ສະຫະພັນກໍາມະບານ ສສກ ຮ່ວມກັບ ມຊ ປາຖະກະຖາເລົ່າມູນເຊື້ອວັນກໍາມະກອນສາກົນ ຄົບຮອບ 140 ປີ
ໃນວັນທີ 29 ເມສາ 2026 ທີ່ຫ້ອງປະຊຸມມະຫາວິທະຍາໄລແຫ່ງຊາດ, ສະຫະພັນກໍາມະບານ ກະຊວງສຶກສາທິການ ແລະ ກິລາ ຮ່ວມກັບ ສະຫະພັນກຳມະບານມະຫາວິທະຍາໄລແຫ່ງຊາດ ຈັດພິທີປາຖະກະຖາເລົ່າມູນເຊື້ອປະຫວັດຄວາມເປັນມາວັນກໍາມະກອນສາກົນ ຄົບຮອບ 140 ປີ (ວັນທີ 1 ພຶດສະພາ 1886-ວັນທີ 1 ພຶດສະພາ 2026), ໂດຍໃຫ້ກຽດປາຖະກະຖາຂອງທ່ານ ວິໄລ ວົງຂະເສີມ ຄະນະພັກ, ຮອງປະທານຄະນະບໍລິຫານງານສູນກາງສະຫະພັນກຳມະບານລາວ, ມີທ່ານ ແສງສະເດັນ ບຸນລາວົງ ຄະນະບໍລິຫານງານສູນກາງກຳມະບານລາວ, ຄະນະພັກກະຊວງ, ປະທານສະຫະພັນກຳມະບານກະຊວງສຶກສາທິການ ແລະ ກິລາ ພ້ອມດ້ວຍຮອງປະທານຄະນະບໍລິຫານງານ ສະຫະພັນກຳມະບານກະຊວງສຶກສາທິການ ແລະ ກິລາ, ມະຫາວິທະຍາໄລແຫ່ງຊາດ, ການສຶກສາພາກເອກະຊົນ ແລະ ບັນດາຮາກຖານກຳມະບານຕ່າງໆ ແລະ ສະມາຊີກກຳມະບານທີ່ຂຶ້ນກັບ ເຂົ້າຮ່ວມ.
ພິທີປາຖະກະຖາຄັ້ງນີ້, ແມ່ນເພື່ອສຶກສາອົບຮົມດ້ານການເມືອງ-ແນວຄິດ ໃຫ້ພະນັກງານ, ສະມາຊິກກຳມະບານ ແລະ ອອກແຮງງານ ໄດ້ຮັບຮູ້ ແລະ ເຂົ້າໃຈຢ່າງເລິກເຊິ່ງ ກ່ຽວກັບປະຫວັດຄວາມເປັນມາ, ຄວາມໝາຍຄວາມສຳຄັນ ຂອງວັນກຳມະກອນສາກົນ ວັນທີ 1 ພຶດສະພາ ທັງນີ້, ກໍເພື່ອຍົກສູງບົດບາດຂອງຊົນຊັ້ນກຳມະກອນ ໂດຍເນັ້ນໜັກໃຫ້ເຫັນເຖິງພາລະກຳປະຫວັດສາດ ແລະ ຄວາມເສຍສະລະຂອງກຳມະກອນ ໃນການສ້າງສາ ແລະ ພັດທະນາເສດຖະກິດ-ສັງຄົມ. ພ້ອມກັນນັ້ນ, ຍັງເປັນການປຸກລະດົມຂະບວນການ: ສ້າງຈິດສຳນຶກໃຫ້ແກ່ສະມາຊິກ ກຳມະບານທຸກສະຫາຍ ໃຫ້ມີຄວາມຕື່ນຕົວ, ມີລະບຽບວິໄນໃນການອອກແຮງງານ ແລະ ຕັ້ງໜ້າຝຶກຝົນຫຼໍ່ຫຼອມ ຕົນເອງໃຫ້ມີສີມືແຮງງານທີ່ທັນສະໄໝ ເພື່ອປະກອບສ່ວນເຂົ້າໃນການພັດທະນາປະເທດຊາດໃນ ຍຸກໃໝ່.
ໂອກາດນີ້, ທ່ານ ວິໄລ ວົງຂະເສີມ ເລົ່າເຖິງປະຫວັດຄວາມເປັນມາຂອງວັນກໍາມະກອນສາມກົນ ວັນທີ 1 ພຶດສະພາ; ຂະບວນການຕໍ່ສູ້, ຄວາມຮຽກຮ້ອງຕ້ອງການຂອງກໍາມະກອນສາກົນ ແລະ ກໍາມະກອນລາວ ໃນຍຸກປັດຈຸບານ ແລະ ການປະກອບສ່ວນໃນພາລະກິດປະຕິວັດຂອງກໍາມະກອນລາວ ແລະ ເສີມຂະຫຍາຍມູນເຊື້ອອັນດີງາມຂອງກໍາມະກອນສາກົນໃນໄລຍະຜ່ານມາ.
ພາບ-ຂ່າວໂດຍ: ການຈະນາ
