ກົມແຜນການ ກະຊວງສຶກສາທິການ ແລະ ກິລາ ຈັດກອງປະຊຸມປຶກສາຫາລືລາຍງານການຈັດຕັ້ງປະຕິບັດກິດຈະກຳປະຈຳເດືອນ ຂອງໂຄງການກອງທຶນຮວ່ມມືສາກົນ ເພື່ອການສຶກສາໄລຍະ III “ ໂຄງການການຮຽນຮູ້ ແລະ ຄວາມເທົ່າທຽມ ” (GPELL-LEAP), ໃນວັນທີ 28 ເມສາ 2026 ທີ່ຫ້ອງປະຊຸມ ກະຊວງສຶກສາທິການ ແລະ ກິລາ ເຂດສະໜາມກິລາເຈົ້າອານຸວົງ, ໂດຍການເປັນປະທານຂອງ ທ່ານ ສີທອງ ສີຂາວ ຫົວໜ້າກົມແຜນການ ກະຊວງ ສສກ, ທ່ານ ໄມເຄີນ ແດຣບໂບ ນັກເສດຖະສາດອາວຸໂສ, ຫົວໜ້າຄະນະທີມງານຈາກ ທະນາຄານໂລກ, ມີບັນດາຫົວໜ້າ-ຮອງຫົວໜ້າກົມ, ຫົວໜ້າສະຖາບັນ ແລະ ຫົວໜ້າ-ຮອງຫົວໜ້າສູນ ເຂົ້າຮ່ວມຢ່າງພ້ອມພຽງ.

ໃນກອງປະຊຸມ, ທ່ານຫົວໜ້າກົມແຜນການ ໄດ້ກ່າວໃຫ້ຮູ້ວ່າ: ກອງປະຊຸມໃນມື້ນີ້ ແມ່ນມີຄວາມສຳຄັນພິເສດ ເພາະກຳລັງຢືນຢູ່ໃນໄລຍະຫົວລ້ຽວຫົວຕໍ່ຂອງການຈັດຕັ້ງປະຕິບັດແຜນວຽກ ປະຈຳປີ 2026. ຈຸດປະສົງຫຼັກແມ່ນເພື່ອຮ່ວມກັນທົບທວນຄວາມຄືບໜ້າ, ຊອກຫາຂໍ້ຄົງຄ້າງ ແລະ ຮ່ວມກັນກຳນົດທິດທາງໃນຕໍ່ໜ້າ ໃຫ້ມີຄວາມຊັດເຈນ, ໂດຍສະເພາະຢ່າງຍິ່ງ ແມ່ນຕ້ອງໄດ້ກະກຽມຄວາມພ້ອມຢ່າງຮອບດ້ານ ເພື່ອຕ້ອນຮັບການລົງມາຊຸກຍູ້ ແລະ ຕິດຕາມການຈັດຕັ້ງປະຕິບັດໂຄງການຂອງຄະນະທີມງານຈາກທະນາຄານໂລກ ທີ່ຈະມີຂຶ້ນໃນຕົ້ນເດືອນມິຖຸນາ 2026 ນີ້. ຜົນສຳເລັດຂອງກອງປະຊຸມ Implementation Support Mission (ISM) ໃນເດືອນມິຖຸນາ ແມ່ນຂຶ້ນກັບຄວາມພ້ອມ ແລະ ຜົນງານທີ່ພວກເຮົາໄດ້ສ້າງໄວ້ໃນມື້ນີ້, ຖ້າສາມາດແກ້ໄຂບັນຫາທີ່ຍັງຄົງຄ້າງໄດ້ທັນເວລາ, ກໍຈະເປັນການສ້າງຄວາມເຊື່ອໝັ້ນໃຫ້ແກ່ຄູຮ່ວມພັດທະນາ ແລະ ຮັບປະກັນວ່າ ໂຄງການຂອງພວກເຮົາຈະສາມາດບັນລຸຕາມເປົ້າໝາຍທີ່ວາງໄວ້ ຢ່າງມີປະສິດທິພາບ ແລະ ຍືນຍົງ.

ສຳລັບການດຳເນີນກອງປະຊຸມ, ແມ່ນຈະໄດ້ຮັບຟັງການລາຍງານຈາກຫຼາຍພາກສ່ວນ ທີ່ເປັນກົນໄກຫຼັກຂອງໂຄງການ ເຊັ່ນ: ຄວາມຄືບໜ້າໃນການປັບປຸງ ແລະ ປຸກສ້າງຫ້ອງຮຽນກຸ່ມພັດທະນາເດັກໃນຊຸມຊົນ ທີ່ເຮົາຕ້ອງໄດ້ເລັ່ງໃຫ້ທັນຕາມກຳນົດເວລາ ເພື່ອຫຼຸດຜ່ອນຄວາມຫຼ້າຊ້າ; ອັບເດດຄວາມຄືບໜ້າໃນການຄັດເລືອກຄູ່ມືການອ່ານຢູ່ເຮືອນ, ການກະກຽມງົບປະມານອາຫານທ່ຽງໃນໂຮງຮຽນ ແລະ ການພັດທະນາອາຊີບຄູແບບຕໍ່ເນື່ອງ; ວຽກງານການປະເມີນ ແລະ ສະຖິຕິ ໂດຍສະເພາະການເຊື່ອມຖານຂໍ້ມູນເຂົ້າລະບົບ EMIS ແລະ ການກະກຽມປະເມີນຜົນນການຮຽນຂອງນັກຮຽນຊັ້ນ ປ.3 ໃນ 40 ເມືອງບຸລິມະສິດ; ຄວາມຄືບໜ້າຂອງການເບີກຈ່າຍເງິນແຮງຈູງໃຈຄູ, ເງີນບໍລິຫານການສຶກສາ ແລະ ຄວາມຄືບໜ້າດ້ານການຈັດຊື້-ຈັດຈ້າງ ແລະ ການສະຫຼຸບງົບປະມານທີ່ຍັງຄ້າງຈ່າຍ.

ໂອກາດດຽວກັນ, ທ່ານຫົວໜ້າກົມແຜນການ ຍັງໄດ້ເນັ້ນໜັກຕື່ມ ເຖິງບັນດາທ່ານທີ່ເຂົ້າຮ່ວມກອງປະຊຸມ ຈົ່ງໄດ້ພ້ອມກັນຍົກສູງຄວາມຮັບຜິດຊອບ ແລະ ປະກອບຄຳຄິດຄຳເຫັນ ຢ່າງກົງໄປກົງມາ. ບໍ່ພຽງແຕ່ລາຍງານ ສິ່ງທີ່ເຮັດໄດ້ເທົ່ານັ້ນ, ແຕ່ສິ່ງທີ່ສຳຄັນກວ່ານັ້ນແມ່ນ ການລາຍງານ ສິ່ງທີ່ຍັງເປັນສິ່ງທ້າທາຍ ເພື່ອໃຫ້ພວກເຮົາສາມາດຊອກຫາແນວທາງອອກຮວ່ມກັນໄດ້ຢ່າງທັນການ.

ພາບ-ຂ່າວໂດຍ: ການຈະນາ