ທ່ານຮອງນາຍົກ, ລັດຖະມົນຕີ ສສກ ຕ້ອນຮັບການເຂົ້າຢ້ຽມພົບປະຂອງທູດອົດສະຕຣາລີ ປະຈຳລາວ
ໃນຕອນບ່າຍວັນທີ 7 ພຶດສະພາ 2026 ທີ່ສໍານັກກະຊວງ ສສກ, ທ່ານ ຮສ.ປອ ທອງສະລິດ ມັງໜໍ່ເມກ ຮອງນາຍົກລັດຖະມົນຕີ, ລັດຖະມົນຕີກະຊວງສຶກສາທິການ ແລະ ກິລາ ໃຫ້ກຽດຕ້ອນຮັບການເຂົ້າພົບປະຂອງທ່ານ ນາງ ເມແກນ ຈອນ ເອກອັກຄະລັດຖະທູດ ວິສາມັນຜູ້ມີອຳນາດເຕັມ ແຫ່ງອົດສະຕຣາລີ ປະຈຳ ສປປ ລາວ, ມີຫົວໜ້າກົມ, ຮອງຫົວໜ້າກົມ ແລະ ຄະນະຮັບຜິດຊອບວຽກງານກ່ຽວຂ້ອງເຂົ້າຮ່ວມ.
ໂອກາດນີ້, ທ່ານ ຮສ.ປອ ທອງສະລິດ ມັງໜໍ່ເມກ ໄດ້ສະແດງຄວາມຕ້ອນຮັບຢ່າງອົບອຸ່ນ ພ້ອມທັງໄດ້ແຈ້ງໃຫ້ທ່ານທູດຊາບກ່ຽວກັບສະພາບການປະຕິຮູບລະບົບການສຶກສາຂອງກະຊວງສຶກສາທິການ ແລະ ກິລາ ໃນປັດຈຸບັນ ກໍຄືສະພາບການປັບປຸງໂຄງຮ່າງການຈັດຕັ້ງຂອງກະຊວງ ສສກ ໃນໄລຍະໃໝ່ ໂດຍສະເພາະໄດ້ສຸມໃສ່ວຽກງານການພັດທະນາຄູ ແລະ ການປະຕິຮູບລະບົບການສຶກສາສາຍສາມັນມາເປັນ 6+3+3 ເສີມສ້າງລະບົບການສຶກສາລາວ ໃຫ້ມີຄຸນະາບດີຂຶ້ນກວ່າເກົ່າ.
ໂອກາດດຽວກັນ, ທ່ານ ນາງ ເມແກນ ຈອນ ໄດ້ສະແດງຄວາມຊົມເຊີຍຕໍ່ການປະຕິຮູບລະບົບການສຶກສາໄລຍະໃໝ່ ພ້ອມຍົກໃຫ້ເຫັນເຖິງຜົນສຳເລັດພາຍໃຕ້ແຜນງານປັບປຸງຄຸນນະພາບ ແລະ ຂະຫຍາຍໂອກາດການເຂົ້າຮຽນສຳລັບການສຶກສາຂັ້ນພື້ນຖານຢູ່ ສປປ ລາວ (BEQUAL) ແລະ ຂົງເຂດຕ່າງໆໃນຂະແຫນງການສຶກສາ ເປັນຕົ້ນແມ່ນ ວຽກງານສ້າງຂີດຄວາມສາມາດຂອງຄູສອນໃນ ສປປ ລາວ, ການຊ່ວຍເຫຼືອໂດຍຜ່ານສະຖາບັນລາວ-ອົດສະຕຣາລີ (LAI) ໂດຍການສະໜັບສະໜູນການພັດທະນາຊັບພະຍາກອນມະນຸດ, ທຶນການສຶກສາ Australian Award Scholarships).
ນອກຈາກນັ້ນ, ທັງສອງຝ່າຍໄດ້ສົນທະນາປຶກສາຫາລື ແລກປ່ຽນວິໄສທັດກ່ຽວກັບການພັດທະນາໃນຂົງເຂດຕ່າງໆ ໂດຍສະເພາະການສົ່ງເສີມການພັດທະນາໃນຂົງເຂດການສຶກສາ-ກິລາ ແລະ ຂົງເຂດວັດທະນະທຳ-ສັງຄົມ ເຊັ່ນ: ວຽກງານການສຶກສາ-ກິລາ, ວຽກງານແມ່ຍິງ, ບົດບາດຍິງ-ຊາຍ, ການພັດທະນາໄວໜຸ່ມ, ການຂົນສົ່ງ, ການແພດ ແລະ ສາທາລະນະສຸກ ຕະຫຼອດຮອດຄວາມໝາຍໝັ້ນຂອງທັງສອງຝ່າຍໃນການຮ່ວມກັນເສີມສ້າງສາຍພົວພັນຮ່ວມມື ແລະ ແຜນງານທີ່ຈະດຳເນີນຮ່ວມກັນໃນອະນາຄົດ ໃຫ້ນັບມື້ເຕິຍໃຫຍ່ຂະຫຍາຍຕົວຂຶ້ນເລື້ອຍໆ.
ພາບ-ຂ່າວໂດຍ: ສົງການ ພັນແພງດີ
