ໃນວັນທີ 22 ເມສາ 2026 ທີ່ຫ້ອງປະຊຸມ ສະຖາບັນພັດທະນາການບໍລິຫານການສຶກສາ (ຫຼັກ ສະຫາຍ ຮສ.ປອ ທອງສະລິດ ມັງໜໍ່ເມກ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ ແຫ່ງ ສປປ ລາວ, ເລຂາຄະນະພັກກະຊວງ, ລັດຖະມົນຕີກະຊວງສຶກສາທິການ ແລະ ກິລາ ໄດ້ລົງພົບປະ ແລະ ບັນຍາຍແລກປ່ຽນບົດຮຽນໃຫ້ແກ່ນັກສຶກສາທິດສະດີການເມືອງຂັ້ນຕົ້ນ ລະບົບ 3 ເດືອນ ຊຸດທີ III ຂອງກະຊວງສຶກສາທິການ ແລະ ກິລາ ໃນຫົວຂໍ້ “ບົດບາດຄວາມສໍາຄັນຂອງການສຶກສາ, ການຄົ້ນຄວ້າວິທະຍາສາດ ແລະ ການກິລາ ໃນໄລຍະໃໝ່” ໂດຍມີ ສະຫາຍ ປອ ຕຸດາວັນ ໜໍ່ເມືອງເສດ ກໍາມະການປະຈໍາພັກກະຊວງ, ຫົວໜ້າກົມຈັດຕັ້ງ ແລະ ພະນັກງານ ກະຊວງສຶກສາທິການ ແລະ ກິລາ, ພ້ອມດ້ວຍຄະນະພັກ, ຄະນະກົມ, ສໍາມະນາກອນ ແລະ ພາກສ່ວນກ່ຽວຂ້ອງເຂົ້າຮ່ວມຮັບຟັງຢ່າງພ້ອມພຽງ.

ສະຫາຍ ປອ ຕຸດາວັນ ໜໍ່ເມືອງເສດ ໄດ້ກ່າວໃຫ້ຮູ້ວ່າ: ຈຸດປະສົງໃນການເຕົ້າໂຮມກັນໃນມື້ນີ້ ແມ່ນເພື່ອຮັບຟັງການບັນຍາຍບົດຮຽນທີ່ສໍາຄັນຍິ່ງຕໍ່ຊີວິດ ແລະ ໜ້າທີ່ການເມືອງ ຂອງການນໍາຂັ້ນສູງຂອງປະເທດ ແລະ ການສູງສຸດຂອງກະຊວງສຶກສາທິການແລະກິລາ ໃນການຈັດຕັ້ງປະຕິບັດໜ້າທີ່ການເມືອງ, ຕິດພັນກັບການຝຶກຝົນຫຼໍ່ຫຼອມຄຸນທາດ ການເມືອງ, ສົມບັດສິນທຳປະຕິວັດ, ແບບແຜນວິທີເຮັດວຽກ-ນໍາພາ, ກຳແໜ້ນແນວທາງການເມືອງ ແລະ ອຸດົມການ ຂອງພັກ ພິເສດ ແມ່ນວຽກງານສຶກສາ, ວິທະຍາສາດ ແລະ ການກິລາ.

ຈາກນັ້ນ, ສະຫາຍ ສົມສີ ໄຊຍະລາດ ຫົວໜ້າຫ້ອງຊຸດຮຽນທິດສະດີການເມືອງ-ການປົກຄອງຂັ້ນຕົ້ນ ຍັງໄດ້ລາຍງານໃຫ້ຮູ້ເຖິງສະພາບລວມ ການຈັດຕັ້ງການຮຽນການສອນ, ກິດຈະກຳການເຄື່ອນໄຫວ ໃນໄລຍະຜ່ານມາ ພ້ອມທັງຂໍ້ສະດວກ, ຂໍ້ຫຍຸ້ງຍາກ ແລະ ສິ່ງທ້າທາຍ ລວມທັງຂໍ້ສະເໜີຈຳນວນໜຶ່ງໃນການຈັດຕັ້ງການຮຽນການສອນ.

ໃນໂອກາດນີ້, ສະຫາຍ ຮສ.ປອ ທອງສະລິດ ມັງໜໍ່ເມກ ໄດ້ສະແດງຄວາມຍ້ອງຍໍຊົມເຊີຍຕໍ່ຄະນະຮັບຜິດ ຊອບຈັດຕັ້ງການຮຽນການສອນທິດສະດີການເມືອງຂັ້ນຕົ້ນ ລະບົບ 3 ເດືອນ ຊຸດທີ III ຂອງກະຊວງສຶກສາທິການ ແລະ ກິລາ ທຸກພາກສ່ວນເຮັດໃຫ້ການຮຽນການສອນຊຸດນີ້ດຳເນີນໄປດ້ວຍດີ ພ້ອມຊົມເຊີຍນັກສຶກສາທັງ 63 ສະຫາຍ ທີ່ໄດ້ສຸມຈິດສຸມໃຈໃສ່ໃນການສຶກສາຮ່ຳຮຽນ ຈົນມີຜົນສຳລັດຕາມລະດັບຄາດໝາຍ. ຫຼັງຈາກນັ້ນ, ສະຫາຍ ຮສ.ປອ ທອງສະລິດ ມັງໜໍ່ເມກ ໄດ້ນໍາສະເໜີກ່ຽວກັບບົດບາດຄວາມສໍາຄັນຂອງການສຶກສາ, ການຄົ້ນຄວ້າວິທະຍາສາດ ແລະ ການກິລາ ໃນໄລຍະໃໝ່ ໂດຍເນັ້ນໃຫ້ເຫັນເຖິງຄວາມສໍານຶກ, ຄວາມສໍາຄັນ, ຈຸດພິເສດຂອງການສຶກສາໃນໄລຍະໃໝ່; ຄວາມສໍານຶກກ່ຽວກັບວິທະຍາສາດ, ສາຍກ່ຽວພັນວິທະຍາສາດ ກັບການສຶກສາ ແລະ ທິດທາງການພັດທະນາການສຶກສາ, ການຄົ້ນຄວ້າວິທະຍາສາດ ແລະ ການກິລາ ຂອງພັກເຮົາໃນຊຸມປີຕໍ່ໜ້າ ເພື່ອໃຫ້ນັກສຶກສາທິດສະດີການເມືອງຊຸດນີ້ ເຂົ້າໃຈເລິກເຊິ່ງ ແລະ ກຳໄດ້ເນື້ອໃນ ແລ້ວນຳໄປໝູນໃຊ້ເຂົ້າໃນການປະຕິບັດວຽກງານຕົວຈິງ ໃຫ້ເກີດດອກອອກຜົນສູງສຸດ.

ພາບ-ຂ່າວໂດຍ: ການຈະນາ ວົງປັນຍາ