ວັນທີ 30 ເມສາ 2026 ທີ່ໂຮງຮຽນມັດທະຍົມສົມບູນນໍ້າບາກ ເມືອງນໍ້າບາກ ແຂວງຫຼວງພະບາງ, ທ່ານ ປອ ນາງ ດາລາວອນ ກິດຕິພັນ ຮອງລັດຖະມົນຕີກະຊວງສຶກສາທິການ ແລະ ກິລາ ໄດ້ໃຫ້ກຽດລົງຕິດຕາມຊຸກຍູ້ ການຝຶກອົບຮົມເຕັກນິກວິທີການສອນວິຊາພາສາລາວ ແລະ ຄະນິດສາດ ຊັ້ນປະຖົມສຶກສາ ຂັ້ນ ປ.1, ປ.2 ແລະ ປ.3, ມີທ່ານ ຮສ ປອ ຫຼ້າວັນ ວົງຄຳສານ ຫົວໜ້າຫ້ອງການກະຊວງສຶກສາທິການ ແລະ ກິລາ, ທ່ານ ອ່ອນຈັນ ແສງຄຳ ຮອງຫົວໜ້າພະແນກສຶກສາທິການ ແລະ ກິລາແຂວງຫຼວງພະບາງ, ທ່ານ ສົມໄຊ ອິນທະສອນ ຫົວໜ້າໂຄງການປັບປຸງພື້ນຖານການຮຽນຮູ້ຂອງເດັກ, ທ່ານຫົວໜ້າຫ້ອງການສຶກສາທິການ ແລະ ກິລາເມືອງ, ຕ່າງໜ້າຈາກວິທະຍາໄລຄູຫຼວງພະບາງ, ຜູ້ຮັບຜິດຊອບໂຄງການຂັ້ນກະຊວງ-ຂັ້ນເມືອງ, ຄູຝຶກຂັ້ນແຂວງ, ພ້ອມດ້ວຍຄະນະຮັບຜິດຊອບ ແລະ ຄູສອນປະຖົມສຶກສາ ຂັ້ນ ປ.1, ປ.2 ແລະ ປ.3 ທົ່ວເມືອງນ້ຳບາກ ເຂົ້າຮ່ວມ.

ໃນລົງຕິດຕາມຊຸກຍູ້ການຝຶກອົບຮົມ ຄັ້ງນີ້້, ຜູ້ຮັບຜິດຊອບໂຄງການຂັ້ນກະຊວງ ໄດ້ຂຶ້ນຜ່ານສະພາບລວມ ແລະ ຈຸດປະສົງ, ການກຳນົດພື້ນທີໂຄງການ, ບັນດາອົງປະກອບຂອງໂຄງການ ແລະ ງົບປະມານຂອງອົງປະກອນໂຄງການ; ຈາກນັ້ນ ທ່ານຮອງອຳນວຍການວິທະຍາໄລຄູ ໄດ້ຜ່ານບົດລາຍງານການກະກຽມການຝຶກອົບຮົມ.

ຈຸດປະສົງການຝຶກອົບຮົມຄັ້ງນີ້ ແມ່ນການສ້າງຄວາມເຂັ້ມແຂງດ້ານການພັດທະນາວິຊາຊີບຄູແບບຕໍ່ເນື່ອງ ໃຫ້ແກ່ອຳນວຍການໂຮງຮຽນປະຖົມ ແລະ ຄູສອນ, ເຊິ່ງການຝຶກອົບຮົມດັ່ງກ່າວສຳມະນາກອນຈະໄດ້ຮຽນຮູ້ກ່ຽວກັບເຕັກນິກວິທີການສອນ, ການວັດ-ປະເມີນຜົນການສອນ, ທັກສະການຟັງ ແລະ ການເວົ້າຄຳສັບທີມີພະຍັນສະນະຄອບ-ຕົວສະກົດ, ການອ່ານ, ການຂຽນ ແລະ ເຕັກນິກການສອນວິຊາຄະນິດສາດ, ພ້ອມນັ້ນ ນັກສຳມະນາກອນຍັງໄດ້ລົງສອນສາທິດຕົວຈິງຢູ່ໂຮງຮຽນອ້ອມຂ້າງ ເປັນການແລກປ່ຽນບົດຮຽນໃນການສິດສອນເຊິ່ງກັນ ແລະ ກັນ ເພື່ອນຳໃຊ້ຂີດຄວາມສາມາດໃນການຮຽນຮູ້ໃຫ້ມີປະສິດຕິຜົນ ແລະ ສາດບັນລຸຄາດໝາຍທີ່ກະຊວງສຶກສາທິການ ແລະ ກິລາວ່າງໄວ້, ການຝຶກອົບຮົມຄັ້ງນີ້ ແມ່ນໄດ້ດຳເນີນໄປເປັນເວລາ 5 ວັນ ລະຫວ່າງວັນທີ 27 ເມສາ - 01 ພຶດສະພາ 2026 ຈຶ່ງຈະສຳເລັດ ໂດຍການສະໜັບສະໜູນຂອງກອງທຶນຮ່ວມມືສາກົນເພື່ອການສຶກສາ ຜ່ານກອງທຶນຫັນປ່ຽນລະບົບການສຶກສາ ພາຍໃຕ້ໂຄງການປັບປຸງພື້ນຖານການຮຽນຮູ້ຂອງເດັກ.

ໂອກາດທີ່ມີຄວາມໝາຍສຳຄັນນີ້ ທ່ານ ປອ ນາງ ດາລາວອນ ກິດຕິພັນ ໄດ້ມີຄຳເຫັນໂອ້ລົມ ຮຽກຮ້ອງໃຫ້ສຳມະນາກອນທຸກພາກສ່ວນພ້ອມກັນສຸມທຸກສະຕິປັນຍາ ເຂົ້າໃນການຝຶກອົມຮົມຄັ້ງນີ້ໃຫ້ມີຄວາມເຂົ້າໃຈ, ຮັບຮູ້ເຕັກນິກວິທີການສອນວິຊາພາສາລາວ ແລະ ຄະນິດສາດ, ສາມາດນຳໄປຈັດຕັ້ງປະຕິບັດ ແລະ ຜັນຂະຫຍາຍເຂົ້າໃນການສິດສອນໃຫ້ໄດ້ຮັບຄຸນນະພາບຂື້ນເທື່ອລະກ້າວ ( ພິເສດ ຄູສອນປະຖົມສຶກສາທົ່ວເມືອງນ້ຳບາກ ຈະໄດ້ຮັບທຶນເພື່ອຍົກລະດັບວຸດທິການສຶກສາແບບຕໍ່ເນື່ອງ ຈຳນວນ 54 ທຶນ ເປົ້າໝາຍຂອງໂຄງການ).

ໂດຍ: ບຸນຄົງ ສົມບຸນສີ