ພິມ
ລາຍລະອຽດ: ໝວດ: ໜ້າຫຼັກ | ເຜີຍແຜ່ເມື່ອ 16 ສິງຫາ 2021 | ກົດເບິ່ງ: 124

sisook3ທ່ານຮອງລັດຖະມົນຕີ ກະຊວງສຶກສາທິການ ແລະ ກິລາ (ສສກ) ໄດ້ໃຫ້ກຽດເຂົ້າຢ້ຽມຢາມ ພົບປະຄະນະຮັບຜິດຊອບວຽກງານ ພ້ອມທັງ ໃຫ້ທິດຊີ້ນຳ ຕໍ່ການຈັດຕັ້ງປະຕິບັດວຽກງານ ແກ່ສະຖາບັນຄົ້ນຄວ້າວິທະຍາສາດການສຶກສາ (ສວສ) ເພື່ອເປັນ ການເຮັດໃຫ້ວຽກງານພາຍໃນສະຖາບັນມີຄຸນນະພາບ ແລະ ມີບາດກ້າວທີ່ດີຂຶ້ນ.

 

ເມື່ອວັນທີ 6 ສິງຫາ ຜ່ານມາ ທີ່ຫ້ອງປະຊຸມ ສະຖາບັນຄົ້ນຄວ້າ ວິທະຍາສາດການສຶກສາ ກະຊວງສຶກສາທິການ ແລະ ກິລາ, ທ່ານ ປອ ນາງ ສີສຸກ ວົງວິຈິດ ຮອງລັດຖະມົນຕີ ກະຊວງສຶກສາທິການ ແລະ ກິລາ, ທັງເປັນຜູ້ຊີ້ນຳວຽກງານສະຖາບັນ ໄດ້ໃຫ້ກຽດເຂົ້າຢ້ຽມຢາມ ແລະ ພົບປະຄະນະຮັບຜິດຊອບວຽກງານດ້ານຕ່າງໆພາຍໃນສະຖາບັນຄົ້ນຄວ້າວິທະຍາສາດການສຶກສາ ແລະ ໃຫ້ກຽດຕ້ອນຮັບໂດຍທ່ານ ປອ ອ່ອນແກ້ວ ນວນນະວົງ ຜູ້ອຳນວຍການສະຖາບັນຄົ້ນຄວ້າວິທະຍາສາດການສຶກສາ, ມີຜູ້ອຳນວຍການສູນ, ພະແນກ, ຕາງໜ້າຈາກ 3 ອົງການຈັດຕັ້ງມະຫາຊົນ ຕະຫຼອດຮອດພະນັກງານ ແລະ ພາກສ່ວນທີ່ກ່ຽວຂ້ອງເຂົ້າຮ່ວມ.

ໃນໂອກາດດັ່ງກ່າວ, ທ່ານ ປອ ອ່ອນແກ້ວ ນວນນະວົງ ໄດ້ກ່າວສະແດງຄວາມຕ້ອນຮັບຢ່າງອົບອຸ່ນ ພ້ອມທັງລາຍງານໃຫ້ຮູ້ເຖິງການເຄື່ອນໄຫວວຽກງານພາຍໃນສະຖາບັນວ່າ: ປັດຈຸບັນສະຖາບັນຄົ້ນຄວ້າວິທະຍາສາດການສຶກສາ ປະກອບມີ ສູນພັດທະນາຫຼັກສູດ, ສູນພັດທະນາສື່ການຮຽນການສອນ, ສູນຄົ້ນຄວ້າ ແລະ ປະເມີນຜົນການສຶກສາ, ສູນສົ່ງເສີມພາສາຕ່າງປະເທດ, ສູນໂຄສະນາຂ່າວສານການສຶກສາ ແລະ ກິລາ ແລະ ມີພະແນກບໍລິຫານ ແລະ ຫ້ອງສະໝຸດ, ມີພະນັກງານທັງໝົດ 111 ຄົນ, ຍິງ 50 ຄົນ; ການຈັດຕັ້ງປະຕິບັດວຽກງານພາຍໃນ ແມ່ນໄດ້ສຳເລັດການອອກຫົວບົດສອບເສັງຈົບ ມ.4 ແລະ ມ.7, ຈັດການຄົ້ນຄວ້າວິທະຍາສາດການສຶກສາຮ່ວມກັບພາກສ່ວນຕ່າງໆ, ສົ່ງເສີມວຽກງານພາສາຕ່າງປະເທດ, ວຽກງານໂຄສະນາຂ່າວສານການສຶກສາ ແລະ ກິລາ ໄດ້ມີການຈັດພິມໜັງສືພິມຄືນເປັນປົກກະຕິ ພາຍຫຼັງໄດ້ຢຸດການຈັດພິມຊົ່ວຄາວເປັນໄລຍະ 3 ເດືອນ (5, 6 ແລະ 7) ຍ້ອນການແຜ່ລະບາດຂອງພະຍາດໂຄວິດ-19, ໄດ້ກະກຽມສະເຫຼີມສະຫຼອງວັນສ້າງຕັ້ງສະຖາບັນ ຄົບຮອບ 35 ປີ, ປັບປຸງລາຍການອອກອາກາດທາງໂທລະພາບສຶກສາ-ກິລາຄືນໃໝ່, ໄດ້ເຄື່ອນໄຫວວຽກງານຫ້ອງສະໝຸດເປັນປົກກະຕິ ແລະ ໄດ້ປະສົບຜົນສຳເລັດໃນການພັດທະນາຕົ້ນສະບັບວິຊາຕ່າງໆໃນການປັບປຸງ ຫຼັກສູດໃໝ່ ແລະ ວຽກງານອື່ນໆອີກທີ່ກ່ຽວຂ້ອງ.

ຂະນະດຽວກັນ, ທ່ານ ປອ ນາງ ສີສຸກ ວົງວິຈິດ ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ຄະນະພັກ ຄະນະນຳສະຖາບັນຄົ້ນຄວ້າວິທະຍາສາດການສຶກສາ ແລະ ຄະນະສູນພາຍໃນສະຖາບັນທີ່ໄດ້ເອົາໃຈໃສ່ຄຸ້ມຄອງບໍລິຫານສະຖາບັນ ໄດ້ດີ, ຊຶ່ງວຽກພັດທະນາຫຼັກສູດ, ສື່ການຮຽນການສອນ ແມ່ນວຽກໜຶ່ງທີ່ສຳຄັນໃນສະຖາບັນ ແລະ ຖືໄດ້ວ່າສະຖາບັນຄົ້ນຄວ້າວິທະຍາສາດການສຶກສາ ແມ່ນເປັນຫົວໃຈທາງດ້ານວິຊາການຂອງກະຊວງສຶກສາທິການ ແລະ ກິລາ ໃນການພັດທະນາສື່ຕ່າງໆ ທັງສື່ສິ່ງພິມ ແລະ ສື່ເອເລັກໂທຣນິກໃຫ້ແກ່ການຈັດການຮຽນກາສອນໃນລະບົບສາມັນສຶກສາ ທົ່ວປະເທດ, ຊົມເຊີຍການເຜີຍແຜ່ການຮຽນການສອນ ຜ່ານທາງໂທລະພາບແມ່ນເຮັດໄດ້ດີ.

ພ້ອມກັນນັ້ນ, ທ່ານຍັງໄດ້ເນັ້ນໜັກວ່າ: ສຳລັບບຸກຄະລາກອນ ທີ່ຮັບຜິດຊອບວຽກງານທາງດ້ານວິທະຍາສາດ ນັກຂຽນປື້ມ ນັກພັດທະນາ ຫຼັກສູດຕ້ອງນຳໃຫ້ທັນກ່ຽວກັບວິທະຍາສາດຂອງໂລກ ໂດຍສະເພາະແມ່ນການພັດທະນາສື່ ແລະ ການຮຽນການສອນ ວິທະຍາສາດໂລກ, ຕ້ອງຄົ້ນຄວ້າກະກຽມກ່ຽວກັບການ ຈັດການ ຮຽນການສອນເພື່ອກຽມຮັບມື ຖ້າຫາກໃນກໍລະນີຍັງມີການ ແຜ່ລະບາດ ຂອງພະຍາດໂຄວິດ-19 ແລະ ບໍ່ສາມາດເປີດ ສົກຮຽນໄດ້ ປົກກະຕິ ຕ້ອງມີແຜນຮອງຮັບໃຫ້ລະອຽດ ເພື່ອໃຫ້ນັກຮຽນ ທຸກຄົນ ໄດ້ເຂົ້າເຖິງ ການຮຽນຢ່າງທົ່ວເຖິງ, ກຽມພ້ອມເຮັດ ແນວໃດໃຫ້ການ ສອນ ຜ່ານສື ອອນລາຍໃຫ້ໄດ້ຄົບທຸກບົດ ແລະ ສອນໄດ້ເປັນແບບ ທຳມະຊາດ ທີ່ສຸດ, ໃຫ້ຄົ້ນຄວ້າພາສາລາວໃຫ້ລະອຽດ ເພີ່ມຕື່ມອີກໃນເວລາ ຂຽນປຶ້ມ-ເປັນ ຕົວແບບໃນການນຳໃຊ້ຄຳສັບຕ່າງໆ ແລະ ຮຽກຮ້ອງໃຫ້ ຄະນະຮັບ ຜິດຊອບໃນການຈັດພິມປຶ້ມຕົ້ນສະບັບວິຊາຕ່າງໆ (ສະບັບປັບປຸງໃໝ່) ຈົ່ງເອົາໃຈໃສ່ກຽມນຳເຂົ້າຈັດພິມເພື່ອແຈກຈາຍຕໍ່ໃຫ້ບັນດາແຂວງຕ່າງໆໃຫ້ທັນເວລາ ໃນຕົ້ນເດືອນກັນຍາ 2021 ໃຫ້ທັນພາກຮຽນ 2 ປີ 2021.

ໂດຍ: ບົວລະພາ

sisook2