ສ້າງແຮງບັນດານໃຈໄວໜຸ່ມຍຸກໃໝ່ ສູ່ເສັ້ນທາງອາຊີບໃໝ່ ດ້ວຍການເລືອກອາຊີບທີໝັ້ນຄົງກັບອາຊີວະສຶກສາ
ກົມອາຊີວະສຶກສາ ກະຊວງສຶກສາທິການ ແລະ ກິລາ ຮ່ວມກັບ ວິທະຍາໄລເຕັກນິກປາກປ່າສັກ ໄດ້ຫັນປ່ຽນຮູບແບບການແນະແນວແບບເກົ່າ ໃຫ້ກາຍເປັນ "ຫ້ອງທົດລອງອາຊີບ" ທີ່ໝັ້ນຄົງໃຫ້ ນັກຮຽນຊັ້ນ ມ.4 ແລະ ມ.7 ໄດ້ລົງມືຝຶກທັກສະຕົວຈິງ ເພື່ອກຽມໄປຝຶກງານ-ເຮັດວຽກ ທີ່ຖືກຕ້ອງ ແນໃສ່ສ້າງໃຫ້ເຂົາເຈົ້າມີອາຊີບວຽກເຮັດງານທຳທີ່ໝັ້ນຄົງ ໃນອະນາຄົດ.
ແຜນການລົງກິດຈະກຳຢູ່ໂຮງຮຽນດັ່ງກ່າວ ເພື່ອເຜີຍແຜ່ຫຼັກສູດການຮຽນວິຊາຊີບແບບປະສົມປະສານ ທີ່ທັນສະໄໝ ຊ່ວຍນັກຮຽນຕັດສິນໃຈ ເລືອກອາຊີບທີໝັ້ນຄົງກັບອາຊີວະສຶກສາ ຈັດຂຶ້ນ ໃນວັນທີ 8 ພຶດສະພາ 2026 ທີ່ໂຮງຮຽນ ມສ ວຽງຈັນ ໂດຍມີ ທ່ານ ທອງພັນ ອຸໄລທອນ ຜູ້ອຳນວຍການໂຮງຮຽນມັດທະຍົມສົມບູນວຽງຈັນ.
ການຈັດກິດຈະກຳໃນຄັ້ງນີ້ ກໍເພື່ອປ່ຽນທັດສະນະຄະຕິຂອງໄວໜຸ່ມຕໍ່ກັບການຮຽນວິຊາຊີບໂດຍການສົ່ງເສີມໃຫ້ນັກຮຽນມັດທະຍົມເຮັດກິດຈະກຳໂຕຈິງ ສາມາດຮັບຂໍ້ມູນຈາກສະຖານອາຊີວະສຶກສາ, ສົນທະນາແລກປ່ຽນກັບຕົວແທນຈາກ ຄູສອນ, ນັກສຶກສາ, ອະດີດນັກສຶກສາວິຊາຊີບ ແລະ ຜູ້ປະກອບການ ແລະ ເຊື່ອມຕໍ່ເຂົາເຈົ້າຫາແຄມເປນສື່ອອນລາຍເພື່ອຮັບຮູ້ຂ່າວສານຈາກກົມ ແລະ ສະຖານອາຊີວະສຶກສາ. ພ້ອມກັນນັ້ນ, ຍັງເປັນໂອກາດໃຫ້ອາຈານຈາກສະຖານອາຊີວະສຶກສາໄດ້ທົດລອງເຮັດກິດຈະກຳໃນຮູບແບບໃໝ່ຮ່ວມກັນກັບທາງໂຄງການເພື່ອເພີ່ມການມີສ່ວນຮ່ວມ ແລະ ຄວາມສົນໃຈຂອງນັກຮຽນ, ຄູມັດທະຍົມ ແລະ ຜູ້ປົກຄອງ.
ກິດຈະກຳດັ່ງກ່າວ ເຮັດໃຫ້ກຮຽນໄດ້ມີສ່ວນຮ່ວມ ແລະ ຮຽນຮູ້ຜ່ານການລົງມືປະຕິບັດແທນການບັນຍາຍ, ສ້າງການເຊື່ອມໂຍງໃຫ້ເຫັນຊັດເຈນລະຫວ່າງ ທັກສະ, ການຈ້າງງານ, ລາຍໄດ້ ແລະ ຄວາມກ້າວໜ້າ ພ້ອມທັງມີການສົນທະນາເລື່ອງບົດບາດຍິງ-ຊາຍ ຢ່າງກົງໄປກົງມາ ແລະ ໃຫ້ກຽດເຊິ່ງກັນແລະກັນ, ສ້າງຄວາມໂດດເດັ່ນໃຫ້ກັບນັກຮຽນຕົວແບບ ແລະ ຜູ້ປະກອບການໃນທ້ອງຖິ່ນ ແລະ ນຳໃຊ້ເຄື່ອງມືທີ່ເຂົ້າໃຈງ່າຍ ເພື່ອຕິດຕາມການປ່ຽນແປງທັດສະນະຄະຕິ.
ໃນກິດຈະກຳ ໄດ້ໃຊ້ເວລາປະມານ 3 ຊົ່ວໂມງ ໂດຍເລີ່ມດ້ວຍການນຳສະເໜີແນວຄິດຫຼັກສັ້ນໆເປັນກຸ່ມໃຫຍ່. ຫຼັງຈາກນັ້ນ, ຈະເປັນການໝູນວຽນໄປຕາມຈຸດຕ່າງໆ ເຊິ່ງນັກຮຽນ ສາມາດເຂົ້າຊົມ ໂຕະໃຫ້ຂໍ້ມູນ (Information Booths), ໂຕະເຮັດກິດຈະກຳ (Interactive Booths), ແລະ ຈຸດວາງສະແດງສື່ (Multimedia Showcase) ຕາມຄວາມສົນໃຈຂອງຕົນເອງ. ໃນງານຈະມີການກວດສອບທັດສະນະຄະຕິ (Perception Check) ຢູ່ທັງທາງເຂົ້າ ແລະ ທາງອອກ ເພື່ອເກັບກຳຂໍ້ມູນຄວາມສົນໃຈ ແລະ ຄວາມໝັ້ນໃຈຂອງນັກຮຽນທີ່ມີຕໍ່ການຮຽນວິຊາຊີບ.
ພາບ-ຂ່າວໂດຍ ສົງການ ພັນແພງດີ
