ຄະນະບໍລິຫານງານຊາວໜຸ່ມປະຊາຊົນປະຕິວັດລາວ ກະຊວງສຶກສາທິການ ແລະ ກິລາ ຈັດກອງປະຊຸມສ່ອງແສງລາຍງານປະຈຳໄຕມາ I ແລະ ວາງທິດທາງແຜນການນປະຈຳໄຕມາ II ໃນວັນທີ 24 ເມສາ 2026 ທີ່ຫ້ອງປະຊຸມ ກະຊວງສຶກສາທິການ ແລະ ກິລາ ໂດຍການເປັນປະທານຂອງ ສະຫາຍ ຈັນທະວົງ ປັນຍາສິລິ ເລຂາທິການສູນກາງຊາວໜຸ່ມ, ເລຂາຄະນະບໍລິຫານງານຊາວໜຸ່ມປະຊາຊົນປະຕິວັດລາວ ກະຊວງສຶກສາທິການ ແລະ ກິລາ, ມີຮອງເລຂາ, ຄະນະບໍລິຫານງານຊາວໜຸ່ມ ສສກ ພ້ອມດ້ວຍບັນດາເລຂາຄະນະຊາວໜຸ່ມຈາກ 7 ພາກສ່ວນຄື: ກົມການເງິນ, ກົມອາຊີວະ, ກົມປະກັນຄຸນນະພາບການສຶກສາ, ກົມກິລາມວນຊົນ, ພະລະ ແລະ ສິລະປະສຶກສາ, ສະຖາບັນຄົ້ນຄວ້າວິທະຍາສາດການສຶກສາ, ວິທະຍາໄລເຕັກນິກ-ວິຊາຊີບການລົດໄຟ, ວິທະຍາໄລຄູດົງຄຳຊ້າງ ເຂົ້າຮ່ວມຢ່າງພ້ອມພຽງ.

ໃນກອງປະຊຸມດັ່ງກ່າວ, ໄດ້ລາຍງານໃຫ້ຮູ້ເຖິງສະພາບລວມ, ດ້ານວຽກງານ, ດ້ານດີ, ດ້ານອ່ອນ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້, ເຊິ່ງຄະນະຊາວໜຸ່ມປະຊາຊົນປະຕິວັດລາວ ກະຊວງສຶກສາທິການ ແລະ ກິລາ. ໂດຍໄດ້ຮັບການນຳພາ-ຊີ້ນຳໂດຍກົງຈາກອົງຄະນະພັກກະຊວງ ສສກ, ການເຄື່ອນໄຫວແມ່ນໄດ້ປະຕິບັດຕາມແນວທາງນະໂຍບາຍຂອງພັກ, ລະບຽບກົດໝາຍຂອງລັດ ແລະ ຂອງຊາວໜຸ່ມປະຊາຊົນປະຕິວັດລາວ ວາງອອກຢ່າງເຂັ້ມງວດ, ມີການເຊື່ອມຊຶມ ແລະ ປະຕິບັດຕາມມະຕິກອງປະຊຸມໃຫຍ່ຂອງຜູ້ແທນຊາວໜຸ່ມຂັ້ນເທິ່ງ ເພື່ອເປັນບ່ອນອີງໃນການຈັດຕັ້ງປະຕິບັດວຽກງານຕາມພາລະບົດບາດ, ໜ້າທີ ແລະ ຄວາມຮັບຜິດຊອບຂອງຕົນ, ມີຄະນະບໍລິຫານງານທັງໝົດ 25 ສະຫາຍ, ຍິງ 9 ສະຫາຍ, ມີ 2 ຄຊປປລ ຂຶ້ນກັບຄື: ຄະນະຊາວໜຸ່ມຊະຊາຊົນປະຕິວັດລາວມະຫາວິທະຍາໄລແຫ່ງຊາດ ແລະ ຄະນະຊາວໜຸ່ມສະມາຄົມການສຶກສາພາກເອກະຊົນ, ປະກອບມີ 35 ຮາກຖານ, 33 ໜ່ວຍຮາກຖານ ປະກອບມີ 164 ໜ່ວຍ 518 ຈຸ, ມີຈຳນວນສະມາຊິກຊາວໜຸ່ມທັງໝົດ 14,712 ສະຫາຍ, ຍິງ 7,090 ສະຫາຍ, ມີກອງເຍົາວະຊົນ 3 ກອງ ມີສະມາຊິກ 1,358 ນ້ອງ, ຍິງ 771 ນ້ອງ. ພ້ອມນັ້ນ, ກໍໄດ້ວາງແຜນວຽກງານແຜນການເຄື່ອນໄຫວໄຕມາດທີ II ປະຈຳປີ 2026. ເພື່ອຈະສືບຕໍ່ໃນດ້ານວຽກງານ ແລະ ຂະບວນການຕ່າງໆ ທີ່ຍັງຄົງຄ້າງໃຫ້ສຳເລັດຕາມແຜນທີ່ວາງໄວ້.

ພາບ-ຂ່າວໂດຍ: ການຈະນາ