ພິມ
ລາຍລະອຽດ: ໝວດ: ໜ້າຫຼັກ | ເຜີຍແຜ່ເມື່ອ 17 ກຸມພາ 2021 | ກົດເບິ່ງ: 387

R1ສະຖາບັນຄົ້ນຄວ້າ ວິທະຍາສາດການສຶກສາ (ສວສ) ກະຊວງ ສຶກສາ ທິການ ແລະ ກິລາ ໄດ້ຈັດ ພິທີປະກາດ ພະນັກງານ ຫຼັກແຫຼ່ງ ອອກ ພັກ ການ- ຮັບ ອຸດໜູນ ບໍານານ ເມື່ອວັນທີ 5 ມັງກອນ ຜ່ານມາ ທີ່ຫ້ອງປະຊຸມ ສະຖາບັນດັ່ງກ່າວ, ໂດຍ ພາຍໃຕ້ການ ເປັນ ປະທານ ຂອງທ່ານ ຮສ.ປອ ພຸດ ສິມມາລາວົງ ຮອງ ລັດ ຖະມົນຕີ ກະຊວງ ສຶກສາທິການ ແລະ ກິລາ, ມີທ່ານ ປອ ອ່ອນແກ້ວ ນວນນະວົງ ຜູ້ອຳນວຍການ ສະຖາ ບັນ ຄົ້ນຄວ້າ ວິທະຍາ ສາດການສຶກສາ ພ້ອມດ້ວຍຄະນະ, ຜູ້ອຳນວຍການ-ຮອງ ຜູ້ອຳນວຍການສູນ, ຫົວໜ້າ-ຮອງ ຫົວໜ້າພະແນກ, ຫົວໜ້າ-ຮອງຫົວໜ້າຂະແໜງ ຕະຫຼອດຮອດພະນັກງານ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ໃນພິທີ, ທ່ານ ຄຳຈັນ ລັດຖະຍອດ ຮອງຜູ້ອຳນວຍການ ສະຖາບັນຄົ້ນຄວ້າວິທະຍາສາດການສຶກສາ, ຜູ້ອຳນວຍການສູນສົ່ງເສີມພາສາຕ່າງປະເທດ ໄດ້ຜ່ານຂໍ້ຕົກລົງ ວ່າດ້ວຍການອະນຸມັດອອກພັກການ ເພື່ອຮັບອຸດໜູນບໍານານ, ລັດຖະມົນຕີ ກະຊວງສຶກສາທິການ ແລະ ກິລາ ໄດ້ຕົກລົງເຫັນດີໃຫ້ ທ່ານ ສຸກສະຫວັນ ພອນເທວາ ຮອງຜູ້ອຳນວຍການ ສະຖາບັນຄົ້ນຄວ້າວິທະຍາສາດການສຶກສາ ອອກພັກການ ເພື່ອຮັບອຸດໜູນບໍານານນັບແຕ່ວັນທີ 1 ມັງກອນ 2021 ເປັນຕົ້ນໄປ, ລວມປີການທັງໝົດ 41 ປີ, ອັດຕາສ່ວນຮ້ອຍບໍານານ 85%, ລະດັບວິຊາສະເພາະປະລິນຍາໂທ; ເຫັນດີໃຫ້ ທ່ານ ນາງ ປາກຽນ ຫຼວງໄຊຊະນະ ຮອງຜູ້ອຳນວຍການ ສະຖາບັນຄົ້ນຄວ້າວິທະຍາສາດການສຶກສາ ອອກພັກການ ເພື່ອຮັບອຸດໜູນບໍານານນັບແຕ່ ວັນທີ 1 ມັງກອນ 2021 ເປັນຕົ້ນໄປ, ລວມປີການທັງໝົດ 36 ປີ, ອັດຕາສ່ວນຮ້ອຍບໍານານ 81%, ລະດັບວິຊາສະເພາະ ປະລິນຍາຕີ; ເຫັນດີໃຫ້ ທ່ານ ພົມມາ ຄຳມັງ ຮອງຜູ້ອຳນວຍການ ສູນຄົ້ນຄວ້າ ແລະ ປະເມີນຜົນການສຶກສາ, ສະຖາບັນຄົ້ນຄວ້າວິທະຍາສາດການສຶກສາ ອອກພັກການ ເພື່ອຮັບອຸດໜູນບໍານານນັບແຕ່ວັນທີ 1 ມັງກອນ 2021 ເປັນຕົ້ນໄປ, ລວມປີການທັງໝົດ 38 ປີ, ອັດຕາສ່ວນຮ້ອຍບໍານານ 83%, ລະດັບວິຊາສະເພາະ ປະລິນຍາຕີ ແລະ ເຫັນດີໃຫ້ ທ່ານ ນາງ ສົມຈັນ ແກ້ວປະເສີດ ຮອງຜູ້ອຳນວຍການ ສູນໂຄສະນາຂ່າວສານການສຶກສາ ແລະ ກິລາ, ສະຖາບັນຄົ້ນຄວ້າວິທະຍາສາດການສຶກສາ ອອກພັກການ ເພື່ອຮັບອຸດໜູນບໍານານນັບແຕ່ວັນທີ 1 ມັງກອນ 2021 ເປັນຕົ້ນໄປ, ລວມປີການທັງໝົດ 35 ປີ, ອັດຕາສ່ວນຮ້ອຍບໍານານ (ທາດເບື່ອ) 85%, ລະດັບວິຊາສະເພາະ ປະລິນຍາຕີ.

       ໂອກາດດຽວກັນນີ້, ທ່ານ ຮສ.ປອ ພຸດ ສິມມາລາວົງ ໄດ້ກ່າວວ່າ: ໃນປີຜ່ານມານີ້ ມີຄວາມຫຍຸ້ງຍາກຫຼາຍຢ່າງ ໂດຍສະເພາະມີຂ່າວພະຍາດໂຄວິດ-19 ລະບາດ ແລະ ໄດ້ມີຄຳສັ່ງຈາກລັດຖະບານໃຫ້ປິດເມືອງ ເພື່ອຄວບຄຸມພະຍາດດັ່ງກ່າວ, ຫຼັງຈາກປິກເມືອງແລ້ວ ໄດ້ມີການແກ້ໄຂບັນຫາຕ່າງໆທີ່ໄດ້ຮັບຜົນກະທົບຈາກພະຍາດໂຄວິດ-19 ເພື່ອເຮັດໃຫ້ການຮຽນການສອນໄດ້ກຳເນີດຕໍ່ໄປ, ຊຶ່ງພວກເຮົາໄດ້ຮັບພາລະເປັນຜູ້ສ້າງເຄື່ອງມືອຸປະກອນໃຫ້ແກ່ຄູສອນ ເປັນຕົ້ນແມ່ນປື້ມແບບຮຽນ, ເຄື່ອງມືອຸປະກອນໃນການສິດສອນ, ເຂົ້າຮ່ວມໃນການອອກແບບການຝຶກອົບຮົມຫຼັກສູດໃໝ່ຫຼາກຫຼາຍຢ່າງ ໂດຍພະຍາຍາມຕິດຕາມພາຍໃຕ້ການນຳພາຂອງຄະນະພັກ, ຄະນະນຳຂອງສະຖາບັນ ພວກເຮົາໄດ້ພ້ອມກັນຜ່ານຜ່າຄວາມຫຍຸ້ງຍາກມາໄດ້ ແລະ ເຮັດສຳເລັດໜ້າທີ່ຫຼາຍຢ່າງ ໂດຍສະເພາະການສ້າງວິດີໂອ, ສ້າງລາຍການ ເພື່ອສິດສອນລູກຫຼານຂອງພວກເຮົາ ໂດຍການເອົາລົງທາງອອນລາຍຕ່າງໆ ແລະ ມີຜູ້ເຂົ້າຊົມ ແລະ ຕິດຕາມກໍບໍ່ໜ້ອຍ, ຊຶ່ງເປັນພື້ນຖານໃຫ້ແກ່ພວກເຮົາດຽວນີ້. ຢ່າງໃດກໍຕາມ, ຕໍ່ໄປການເພີ່ມລາຍການ ວິທະຍຸ, ລາຍການໂທລະພາບ ເປັນການເພີ່ມວຽກໂດຍກົງໃຫ້ກັບພວກເຮົາ ໂດຍໄດ້ຮັບການສະໜັບສະໜູນຈາກຫຼາຍບ່ອນ. ນອກຈາກນັ້ນ, ໄດ້ສັງເກດເຫັນວ່າ ໄດ້ສ້າງແບບຟອມການຮຽນຮູ້ຈາກການລາຍງານກໍໄດ້ດຳເນີນແລ້ວ, ພ້ອມທັງໄດ້ຈັດກອງປະຊຸມວິທະຍາສາດການສຶກສາລະດັບຊາດ ແລະ ອື່ນໆ.

      ຂະນະດຽວກັນ, ທ່ານ ຮສ.ປອ ພຸດ ສິມມາລາວົງ ຍັງໄດ້ກ່າວອີກວ່າ: ຈາກຜົນງານທັງໝົດນັ້ນ, ລ້ວນແຕ່ເກີດຈາກປັດໃຈຂອງພວກເຮົາ. ໃນນັ້ນ, ທີ່ລືມບໍ່ໄດ້ແມ່ນການປະກອບສ່ວນຢ່າງຫ້າວຫັນ, ມີຄວາມຮັບຜິດຊອບ ແລະ ເປັນເຈົ້າການຂອງ 4 ທ່ານ, ຊຶ່ງຕະຫຼອດໄລຍະເວລາການປະຕິບັດວຽກງານຂອງທັວ 4 ທ່ານ ແມ່ນຈະຕິດພັນໃນການປະກອບສ່ວນ, ອຸທິດເຮື່ອແຮງ, ສະຕິປັນຍາ ເພື່ອພັດທະນາການສຶກສາ ໂດຍສະເພາະການພັດທະນາວຽກງານຕ່າງໆຢູ່ໃນສະຖາບັນຂອງພວກເຮົານີ້. ຕາງໜ້າໃຫ້ແກ່ຄະນະນຳກະຊວງສຶກສາທິການ ແລະ ກິລາ ສະແດງຄວາມຮູ້ບຸນຄຸນ ແລະ ຊົມເຊີຍຜົນງານທີ່ຍິ່ງໃຫຍ່ຂອງພວກທ່ານທີ່ໄດ້ມາປະກອບສ່ວນວຽກງານໃນຂະແໜງການສຶກສາ ແລະ ກິລານີ້.R2