ກົມກິລາມວນຊົນ, ພະລະ ແລະ ສິລະປະສຶກສາ ກະຊວງສຶກສາທິການ ແລະ ກິລາ (ສສກ) ໄດ້ຈັດພິທີສະຫຼຸບຖອດຖອນບົດຮຽນວຽກງານເຕັກນິກ-ຈັດການແຂ່ງຂັນ ງານມະຫາກຳກິລາຄົນພິິການແຫ່ງຊາດ ຄັ້ງທີ IV ໃນວັນທີ 30 ເມສາ 2026 ທີ່ຫ້ອງປະຊຸມຫ້ອງວ່າການນະຄອນຫຼວງວຽງຈັນ, ໂດຍການເປັນປະທານຂອງ ທ່ານ ກິ່ງມະໂນ ພົມມະຫາໄຊ ຮອງລັດຖະມົນຕີ ກະຊວງສຶກສາທິການ ແລະ ກິລາ, ມີທ່ານ ວິລະວັນ ບຸນສຸກໄທ ຫົວໜ້າກົມມວນຊົນ, ພາລະ ແລະ ສິລະປະສຶກສາ ກະຊວງສຶກສາທິການ ແລະ ກິລາ, ພ້ອມດ້ວຍບັນດາຫົວໜ້າ-ຮອງຫົວໜ້າກົມ, ຄະນະກໍາມະການຝ່າຍຕ່າງໆ, ຮອງຫົວໜ້າພະແນກສຶກສາທິການ ແລະ ກິລາ, ຫົວໜ້າຄະນະນັກກິລາບັນດາແຂວງ, ນະຄອນຫຼວງ ແລະ ຕາງໜ້າສະຫະພັນກິລາຄົນພິການແຫ່ງຊາດ ເຂົ້າຮ່ວມຢ່າງພ້ອມພຽງ.

ໃນພິທີ, ທ່ານ ກິ່ງມະໂນ ພົມມະຫາໄຊ ໄດ້ມີຄຳເຫັນວ່າ: ພາຍຫຼັງການແຂ່ງຂັນກິລາຄົນພິການແຫ່ງຊາດ ຄັ້ງທີ IV ໄດ້ສິ້ນສຸດລົງໃນທ້າຍປີ 2025 ຜ່ານມາ ຄະນະກຳມະການເຕັກນິກຈັດການແຂ່ງຂັນ ກໍໄດ້ມີຄວາມເອົາໃຈໃສ່ໃນການສັງລວມຂໍ້ມູນວຽກງານທີ່ກ່ຽວຂ້ອງ ແລະ ມື້ນີ້ ກໍເປັນກາລະໂອກາດອັນດີ ທີ່ຄະນະກໍາມະການເຕັກນິກຈັດການແຂ່ງຂັນ ຮ່ວມກັບບັນດາສະຫະພັນກິລາຄົນພິການແຫ່ງຊາດ ແລະ ບັນດາຫົວໜ້າຄະນະນຳ ຂອງນັກກິລາຂອງບັນດາແຂວງ, ນະຄອນຫຼວງ ຈະໄດ້ພ້ອມກັນ ແລກປ່ຽນຄວາມຄິດເຫັນ ຕໍ່ວຽກງານຕ່າງໆ ທີ່ກຳມະການເຕັກນິກ-ຈັດການແຂ່ງຂັນ ຈະໄດ້ນຳສະເໜີຜ່ານກອງປະຊຸມໃນຄັ້ງນີ້. ດັ່ງນັ້ນ, ຈຶ່ງຂໍສະແດງຄວາມຊົມເຊີຍມາຍັງຄະນະຮັບຜິດຊອບກອງປະຊຸມ, ບັນດາທ່ານໃນຄະນະກຳມະການ ທີ່ໄດ້ພ້ອມກັນເອົາໃຈໃສ່ໃນການກະກຽມ ເນື້ອໃນເອກະສານຂອງກອງປະຊຸມ ຢ່າງຄົບຖ້ວນ ແລະ ຂໍຊົມເຊີຍມາຍັງບັນດາທ່ານຮອງຫົວໜ້າພະແນກສຶກສາທິການ ແລະ ກິລາບັນດາແຂວງ, ນະຄອນຫຼວງ ພ້ອມດ້ວຍຄະນະ ທີ່ຕັດສິນໃຈເດີນທາງມາຮ່ວມກອງປະຊຸມ ດ້ວຍຄວາມຮັບຜິດຊອບສູງ ເຮັດໃຫ້ກອງປະຊຸມ ສາມາດດຳເນີນໄປຕາມແຜນການຄາດໝາຍທີ່ວາງໄວ້.

ໂອກາດດຽວກັນ, ທ່ານ ວິລະວັນ ບຸນສຸກໄທ ໄດ້ລາຍງານສະພາບລວມວຽກງານເຕັກນິກ-ຈັດການແຂ່ງຂັນງານມະຫາກຳກິລາຄົນພິການແຫ່ງຊາດ ໃຫ້ຮູ້ວ່າ: ກຳມະການເຕັກນິກ-ຈັດການແຂ່ງຂັນ ງານມະຫາກຳກິລາຄົນພິການແຫ່ງຊາດ ຄັ້ງທີ IV ປີ 2025 ທີ່ນະຄອນຫຼວງວຽງຈັນ ໂດຍການໄດ້ຮັບກຽດເປັນເຈົ້າພາບ ເຊິ່ງມີຄະນະກໍາມະການ 8 ທ່ານ, ປະກອບມີ 5 ອະນຸກໍາມະການ ຄື: ອະນຸກຳມະການ ບໍລິຫານ-ການເງິນ, ອະນຸກຳມະການຈັດການແຂ່ງຂັນ, ອະນຸກຳມະການສະຖານທີ່ ແລະ ອຸປະກອນ, ອະນຸກໍາມະການຂໍ້ມູນສະຖິຕິ ແລະ ສະຫຼຸບຜົນການແຂ່ງຂັນ, ອະນຸກໍາມະການຂຶ້ນທະບຽນ ແລະ ອອກບັດ; ມີບຸກຄະລາກອນທັງໝົດ 52 ທ່ານ ແລະ ກໍາມະການຕັດສິນຈາກສະຫະພັນກິລາຄົນພິການແຫ່ງຊາດ ຈຳນວນ 242 ທ່ານ ໄດ້ເລີ່ມຈັດຕັ້ງປະຕິບັດວຽກງານ ໄລຍະວັນທີ 14-18 ທັນວາ 2025, ກໍານົດ 9 ປະເພດກິລາ, 172 ລາຍການແຂ່ງຂັນ ມີຜູ້ສະໝັກເຂົ້າຮ່ວມແຂ່ງຂັນທັງໝົດຈາກ 17 ແຂວງ 1 ນະຄອນຫຼວງ, ມີຄະນະນຳ, ຄູຝຶກ ແລະ ນັກກິລາເຂົ້າຮ່ວມແຂ່ງຂັນທັງໝົດ 708 ຄົນ, ຍິງ 325 ຄົນ. ພ້ອມນີ້, ຍັງມີທັງດ້ານດີ, ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້. ແຕ່ເຖິງຢ່າງໃດກໍຕາມ, ການແຂ່ງຂັນຄັ້ງນີ້ ແມ່ນງານແຂ່ງຂັນທີ່ຍົກຖານະບົດບາດລະດັບຂອງການຈັດງານ ເປັນງານມະຫາກຳກິລາຄົນພິການແຫ່ງຊາດ ທີ່ມີລະບົບການຈັດຕັ້ງທີ່ຖືກຕ້ອງ, ມີນິຕິກຳຄົບຊຸດ ໃນການຄຸ້ມຄອງການຈັດງານ, ໂດຍລວມຖ້າທຽບໃສ່ການຈັດງານແຂ່ງຂັນ ຄັ້ງທີ 3 ທີ່ແຂວງຊຽງຂວາງ ໃນປີ 2023 ແມ່ນມີຈຳນວນນັກກິລາທັງໝົດ 280 ຄົນ ທີ່ເພີ່ມຂື້ນ 35 ຄົນ, ມີປະເພດກິລາເພີ່ມຂື້ນ 2 ປະເພດກິລາ, ທັງໝົດນີ້ ໄດ້ສະແດງໃຫ້ເຫັນເຖິງບາດກ້າວໃໝ່ ໃນການພັດທະນາກິລາ-ກາຍຍະກຳຄົນພິການ ຢູ່ພາຍໃນປະເທດ ແລະ ເຮັດໃຫ້ສັງຄົມ ມີຄວາມຮັບຮູ້ຢ່າງກວ້າງຂວາງຕໍ່ວຽກງານກິລາຄົນພິການ ເວົ້າລວມ, ເວົ້າສະເພາະ ການປະຕິບັດນະໂຍບາຍສົ່ງເສີມຄົນພິການ ໄດ້ມີສ່ວນຮ່ວມໃນການຫລີ້ນກິລາ ແລະ ການເຂົ້າຮ່ວມແຂ່ງຂັນກິລານັບມື້ເພີ່ມຂື້ນ ແລະ ສາມາດຄັດເລືອກໄດ້ນັກກິລາທີ່ມີພອນສະຫວັນຈຳນວນໜຶ່ງ ເພື່ອສືບທອດປ່ຽນແທນນັກກິລາທີມຊາດໃນອານາຄົດ.

ສຳລັບກອງປະຊຸມ, ແມ່ນຈະໄດ້ຮັບຟັງບັນດາແຂວງ ກໍຄື 18 ແຂວງ 1 ນະຄອນຫຼວງ ປະກອບຄຳຄິດຄຳເຫັນ ແລະ ຖອດຖອນບົດຮຽນ ວຽກງານເຕັກນິກການເຂົ້າຮ່ວມແຂ່ງຂັນກິລາຄົນພິການແຫ່ງຊາດ ຄັ້ງທີ IV.

ພາບ-ຂ່າວໂດຍ: ການຈະນາ