ສະຫາຍ ຮສ.ປອ ທອງສະລິດ ມັງໜໍ່ເມກ, ຄະນະເລຂາທິການສູນກາງພັກ, ເລຂາຄະນະບໍລິຫານພັກ, ລັດຖະມົນຕີກະຊວງສຶກສາທິການ ແລະ ກິລາ (ສສກ), ໄດ້ໃຫ້ສໍາພາດຕໍ່ໜ່ວຍງານໂຄສະນາ ແລະ ຂະບວນການ, ອະນຸກໍາມະການໂຄສະນາ ແລະ ຂະບວນການ ເນື່ອງໃນໂອກາດກະກຽມ ແລະ ດໍາເນີນກອງປະຊຸມໃຫຍ່ ຄັ້ງທີ X ຂອງອົງຄະນະພັກກະຊວງສຶກສາທິການ ແລະ ກິລາ ທີ່ຈະຈັດຂຶ້ນໃນມໍ່ໆນີ້ ວ່າ: “ດັ່ງທີ່ພວກເຮົາຊາບນຳກັນແລ້ວວ່າ ການສຶກສາແມ່ນວຽກງານ ທີ່ມີຄວາມສຳຄັນຕໍ່ການພັດທະນາຊັບພະຍາກອນມະນຸດ ແລະ ການພັດທະນາປະເທດຊາດ. ພາລະກິດຂອງການສຶກສາບໍ່ພຽງແຕ່ເປັນການສິດສອນຄວາມຮູ້ ແຕ່ຍັງລວມເຖິງການສ້າງຄົນ, ສ້າງນັກວິທະຍາສາດ, ສ້າງຜູ້ປະກອບການ, ພະນັກງານ,​ ທະຫານ, ​ຕຳຫຼວດ ແລະ ເຮັດໃຫ້ປະຊາຊົນລາວ ມີຄຸນນະພາບ, ຈັນຍາບັນ,​ຈັນຍາທຳ, ຄຸນນະທຳ ແລະ ມີຄວາມສາມາດຮອບດ້ານ ເພື່ອເປັນກຳລັງແຮງໃນການປະຕິບັດພາລະກິດປົກປັກ, ຮັກສາ ແລະ ພັດທະນາປະເທດຊາດ ໃຫ້ມີຄວາມຈະເລີນສີວິໄລ ເດີນຕາມເສັ້ນທາງສັງຄົມນິຍົມ. ຍ້ອນແນວນັ້ນ, ພັກປະຊາຊົນປະຕິວັດລາວ ຈຶ່ງວາງແນວທາງການສຶກສາອອກໃນແຕ່ລະໄລຍະ ແລະ ຖືເອົາການສຶກສາໄປກ່ອນວຽກງານອື່ນກ້າວໜຶ່ງ”.

ສະຫາຍກ່າວຕື່ມວ່າ: ໃນ 3 ເດືອນທີ່ຜ່ານມານີ້, ບັນດານັກວິທະຍາສາດ, ນັກວິຊາການ ແລະ ການນໍາ ໃນຂະແໜງສຶກສາ ແລະກິລາ ຕ່າງກໍໄດ້ພາກັນໃຫ້ການສໍາພາດ, ຄໍາຄິດຄໍາເຫັນ ແລະ ທັດສະນະ ຕໍ່ການພັດທະນາວຽກງານສຶກສາ, ຄົ້ນຄວ້າວິທະຍາສາດ ແລະ ການກິລາ ຕາມໜ້າທີ່ຄວາມຮັບຜິດຊອບຂອງຕົນເອງ ຢ່າງ​ອຸ​ດົມ​ສົມ​ບູນ ມີ​ທັງ​ອະ​ດີດ, ປັດ​ຈຸ​ບັນ ແລະ​ ອະ​ນາ​ຄົດ, ມີ​ທັງ​ຜົນ​ສຳ​ເລັດ ແລະ​ມີ​ທັງ​ຂໍ້​ຈຳ​ກັດ. ແຕ່​ເຖິງ​ຢ່າງ​ໃດ​ກໍຕາມ ຂ້າພະເຈົ້າສັງລວມວ່າ ໃນຕໍ່ໜ້າແມ່ນຕ້ອງ “ຍົກສູງຄວາມສາມາດນໍາພາຂອງຄະນະພັກທຸກຂັ້ນ, ປັປປຸງລະບົບການສຶກສາ, ວິທະຍາສາດ ແລະ ການກິລາ ໃຫ້​ຫັນ​ປ່ຽນ​ຢ່າງ​ແຂງ​ແຮງ ແລະ​ ມີ​ຄຸນ​ນະ​ພາບ​ສູງ​ຂຶ້ນ, ຮັບ​ໃຊ້​ພາ​ລະ​ກິດ​ຂອງ​ພັກ, ສາ​ມາດ​ເຊື່ອມ​ໂຍງ​ກັບ​ພາກ​ພື້ນ ແລະ​ສາ​ກົນ”. ແຕ່ຢາກເຮັດໄດ້ຄືແນວນັ້ນ, ຕ້ອງສຸມໃສ່ປັບປຸງການສຶກສາກ່ອນໄວຮຽນ, ປະຖົມສຶກສາ ແລະມັດທະຍົມສຶກສາ ໃຫ້ມີຄຸນນະພາບດີຂຶ້ນ ແລະ ເທົ່າທຽມກັນຫຼາຍຂຶ້ນ; ສ້າງພື້ນຖານຫັນໄປສູ່ສັງຄົມແຫ່ງພູມປັນຍາ ແລະ ສັງຄົມແຫ່ງການຮຽນຮູ້ ໃຫ້ເປັນຮູບປະທໍາຫຼາຍຂຶ້ນ ທັງຢູ່ສູນກາງ ແລະ ທ້ອງຖິ່ນ; ປັບປຸງລະບົບການຮຽນ ການສອນ ໃນລະບົບອະຊີວະສຶກສາ ແລະ ຊັ້ນສູງ ຕາມຄວາມຕ້ອງການຂອງຕະຫຼາດ ແລະ ທ່າແຮງບົ່ມຊ້ອນຂອງການພັດທະນາເສດຖະກິດ-ສັງຄົມຂອງປະເທດຊາດ; ສົມທົບແໜ້ນສາຍພົວພັນການສຶກສາ, ການຄົ້ນຄວ້າວິທະຍາສາດ ແລະ ການກິລາ, ຊຸກຍູ້ທັງ 3 ຂະແໜງການດັ່ງ​ກ່າວ ໃຫ້ມີການພັດທະນາ ແລະ ນໍາໃຊ້ຄວາມກ້າວໜ້າທາງດ້ານວິທະຍາສາດ, ເຕັກໂນໂລຊີ ແລະ ນະວັດຕະກໍາ ໃຫ້​ນັບ​ມື້ກວ້າງ​ຂວາງ; ເອົາໃຈໃສ່ສົ່ງເສີມກິລາມວນຊົນ ໃຫ້ກວ້າງຂວາງ, ທົ່ວເຖິງ, ເອົາໃຈໃສ່ກິລາທີ່ມີມູນເຊື້ອ ແລະ ກິລາ ທີ່ມີໜໍ່ແໜງໃໝ່ຂອງປະເທດຊາດ ເຂົ້າ​ຮ່ວມ​ການ​ແຂ່ງ​ຢູ່​ພາກ​ພື້ນ ແລະ​ ສາ​ກົນ ສາມາດສ້າງຊື່ສຽງໃຫ້ແກ່ປະເທດຊາດນັບມື້ນັບຫຼາຍຂຶ້ນ.

ທັງໝົດບັນຫາທີ່ກ່າວມານັ້ນ, ເປັນບັນຫາພື້ນຖານຢູ່ໃນລາຍງານການເມືອງ ແລະ ແຜນພັດທະນາວຽກງານການສຶກສາ, ວິທະຍາສາດ ແລະ ການກິລາ ໃນກອງປະຊຸມໃຫຍ່ ຄັ້ງທີ X ຂອງອົງຄະນະພັກກະຊວງສຶກສາທິການ ແລະກິລາ ຊຶ່ງບັນ​ດາ​ເນື້ອ​ໃນ​ເຫຼົ່​ານັ້ນ ພາຍຫຼັງສໍາເລັດກອງປະຊຸມ ຄະ​ນະພັກ, ຄະ​ນະ​ນຳ, ສະ​ມາ​ຊິກ​ພັກ-ພະ​ນັກ​ງານ ທົ່ວ​ກະ​ຊວງ​ສຶກ​ສາ​ທິ​ການ ແລະ ​ກິ​ລາ ຍັງຈະໄດ້ຜັນຂະຫຍາຍເປັນແຜນງານ, ​ໂຄງການ ແລະ ແຜນການຢ່າງລະອຽດ ເພື່ອສ້າງໃຫ້ເປັນຮູບປະທໍາ, ເຮັດໃຫ້ການສຶກສາ, ວິທະຍາສາດ ແລະ ການກິລາ ມີການຫັນປ່ຽນໃໝ່ຮອບດ້ານ ແລະເລິກເຊິ່ງກວ່າເກົ່າ.

ສະຫາຍ ເລຂາຄະນະບໍລິຫານງານພັກ ກະຊວງ ສສກ ໄດ້ເນັ້ນໜັກໃນຕອນທ້າຍວ່າ: “ເພື່ອເປັນການສ້າງຄວາມພ້ອມຮອບດ້ານ ໃຫ້ແກ່ກອງປະຊຸມໃຫຍ່ ຄັ້ງທີ X ຂອງອົງຄະນະພັກກະຊວງສຶກສາທິການ ແລະ ກິລາ, ຂ້າພະເຈົ້າຂໍຮຽກຮ້ອງມາຍັງສະມາຊິກພັກ, ພະນັກງານ, ຄູ-ອາຈານ, ນັກວິທະຍາສາດ, ນັກກິລາ, ນັກຮຽນ-ນັກສຶກສາ ແລະ ພໍ່ແມ່ປະຊາຊົນທຸກພາກສ່ວນ ຈົ່ງພ້ອມກັນສືບຕໍ່ສ້າງຂະບວນການຟົດຟື້ນ ປະກອບສ່ວນເຂົ້າໃນການສ້າງສາພັດທະນາປະ​ເທດ​ຊາດ ກໍ​ຄືພັດ​ທະ​ນາວຽກງານການສຶກສາ, ວິທະຍາສາດ ແລະ ການກິລາ ໃຫ້ມີຜົນສຳເລັດໃໝ່ ໃຫຍ່ຫຼວງກວ່າ​ເກົ່າ”.