ສສກ ຜ່ານຮ່າງຂໍ້ຕົກລົງວ່າດ້ວຍລະບຽບການ ແລະ ກົນໄກວິທີການເຮັດວຽກ ເພື່ອຫັນເຂົ້າສູ່ລະບົບທັນສະໄໝ
ກະຊວງສຶກສາທິການ ແລະ ກິລາ (ສສກ) ໄດ້ຈັດກອງປະຊຸມຜ່ານຮ່າງຂໍ້ຕົກລົງວ່າດ້ວຍລະບຽບການ ແລະ ກົນໄກວິທີການເຮັດວຽກ ເພື່ອຫັນເຂົ້າສູ່ລະບົບທັນສະໄໝ. ວັນທີ 12 ມິຖຸນາ 2026 ຜ່ານມານີ້ ທີ່ຫ້ອງປະຊຸມໃຫຍ່ ວິທະຍາໄລເຕັກນິກ-ວິຊາຊີບ ການລົດໄຟ (ຫຼັກ 16) ໂດຍພາຍໃຕ້ການເປັນປະທານຂອງທ່ານ ປອ. ນາງ ດາລາວອນ ກິດຕິພັນ ຮອງລັດຖະມົນຕີ ກະຊວງສຶກສາທິການ ແລະ ກິລາ, ມີຫົວໜ້າ-ຮອງຫົວໜ້າຫ້ອງການ, ຫົວໜ້າ-ຮອງຫົວໜ້າກົມ, ຜູ້ອຳນວຍການ-ຮອງຜູ້ອຳນວຍການສະຖາບັນ, ສູນ, ຜູ້ອຳນວຍການວິທະຍາໄລເຕັກນິກ-ວິຊາຊີບການລົດໄຟ ພ້ອມດ້ວຍຫົວໜ້າພະແນກ-ຮອງພະແນກທົ່ວຂະແໜງການສຶກສາ ແລະ ກິລາເຂົ້າຮ່ວມຢ່າງພ້ອມພຽງ.
ໂອກາດດັ່ງກ່າວ, ທ່ານ ປອ ນາງ ດາລາວອນ ກິດຕິພັນ ໄດ້ກ່າວວ່າ: ການຈັດກອງປະຊຸມຄັ້ງນີ້ ແມ່ນມີຄວາມໝາຍຄວາມສຳຄັນຢ່າງຍິ່ງ ເພື່ອເປັນການຈັດຕັ້ງຜັນຂະຫຍາຍ ແລະ ປັບປຸງກົນໄກການເຮັດວຽກ, ສ້າງຄວາມເປັນເອກະພາບ ຂອງກະຊວງສຶກສາທິການ ແລະ ກິລາ ເຊິ່ງເປັນບັນຫາໃໝ່ ແລະ ເປັນບັນຫາທີ່ມີຄວາມຊັບຊ້ອນໃນກະຊວງ ແລະ ອົງການຂອງພັກ-ລັດ, ເປັນບັນຫາທີ່ເວົ້າກັນຫຼາຍໃນເວລາສໍາຫຼວດກວດກາ, ຕໍານິສົ່ງຂ່າວເຊິ່ງກັນ ແລະ ກັນ ລະຫວ່າງຂັ້ນເທິງຕໍ່ຂັ້ນລຸ່ມ ແລະ ຂັ້ນລຸ່ມຕໍ່ຂັ້ນເທິງ. ຍ້ອນແນວນັ້ນ ພາຍຫຼັງທີ່ກະຊວງສຶກສາທິການ ແລະ ກິລາ ປັບປຸງກົງຈັກການຈັດຕັ້ງສໍາເລັດ, ກະຊວງສຶກສາທິການ ແລະກິລາ ຈຶ່ງໄດ້ສ້າງນິຕິກໍານີ້ອອກມາ ເພື່ອແນໃສ່ຍົກສູງສະຕິຄວາມຮັບຜິດຊອບຂອງພະນັກງານຂັ້ນຕ່າງ ຈົນຮອດວິຊາການ, ໃຫ້ຮັບປະກັນຄວາມວ່ອງໄວ, ໂປ່ງໃສ ແລະ ສອດຄ່ອງກັບແນວທາງຂອງພັກ-ນະໂຍບາຍຂອງລັດ.
ໃນກອງປະຊຸມດັ່ງກ່າວ ທ່ານ ຮສ.ປອ ຫຼ້າວັນ ວົງຄໍາສານ ຫົວໜ້າຫ້ອງການ ກະຊວງສຶກສາທິການ ແລະ ກິລາ ໄດ້ຂຶ້ນຜ່ານ (ຮ່າງ) ຂໍ້ຕົກລົງວ່າດ້ວຍລະບຽບການ ແລະ ກົນໄກວິທີການເຮັດວຽກຂອງກະຊວງສຶກສາທິການ ແລະ ກິລາ ຂອງທ່ານລັດຖະມົນຕີ ສສກ ເຊິ່ງມີທັງໝົດ 7 ໝວດ, 36 ມາດຕາ ໄດ້ແກ: ໝວດທີ 1 ບົດບັນຍັດທົ່ວໄປ; ໝວດທີ 2 ຄວາມຮັບຜິດຊອບ ແລະ ຂອບເຂດສິດ ການແກ້ໄຂວຽກງານ; ໝວດທີ 3 ການພົວພັນປະສານງານ ແລະ ວຽກງານແຜນການ; ໝວດທີ 4 ປະເພດກອງປະຊຸມ ແລະ ການຈັດກອງປະຊຸມ; ໝວດທີ 5 ການໄປເຄື່ອນໄຫວວຽກພາຍໃນ, ຕ່າງປະເທດ, ການຕ້ອນຮັບແຂກ ແລະ ການລາພັກ; ໝວດທີ 6 ລະບອບສ່ອງແສງລາຍງານ ແລະ ໝວດທີ 7 ການຕິດຕາມ, ຕີລາຄາ ແລະ ມາດຕະການ ຈັດຕັ້ງປະຕິບັດ.
ທ່ານ ຮອງລັດຖະມົນຕີ ຍັງໄດ້ເນັ້ນຕື່ມວ່າ ເນື້ອໃນຂອງແຕ່ລະມາດຕາ ຈະເປັນບ່ອນອີງ ຫຼື ຫຼັກຖານທີ່ສໍາຄັນ ໃຫ້ແກ່ພວກເຮົາ ທີ່ຈະຈັດຕັ້ງປະຕິບັດວຽກງານໃນຂອບເຂດທີ່ຕົນຮັບຜິດຊອບ, ທີ່ໄດ້ຮັບການມອບໝາຍ ແລະ ສອດຄ່ອງກັບບູລິມະສິດຂອງແຜນພັດທະນາຂະແໜງການສຶກສາ ແລະ ກິລາ ປະຈໍາປີ 2026 ກໍຄືແຜນ 5 ປີ ຄັ້ງທີ X ໃຫ້ມີປະສິດທິພາບ ແລະ ປະສິດທິຜົນ ກໍໃຫ້ເກີດປະໂຫຍດສູງສຸດ ມາສູ່ກົມກອງພວກເຮົາ ຂໍໃຫ້ທຸກທ່ານ ມີຄໍາເຫັນຢ່າງກົງໄປກົງມາ ຊັດເຈນ ແລະ ໃຫ້ກອງເລຂານໍາໄປປັບປຸງ ກ່ອນຈະລົງລາຍເຊັນຮັບຮອງ ແລະ ປະກາດນໍາໃຊ້.
ຫລັງຈາກນັ້ນ, ກໍໄດ້ມີການປະກອບຄໍາຄໍາເຫັນ ຈາກຫລາຍພາກສ່ວນ ເຊິ່ງເຮັດໃຫ້ມີເນື້ອໃນລະອຽດຂຶ້ນກວ່າເກົ່າ. ຕອນທ້າຍຂອງກອງປະຊຸມ ທ່ານປະທານກອງປະຊຸມ ຍັງໄດ້ມອບໝາຍໃຫ້ແຕ່ລະພາກສ່ວນໄປຈັດກອງປະຊຸມລະດົມແນວຄວາມຄິດ ໃນພາກຕົນ ແລ້ວ ສົ່ງໃຫ້ກອງເລຂາ ໃນເວລາອັນສົມຄວນ.
ພາບ-ຂ່າວໂດຍ: ບົວລະພາ
