ກະຊວງສຶກສາທິການ ແລະ ກິລາ (ສສກ) ໄດ້ຈັດກອງປະຊຸມຝຶກອົບຮົມວຽກງານກວດກາພັກ-ລັດ ໃຫ້ແກ່ຄະນະພັກ-ຄະນະນຳແຕ່ລະຂັ້ນ ແລະ ຜູ້ເຮັດວຽກງານກວດກາ ທີ່ຂຶ້ນກັບກະຊວງສຶກສາທິການ ແລະ ກິລາ ໃນວັນທີ 26 ພຶດສະພາ 2026 ທີ່ສະໂມສອນຊັ້ນ 2 ມະຫາວິທະຍາໄລແຫ່ງຊາດ ພາຍໃຕ້ການເປັນປະທານຂອງສະຫາຍ ປອ ນາງ ດາລາວອນ ກິດຕິພັນ ຮອງເລຂາຄະນະພັກກະຊວງ, ຮອງລັດຖະມົນຕີ ກະຊວງສຶກສາທິການ ແລະ ກິລາ, ໂດຍມີຄະນະປະຈຳພັກກະຊວງ, ຄະນະບໍລິຫານງານພັກ, ປະທານ-ຮອງປະທານກວດກາພັກກະຊວງ, ອົງການກວດກາແຫ່ງລັດ, ເລຂາຄະນະພັກຮາກຖານ, ຄະນະກວດກາຄະນະພັກຮາກຖານ, ຜູ້ກວດກາໜ່ວຍພັກຮາກຖານ, ຫົວໜ້າພະແນກສຶກສາທິການ ແລະ ກິລານະຄອນຫຼວງ/ແຂວງ, ພະນັກງານກວດກາ ແລະ ພາກສ່ວນຕ່າງໆ ທີ່ຂຶ້ນກັບກະຊວງ ເຂົ້າຮ່ວມຢ່າງພ້ອມພຽງ.

ໂອກາດດັ່ງກ່າວ, ສະຫາຍ ປອ ນາງ ດາລາວອນ ກິດຕິພັນ ໄດ້ມີຄຳເຫັນ ແລະ ກ່າວເປີດກອງປະຊຸມວ່າ: ກອງປະຊຸມຝຶກອົບຮົມວຽກງານກວດກາພັກ-ລັດໃນຄັ້ງນີ້ ເປັນກອງປະຊຸມທີ່ມີຄວາມໝາຍຄວາມສຳຄັນທີ່ສຸດສຳລັບຄະນະພັກ, ຄະນະນຳ ແລະ ຜູ້ຮັບຜິດຊອບວຽກງານກວດກາແຕ່ລະຂັ້ນ ຊຶ່ງຈະໄດ້ພ້ອມກັນຄົ້ນຄວ້າແລກປ່ຽນຄວາມຄິດເຫັນ ແລະ ປົບສົບການຮ່ວມມື, ກອງປະຊຸມຈະໄດ້ຮັບຟັງການລາຍງານຫຍໍ້ການຈັດຕັ້ງ ແລະ ການເຄື່ອນໄຫວວຽກງານຂອງຄະນະກວດກາພັກກະຊວງສຶກສາທິການ ແລະ ກິລາ ແລະ ການນຳສະເໜີບົດຮຽນຂອງວິທະຍາກອນ ຈາກ ສສ ຫວຽດນາມ, ວິທະຍາກອນຈາກຄະນະກວດກາສູນກາງພັກກ່ຽວກັບກົງຈັກການຈັດຕັ້ງຂອງຄະນະກວດກາພັກ, ອົງການກວດກາລັດ, ອົງການຕ້ານການສໍ້ລາດບັງຫຼວງ ແລະ ການບຳລຸງສ້າງພະນັກງານກວດກາ; ຄວາມຮູ້ທົ່ວໄປກ່ຽວກັບວຽກງານກວດກາພັກ; ວຽກງານຕິດຕາມຂອງພັກ; ການກວດກາການຈັດຕັ້ງພັກ; ຄວາມຮຫບຜິດຊອບໜ້າທີ່ການເມືອງຂອງພັກ, ສະມາຊິກພັກ, ການຈັດຕັ້ງລັດ ແລະ ພະນັກງານ-ລັດຖະກອນ; ວຽກງານສະກັດກັ້ນ ແລະ ຕ້ານການສໍ້ລາດບັງຫຼວງ; ວຽກງານຄົ້ນຄວ້າ, ພິຈາລະນາ ແລະ ແກ້ໄຂຄຳຮ້ອງຟ້ອງ, ຮ້ອງທຸກ ແລະ ຄຳສະເໜີ; ລະບຽບວິໄນຂອງພັກ ແລະ ການລົງວິໄນພາຍໃນພັກ; ກວດກາພິສູດໃນວຽກງານກວດກາພັກ; ບາງບັນຫາພຶ້ນຖານກ່ຽວກັບຈິດຕະສາດໃນວຽກງານກວດກາ; ຄວາມຮູ້ພື້ນຖານກ່ຽວກັບວຽກງານກວດກາລັດ; ຄວາມຮູ້ພຶ້ນຖານກ່ຽວກັບການສືບສວນ-ສອບສວນ; ຄວາມຮູ້ພຶ້ນຖານກ່ຽວກັບວຽກງານຕິດຕາມ, ກວດກາໂຄງການລົງທຶນຂອງລັດເລີ່ມແຕ່ຫົວທີ; ການແກ້ໄຂຜົນການກວດກາ ແລະ ການຕິດຕາມ, ຊຸກຍູ້, ກວດກາການແກ້ໄຂຜົນການກວດກາ; ການສ້າງເອກະສານ ແລະ ສຳນວນ, ສຳເນົາເອກະສານວຽກງານກວດກາ. ດັ້ງທີ່ຮູ້ກັນແລ້ວວ່າວຽກງານກວດກາແມ່ນວຽກງານໜຶ່ງທີ່ສຳຄັນຂອງພັກ, ແມ່ນໜຶ່ງໃນພາລະບົດບາດການນຳພາຂອງຄະນະພັກ, ຄະນະນຳທຸກຂັ້ນ ແລະ ສອດຫ້ອຍເຂົ້າໃນທຸກຂົງເຂດວຽກງານ, ກວດກາ ແມ່ນການຊອກຮູ້, ການເກັບກຳຂໍ້ມູນ ແລະ ຫຼັກຖານກ່ຽວກັບການຊີ້ນຳ-ນຳພາ, ການຈັດຕັ້ງແນວທາງຂອງພັກ, ນະໂຍບາຍຂອງລັດ, ກົດໜາຍ, ລະບຽບການ ແລະ ການປະຕິບັດພາລະບົດບາດ, ສິດ, ໜ້າທີ່, ຄວາມຮັບຜິດຊອບຂອງການຈັດຕັ້ງ, ບຸກຄົນທີ່ຢູ່ໃນອົງການຈັດຕັ້ງພັກ-ລັດ ເພື່ອພິຈາລະນາ, ຕີລາຄາ, ປະເມີນຜົນ ການຈັດຕັ້ງຂັ້ນເທິງຂອງເປົ້າໝາຍຖືກກວດກາ ພິຈາລະນາ ຕາມກົດໝາຍ ແລະ ລະບຽບທີ່ວາງໄວ້; ການກວດກາ ບໍ່ແມ່ນການຈັດຕັ້ງປະຕິບັດວຽກງານໃນໄລຍະໃດ ໄລຍະໜຶ່ງເທົ່ານັ້ນ, ມັນແມ່ນວຽກຂອງການຈັດຕັ້ງພັກ-ລັດທຸກຂັ້ນ ແລະ ເປັນວຽກຂອງໝົດທຸກຄົນ ທີ່ຈະຕ້ອງໄດ້ມີສ່ວນຮ່ວມໃນວຽກງານກວດກາ, ພ້ອມທັງເຮັດປົກກະຕິ ແລະ ຕໍ່ເນື່ອງ. ສະນັ້ນ, ຄະນະກວດກາແຕ່ລະຂັ້ນ ຕ້ອງມີຫົວຄິດປະດິດສ້າງໃນການກວດກາ, ບໍ່ແມ່ນກວດກາເພື່ອຊອກເອົາຄວາມຜິດ ຫຼື ຈຸດອ່ອນ/ຂໍ້ຄົງຄ້າງຕ່າງໆເທົ່ານັ້ນ, ການກວດກາ ແມ່ນຈະຕ້ອງໄດ້ຊອກໃຫ້ເຫັນດ້ານດີ ເພື່ອພ້ອມກັນສົ່ງເສີມ ແລະ ໃຫ້ຄຳຍ້ອງຍໍຊົມເຊີຍ, ສຳລັບຈຸດອ່ອນ/ຂໍ້ຄົງຄ້າງ ຫຼື ຂໍ້ຜິດພາດຕ່າງໆ ກໍຈະໄດ້ພ້ອມກັນຊອກຫາວິທີທາງໃນການປັບປຸງ, ແກ້ໄຂໃຫ້ດີຂຶ້ນ.

ສຳລັບກອງປະຊຸມຝຶກອົບຮົມໃນຄັ້ງນີ້ ແມ່ນຈະດຳເນີນໄປເປັນເວລາ 5 ວັນ (26-30 ພຶດສະພາ 2026 ) ຈຶ່ງຈະສຳເລັດ. ມີຫຼາຍເນື້ອໃນທີ່ຈຳໄດ້ຄົ້ນຄວ້າ, ແລກປ່ຽນ ຈຶ່ງຮຽກຮ້ອງໃຫ້ບັນດາສະຫຼາຍຜູ້ແທກກອງປະຊຸມທັງໝົດຈົ່ງຍົກສູງຄວາມຮັບຜິດຊອບ, ສຸມທຸກສະຕິປັນຍາເຂົ້າໃນການຄົ້ນຄວ້າ, ສົນທະນາ ແລກປ່ຽນຄຳເຫັນຢ່າງກົງໄປກົງມາ ແລະ ສ້າງສັນ ເພື່ອເຮັດໃຫ້ກອງປະຊຸມມີຄວາມໝາຍຄວາມສຳຄັນ ແລະ ໄດ້ຮັບຜົນສຳເລັດຕາມແຜນທີ່ວາງໄວ້.

ໂດຍ: ບຸນທະວີ ນະວົງສາ