ໃນວັນທີ 15 ພຶດສະພາ 2026 ທີ່ຫ້ອງປະຊຸມສະຖາບັນຄົ້ນຄວ້າວິທະຍາສາດການສຶກສາ (ສວສ), ກົມກວດກາ ກະຊວງສຶກສາທິການ ແລະ ກິລາ ໄດ້ຈັດກອງປະຊຸມໜ່ວຍງານວິຊາການຂະແໜງການຍ່ອຍການບໍລິຫານ-ຄຸ້ມຄອງການສຶກສາ ແລະ ກິລາ (Focal Group 5 - FG5) ປະຈຳໄຕມາດ 2 ປີ 2026 ເພື່ອປຶກສາຫາລື ແລະ ຕິດຕາມຄວາມຄືບໜ້າວຽກງານບູລິມະສິດຂອງຂະແໜງການ, ໃຫ້ກຽດເປັນປະທານຮ່ວມຂອງ ທ່ານ ປອ ຈັນທະວົງ ປັນຍາສີລິ ຄະນະບໍລິຫານງານພັກກະຊວງ, ຫົວໜ້າກົມກວດກາ ທັງເປັນປະທານໜ່ວຍງານ FG5, ມີ ທ່ານ ນາງ ເຮເລັນ ໂຄເນເຟຍ (Helen Konefia) ອະນຸເລຂາຂະແໜງການສຶກສາ ແລະ ສັງຄົມ ສຳນັກງານຜູ້ຕາງໜ້າສະຫະພາບເອີຣົບ ປະຈຳ ສປປ ລາວ ແລະ ທ່ານ ຢາສຶມາສະ ນາກາໂອກະ (Yasumasa Nagaoka) ທີ່ປຶກສາດ້ານນະໂຍບາຍການສຶກສາ ຕາງໜ້າຈາກອົງການໄຈກ້າ (JICA) ປະຈຳລາວ, ມີບັນດາທ່ານຫົວໜ້າກົມ, ຮອງກົມ, ຜູ້ຕາງໜ້າຈາກຄູ່ຮ່ວມພັດທະນາ ແລະ ພະນັກງານວິຊາການທີ່ກ່ຽວຂ້ອງເຂົ້າຮ່ວມທັງແບບເຊິ່ງໜ້າ ແລະ ຜ່ານລະບົບອອນລາຍ.

ໃນກອງປະຊຸມ, ທ່ານ ປອ ຈັນທະວົງ ປັນຍາສີລິ ໄດ້ມີີຄຳເຫັນເນັ້ນໜັກເຖິງພາລະບົດບາດຂອງ FG5 ໃນການເປັນເວທີປະສານງານ, ແລກປ່ຽນບົດຮຽນ ແລະ ຕິດຕາມການຈັດຕັ້ງປະຕິບັດແຜນພັດທະນາການສຶກສາ ແລະ ກິລາ ໃຫ້ມີຄວາມກົມກຽວກັນ ລະຫວ່າງການລົງທຶນຂອງລັດຖະບານ ແລະ ຄູ່ຮ່ວມພັດທະນາ. ທ່ານຍັງໄດ້ຍົກໃຫ້ເຫັນຜົນສຳເລັດຈາກໄຕມາດ 1 ທີ່ຜ່ານມາ ເປັນຕົ້ນແມ່ນການປຶກສາຫາລືກ່ຽວກັບການປະຕິຮູບລະບົບການສຶກສາ ສາຍສາມັນ (6+3+3), ວຽກງານການປ່ຽນແປງສະພາບອາກາດ ແລະ ການຈັດສັນງົບປະມານ.

ສຳລັບກອງປະຊຸມໃນຄັ້ງນີ້, ບັນດາຜູ້ເຂົ້າຮ່ວມກອງປະຊຸມໄດ້ຮ່ວມກັນຄົ້ນຄວ້າ ແລະ ປຶກສາຫາລືໃນ 4 ຫົວຂໍ້ສຳຄັນ ຄື: ລາຍງານຄວາມຄືບໜ້າການປັບປຸງກົງຈັກການຈັດຕັ້ງໃນຂັ້ນກະຊວງ ເພື່ອໃຫ້ສອດຄ່ອງກັບຄວາມຕ້ອງການໃນປັດຈຸບັນ; ລາຍງານກ່ຽວກັບການຍົກລະດັບມາດຕະຖານ ແລະ ຄຸນນະພາບການສຶກສາ; ຂະບວນການສ້າງ ແລະ ພັດທະນາປື້ມອ່ານເສີມ ໂດຍສຳນັກພິມສຶກສາ ແລະ ກິລາ; ລາຍງານແຜນປະຕິບັດງານດິຈິຕອນສຳລັບຂະແໜງການສຶກສາ ແລະ ກິລາ ໄລຍະ 5 ປີ (2026-2030). ພ້ອມນັ້ນ, ກອງປະຊຸມໄດ້ດຳເນີນໄປ ໂດຍມີການແລກປ່ຽນຄຳຄິດຄຳເຫັນຢ່າງກົງໄປກົງມາ, ເພື່ອສ້າງຄວາມເປັນເອກະພາບ ແລະ ກຳນົດທິດທາງໃນການຈັດຕັ້ງປະຕິບັດວຽກງານໃຫ້ບັນລຸຕາມຄາດໝາຍທີ່ວາງໄວ້, ເພື່ອແນໃສ່ພັດທະນາຂະແໜງການສຶກສາ, ວິທະຍາດ ແລະ ກິລາ ໃຫ້ມີຄວາມເຂັ້ມແຂງ ແລະ ຍືນຍົງ ໃນອະນາຄົດ.

ພາບ-ຂ່າວໂດຍ: ການຈະນາ