ສສກ ຮ່ວມກັບ ລັດຖະບານອົດສະຕຣາລີ ເປີດເຄື່ອງມືປະເມີນຕົນເອງສຳລັບຄູປະຖົມ ເພື່ອຍົກລະດັບຄຸນນະພາບການສອນ
ໃນວັນທີ 4 ສິງຫາ 2026 ທີ່ໂຮງແຮມ ຮໍລິເດອິນ, ກະຊວງສຶກສາທິການ ແລະ ກິລາ (ສສກ) ໂດຍໄດ້ຮັບການສະໜັບສະໜູນຈາກລັດຖະບານອົດສະຕຣາລີ ຜ່ານແຜນງານບີຄວາ (BEQUAL) ໄດ້ຈັດກອງປະຊຸມນຳສະເໜີເຄື່ອງມືປະເມີນຕົນເອງສຳລັບຄູຊັ້ນປະຖົມສຶກສາ ໂດຍການເປັນປະທານຮ່ວມຂອງ ທ່ານ ປອ ລຳພູນ ຫຼວງໄຊ ຫົວໜ້າກົມພັດທະນາຄູ ແລະ ການບໍລິຫານການສຶກສາ ແລະ ທ່ານ ນາງ ເຄດ ກູດຟຣູດ (Kate Goodfroot), ເລຂານຸການໂທ ສະຖານທູດອົດສະຕຣາລີ ປະຈຳ ສປປ ລາວ, ມີຜູ້ຕາງໜ້າຈາກກົມກ່ຽວຂ້ອງຂັ້ນສູນກາງ, ພະແນກສຶກສາທິການ ແລະ ກິລາແຂວງ (ສກຂ) 8 ແຂວງ, ວິທະຍາໄລຄູ 8 ແຫ່ງ ແລະ ບັນດາຄູ່ຮ່ວມພັດທະນາ ເຂົ້າຮ່ວມຢ່າງພ້ອມພຽງ.
ກອງປະຊຸມໃນຄັ້ງນີ້ ມີຈຸດປະສົງເພື່ອສ້າງຄວາມເຂົ້າໃຈຮ່ວມກັນ, ກຳນົດເງື່ອນໄຂ ແລະ ບົດບາດຄວາມຮັບຜິດ ຊອບຂອງແຕ່ລະພາກສ່ວນ, ພ້ອມທັງວາງແຜນເຊື່ອມໂຍງເຄື່ອງມືນີ້ເຂົ້າໃນລະບົບທີ່ມີຢູ່ແລ້ວ ເຊັ່ນ ການພັດທະນາວິຊາຊີບຄູແບບຕໍ່ເນື່ອງ (CPD), ການປະເມີນຜົນງານ ແລະ ຄຸນນະພາບການສອນ, ລະບົບປະກັນຄຸນນະພາບມາດຕະຖານຄຸນນະພາບພື້ນຖານ (FQS). ໂດຍການລິເລີ່ມນີ້ ຖືເປັນບາດກ້າວສຳຄັນໃນການພັດທະນາລະບົບການສຶກສາຂັ້ນພື້ນຖານ, ຮັບປະກັນໃຫ້ການພັດທະນາທັກສະຂອງຄູດຳເນີນໄປຢ່າງຖືກເປົ້າໝາຍ, ເຊື່ອມໂຍງກັບການສອນຕົວຈິງ ແລະ ສົ່ງເສີມການຮຽນຮູ້ຂອງເດັກນ້ອຍໃນ ສປປ ລາວ ຢ່າງຍືນຍົງ. ເຊິ່ງເຄື່ອງມືປະເມີນຕົນເອງສຳລັບຄູ ແມ່ນໄດ້ຖືກເລີ່ມພັດທະນາຂຶ້ນຕັ້ງແຕ່ປີ 2023 ໂດຍເຊື່ອມໂຍງກັບມາດຕະຖານການສອນຊັ້ນປະຖົມສຶກສາ. ຫຼັງຈາກການທົດລອງນຳໃຊ້ໄລຍະທຳອິດໃນ 3 ເມືອງເປົ້າໝາຍ ກໍໄດ້ມີການປັບປຸງ ແລະ ຂະຫຍາຍການທົດລອງໃນສົກຮຽນ 2025–2026 ຮ່ວມກັບຜູ້ເຮັດວຽກສຶກສານິເທດພາຍໃນ 1,124 ໂຮງຮຽນ. ທັງນີ້ ເພື່ອເກັບກຳຄຳຊີ້ແນະ ແລະ ປະສົບການຕົວຈິງມາປັບປຸງເຄື່ອງມືໃຫ້ມີຄວາມສອດຄ່ອງ, ປະຕິບັດໄດ້ຈິງ ແລະ ພ້ອມທີ່ຈະນຳໃຊ້ຢ່າງກວ້າງຂວາງໃນທົ່ວປະເທດ.
ໃນງານດັ່ງກ່າວ, ທ່ານ ປອ ລຳພູນ ຫຼວງໄຊ ໄດ້ມີຄຳເຫັນວ່າ: ເຄື່ອງມືປະເມີນຕົນເອງສຳລັບຄູ ແມ່ນບາດກ້າວສຳຄັນໃນການສະໜັບສະໜູນຄູ ໃຫ້ສະທ້ອນຄືນການປະຕິບັດງານ ເພື່ອເສີມສ້າງທັກສະ ແລະ ຕອບສະໜອງຄວາມຕ້ອງການຂອງນັກຮຽນ. ການສອນທີ່ດີຂຶ້ນຈະນຳໄປສູ່ການມີສ່ວນຮ່ວມ ແລະ ຜົນການຮຽນຮູ້ທີ່ດີຂອງນັກຮຽນ. ຂໍສະແດງຄວາມຂອບ ໃຈຢ່າງຍິ່ງມາຍັງ ລັດຖະບານອົດສະຕຣາລີ ຜ່ານແຜນງານບີຄວາ ທີ່ໄດ້ໃຫ້ການສະໜັບສະໜູນດ້ານວິຊາການ ແລະ ງົບປະມານຢ່າງຕໍ່ເນື່ອງ.
ໂອກາດດຽວກັນ, ທ່ານ ນາງ ເຄດ ກູດຟຣູດ ໄດ້ກ່າວຕື່ມວ່າ: ການສະໜັບສະໜູນຄູ ແມ່ນວິທີທີ່ມີຄວາມສຳຄັນທີ່ສຸດໃນການສົ່ງເສີມການສຶກສາ. ລັດຖະບານອົດສະຕຣາລີ ມີຄວາມພູມໃຈທີ່ໄດ້ຮ່ວມມືກັບ ກະຊວງສຶກສາທິການ ແລະ ກິລາ ເພື່ອສ້າງຄູໃຫ້ມີຄວາມໝັ້ນໃຈ ແລະ ມີຄວາມສາມາດ. ນີ້ບໍ່ພຽງແຕ່ເປັນການລົງທຶນໃນໂຮງຮຽນເທົ່ານັ້ນ, ແຕ່ຍັງເປັນການລົງທຶນໃສ່ການສ້າງທັກສະ ແລະ ອະນາຄົດຂອງ ສປປ ລາວ.
ສຳລັບເຄື່ອງມືປະເມີນຕົນເອງຂອງຄູຊັ້ນປະຖົມສຶກສາ ຈະຊ່ວຍໃຫ້ຄູສາມາດສະທ້ອນຄືນການປະຕິບັດໜ້າທີ່ຂອງຕົນ, ໂດຍກຳນົດຄວາມຕ້ອງການການ ຮຽນຮູ້ເພີ່ມເຕີມທາງດ້ານວິຊາຊີບ ແລະ ປັບປຸງການຮຽນ-ການສອນໃນຫ້ອງຮຽນໃຫ້ມີປະສິດທິພາບ ແລະ ຄຸນນະພາບສູງຂຶ້ນ.
ພາບ-ຂ່າວໂດຍ: ການຈະນາ
