ເມື່ອບໍ່ດົນມານີ້ ທີ່ສໍານັກກະຊວງສຶກສາທິການ ແລະ ກິລາ, ທ່ານ ກິ່ງມະໂນ ພົມມະຫາໄຊ ຮອງລັດຖະມົນຕີກະຊວງສຶກສາທິການ ແລະ ກິລາ ຫຼື ສສກ ໄດ້ໃຫ້ກຽດຕ້ອນຮັບ ທ່ານ ຣັດຊູຮານັອບ ອຸດສະມານ ອັບດຸນ-ອາຊີເຢວິດ (RASSUKHANOV Usman Abdul-Azievich) ຫົວໜ້າກົມພັດທະນາລະບົບການສຶກສາແຫ່ງຊາດ ແລະ ການຮ່ວມມືກັບຕ່າງປະເທດ, ຄະນະຜູ້ແທນກະຊວງສຶກສາສະຫະພັນຣັດເຊຍ ທີ່ມາຢ້ຽມຢາມ ແລະ ເຮັດວຽກກັບກະຊວງສຶກສາທິການ ແລະ ກິລາ ເພື່ອກະກຽມສ້າງໂຮງຮຽນສາມັນສຶກສາ ມິດຕະພາບ ລາວ- ຣັດເຊຍ ຢູ່ ສປປ ລາວ, ມີຫົວໜ້າກົມ-ຮອງກົມ, ສະຖາບັນ ແລະ ຄະນະຮັບຜິດຊອບທັງສອງຝ່າຍເຂົ້າຮ່ວມ.

ໃນການເຂົ້າຢ້ຽມຢາມຄັ້ງນີ້ ແມ່ນເພື່ອສືບຕໍ່ຈາກກອງປະຊຸມພົບປະທາງໄກ (ອອນລາຍ) ຄັ້ງວັນທີ 7 ກັນຍາ 2025 ແລະ ຄໍາເຊີນຂອງທ່ານຮອງລັດຖະມົນຕີກະຊວງສຶກສາທິການ ແລະ ກິລາ ເພື່ອກະກຽມສ້າງໂຮງຮຽນສາມັນສຶກສາ ມິດຕະພາບ ລາວ-ຣັດເຊຍ ຢູ່ ສປປ ລາວ ແລະ ວາງແຜນຮ່ວມກັນໃຫ້ສໍາເລັດຕາມຄວາມມຸ້ງຫວັງ ແລະ ຄໍາໝັ້ນສັນຍາຮ່ວມກັນຂອງສອງປະທານປະເທດ ທີ່ໄດ້ຕົກລົງທີ່ຈະສ້າງໂຮງຮຽນດັ່ງກ່າວ, ຊຶ່ງສອງຝ່າຍເຫັນດີ ອອກແບບໂຮງຮຽນຄົບວົງຈອນ, ມີເນື້ອທີ່ 7.925 ແຮັກຕາ ສາມາດບັນຈຸນັກຮຽນໄດ້ 1.200 ຄົນ ມີການດໍາເນີນການຮຽນການສອນເປັນພາສາຣັດເຊຍ ນັບແຕ່ຊັ້ນປະຖົມເຖິງມັດທະຍົມຕອນປາຍ ຢູ່ນະຄອນຫຼວງວຽງຈັນ.

ນອກນັ້ນ, ຍັງຈະໄດ້ຂະຫຍາຍການສິດສອນພາສາຣັດເຊຍ ຢູ່ໂຮງຮຽນແຫ່ງອື່ນໆ ຕາມຄວາມເໝາະສົມຢູ່ນະຄອນຫຼວງວຽງຈັນ, ແຂວງສະຫວັນນະເຂດ ແລະ ແຂວງຫຼວງພະບາງ; ທັງສອງຝ່າຍຍັງໄດ້ປຶກສາຫາລືຮ່ວມກັນທາງດ້ານສະຖານທີ່, ຕຶກອາຄານ, ການສ້າງຕໍາລາການຮຽນການສອນພາສາຣັດເຊຍ ແລະ ການສ້າງຄູສອນພາສາຣັດເຊຍ; ການວາງສີລາລຶກສອງຝ່າຍແມ່ນໃຫ້ຮີບຮ້ອນໃຫ້ທັນກັບເວລາສະເຫຼີມສະຫຼອງການສ້າງຕັ້ງສາຍພົວພັນການທູດ ສປປ ລາວ ແລະ ສະຫະພັນຣັດເຊຍ. ພ້ອມນັ້ນທັງສອງຝ່າຍຈະໄດ້ມີການໂຄສະນາເຜີຍແຜ່ໃຫ້ພໍ່ແມ່ຜູ້ປົກຄອງຊຸກຍູ້ລູກຫຼານໃຫ້ກຽມໄປເຂົ້າຮຽນຢູ່ໂຮງຮຽນດັງກ່າວ, ຈາກນັ້ນທັງສອງຝ່າຍໄດ້ຮ່ວມລົງນາມເຊັ່ນບົດບັນທຶກເຫັນດີໃນເບື້ອງຕົ້ນ ວ່າດ້ວຍການສ້າງຕັ້ງໂຮງຮຽນສາມັນສຶກສາ ມິດຕະພາບ ລາວ-ຣັດເຊຍ ອີກດ້ວຍ.

ຂ່າວໂດຍ: ບຸນທະວີ ນະວົງສາ