ເກມ ຄັ້ງທີ XVIII ທີ່ນະຄອນຫຼວງຈາກາຕາ-ປາເລມບັງ ປະເທດອິນໂດເນເຊຍ ເປັນເຈົ້າພາບ ລະຫວ່າງວັນທີ 18 ສິງຫາ ຫາ 2 ກັນຍາ 2018 ຂອງກົມກິລາລະດັບສູງ ກະຊວງສຶກສາທິການ ແລະ ກິລາ ແຈ້ງໃຫ້ຊາບວ່າ: ສປປ ລາວ ທັບນັກກິລາເຂົ້າຮ່ວມ ທັງໝົດ 217 ຄົນ ໃນ 18 ປະເພດກິລາ ແລະ 1 ກິລາສາທິດ. ໃນນີ້ ມີ 12 ປະເພດກິລາທີ່ນຳໃຊ້ງົບປະມານລັດຖະບານ ຄື: ກະຕໍ້, ປັນຈັກສີລັດ, ຢູໂດ, ວູຊູ, ເທຄວັນໂດ, ລົດຖີບ, ຄາຣາເຕໂດ, ມວຍສາກົນ, ຍິງທະນູ, ແລ່ນ-ລານ, ລອຍນ້ຳ ແລະ ຍົກນ້ຳໜັກ. ສ່ວນອີກ 6 ປະເພດກິລາ ກັບ 1 ກິລາສາທິດ ແມ່ນກຸ້ມຕົວເອງດ້ານງົບປະມານ ຄື: ປິ່ງປ່ອງ, ເຕະບານຊາຍ, ຊັອບເທັນນິດ, ພາລາກາຍດິງ, ຍິງປຶນ, ເບັດບອນ ແລະ 1 ກິລາສາທິດ ອີ-ສະປອດ. ຜ່ານການແຂ່ງຂັນຕົວຈິງ ຜົນປາກົດວ່າ ທັບນັກກິລາລາວເຮົາ ສາມາດຍາດມາໄດ້ທັງໝົດ 2 ຫຼຽນເງິນ ແລະ 3 ຫຼຽນທອງ. ໃນນີ້ໄດ້ຈາກກິລາປັນຈັກສີລັດ 1 ຫຼຽນເງິນ ແລະ 2 ຫຼຽນທອງ ແລະ ກິລາກະຕໍ້ 1 ຫຼຽນເງິນ ແລະ 1 ຫຼຽນທອງ ຖືກຈັດຢູ່ໃນອັນດັບ 31 ຂອງຕາຕະລາງສະຫຼຸບຫຼຽນ ຈາກທັງໝົດ 45 ປະເທດເຂົ້າຮ່ວມ.
ຢ່າງໃດກໍ່ຕາມ, ໃນການເຂົ້າຮ່ວມງານມະຫາກຳກິລາເອຊຽນ ເກມ 7 ຄັ້ງຜ່ານມາ ຖືວ່າ ຄັ້ງທີ XVIII ນີ້ ປະສົບຜົນສຳເລັດທີ່ສຸດ ໂດຍອີງຈາກຜົນງານໃນການເຂົ້າຮ່ວມທັງໝົດ 7 ຄັ້ງ ປະກອບມີ: ຄັ້ງທີ XI ປີ 1990 ທີ່ນະຄອນຫຼວງປັກກິ່ງ ສປ ຈີນ ຍາດໄດ້ 1 ຫຼຽນທອງ, ຄັ້ງທີ XIII ປີ 1998 ທີ່ນະຄອນຫຼວງບາງກອກ ປະເທດໄທ ຍາດໄດ້ 1 ຫຼຽນທອງ, ຄັ້ງທີ XIV ປີ 2002 ທີ່ນະຄອນ ບູຊານ ສ ເກົາຫຼີ ຍາດໄດ້ 2 ຫຼຽນທອງ, ຄັ້ງທີ XV ປີ 2006 ທີ່ນະຄອນຫຼວງໂດຮາ ປະເທດກາຕາ ຍາດໄດ້ 1 ຫຼຽນເງິນ, ຄັ້ງທີ XVI ປີ 2010 ແຂວງກວາງໂຈວ ສປ ຈີນ ຍາດໄດ້ 2 ຫຼຽນທອງ, ຄັ້ງທີ XVII ປີ 2014 ຢູ່ເມືອງອິນຊອນ ສ ເກົາຫຼີ ຍາດໄດ້ 1 ຫຼຽນເງິນ ກັບ 2 ຫຼຽນທອງ ແລະ ຄັ້ງທີ XVIII ປີ 2018 ຢູ່ນະຄອນຫຼzວງຈາກາຕາ-ປາເລມບັງ ປະເທດອິນໂດເນເຊຍ ຍາດໄດ້ 2 ຫຼຽນເງິນ ກັບ 3 ຫຼຽນທອງ.
ຄຽງຄູ່ກັບຜົນສຳເລັດທີ່ກ່າວມານັ້ນ, ຍັງມີຈຸດດີ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້. ໃນນີ້ຈຸດດີ ແມ່ນໄດ້ຮັບການຊີ້ນຳ-ນຳພາຢ່າງໃກ້ຊິດຈາກຂັ້ນເທິງ; ໄດ້ມີການກະກຽມແຜນການ, ແຜນງານ, ແຜນຄົນ ແລະ ແຜນງົບປະມານເປັນຢ່າງດີ; ຄະນະຮັບຜິດຊອບຄູເຝິກ ແລະ ນັກກິລາໄດ້ມີຄວາມຕັດສິນໃຈສູງຕໍ່ໜ້າທີ່ວຽກງານທີ່ຕົນເອງຮັບຜິດຊອບ ແລະ ມີຄວາມສາມັກຄີເປັນເອກະພາບ. ສ່ວນຂໍ້ຄົງຄ້າງ ເປັນຕົ້ນແມ່ນການສະໜອງງົບປະມານໃນໄລຍະການກະກຽມເຝິກແອບເບື້ອງຕົ້ນຍັງຊັກຊ້າ ເປັນເຫດໃຫ້ ການສະໜອງອຸປະກອນເຝິກແອບ ແລະ ອັດຕາບຳລຸງໃຫ້ກັບນັກກິລາບາງປະເພດບໍ່ໄດ້ຕາມແຜນການທີ່ວາງໄວ້; ການສົ່ງນັກກິລາໄປເຂົ້າຮ່ວມແຂ່ງຂັນທົດທອບຢູ່ຕ່າງປະເທດ ມີລັກສະນະຊັກຊ້າຍ້ອນງົບປະມານ.
ຂະນະທີ່ບົດຮຽນທີ່ຖອດຖອນໄດ້ ຕ້ອງເພີ່ມທະວີການຊີ້ນຳ-ນຳພາດ້ານການເມືອງແນວຄິດ ໃຫ້ແກ່ຄະນະນຳ, ຄູເຝິກ ແລະ ນັກກິລາຢ່າງເປັນປົກກະຕິ; ສະຫະພັນກິລາແຫ່ງຊາດ ຕ້ອງເປັນເຈົ້າພາບໃນການຄັດເລືອກ ແລະ ສັນຫາຕົວນັກກິລາທີ່ມີຄວາມສາມາດສູງ ເພື່ອເຂົ້າສູນເຝິກຊ້ອມ ແລະ ເຂົ້າຮ່ວມແຂ່ງຂັນ; ຕ້ອງເອົາລະບົບວິທະຍາສາດການກິລາເຂົ້າຊ່ວຍໃນການພັດທະນາກິລາລະດັບສູງ; ສະໜອງງົບປະມານໃຫ້ແກ່ການພັດທະນາກິລາລະດັບສູງ ໂດຍສະເພາະການກະກຽມເຂົ້າຮ່ວມງານແຂ່ງຂັນກິລາໃນລະດັບຕ່າງໆ ໃຫ້ທ່ວງທັນຕາມຄວາມຮຽກຮ້ອງຕ້ອງການ.
ທັງນີ້, ສຳລັບງານມະຫາກຳກິລາເອຊຽນ ເກມ ຄັ້ງທີ 19 ແມ່ນເມືອງຫັງໂຈວ ສປ ຈີນ ຮັບກຽດເປັນເຈົ້າພາບ ໃນປີ 2022.
ອຳໄພວັນ
60 ປະເທດສະມາຊິກ ໄອພີເອັດຊີ ໂຫວດໃຫ້ ສປປ ລາວ ເປັນເຈົ້າພາບ ຈັດແຂ່ງຂັນຍິງປືນ ເລໂວ4 ລະດັບສາກົນ
ປະເທດສະມາຊິກ ໄອພີເອັດຊີ ຫຼື “IPSC” ຈຳນວນ 60 ປະເທດ ຕົກລົງເຫັນດີໂຫວດໃຫ້ ສປປ ລາວ ເປັນເຈົ້າພາບ ຈັດການແຂ່ງຂັນກິລາຍິງປືນ ເລໂວ4 ລະດັບສາກົນ ໃນປີ 2021. ຂະນະທີ່ພາຍໃນປີ 2019 ສະຫະພັນກິລາຍິງປືນແຫ່ງຊາດລາວ ຈະເລີ່ມຄັດເລືອກເອົານັກກິລາຢ່າງເປັນທາງ ການ ແລະ ຄາດວ່າຈະສົ່ງເຂົ້າຮ່ວມເຖິງ 25 ຄົນ.
ເມື່ອວັນທີ 16 ກັນຍາ 2018 ຜ່ານມາ ທີ່ເມືອງພັດທະຍາ ປະເທດໄທ ໄດ້ມີກອງປະຊຸມຄະນະບໍລິຫານສະມາຄົມກິລາຍິງປືນ IPSC ໂລກ ຄັ້ງທີ 42, ໂດຍຕາງໜ້າຈາກສປປ ລາວເຂົ້າຮ່ວມແມ່ນ ທ່ານ ພຸດທະສັກ ສຸກອາລຸນ ປະທານສະໂມສອນກິລາຍິງປືນໄອພີເອັດຊີລາວ, ທັງເປັນຜູ້ອຳນວຍການສະໜາມກິລາຍິງປຶນ 5 ເມສາ ພ້ອມດ້ວຍບັນດາປະເທດສະມາຊິກ ໄອພີເອັດຊີ ທີ່ມາຈາກ 60 ປະເທດ ເຂົ້າຮ່ວມຢ່າງພ້ອມພຽງ.
ໃນກອງປະຊຸມຄັ້ງນີ້, ບັນດາປະເທດສະມາຊິກທີ່ມາຈາກ 60 ປະເທດ ໄດ້ຕົກລົງເຫັນດີເປັນເອກະພາບ ໂຫວດຄະແນນໃຫ້ ສປປ ລາວ ເປັນເຈົ້າພາບ ຈັດການແຂ່ງຂັນກິລາຍິງປືນ ລາຍການ ໄອພີເອັດຊີ ເລໂວ4 ລະດັບສາກົນ ໃນປີ 2021 ທີ່ສະໜາມກິລາຍິງປືນ 5 ເມສາ ເມືອງໄຊເຊດຖາ ນະຄອນຫຼວງວຽງຈັນ. ທັງນີ້, ເພື່ອເປັນການກະກຽມຄວາມພ້ອມດ້ານຕ່າງໆ ເວົ້າລວມ, ເວົ້າສະເພາະແມ່ນການກະກຽມດ້ານນັກກິລາ ສະຫະພັນກິລາຍິງປືນແຫ່ງຊາດລາວ ຮ່ວມກັບ ສະໂມສອນກິລາຍິງປືນໄອພີເອັດຊີລາວ ຈະເລີ່ມຄັດເລືອກເອົານັກກິລາທີ່ມີຄວາມສາມາດ ແລະ ພອນສະຫວັນດີເດັ່ນ ກຽມຕາງໜ້າໃຫ້ ສປປ ລາວເຂົ້າຮ່ວມແຂ່ງຂັນລາຍການດັ່ງກ່າວ ພາຍໃນປີ 2019 ນີ້, ເຊິ່ງຄາດວ່າ ຈະສົ່ງນັກກິລາເຂົ້າຮ່ວມແຂ່ງຂັນທັງໝົດ 25 ຄົນ ຫວັງສ້າງຜົນງານໃຫ້ກັບປະເທດຊາດ ໃນລະດັບສາກົນ.
ທ່ານ ພຸດທະສັກ ສຸກອາລຸນ ກ່າວອີກວ່າ: ສຳລັບການກະກຽມເປັນເຈົ້າພາບ ຈັດການແຂ່ງຂັນ ກິລາຍິງປືນ ໄອພີເອັດຊີ ຊີງແຊ໋ມນາໆຊາດ ເລໂວ3 ຊີງຂັນພະນະທ່ານນາຍົກລັດຖະມົນຕີແຫ່ງ ສປປ ລາວ ຄັ້ງທີ 1 ປະຈຳປີ 2018 ທີ່ສະໜາມກິລາຍິງປືນ 5 ເມສາ ເມືອງໄຊເຊດຖາ ນະຄອນຫຼວງວຽງຈັນ ໃນລະຫວ່າງວັນທີ 26-28 ຕຸລານີ້ ນັບມາຮອດປັດຈຸບັນ ມີຄວາມພ້ອມແລ້ວ 100%. ເຊິ່ງລາຍການນີ້ ຈະມີການຊີງໄຊທັງໝົດ 6 ລາຍການ ຄື: ປືນສະແຕັດດາດ, ປືນໂປດັກຊັນ, ປືນໂປດັກຊັນ ອັອບຕິກ, ປືນໂອເພັນ, ປືນຣີໂວນໂວ່ ແລະ ປືນ ຄາສສິກ ແຂ່ງຂັນ 15 ລາຍການ ແຕ່ລະສະໜາມປີນີ້ ມີການປັບປຸງ ແລະ ແປງຮູບແບບການແຂ່ງຂັນແຕກຕ່າງກວ່າປີທີ່ຜ່ານມາ ຄາດວ່າຈະມີນັກກິລາຈາກ 10 ກວ່າປະເທດ ເຂົ້າຮ່ວມຊີງໄຊຫຼາຍຮ້ອຍຄົນ ໂດຍສະເພາະແມ່ນ ເຈົ້າພາບ ລາວ, ໄທ, ສິງກະໂປ, ມາເກົາ, ຟີລິບປິນ, ສປ ຈີນ, ເຊີເບຍ ແລະ ປະເທດອື່ນໆອີກ ສະເພາະນັກກິລາລາວ ກໍ່ຈະສົ່ງເຂົ້າຮ່ວມແຂ່ງຂັນ 30 ກວ່າຄົນ.
ຂ່າວໂດຍ: ລູກນ້ຳເຊ
ໂກນບານຍິງລາວ ຄວ້າທີ 3 ກັບບ້ານລາຍການ ອາຊີ-ປາຊີຟິກ ທີ່ປະເທດໄທ
ທັບນັກກິລາຄົນພິການໂກນບານຍິງທີມຊາດລາວ ຄວ້າອັນດັບທີ 3 ມາຄອງ ພາຍຫຼັງເອົາຊະນະ ທີມຊາດສິງກະໂປ ມາໄດ້ 11-1 ປະຕູ ໃນການແຂ່ງຂັນກິລາໂກນບານຍິງ ລາຍການ ອາຊີ-ປາຊີຟິກ 2018 ຫຼື “2018 ASIA & PACIFIC INVITATIONAL GOALBALL TOURNAMENT” ທີ່ນະຄອນຫຼວງບາງກອກ ປະເທດໄທ ເປັນເຈົ້າພາບ ລະຫວ່າງວັນທີ 11-14 ກັນຍານີ້. ຂະນະທີ່ ປະເພດທີມຊາຍ ເຮັດໄດ້ດີທີ່ສຸດພຽງແຕ່ໄດ້ເຂົ້າຮ່ວມເທົ່ານັ້ນ ຫຼັງລົງສະໜາມໃນຮອບແບ່ງກຸ່ມທັງຂາໄປ-ຂາກັບ ບໍ່ສາມາດເກັບໄຊຊະນະໄດ້ຈັກນັດ.
ເມື່ອວັນທີ 14 ກັນຍາ ຜ່ານມາ ທີ່ສະໜາມກິລາໃນຮົ່ມ ໄທ-ຍີ່ປຸ່ນ ດິນແດງ ນະຄອນຫຼວງບາງກອກ ປະເທດໄທ, ທັບນັກກິລາຄົນພິການໂກນບານຍິງທີມຊາດລາວ ຊຸດກຽມເຂົ້າຮ່ວມງານມະຫະກຳກິລາເອຊຽນພາຣາເກມ ຄັ້ງທີ XII ທີ່ນະຄອນຫຼວງຈາກາຕາ ປະເທດອິນໂດເນເຊຍ ເປັນເຈົ້າພາບ ໃນລະຫວ່າງວັນທີ 6-13 ຕຸລານີ້ ໄດ້ລົງທຳການແຂ່ງຂັນນັດຊີງອັນດັບ 3 ໃນລາຍການ ໂກນບານຍິງລາຍການ ອາຊີ-ປາຊີຟິກ 2018 ຫຼັງຈາກໃນຮອບຮອງຊະນະເລີດ ຫຼື ຮອບ 4 ທີມສຸດທ້າຍ ເສຍໃຫ້ ທີມຊາດ ສ ເກົາຫຼີ 1-5 ປະຕູ. ເຊິ່ງນັດນີ້, ທີມຊາດລາວ ລົງສະໜາມພົບກັບ ທີມຊາດສິງກະໂປ. ຜ່ານການແຂ່ງຂັນ ຜົນປາກົດວ່າ ທີມຊາດລາວ ສາມາດເອົາຊະນະໄປໄດ້ 11-1 ປະຕູ ເຮັດໃຫ້ ຄວ້າອັນດັບ 3 ມາຄອງໄດ້ສຳເລັດ. ຂະນະທີ່ ແຊ໋ມຕົກເປັນຂອງທີມຊາດໄທ ເອົາຊະນະ ທີມຊາດ ສ ເກົາຫຼີ ໄປ 8-1 ປະຕູ. ສ່ວນ ປະເພດທີມຊາຍ ເຮັດໄດ້ດີທີ່ສຸດພຽງແຕ່ໄດ້ເຂົ້າຮ່ວມເທົ່ານັ້ນ ຫຼັງລົງສະໜາມໃນຮອບແບ່ງກຸ່ມທັງຂາໄປ-ຂາກັບ ບໍ່ສາມາດເກັບໄຊຊະນະໄດ້ຈັກນັດ ຈົບອັນດັບສຸດທ້າຍຂອງຕາຕະລາງ.
ສຳລັບຜົນງານຂອງທີມໂກນບານສາວລາວເຮົາ ໃນຮອບທຳອິດ ແມ່ນສາມາດ ຊະນະ 2 ນັດ ແລະ ເສຍ 2 ນັດ ມີ 6 ຄະແນນ ປະກອບມີ ຊະນະ ທີມຊາດສິງກະໂປ 4-1 ປະຕູ, ຊະນະ ທີມຊາດອິນເດຍ 10-0 ປະຕູ ແລະ ເສຍໃຫ້ ທີມຊາດ ສ ເກົາຫຼີ 1-4 ປະຕູ ແລະ ເສຍໃຫ້ ເຈົ້າພາບ ທີມຊາດໄທ 1-7 ປະຕູ. ສ່ວນໃນ ຮອບ 4 ທີມສຸດທ້າຍ ລາວ ເສຍໃຫ້ ສ ເກົາຫຼີ 1-5 ປະຕູ.
ອຳໄພວັນ
ຂ່າວການເຄື່ອນໄຫວຕ່າງໆ
ສື່ມວນຊົນລາວ 40 ກວ່າຄົນສຳເລັດຍົກລະດັບການໂຄສະນາ ແລະ ນຳໃຊ້ເຕັກນິກໃໝ່ ທີ່ ສປ ຈີນ
ສື່ມວນຊົນຂອງ ສປປ ລາວ ຈຳນວນ 42 ຄົນ ທີ່ປະກອບມີຫຼາຍພາກສ່ວນ ເປັນຕົ້ນແມ່ນ ຄະນະໂຄສະນາອົບຮົມສູນກາງພັກ, ສະຖາບັນການເມືອງ-ການປົກຄອງແຫ່ງຊາດ, ຄະນະກວດກາ ສູນກາງພັກ, ຄະນະພົວພັນຕ່າງປະເທດສູນກາງພັກ, ຄະນະຈັດຕັ້ງສູນກາງພັກ, ກະຊວງຖະແຫຼງຂ່າວ, ວັດທະນາທຳ ແລະ ທ່ອງທ່ຽວ, ກະຊວງສຶກສາທິການ ແລະ ກິລາ, ກະຊວງປ້ອງກັນປະເທດ, ກະຊວງປ້ອງກັນຄວາມສະຫງົບ, ກະຊວງໄປສະນີໂທລະຄົມມະນາຄົມ ແລະ ການສື່ສານ ແລະ ຄະນະໂຄສະນາອົບຮົມນະຄອນຫຼວງ, ໄຊຍະບູລີ, ຫຼວງພະບາງ, ຊຽງຂວາງ, ບໍລິຄຳໄຊ ແລະ ແຂວງວຽງຈັນ ໄດ້ສຳເລັດການເຂົ້າຮ່ວມເຝິກອົບຮົມການໂຄສະນາສື່ມວນຊົນ ແລະ ການໃຊ້ເຕັກນິກໃໝ່ດ້ານສື່ມວນຊົນ ທີ່ ສປ ຈີນ.
ພິທີປິດເຝິກອົບຮົມດັ່ງກ່າວ, ໄດ້ມີຂຶ້ນໃນວັນທີ 15 ກັນຍາ ຜ່ານມາ ພາຍຫຼັງໄດ້ດໍາເນີນມາຕັ້ງແຕ່ວັນທີ 26 ສິງຫາ 2018 ທີ່ນະຄອນຊ່າງຊາ ແຂວງຫູນານ ສປ ຈີນ. ໂດຍການເປັນປະທານຮ່ວມຂອງທ່ານ ປອ. ຄຳໝັ້ນ ຈັນທະລັງສີ ຮອງຫົວໜ້າຄະນະໂຄສະນາອົບຮົມສູນກາງພັກ ສປປ ລາວ, ທ່ານ ລ້ຽວກວ່າງຮຸຍ ຫົວໜ້າຫ້ອງການກົດລະບຽບ ແລະ ສາຍສຳພັນການຄ້າສາກົນ ພະແນກການຄ້າ ແຂວງຫູນານ, ທ່ານ ເສີນປໍ່ ຜູ້ອຳນວຍການ ວິທະຍາໄລ ອາຊີວະສຶກສາການຄ້າຕ່າງປະເທດ ແຂວງຫູນານ, ທ່ານ ເສິນຊີນ ຮອງຜູ້ອຳນວຍການ ກຸ່ມບໍລິສັດສື່ມວນຊົນການພິມຈົ່ງນານ, ທ່ານ ກ່ານແສຫຼຽງ ທຽບເທົ້າ ຮອງຫົວໜ້າ ພະແນກການຄ້າແຂວງຫູນານ.
ໃນຊຸດເຝິກອົບຮົມຄັ້ງນີ້, ສຳມະນາກອນໄດ້ຮຽນຮູ້ທັງພາກທິດສະດີ ແລະ ພາກທັດສະນະສຶກສາຕົວຈິງ, ເຊິ່ງໃນພາກທິດສະດີ ແມ່ນໄດ້ຮັບຟັງການບັນຍາຍເນື້ອໃນເອກະສານທີ່ກ່ຽວຂ້ອງກັບວຽກງານໂຄສະນາຂ່າວສານຈາກນັກຊ່ຽວຊານດ້ານການນຳໃຊ້ເຕັກນິກສື່ມວນຊົນແບບໃໝ່ ຈຳນວນ 12 ຫົວຂໍ້ ຄື: ການວິເຄາະກ່ຽວກັບອຸດສາຫະກໍາສິ່ງພິມດິຈິຕອນຂອງປະເທດຈີນ, ການຄົ້ນຄິດການຄຸ້ມຄອງບໍລິຫານ, ຈິນຕະນາການ ແລະ ການບັນລຸຕົວຈິງໃນການເຊື່ອມໂຍງສື່, ສື່ແບບໃໝ່ກັບການຂັບເຄື່ອນຂອງຍຸກສະໄໝ, ໃນຍຸກແຫ່ງອິນເຕີເນັດການປ່ຽນແປງຂອງສື່ ແລະ ນະວັດຕະກຳໃໝ່ ໃນການສະເໜີລາຍງານຂໍ້ມູນ, ຈາກຜົນສະທ້ອນຂອງຂ່າວສານເທິນເຊິນ (tencent) ມາເບິ່ງທ່າຂະຫຍາຍຕົວຂອງສື່ອິນເຕີເນັດເຄື່ອນທີ່, ຍຸກອິນເຕີເນັດການແຍກຕົວຂອງໂຄງປະກອບນິເວດວິທະຍາຂອງສື່ມວນຊົນ ແລະ ການປະກອບຕົວຄືນໃໝ່ຂອງລະບຽບການເຜີຍແຜ່, ໂຄງສ້າງໃໝ່ຂອງສື່ກັບນະວັດຕະກຳໃໝ່ໃນການເຜີຍແຜ່ວຽກງານບໍລິຫານ, ສື່ມວນຊົນກັບການປ່ຽນແປງຂອງວັດທະນະທຳຊຸມຊົນ, ຄວາມຫວັງ ແລະ ຂໍ້ຫຍຸ້ງຍາກໃນການຫັນປ່ຽນລະບົບດິຈິຕອນຂອງສໍານັກພິມ, ສະພາບການພັດທະນາອຸດສາຫະກໍາວັດທະນາທໍາຂອງແຂວງຫູນານໃນປັດຈຸບັນ, ທ່າອ່ຽງ ແລະ ຍຸດທະສາດການພັດທະນາໃນອະນາຄົດ, ຍຸກແຫ່ງການເຊື່ອມໂຍງສື່, ການຊອກຄົ້ນ ແລະ ພຶດຕິກຳຕົວຈິງໃນການທ້ອນໂຮມຊັບພະຍາກອນຂົງເຂດຂໍ້ມູນຂ່າວສານ ແລະ ການສຶກສາ.
ນອກຈາກຮຽນທິດສະດີແລ້ວ ເພື່ອໃຫ້ໄດ້ຮຽນຮູ້ບົດຮຽນຕົວຈິງ, ສຳມະນາກອນໄດ້ເດີີນທາງໄປທັດສະນະສຶກສາຢູ່ເວບໄຊແດງ, ເຊິ່ງເປັນເວບໄຊຂອງອົງຄະນະພັກແຂວງຫູນານ, ຢ້ຽມຊົມບໍລິສັດທຽນເວີນຊູເມີຍ, ບໍລິສັດເວບໄຊຕ້າຊັງ, ສູນຄົ້ນຄວ້າຂອງບໍລິສັດຫົວເວີຍ, ເຊິ່ງເປັນບໍລິສັດຜະລິດເວບໄຊທີ່ມີຊື່ສຽງ ແລະ ນຳໃຊ້ເຕັກນິກທີ່ທັນສະໄໝເຂົ້າໃນສື່ມວນຊົນໃໝ່, ໄປຢ້ຽມຊົມວັດທະທໍາທາງປະຫວັດສາດຢູ່ເມືອງຊູຈາງຢຽນ (ຊົນລະປະທານທີ່ມີອາຍຸຫຼາຍກວ່າ 2 ພັນປີແຂວງເສສວນ), ຢ້ຽມຊົມສູນຄົ້ນຄວ້າໝີແພນດ້າ ນະຄອນເສິນຕູ, ຢ້ຽມຊົມຫໍພິພິຕະພັນຊາງສຽງ ແລະ ສະຖານທີ່ທາງປະຫວັດສາດຂອງນະຄອນໂສງຊິ້ງ, ບໍລິສັດຈົງຫຼຽນຈົງເຄີ ກົນຈັກວິສະຫະກຳ-ກະສິກຳ, ໝູ່ບ້ານທ່າເຮືອຈຽ້ນກ້າງ, ຫໍພິພິຕະພັນ ນະຄອນຊາງຊາ, ດອນໝາກກ້ຽງ ພ້ອມທັງສະຖານທີ່ທາງປະຫວັດສາດ ແລະ ວັດທະນາທໍາທີ່ໜ້າສົນໃນຈຳນວນໜຶ່ງພາຍໃນນະຄອນຊາງຊາ ແຂວງຫູນານ.
(ໂດຍ ໜຸ່ມເຈັດ)
ແມ່ຍິງສຳນັກ ສສກ ສ່ອງແສງວຽກງານໃນໄລຍະຜ່ານມາ
ສະຫະພັນແມ່ຍິງຮາກຖານສຳນັກ ກະຊວງສຶກສາທິການ ແລະ ກິລາ (ສສກ) ໄດ້ຈັດກອງປະຊຸມສ່ອງແສງ 3 ເດືອນ (ກໍລະກົດ ຫາ ກັນຍາ 2018) ເພື່ອສະຫຼຸບການເຄື່ອນໄຫວໃນໄລຍະເດືອນ 3 ເດືອນ, ຮັບຟັງສະພາບທີ່ພົ້ນເດັ່ນຂອງແຕ່ລະໜ່ວຍ ແລະ ແນະນໍາການຈັດຕັ້ງປະຕິບັດຂະບວນການແຂ່ງຂັນ 3 ດີຂອງ 3 ອົງການຈັດຕັ້ງມະຫາຊົນ.
ກອງປະຊຸມດັ່ງກ່າວ, ໄດ້ຈັດຂຶ້ນໃນວັນທີ 14 ກັນຍາ ຜ່ານມາ ທີ່ຫ້ອງປະຊຸມສໍານັກງານກະຊວງສຶກສາທິການ ແລະ ກິລາ (ຕຶກສີສະເກດ), ໂດຍໃຫ້ກຽດເຂົ້າຮ່ວມຂອງສະຫາຍ ນາງ ປ້ອງມິ່ງ ສີສະຫວັດ ຄະນະບໍລິຫານງານສະຫະພັນແມ່ຍິງ ກະຊວງ ສສກ, ປະທານສະຫະພັນແມ່ຍິງຮາກຖານສໍານັກ ກະຊວງ ສສກ, ສະຫາຍ ນາງ ທອງແດງ ສົມຈັນມະວົງ ຄະນະສະຫະພັນແມ່ຍິງຮາກຖານສໍານັກ ກະຊວງສຶກສາທິການ ແລະ ກິລາ, ພ້ອມດ້ວຍຄະນະສະຫະພັນແມ່ຍິງຮາກຖານສໍານັກ ກະຊວງສຶກສາທິການ ແລະ ກິລາ, ບັນດາຫົວໜ້າໜ່ວຍສະຫະພັນແມ່ຍິງຫ້ອງການ, ກົມ, ສະຖາບັນ, ສູນ, ວິທະຍາໄລສົງອົງຕື້, ລັດວິສະຫະກິດອຸປະກອນການສຶກສາ ແລະ ພາກສ່ວນຕ່າງໆທີ່ຂຶ້ນກັບສະຫະພັນແມ່ຍິງຮາກຖານສໍານັກ ກະຊວງສຶກສາທິການ ແລະ ກິລາ.
ໃນກອງປະຊຸມ, ສະຫາຍ ນາງ ປ້ອງມິ່ງ ສີສະຫວັດ ໄດ້ສະຫຼຸບວຽກງານທີ່ພົ້ນເດັ່ນປະຈໍາ 3 ເດືອນ (ກໍລະກົດ ຫາ ກັນຍາ 2018) ແລະ ທິດທາງແຜນການໃນຕໍ່ໜ້າ (ຕຸລາ ຫາ ທັນວາ 2018), ເຊິ່ງໄດ້ຈັດຕັ້ງປະຕິບັດວຽກງານຕາມຄວາມຮຽກຮ້ອງຕ້ອງການຂອງແນວທາງປ່ຽນແປງໃໝ່ຂອງພັກ ໂດຍອົງການຈັດຕັ້ງສະຫະພັນແມ່ຍິງຮາກຖານສໍານັກ ກະຊວງສຶກສາທິການ ແລະ ກິລາ ໄດ້ຖືເອົາວຽກງານການສຶກສາອົບຮົມການເມືອງ-ແນວຄິດ ເປັນວຽກງານທີ່ສໍາຄັນ ແລະ ຕົ້ນຕໍ, ກະຕຸກຊຸກຍູ້ແມ່ຍິງໃຫ້ມີຄວາມກ້າຫານສະແດງຄວາມຄິດເຫັນຢ່າງເປັນເຈົ້າການ. ນອກຈາກນັ້ນ, ໃນໄລຍະຜ່ານມາຍັງໄດ້ເຂົ້າຮ່ວມເຊື່ອມຊຶມມະຕິກອງປະຊຸມຕ່າງໆຂອງພັກ, ລັດ ທີ່ຫ້ອງການຄະນະພັກໄດ້ຈັດຂຶ້ນ ໂດຍມີຜູ້ເຂົ້າຮ່ວມ ຈໍານວນ 102 ສະຫາຍ, ເຂົ້າຮ່ວມກອງປະຊຸມຜູ້ບໍລິຫານການສຶກສາທົ່ວປະເທດ ຈໍານວນ 16 ສະຫາຍ, ເຂົ້າຮ່ວມຮັບຟັງປາຖະກະຖາວັນເກີດປະທານສຸພານຸວົງ, ວັນສ້າງຕັ້ງແມ່ຍິງລາວ ແລະ ໄປຢ້ຽມຊົມຫໍພິພິຕະພັນປະທານ ສຸພານຸວົງ ແລະ ຫໍມູນເຊື້ອແມ່ຍິງລາວ 2 ຄັ້ງ ມີຜູ້ເຂົ້າຮ່ວມ 93 ສະຫາຍ, ສະມາຊິກສະຫະພັນແມ່ຍິງສໍານັກ ໄດ້ປະກອບສ່ວນທາງວັດຖຸ ເປັນຕົ້ນແມ່ນເຄື່ອງນຸ່ງຫົ່ມ ແລະ ວັດຖຸອຸປະກອບຕ່າງໆ ເພື່ອຊ່ວຍເຫຼືອໄພນໍ້າຖ້ວມ ຢູ່ແຂວງອັດຕະປື, ເຂົ້ຮ່ວມລົງເກັບກໍາຂໍ້ມູນວຽກງານ 3 ສ້າງ ແລະ ຕິດຕາມການກະກຽມການໄຂສົກຮຽນໃໝ່ 2018-2019 ຂອງແຕ່ລະແຂວງ ມີແມ່ຍິງເຂົ້າຮ່ວມ 10 ກວ່າສະຫາຍ, ໄດ້ຈັດຕັ້ງປະຕິບັດວຽກງານຕ່າງໆ ແລະ ເຄື່ອນໄຫວວຽກງານຕ່າງໆ ທີ່ທາງຄະນະຈັດຕັ້ງ ກະຊວງສຶກສາທິການ ແລະ ກິລາ ແລະ ອ້ອມຂ້າງກະຊວງ ສສກ ຈັດຂຶ້ນ.
ນອກຈາກນັ້ນ, ໃນກອງປະຊຸມຍັງໄດ້ສະຫຼຸບຕີລາດ້ານດີ, ດ້ານອ່ອນ ໃນການເຄື່ອນໄຫວຂອງຮາກຖານສໍານັກ, ຮັບຟັງລາຍງານສະຫຼຸບການເຄື່ອນໄຫວໃນໄລຍະເດືອນກໍລະກົດ ຫາ ກັນຍາ 2018, ຮັບຟັງສະພາບທີ່ພົ້ນເດັ່ນຂອງແຕ່ລະໜ່ວຍ, ແນະນໍາການຈັດຕັ້ງປະຕິບັດຂະນວນການແຂ່ງຂັນ 3 ດີຂອງ 3 ອົງການຈັດຕັ້ງມະຫາຊົນ ແລະ ປຶກສາຫາລືບັນຫາອື່ນໆ.
ສໍາລັບແຜນການທິດທາງໃນຕໍ່ໜ້າ ແມ່ນຈະສືບຕໍ່ສຶກສາອົບຮົມການເມືອງ-ແນວຄິດ, ຄຸນທາດການເມືອງ, ຄຸນສົມບັດສິນທໍາປະຕິວັດ, ເຊິ່ງເຂົ້າຮ່ວມເຊື່ອມຊຶມມະຕິຕ່າງໆຂອງພັກທີ່ອົງຄະນະພັກ ແລະ ອົງການປົກຄອງໄດ້ຈັດຂຶ້ນ, ເປັນເຈົ້າການຈັດກອງປະຊຸມສະຫຼຸບວຽກງານ 3 ດີ, ເຄິ່ງສະໄໝ ແລະ ສືບຕໍ່ຈັບມືແຂ່ງຂັນກັບ 3 ອົງການຈັດຕັ້ງ, ປຸກລະດົມສະມາຊິກແມ່ຍິງໃຫ້ເປັນເຈົ້າການປະກອບສ່ວນເຂົ້າໃນການພັດທະນາການສຶກສາ, ແຜນພັດທະນາແມ່ຍິງ, ຍົກສູງສະຕິລະວັງຕົວຕ້ານທຸກກົນອຸບາຍຂອງສັດຕູ, ເປັນເຈົ້າການສະກັດກັ້ນ ແລະ ຕ້ານປາກົດການຫຍໍ້ທໍ້ໃນຕົນເອງ, ຖັນແຖວເອື້ອຍນ້ອງແມ່ຍິງ ແລະ ການຈັດຕັ້ງ ແລະ ສືບຕໍ່ເຂົ້າຮ່ວມປະກອບສ່ວນທຸກຂະບວນວຽກງານກັບອົງການຈັດຕັ້ງພັກ, ລັດ ແລະ ອົງການຈັດຕັ້ງມະຫາຊົນຈັດຂຶ້ນ.
ໂດຍ: ນາງ ຕຸ່ນຄໍາ
