ກະຊວງສຶກສາທິການ ແລະ ກິລາ ໄດ້ຈັດກອງປະຊຸມສະຫຼຸບ ແລະ ຖອດຖອນບົດຮຽນວຽກງານກອງທຶນສະຫວັດດີການຄູແຫ່ງຊາດ ປະຈຳປີ 2024-2025 ແລະ ທິດທາງແຜນການປີ 2026 ໃນວັນທີ 30 ເມສາ 2026 ທີ່ຫ້ອງປະຊຸມສະຖາບັນຄົ້ນຄວ້າວິທະຍາສາດການສຶກສາ (ສວສ) ໂດຍການເປັນປະທານຂອງ ທ່ານ ຮສ.ປອ ທອງສະລິດ ມັງໜໍ່ເມກ ຮອງນາຍົກລັດຖະມົນຕີ, ລັດຖະມົນຕີກະຊວງສຶກສາທິການ ແລະ ກິລາ, ມີບັນດາຫົວໜ້າ/ຮອງຫົວໜ້າກົມ, ຫົວໜ້າ/ຮອງຫົວໜ້າພະແນກ ແລະ ຫົວໜ້າ/ຮອງຫົວໜ້າຂະແໜງຈັດຕັ້ງ, ພະນັກງານ ຂະແໜງບໍລິຫານ, ການເງິນ, ພະແນກສຶກສາທິການ ແລະ ກິລາແຂວງ, ນະຄອນຫຼວງ ແລະ ພະນັກງານວິຊາການ ທີ່ກ່ຽວຂ້ອງເຂົ້າຮ່ວມ.

ໃນກອງປະຊຸມ, ທ່ານ ຮສ.ປອ ທອງສະລິດ ມັງໜໍ່ເມກ ໄດ້ມີຄຳເຫັນກ່າວວ່າ: ດັ່ງທີ່ພວກເຮົາຮູ້ກັນແລ້ວວ່າ ກອງທຶນສະຫວັດດີການຄູແຫ່ງຊາດ ແມ່ນກອງທຶນໜຶ່ງທີ່ມີຄວາມໝາຍສຳຄັນ ໃນການສະສົມທຶນຈາກພະນັກງານ-ລັດຖະກອນ ແລະ ລັດຖະກອນຄູ ທົ່ວຂະແໜງການສຶກສາ, ວິທະຍາສາດ ແລະ ກິລາ, ມີຈຸດປະສົງເພື່ອຊ່ວຍເຫຼືອເຊິ່ງກັນ ແລະ ກັນໃນເວລາເຈັບເປັນ, ເສຍຊີວິດ ແລະ ປະຕິບັດນະໂຍບາຍອື່ນໆ ໂດຍແນໃສ່ເສີມສ້າງຂວັນກຳລັງໃຈ, ຄວາມສາມັກຄີ, ຊ່ວຍເຫຼືອເຊິ່ງກັນ ແລະ ກັນ, ຄວາມອຸ່ນອ່ຽງທຸນທ່ຽງໃນການຈັດຕັ້ງປະຕິບັດວຽກງານ ໃນສະພາບຄວາມຫຍຸ້ງຍາກທາງດ້ານເສດຖະກິດ-ສັງຄົມໃນແຕ່ລະໄລຍະ.

ໃນໄລຍະຜ່ານມາຄະນະຮັບຜິດຊອບ ແລະ ຄະນະກຳມະການແຕ່ລະຂັ້ນ ໄດ້ຄົ້ົນຄວ້າປັບປຸງນິຕິກຳການຄຸ້ມຄອງ ກອງທຶນສະຫວັດດີການຄູແຫ່ງຊາດ ເປັນແຕ່ລະໄລຍະ ໃນປັດຈຸບັນໄດ້ນຳໃຊ້ຂໍ້ຕົກລົງວວ່າດ້ວຍກອງທຶນສະຫວັດດີການຄູແຫ່ງຊາດ ສະບັບເລກທີ 5000/ສສກ, ລົງວັນທີ 15 ກໍລະກົດ 2024 ໂດຍໄດ້ເກັບເງິນບຳລຸງຈາກສະມາຊິກກອງທຶນ 15,000 ກີບ/ເດືອນ/ຄົນ ແລະ ອະນຸມັດໃຫ້ບັນພະຊິດຄູ ແລະ ບັນພະສິດບໍລິຫານ ເຂົ້າເປັນສະມາຊິກກອງທຶນຕື່ມອີກ ແລະ ໃຫ້ເລີ່ມຈັດຕັ້ງປະຕິບັດງວດ III/2024 ເປັນຕົ້ນມາ. ແຕ່ເຖິງຢ່າງໃດກໍຕາມ, ເນື່ອງຈາກ ການເສຍຊີວິດຂອງສະມາຊິກກອງທຶນ ມີການເພີ່ມຂື້ນຫຼາຍສົມຄວນ, ຖ້າທຽບໃສ່ລາຍຮັບ ໂດຍຜ່ານມາການວວິເຄາະລາຍຮັບ ແລະ ລາຍຈ່າຍໃນປີ 2024-2025 ເຫັນໄດ້ວ່າ ຍັງບໍ່ສາມາດແກ້ໄຂໃໃຫ້ພາກສວ່ນທີ່ຍັງມີບັນຫາຂາດດຸນ.

ສະນັ້ນ, ເພື່ອເຮັດໃຫ້ ການຄຸ້ມຄອງ ແລະ ການນຳໃຊ້ກອງທຶນສະຫວັດດີການຄູແຫ່ງຊາດ ທຸກຂັ້ນໃຫ້ມີຄວາມຖືກຕ້ອງ, ໂປ່ງໃສ, ທັນເວລາ ແລະ ຮັບປະກັນຄວາມຍືນຍົງ ຈຶ່ງເນັ້ນໜັກໃຫ້ຜູ້ແທນກອງປະຊຸມ ຈົ່ງເອົາໃຈໃສ່ຄົ້ນຄວ້າ, ປຶກສາຫາລື ແລະ ແລກປ່ຽນຄຳເຫັນ ຕໍ່ເນື້ອໃນກອງປະຊຸມດັ່ງນີ້: ຜ່ານບົດສະຫຼຸບການຄຸ້ມຄອງ ແລະ ຈັດຕັ້ງປະຕິບັດ ກອງທຶນສະຫວັດດີການນຄູແຫ່ງຊາດ ປະຈຳປີ 2024-2025 ແລະ ທິດທາງແຜນການປີ 2026; ເຜີຍແຜ່ ແລະ ທົບທວນ ຂໍ້ຕົກລົງວ່າດ້ວຍກອງທຶນສະຫວັດດີການຄູແຫ່ງຊາດ ສະບັບເລກທີ 5000/ສສກ, ລົງວັນທີ 15 ກໍລະກົດ 2024; ລາຍງານການເກັບລາຍ-ລາຍຈ່າຍ ກອງທຶນສະຫວັັດດີການຄູແຫ່ງຊາດ ປະຈຳສົກປີ 2024-2025; ຮັບຟັງການລາຍງານ ແລະ ການປະກອບຄຳເຫັນຈາກບັນດາແຂວງ ຈຳນວນ 06 ແຂວງ.

ສຳລັບກອງປະຊຸມ, ແມ່ນຈະໄດ້ຮັບຟັງການລາຍງານ ການຈັດຕັ້ງປະຕິບັດ ຂໍ້ສະດວກ, ຂໍ້ຫຍຸ້ງຍາກ ວິທີການແກ້ໄຂ ແລະ ແຜນການໃນຕໍ່ໜ້າຂອງ 06 ກອງທຶນຄື: ກອງທຶນ ຂັ້ນສຳນັກກະຊວງ, ກອງທຶນ ແຂວງຄຳມ່ວນ, ແຂວງສະຫວັນນະເຂດ, ແຂວງຊຽງຂວາງ, ແຂວງຫຼວງນ້ຳທາ ແລະ ແຂວງຜົ້ງສາລີ.

ພາບ-ຂ່າວໂດຍ: ການຈະນາ