ຄະນະກຳມະການພາຣາແລມປິກແຫ່ງຊາດລາວ (ຄພລ) ໄດ້ຈັດກອງປະຊຸມໃຫຍ່ ຄະນະບໍລິຫານງານ ຄະນະກຳມະການພາຣາແລມປິກແຫ່ງຊາດລາວ ສະໄໝທີ IV ໃນວັນທີ 28 ມີນາ 2026 ທີ່ຫ້ອງປະຊຸມໃຫຍ່ ສະຖາບັນຄົ້ນຄວ້າວິທະຍາສາດການສຶກສາ (ສວສ) ໂດຍການເປັນປະທານຂອງ ທ່ານ ກິ່ງມະໂນ ພົມມະຫາໄຊ ຮອງລັດຖະມົນຕີກະຊວງສຶກສາທິການ ແລະ ກິລາ, ຜູ້ຊີ້ນໍາວຽກງານກິລາ-ກາຍຍະກຳ ແລະ ທ່ານ ນາງ ຂັນທະລີ ສິຣິພົງພັນ ປະທານຄະນະກຳມະການພາຣາແລມປິກແຫ່ງຊາດລາວ, ພ້ອມດ້ວຍບັນດາຮອງປະທານ ແລະ ຄະນະບໍລິຫານງານ, ມີຄະນະປະຈຳ, ເລຂາ, ຮອງເລຂາ ຄະນະກຳມະການພາຣາແລມປິກແຫ່ງຊາດລາວ, ມີທ່ານຮອງປະທານ-ເລຂາທິການ ຄະນະກຳມະການໂອແລມປິກແຫ່ງຊາດລາວ, ບັນດາທ່ານຫົວໜ້າກົມ, ຮອງຫົວໜ້າກົມ ຈາກກະຊວງສຶກສາທິການ ແລະ ກິລາ ແລະ ບັນດາກະຊວງທີ່ກ່ຽວຂ້ອງ, ມີບັນດາກຳມະການຂອງ ຄະນະກຳມະການພາຣາແລມປິກແຫ່ງຊາດ, ປະທານ ແລະ ຮອງປະທານ, ເລຂາທິການ ສະຫະພັນກິລາຄົນພິການແຫ່ງຊາດ, ຄູຝຶກ, ຕົວແທນນັກກິລາຄົນພິການ ແລະ ພາກສ່ວນຕ່າງທີ່ກ່ຽວຂ້ອງ ເຂົ້າຮ່ວມຢ່າງພ້ອມພຽງ.

ໃນກອງປະຊຸມ, ທ່ານ ນາງ ຂັນທະລີ ສິຣິພົງພັນ ໄດ້ມີຄຳເຫັນກ່າວວ່າ: ໃນກອງປະຊຸມໃຫຍ່ຄັ້ງນີ້ ຈະໄດ້ພ້ອມກັນສະຫຼຸບຕີລາຄາ ການນຳພາໃນການເຄື່ອນໄຫວ ຈັດຕັ້ງປະຕິບັດວຽກງານຂອງຄະນະບໍລິຫານງານ ຄະນະກຳມະການພາຣາແລມປິກແຫ່ງຊາດລາວ ສະ​ໄໝ​ທີ IV ຕະຫຼອດປີຜ່ານມາ. ​ເພື່ອຊອກໃຫ້ເຫັນດ້ານດີ, ດ້ານຕັ້ງໜ້າ ທີ່ພວກເຮົາຈະຕ້ອງໄດ້ສືບຕໍ່ເສີມຂະຫຍາຍ ແລະ ດ້ານຂໍ້ຄົງຄ້າງທີ່ພວກເຮົາຈະຕ້ອງໄດ້ສືບຕໍ່ປັບປຸງແກ້ໄຂໃນຕໍ່ໜ້າ. ຂ້າພະເຈົ້າ ມີຄວາມເຊື່ອໝັັ້ນ ວ່າບັນດາທ່ານ ຈະພ້ອມກັນເຊີດຊູຄວາມຮັບຜິດຊອບສູງ ໃນ​ການ​ປະ​ກອບຄຳຄິດຄຳເຫັນ ແລະ ພ້ອມ​ກັນ​ດຳ​ເນີນກອງ​ປະ​ຊຸມ​ໄດ້​ຮັບ​ຜົນສຳເລັດ ແລະ ບັນລຸຕາມຈຸດປະສົງ ລະດັບຄາດໝາຍທີ່ວາງໄວ້.

ຫຼັງຈາກນັ້ນ, ທ່ານ ວິລະວັນ ບຸນສຸກໄທ ຫົວໜ້າກົມກິລາມວນຊົນ, ພະລະ ແລະ ສິລະປະສຶກສາ ທັງເປັນຮອງປະທານ-ເລຂາທິການ ຄພລ ໄດ້ລາຍງານໃຫ້ຮູ້ວ່າ: ຄະນະກຳມະການພາຣາແລມປິກແຫ່ງຊາດລາວ ເປັນອົງການຈັດຕັ້ງກິລາຄົນພິການທາງສັງຄົມ ເຊິ່ງເປັນສະມາຊິກຂອງຄະນກໍາມະການພາຣາແລມປິກສາກົນ (IPC) ເປັນຕົວແທນໃຫ້ແກ່ ສປປ ລາວ ໃນການເຂົ້າຮ່ວມຂະບວນການເຄື່ອນ ໄຫວພາຣາແລມປິກ ໃນອະນຸພາກພື້ນ, ພາກພື້ນ ແລະ ສາກົນ ມີພາລະບົດບາດໜ້າທີ່ ໃນການພັດທະນາກິລາ-ກາຍຍະກໍາຄົນພິການ ປົກປ້ອງຂະບວນການພາຣາແລມປິກຂອງ ສປປ ລາວ ໂດຍສອດຄ່ອງກັບທໍາມະນູນຂອງ IPC ທໍາມະນູນຂອງຄະນະກໍາມະການພາຣາແລມປິກອາຊີ ແລະ ທໍາມະນູນຂອງ ຄພລ ກົດໝາຍວ່າດ້ວຍ ກິລາ-ກາຍຍະກໍາ (ສະບັບປັບປຸງ) ສະບັບເລກທີ 29/ສພຊ ລົງວັນທີ 25 ພະຈິກ 2019 ພາກທີ IV ໝວດທີ 02 ມາດຕາ 73 ແລະ 74.

ຄພລ ມີບົດບາດ ໃນການໂຄສະນາເຜີຍແຜ່ຫຼັກການພື້ນຖານອຸດົມການພາຣາແລມປິກ, ໂດຍຜ່ານຂະບວນການກິລາມວນຊົນ ແລະ ກິລາ ເພື່ອການແຂ່ງຂັນ ປະຕິບັດກົດບັດພາຣາແລມປິກສາກົນ ໃສນການເຄື່ອນໄຫວພາຣາແລມປິກໃນ ສປປ ລາວ ຊຸກຍູ້ສົ່ງເສີມ ແລະ ມີສ່ວນຮ່ວມ ໃນການພັດທະນາກີລາຄົນພິການ ປະສານງານຮ່ວມມືໃນການຈັດຕັ້ງພັກ-ລັດ ເພື່ອການເຄື່ອນໄຫວ ແລະ ພັດທະນາກິລາຄົນພິການ ຕາມກົດບັດພາຣາແລມປິກສາກົນ. ໂດຍລວມ ການຈັດຕັ້ງປະຕິບັດແຜນການເຄື່ອນໄຫວ ຂອງ ຄພລ IV ຕະຫຼອດ 4 ປີຜ່ານມາ (2022-2025) ມີຜົນສຳເລັດຕາມແຜນການທີ່ວາງໄວ້ ເປັນຕົ້ນ: ວຽກງານຫ້ອງການບໍລິຫານ ແລະ ຄຸ້ມຄອງ ແບບ ແຜນວິທີເຮັດວຽກໄດ້ຮັບການປັບປຸງດີຂຶ້ນ ວຽກງານຮ່ວມມື ແລະ ປະສານງານພາຍໃນ ແລະ ຕ່າງປະເທດ ໄດ້ຮັບການປັບປຸງ ແລະ ເສີມຂະຫຍາຍວຽກງານສົ່ງເສີມການພັດທະນາບຸກຄະລາກອນກິລາ ທັງຂັ້ນສູນກາງ ແລະ ທ້ອງຖິ່ນ ໄດ້ຮັບການພັດທະນາ ວຽກງານໂຄສະນາເຜີຍແຜ່ ວຽກງານກິລາ-ກາຍຍະກຳຄົນພິການ ລວມທັງການປຸກລະດົມປະກອບສ່ວນດ້ານການເງິນ ແລະ ວັດຖຸອຸປະກອນຮັບໃຊ້ ໃນການເຄື່ອນໄຫວວຽກງານກິລາ ໄດ້ມີທ່າອ່ຽງດີຂຶ້ນ. ຈາກຜົນສຳເລັດດັ່ງກ່າວ, ໄດ້ເປັນປັດໃຈຊຸກຍູ້ໃຫ້ແກ່ການສ້າງຜົນງານ ຂອງນັກກີລາຄົນພິການ ໃນການເຂົ້າຮ່ວມການແຂ່ງຂັນງານມະຫະກຳກິລາຄົນພິການພາຍໃນປະເທດ ອະນຸພາກພື້ນ, ພາກພື້ນ ແລະ ສາກົນ. ມີສະຖິຕິທີ່ດີຂຶ້ນ ພິເສດແມ່ນເຂົ້າຮ່ວມງານມະຫະກຳກິລາອາຊຽນພາຣາເກມ ຄັ້ງທີ XIII ທີ່ນະຄອນຣາຊະສີມາ ຣາຊະອານາຈັກໄທ ໄດ້ຮັບຜົນສຳເລັດລື່ນຄາດໝາຍທີ່ວາງໄວ້ ແລະ ໄດ້ຮັບຫຼຽນຄຳ ເຊິ່ງເປັນຫຼຽນຄຳປະຫວັດສາດ ໃນການເຂົ້າຮ່ວມງານມະຫະກຳກິລາ ໃນລະດັບອາຊຽນພາຣາເກມ. ເພື່ອເປັນການສືບຕໍ່ຈັດຕັ້ງປະຕິບັດແຜນການເຄື່ອນໄຫວຂອງ ຄພລ ທີ່ກໍານົດໄວ້ ໃຫ້ສອດຄ່ອງກັບທໍາມະນູນຂອງ ຄພລ ແລະ ສາກົນ ຄພລ ໄດ້ວາງແຜນການເຄື່ອນໄຫວ 4 ປີຕໍ່ໜ້າ ໂດຍສະເພາະສຸມໃສ່ວຽກວານບໍລິຫານ ແລະ ຄຸ້ມຄອງ ວຽກງານການເງິນ ວຽກງານສົ່ງເສີມການພັດທະນາບຸກຄະລາກອນ ແລະ ແຜນ ການເຄື່ອນໄຫວຂອງບັນດາກໍາມະການ.

ສຳລັບກອງປະຊຸມ, ໄດ້ເຫັນດີຄົ້ນຄວ້າສະເໜີເປົ້າໝາຍເລືອກຕັ້ງເອົາປະທານ ແລະ ຮອງປະທານ ຄພລ ສະໄໝທີ V ປະກອບມີ: ທ່ານ ກິ່ງມະໂນ ພົມມະຫາໄຊ ເປັນປະທານ, ທ່ານ ວິລະວັນ ບຸນສຸກໄທ ເປັນຮອງປະທານ-ເລຂາທິການ, ທ່ານ ສີຈັນ ຈິດຕະປັນຍາ ຫົວຫົວໜ້າກົມກິລາລະດັບສູງ, ທ່ານ ນາງ ກອງມະນີ ວາດຕະນາ ຫົວໜ້າກົມການເງິນ ແລະ ທ່ານ ແສງສະເດັນ ບຸນລາວົງ ຫົວໜ້າກົມຮ່ວມມືກັບຕ່າງປະເທດ ເປັນຮອງປະທານ ພ້ອມດ້ວຍຄະນະອີກ 12 ທ່ານ. ນອກຈາກນີ້, ຍັງເຫັນດີຄົ້ນຄວ້າສະເໜີເປົ້າໝາຍ ເລຂາ ແລະ ຮອງເລຂາທິການຄະນະກຳມະການພາຣາແລມປິກແຫ່ງຊາດລາວ ສະໄໝທີ V ເພື່ອສະເໜີຂໍທິດຊີ້ນໍາຈາກທ່ານຮອງນາຍົກລັດຖະມົນຕີ, ລັດຖະມົນຕີກະຊວງສຶກສາທິການ ແລະ ກິລາ ປະກອບມີ: ທ່ານ ວິລະວັນ ບຸນສຸກໄທ ຫົວໜ້າກົມກິລາມວນຊົນ, ພະລະ ແລະ ສິລະປະສຶກສາ ເປັນເລຂາທິການ ແລະ ທ່ານລັດທະໄຊ ອິນທະວົງ ຮອງຫົວໜ້າກົມກິລາມວນຊົນ, ພະລະ ແລະ ສິລະປະສຶກສາ ເປັນຮອງເລຂາທິການ.