ກົມສາມັນສຶກສາ ກະຊວງສຶກສາທິການ ແລະ ກິລາ (ສສກ) ໄດ້ຈັດງານຖະແຫຼງຂ່າວຢ່າງເປັນທາງການ ໃນຕອນບ່າຍວັນທີ 29 ພຶດສະພາ 2025 ທີ່ກະຊວງດັ່ງກ່າວ ໃຫ້ກຽດຖະແຫຼງໂດຍ ທ່ານ ນາງ ນວມຄຳ ຈັນທະບູລີ ຫົວໜ້າກົມສາມັນສຶກສາ ກະຊວງ ສສກ ເພື່ອແຈ້ງຄວາມພ້ອມຮອບດ້ານໃນການຈັດຕັ້ງບັ້ນສອບເສັງຈົບຊັ້ນມັດທະຍົມສຶກສາຕອນຕົ້ນ (ມ.4) ແລະ ມັດທະຍົມສຶກສາຕອນປາຍ (ມ.7) ປະຈຳສົກຮຽນ 2025-2026 ໂດຍເນັ້ນໜັກໃສ່ຄວາມໂປ່ງໃສ, ຍຸຕິທຳ ແລະ ຮັບປະກັນຄຸນນະພາບການສຶກສາທີ່ແທ້ຈິງ ພ້ອມຮຽກຮ້ອງໃຫ້ທົ່ວສັງຄົມ, ຜູ້ປົກຄອງ ແລະ ນັກຮຽນ ເປັນເຈົ້າການຮ່ວມກັນ.

ການສອບເສັງຈົບຊັ້ນໃນປີນີ້ ຖືເປັນວຽກງານບູລິມະສິດລະດັບຊາດ ທີ່ແນໃສ່ວັດ ແລະ ປະເມີນຜົນການຮຽນ-ການສອນຢ່າງເປັນຮູບປະທຳ ໂດຍມີການຮ່ວມມືຢ່າງໃກ້ຊິດລະຫວ່າງ 4 ກະຊວງ ແລະ 4 ບໍລິສັດໂທລະຄົມມະນາຄົມ ເພື່ອອຳນວຍຄວາມສະດວກ ແລະ ສະກັດກັ້ນປະກົດການຫຍໍ້ທໍ້ຕ່າງໆ ຕະຫຼອດໄລຍະການສອບເສັງ. ສຳລັບບັ້ນສອບເສັງຈະຖືກຈັດຂຶ້ນເປັນ 2 ໄລຍະ ຄື: ຊັ້ນມັດທະຍົມສຶກສາຕອນຕົ້ນ (ມ.4) ຈັດຂຶ້ນລະຫວ່າງ ວັນທີ 10-12 ມິຖຸນາ 2026ມີການສອບເສັງທັງໝົດ 5 ວິຊາ ປະກອບມີ: ພາສາລາວ-ວັນນະຄະດີ 120 ນາທີ, ວິທະຍາສາດສັງຄົມ 90 ນາທີ,ວິທະຍາສາດທຳມະຊາດ 120 ນາທີ, ພາສາອັງກິດ 90 ນາທີ ແລະ ຄະນິດສາດ 120 ນາທີ. ສ່ວນຊັ້ນມັດທະຍົມສຶກສາຕອນປາຍ (ມ.7) ຈັດຂຶ້ນລະຫວ່າງ ວັນທີ 17-19 ມິຖຸນາ 2026, ສອບເສັງທັງໝົດ 5 ວິຊາ ປະກອບມີ ພາສາລາວ-ວັນນະຄະດີ 120 ນາທີ, ກຸ່ມວິຊາວິທະຍາສາດສັງຄົມ 120 ນາທີ, ກຸ່ມວິຊາວິທະຍາສາດທຳມະຊາດ 90 ນາທີ, ພາສາອັງກິດ 90 ນາທີ ແລະ ຄະນິດສາດ 120 ນາທີ. ນອກຈາກນີ້, ທາງຄະນະຈັດການສອບເສັງ ມີນະໂຍບາຍກຳນົດເວລາສອບເສັງຄືນ ສຳລັບນັກຮຽນທີ່ມີເຫດຜົນຈຳເປັນ ເຊັ່ນ: ເຈັບເປັນ, ເກີດເຫດສຸກເສີນກະທັນຫັນ ຫຼື ນັກກິລາທີ່ຕາງໜ້າໄປແຂ່ງຂັນລາຍການຕ່າງໆ.

ໃນສົກຮຽນ 2025-2026 ທົ່ວປະເທດ ມີໂຮງຮຽນມັດທະຍົມທັງໝົດ 1,866 ແຫ່ງ ເພີ່ມຂຶ້ນ 5 ແຫ່ງ ຫາກທຽບໃສ່ສົກຮຽນຜ່ານມາ, ມີໂຮງຮຽນເອກະຊົນ 165 ແຫ່ງ. ໃນນີ້, ຊັ້ນ ມ.4 ມີນັກສອບເສັງທັງໝົດ 71,427 ຄົນ ຍິງ 35,319 ຄົນ, ເພີ່ມຂຶ້ນຈາກປີຜ່ານມາ 2,263 ຄົນ; ມີນັກສອບເສັງສອງພາສາ (Bilingual) ຈຳນວນ 247 ຄົນ ຍິງ 141 ຄົນ ແລະ ພະສົງ-ສາມະເນນ 698 ອົງ ແລະ ມີສູນສອບເສັງທັງໝົດ 588 ສູນ ປະກອບມີ 3,578 ຫ້ອງສອບເສັງ. ສ່ວນ ຊັ້ນ ມ.7 ມີນັກສອບເສັງທັງໝົດ 40,722 ຄົນ ຍິງ 19,848 ຄົນ, ຫຼຸດລົງຈາກປີຜ່ານມາ 1,035 ຄົນ; ມີນັກສອບເສັງສອງພາສາ ຈຳນວນ 208 ຄົນ ຍິງ 139 ຄົນ ແລະ ພະສົງ-ສາມະເນນ 415 ອົງ ແລະ ມີສູນສອບເສັງທັງໝົດ 278 ສູນ ປະກອບມີ 2,022 ຫ້ອງສອບເສັງ.

ດ້ານມາດຕະການເຂັ້ມງວດ ກ່ຽວກັບໂປ່ງໃສ, ຍຸຕິທຳ ແລະ ຕ້ານປະກົດການຫຍໍ້ທໍ້ ເພື່ອຮັບປະກັນໃຫ້ຜົນການສອບເສັງສະທ້ອນເຖິງຄຸນນະພາບທີ່ແທ້ຈິງ ກະຊວງສຶກສາທິການ ແລະ ກິລາ ໄດ້ວາງມາດຕະການຢ່າງຮັດກຸມ ການອອກຫົວບົດສອບເສັງ ດຳເນີນການໂດຍສະຖາບັນຄົ້ນຄວ້າວິທະຍາສາດການສຶກສາ ພາຍໃຕ້ລະບຽບການເຂົ້າສູນອອກຫົວບົດຢ່າງເຂັ້ມງວດ, ຫົວບົດມີຄວາມສົມດຸນ (ງ່າຍ 20%, ປານກາງ 65%, ຍາກ 15%) ໂດຍແບ່ງເປັນ 2 ຊຸດ (ຊຸດ A ແລະ ຊຸດ B) ພ້ອມມີຫົວບົດສຳຮອງ; ນຳໃຊ້ເຄື່ອງຈັກກວດບົດສອບເສັງອັດຕະໂນມັດ ເພື່ອຮັບປະກັນຄວາມຖືກຕ້ອງ, ໂປ່ງໃສ, ຍຸຕິທຳ ແລະ ເປັນເອກະພາບທົ່ວປະເທດ; ປະສານງານຮ່ວມກັບ 4 ກະຊວງ ຄື: ກະຊວງສຶກສາທິການ ແລະ ກິລາ, ກະຊວງວັດທະນະທຳ ແລະ ທ່ອງທ່ຽວ, ກະຊວງປ້ອງກັນຄວາມສະຫງົບ ແລະ ກະຊວງປ້ອງກັນປະເທດ ແລະ 4 ບໍລິສັດໂທລະຄົມ (ລາວໂທລະຄົມ, ທີພລັດ, ຢູນິເທວ, ອີທີແອວ) ເພື່ອສະກັດກັ້ນການຮົ່ວໄຫຼຂອງຂໍ້ມູນ ແລະ ການສໍ້ໂກງທຸກຮູບແບບ; ແຕ່ງຕັ້ງຄະນະກຳມະການ ແລະ ພະນັກງານຂັ້ນສູນກາງລົງຊີ້ນຳ, ຕິດຕາມ ແລະ ຕັດສິນຜົນການສອບເສັງຢູ່ແຕ່ລະແຂວງຢ່າງໃກ້ຊິດ.

ສຳລັບເກນການຕັດສິນຜົນການສອບເສັງ ແມ່ນອີງຕາມແຈ້ງການ ກໍານົດເກນ ການຕັດສິນຄະແນນສອບເສັງຈົບຊັ້ນມັດທະຍົມສຶກສາ (ມ.4) ແລະ (ມ.7) ສະບັບເລກທີ 3243/ຫກ, ລົງວັນທີ 6 ມິຖຸນາ 2024 ເຊິ່ງໄດ້ກໍານົດເກນການຕັດສິນຜົນການສອບເສັງ ດັ່ງນີ້: ເງື່ອນໄຂການຕັດສິນຜົນການສອບເສັງຈົບຊັ້ນມັດທະຍົມສຶກສາ (ມ.4) ແລະ (ມ.7) ໃຫ້ເອົາຄະແນນແຕ່ລະວິຊາທີ່ສອບເສັງມາບວກກັບຄະແນນສະເລ່ຍປະຈໍາປີແລ້ວຫານໃຫ້ 2 ຖ້າຄະແນນສະເລ່ຍໄດ້ 5,00 ຂຶ້ນໄປຖືວ່າສອບເສັງໄດ້, ແຕ່ຄະແນນສອບເສັງຕ້ອງໄດ້ 3,00 ຂຶ້ນໄປ ຈຶ່ງມີເງື່ອນໄຂບວກກັບຄະແນນສະເລ່ຍປະຈໍາປີ; ການບັນທຶກຄະແນນສະເລ່ຍປະຈໍາປີ, ຄະແນນສອບເສັງຈົບຊັ້ນມັດທະຍົມສຶກສາ (ມ.4) ແລະ (ມ.7) ແລະ ຄະແນນສະເລ່ຍລະຫວ່າງ ຄະແນນສອບເສັງກັບຄະແນນສະເລ່ຍປະຈໍາປີ ໃສ່ປຶ້ມທະບຽນ ແລະ ບັນທຶກຄະແນນນັກສອບເສັງຈົບຊັ້ນມັດທະຍົມສຶກສາ (ມ.4) ແລະ (ມ.7) ໃຫ້ບັນທຶກເປັນເລກເສດ ໂດຍກໍານົດເອົາຫຼັງຈຸດສອງຕົວເລກ.

ຫຼັງຈາກການຖະແຫຼງຂ່າວໃນມື້ນີ້, ກະຊວງສຶກສາທິການ ແລະ ກິລາ ຈະສືບຕໍ່ຈັດກອງປະຊຸມເປີດບັ້ນສອບເສັງໃນຂອບເຂດທົ່ວປະເທດ, ຈັດຝຶກອົບຮົມໃຫ້ແກ່ຄະນະກຳມະການຊີ້ນຳ ແລະ ສົ່ງຄະນະສະເພາະກິດຮ່ວມກັບຂະແໜງການປ້ອງກັນຄວາມສະຫງົບ ແລະ ໂທລະຄົມ ລົງຕິດຕາມສູນສອບເສັງຕົວຈິງຢ່າງໃກ້ຊິດ. ສະນັ້ນ, ໃນນາມຄະນະຮັບຜິດຊອບຈັດການສອບເສັງ ຂໍຮຽກຮ້ອງມາຍັງ ຜູ້ປົກຄອງ, ຊຸມຊົນ ແລະ ທົ່ວສັງຄົມ ຈົ່ງຮ່ວມກັນເປັນຫູເປັນຕາ, ຊຸກຍູ້ ແລະ ສ້າງເງື່ອນໄຂໃຫ້ລູກຫຼານໄດ້ຄົ້ນຄວ້າຮ່ຳຮຽນ, ເດີນທາງໄປສອບເສັງໃຫ້ທັນໂມງ ແລະ ເວລາ ພ້ອມທັງປະຕິບັດລະບຽບການສອບເສັງຢ່າງເຂັ້ມງວດ ເພື່ອຮ່ວມກັນຍົກສູງຄຸນນະພາບການສຶກສາຂອງຊາດ ໃຫ້ມີຄວາມກ້າວໜ້າຢ່າງຍືນຍົງ.