ເຊກອງ ຫາລືກຽມຄວາມພ້ອມ ເປັນເຈົ້າພາບມະຫາກຳກິລານັກຮຽນມັດທະຍົມສຶກສາທົ່ວປະເທດ ຄັ້ງທີ 8 ໃນປີ 2027
ໃນວັນທີ 13 ພຶດສະພາ 2026 ທີ່ຫ້ອງວ່າການແຂວງເຊກອງ ໄດ້ຈັດກອງປະຊຸມຄະນະຮັບຜິດຊອບລະດັບຊາດ ຄັ້ງທີ 1 ເພື່ອຊຸກຍູ້ການກະກຽມຄວາມພ້ອມໃນການເປັນເຈົ້າພາບງານມະຫາກຳກິລານັກຮຽນມັດທະຍົມສຶກສາທົ່ວປະເທດ ຄັ້ງທີ 8 ເຊິ່ງຈະຈັດຂຶ້ນໃນປີ 2027, ໃຫ້ກຽດເຂົ້າຮ່ວມໂດຍ ທ່ານ ນາງ ສີສະຫງ່າ ແກ້ວດວງດີ ຮອງປະທານຄະນະກຳມະການປົກຄອງແຂວງເຊກອງ ແລະ ທ່ານ ກິ່ງມະໂນ ພົມມະຫາໄຊ ຮອງລັດຖະມົນຕີ ກະຊວງສຶກສາທິການ ແລະ ກິລາ ພ້ອມດ້ວຍຄະນະກຳມະການລະດັບຊາດ ແລະ ຜູ້ຕາງໜ້າຈາກແຂວງໃກ້ຄຽງ.
ໃນພິທີ, ທ່ານ ຄຳໄພ ສິມມາວັດ ຫົວໜ້າພະແນກສຶກສາທິການ ແລະກິລາແຂວງເຊກອງ ລາຍງານວ່າ: ພາຍຫຼັງລັດຖະມົນຕີກະຊວງສຶກສາທິການ ແລະກິລາ ໄດ້ມອບທຸງງານມະຫາກຳກິລານັກຮຽນໃຫ້ແຂວງເຊກອງ ສືບຕໍ່ເປັນເຈົ້າພາບ ຈັດຕັ້ງປະຕິບັດ ຄັ້ງທີ 8 ໃນປີ 2027; ຈາກນັ້ນ ກໍໄດ້ຂໍທິດຊີ້ນຳຈາກການນຳແຂວງ ແລະ ປະສານສົມສົມກັບພາກສ່ວນກ່ຽວຂ້ອງ ເພື່ອພ້ອມກັນວາງແຜນກະກຽມຄວາມພ້ອມຮອບດ້ານ ເຊິ່ງມາຮອດປະຈຸບັນ ໄດ້ສຳເລັດອອກຂໍ້ຕົກລົງ ຂອງເຈົ້າແຂວງ ສະບັບເລກທີ 366/ຊກ, ລົງວັນທີ 23 ຕຸລາ 2024 ວ່າດ້ວຍຮັບຮອງເອົາໄຟຟ້າພະລັງງານລົມ ຫຼື ກັງຫັນລົມ ເປັນສັນຍາລັກໂລໂກ້, ປາຫວ່າຄຳ ເປັນສັນຍາລັກສັດນຳໂຊກ, ອອກຂໍ້ຕົກລົງ ເລກທີ 31/ຊກ, ລົງວັນທີ 12 ມີນາ 2025 ວ່າດ້ວຍຮັບຮອງເອົາຈຳນວນ 13 ປະເພດກິລາ ບັນຈຸເຂົ້າໃນການແຂ່ງຂັນ, ຊິງຫຼຽນລາງວັນ ທັງໝົດ 456 ຫຼຽນ; ໃນນັ້ນ, ມີ 135 ຫຼຽນຄຳ, 135 ຫຼຽນເງິນ, 186 ຫຼຽນທອງ, 135 ລາຍການແຂ່ງຂັນ ໂດຍແຂວງຫນຶ່ງ ສາມາດສົ່ງຄະນະຄູຝຶກ ແລະ ນັກກິລາໄດ້ສູງສຸດ 394 ທ່ານ, ສຳເລັດຈັດກອງປະຊຸມ ຮ່ວມກັບກົມກິລາມວນຊົນ, ພາລະ ແລະ ສິລະປະສຶກສາ ຄັ້ງທີ 1 ເຊິ່ງໄດ້ກຳນົດກໜ້າວຽກຈະຕ້ອງປະຕິບັດ 5 ຈຸດສຸມ, ຄັ້ງທີ 2 ໄດ້ກຳນົດໂຄງປະກອບບຸກຄະລາກອນ, ຄະນະຮັບຜິດຊອບລະດັບຊາດ ແລະງົບປະມານນຳໃຊ້ຢ່າງລະອຽດ, ວຽກງານການກໍ່ສ້າງພື້ນຖານໂຄງລ່າງ ລວມ 26 ກິດຈະກຳ, ກຳນົດຈຸດການແຂ່ງຂັນກິລາແຕ່ລະປະເພດ, ກຳນົດເປົ້າໝາຍ, ສູນພັກເຊົານັກກິລາ ຈາກບັນດາແຂວງ ທີ່ຈະເຂົ້າຮ່ວມ ມີ 17 ສູນ, ກະກຽມສະຖານທີ່ຮອງຮັບການນຳ, ແຂກ ແລະ ມວນຊົນທົ່ວໄປ.
ສຳລັບງານມະຫາກຳກິລານັກຮຽນມັດທະຍົມທົ່ວປະເທດຄັ້ງທີ 8 ທີ່ແຂວງເຊກອງ ຈະເປັນເຈົ້າພາບ ໃນປີ 2027 ຈະມີ 13 ປະເພດກິລາແຂ່ງຂັນ ຄື: ກິລາແລ່ນ-ລານ 38 ລາຍການ, ກິລາບານເຕະ 2 ລາຍການ, ບານສົ່ງໃນຮົ່ມ ແລະ ຫາດຊາຍ 4 ລາຍການ, ບານບ້ວງ 4 ລາຍການ, ເປຕັງ 9 ລາຍການ, ກະຕໍ້ 6 ລາຍການ, ຫນ້າເກັກ 12 ລາຍການ, ໝາກເສິກ 9 ລາຍການ, ປິ່ງປ່ອງ 7 ລາຍການ, ດອກປີກໄກ່ 6 ລາຍການ, ໝາກແລ້ 12 ລາຍການ, ເທັກຄວັນໂດ 21 ລາຍການ ແລະ ກິລາດຶງເຊືອກ 5 ລາຍການ.
ໂອກາດນີ້, ທ່ານ ນາງ ສີສະຫງ່າ ແກ້ວດວງດີ ໄດ້ມີທິດຊີ້ນຳຫຼາຍບັນຫາ ໂດຍເນັ້ນໃຫ້ສືບຕໍ່ຈັດຕັ້ງປະຕິບັດບັນດາຫນ້າວຽກທີ່ຍັງຄົງຄ້າງໃຫ້ສຳເລັດທັນການ, ປະສານສົມທົບກັນຢ່າງກົມກຽວແຕ່ສູນກາງ ກໍຄືກະຊວງສຶກສາທິການ ແລະ ກິລາ ເພື່ອຂໍທິດຊີ້ນໍາໃນການກະກຽມແຜນວຽກຕ່າງໆໃນດ້ານກິລາ,ປະສານສົມທົບແໜ້ນກັບເຈົ້າໜ້າທີ່ ໃນການວາງແຜນປ້ອງກັນຊາດ-ປ້ອງກັນຄວາມສະຫງົບ ເພື່ອຮັບປະກັນຄວາມປອດໄພນັບແຕ່ມື້ເລີ່ມແຂ່ງຂັນ ຈົນຮອດມື້ສໍາເລັດ; ພ້ອມນີ້ ກໍເອົາໃຈໃສ່ສະຫຼຸບລາຍງານ, ປຶກສາຫາລື, ຖອດຖອນບົດຮຽນໃນແຕ່ລະອະນຸ ເປັນໄລຍະ ເພື່ອເຮັດໃຫ້ການກະກຽມຈັດງານມະຫາກຳກິລານັກຮຽນທົ່ວປະເທດ ຄັ້ງທີ 8 ໄດ້ຮັບຜົນສຳເລັດດ້ວຍດີ.
