ໃນວັນທີ 7 ເມສາ 2026 ທີ່ກະຊວງສຶກສາທິການ ແລະ ກິລາ, ທ່ານ ຮສ.ປອ ທອງສະລິດ ມັງໜໍ່ເມກ ຮອງນາຍົກລັດຖະມົນຕີ, ລັດຖະມົນຕີ ກະຊວງສຶກສາທິການ ແລະ ກິລາ (ສສກ) ຕ້ອນຮັບການເຂົ້າຢ້ຽມຂໍ່ານັບຂອງ ທ່ານ ອອງ ຊິວ ເກ (Ong Siew Gay) ເອກອັກຄະລັດຖະທູດ ແຫ່ງ ສາທາລະນະລັດ ສິງກະໂປ ປະຈຳ ສປປ ລາວ ພ້ອມຄະນະ ເນື່ອງໃນໂອກາດມາດຳລົງຕຳແໜ່ງ ເປັນເອກອັກຄະລັດຖະທູດ ແຫ່ງສາທາລະນະລັດ ສິງກະໂປ ຄົນໃໝ່ ປະຈຳ ສປປ ລາວ.

ໂອກາດດັ່ງກ່າວ, ທ່ານ ຮສ.ປອ ທອງສະລິດ ມັງໜໍ່ເມກ ໄດ້ສະແດງຄວາມຍິນດີ ຕ້ອນຮັບ ແລະ ຊົມເຊີຍຕໍ່ທ່ານທູດທີ່ໄດ້ຖືກແຕ່ງຕັ້ງ ໃຫ້ມາດຳລົງຕຳແໜ່ງການທູດຢູ່ ສປປ ລາວ, ເຊິ່ງເປັນການປະກອບສ່ວນອັນສຳຄັນ ເຂົ້າໃນການຮັດແໜ້ນສາຍພົວພັນມິດຕະພາບ ແລະ ການຮ່ວມມືທີ່ດີ ພ້ອມທັງສະແດງຄວາມຊົມເຊີຍຕໍ່ການຮ່ວມມືອັນດີ ທີ່ຜ່ານມາ ແລະ ຂອບໃຈ ລັດຖະບານ ສິງກະໂປ ທີ່ໄດ້ສະໜັບສະໜູນ ສປປ ລາວ ໃນຫຼາຍດ້ານເປັນຕົ້ນກໍຄືດ້ານການສຶກສາ, ການກໍ່ສ້າງບຸກຄະລາກອນ, ການຊ່ວຍເຫຼືອດ້ານການຝຶກອົບຮົມ ພາສາອັງກິດ ແລະ ວິຊາສະເພາະອື່ນໆ. ພ້ອມນັ້ນ, ທ່ານ ຍັງໄດ້ເນັ້ນໃຫ້ ສອງຝ່າຍ ສືບຕໍ່ ສົ່ງເສີມ ແລະ ຂະຫຍາຍການຮ່ວມມື ໃຫ້ມີຄວາມແໜ້ນແຟ້ນ ແລະ ເກີດຜົນປະໂຫຍດ ຢ່າງເປັນຮູບທຳຫຼາຍຂຶ້ນ.

ໃນໂອກາດນີ້, ທ່ານທູດສິງກະໂປ ກໍໄດ້ສະແດງຄວາມຂອບໃຈ ຕໍ່ການຕ້ອນຮັບອັນອົບອຸ່ນ ແລະ ຢືນຢັນ ວ່າ ຈະສືບຕໍ່ສົ່ງເສີມ ການຮ່ວມມື ກັບ ສປປ ລາວ ໃຫ້ດີຂຶ້ນຢ່າງຕໍ່ເນື່ອງ. ໃນການພົບປະ, ທັງສອງຝ່າຍໄດ້ຫາລື ແລະ ແລກປ່ຽນຄວາມເຫັນ ກ່ຽວກັບ ການຮ່ວມມື ລະຫວ່າງ ສອງປະເທດ ລາວ-ສິງກະໂປ ໂດຍສະເພາະ ດ້ານການສຶກສາ ການພັດທະນາຊັບພະຍາກອນມະນຸດ, ການໃຫ້ທຶນການສຶກສາ ແລະ ໂຄງການແລກປ່ຽນນັກຮຽນ-ນັກສຶກສາ.

ພາບ-ຂ່າວ: ບຸນທະວີ ນະວົງສາ